“Au 'baiseun ko, ama' gubernur! Na'ko 'roo-'roo re' ia, nmurai na'ko ho mnaa' prenat ambi ia, ho muhiin muhuun saa' re' reko neu kai. Rarit ho mmoe' rais arekot huma'-huma', tar antea hai atoin Yahudis bisa mmoin nok mamut ma marine. Onaim hai he mpaek oras ia, he mtoit makasi meu ama' gubernur. Te sekau nteni' es re' he bisa nmoe' on re' ho, tua, anbi mee-mee. 4 Mes au kais u'uab amnanu'. Au he u'uab 'eu haa rais ji in uun. Onaim au 'baiseun ko aam usi', he mneen murek-reko' saa'-saa' re' au he 'baisenun sin anmatoom nok tuaf re' ia.

5 On nai, tua. Neu hai atoin Yahudis, nai' Paulus re' ia, nahuum on re' meens es, re' natpain na'ko baer jes neu baer jes. In biasa nraban hai atoran pirsait, ma in ntaisibun hai atoran harat anbi mee-mee. In nbi bare mee-mee jaah, hai atoin Yahudis sin of ro he nmaka'rais ein es nok es. In re' ia, anjair on re' a'naak ikobraka' na'ko pukan pirsait re' natuin atoin Nasaretas tuaf es, re' hai mteek main sin am mak, ‘pukan Nasrani’. Mes saa' re' sin nanoni' sin, nasuir ko'u na'ko hai pirsait ii in nonin. 6 Atoni' ia msa', in na'taka' niit he n'oemetab hai Uim Onen Uuf re' in kninu' kuun, ma in neik atoin meis'okan antaam neu naan. Etun hai mheek je. [Natuin hai romim, hai he mhuukn ee natuin hai atoran. 7 Mes soraru 'nakaf nai' Lisias, neem nasiik naan ee na'ko hai 'nimam. 8 Rarit in naprenat am nak, karu nmui' tuaf re' he nmoe' rasi nok nai' Paulus, sin ro he neman ma nbaiseun ko anbi Kaisarea. In teenb ii, maut he gubernur ee, es re' an'urus rasi naan].^a Onaim oras ia, hai iim ambi ia, he ho es re' amparikas rasi ia. Of ho meikn om muhiin mak, saa'-saa' re' hai mi'uab sin re' ia, ro tebe, tua.

On re' naan, tua.”

9 Nai' Tertulus na'uab anrair on naan ate, atoin Yahudis bian sin anteebs ee mnak, “Tebe, on naan, usi'.”

10 Rarit gubernur ee nasneku' nai' Paulus am nak, “Oras ia, au 'fee ko mainuan he ho mumneob om.”

Rarit nai' Paulus anfeen anhaek, ma na'uab am nak, “Ama' gubernur! Ho muprenat anbi propinsi ia, a'roo gwen. Onaim ho muhiin murair hai atoin Yahudis hai 'tokom ma hai 'hakem. Es naan ate, au ka umtau fa he au umneob ok a'bi ho humam ma ho matam. 11 Of ai' neno bo'es am nua akoont ii, au 'nao 'bi Yerusalem he 'onen a'bi Uim Onen Uuf. Ho bisa mutaan meu tuaf-tuaf re' an'oen ein nokan anbi oras naan. 12 Anbi Uim Onen Uuf naan, au ka 'maheek fa 'ok tuaf es amsa'. Ma nbi uim onen bian sin, au ka ubuab fa tuaf he au 'moe' taisibu. On nana amsa', anbi Yerusalem, au ka 'moe' fa taisibu saa'-saa'.

13 Mes oras ia, atoin ein ia he namouf kau. Saa'-saa' re' sin na'uab sin fe'e na, ka nmu'in fa bukti saa'-saa'. 14 On nai, aam gubernur. Au he 'manaku' 'aan rasi mese'. Au 'ok pukan feu' gwes, re' atoni' nakaanb ee mnak, ‘Usif Yesus In Raan A'honis’. Au 'onen 'eu Uisneno nahuum on re' au be'i-na'i sin an'oen ein amsa' neu Ne. Au utuin ka'o Musa in apreent ein ok-oke' msa', ma au 'pirsai teb-tebe saa' re' Uisneno In mafefa' kniun' ein antui nain sin na'ko unu' neu kai. 15 Au ufnekan 'eu Uisneno on re' tuaf ein re' ia, re' anmaka'rais ein nok kau. Hai mpirsai mak, of Uisneno namonib nafani' amates: es re' amoe' reko ma amoe' re'uf. 16 Etun au 'aim ranan ma'tani', he on mee te, au bisa 'moin nok neek amneot ma amnonot, anbi Uisneno ma mansian ii sin humak ma sin maatk ein. On naan ate, ka tiit fa es he bisa namouf kau.

17 Au 'meup toon fauk een anbi pah bian, ka nbi fa pah Isra'el, na' au 'fain 'uum 'eu Yerusalem. Oras au 'uum, au 'eik roit re' atoni' nabuab sin, he njair turun-babat neu tuaf-tuaf re' anmonin anbin susat. Rarit au 'nao 'bi Uim Onen Uuf he 'onen, ma 'fee fua'-turu' huma'-huma' 'eu Uisneno anbi naan. 18 Oras au ukniun ok a'bi Uim Onen Uuf utuin hai atoran harat, sin neman ma nheek kau. Mes oras naan, ka nmui' fa too mfaun anbi naan, ma ka nmui' fa taisibu saa'-saa' amsa'.^b 19 Suma nmu'i haa atoin Yahudis fauk re' sin neman na'kon propinsi Asia, he n'oen ein anbin naan amsa'. Onaim karu sin anmu'in rasi nok kau te, ro sin re' naan esan re' he an'a'an rasi nok kau. Ka sin ama' re' ia fa! 20 Mes atoin ein naan, sin ka neman fa. Onaim ho mutaan miit sin re' ia, au 'saan saa'? Neno naan, oras sin nparikas kau 'bi baer feek rais pirsait, sin ka napenin fa au saant es amsa'. Ho mutaan ahaa sin. 21 Suma of anmui' naan rasi noon es, re' nmoe' sin tar antea sin ntaisibun ma ka nroim kau fa. Oras au haank ii nsae, ma au 'ak, ‘Hi he mhukun kau, natuin au 'pirsai Uisneno re' bisa namonib amates!’”^c

22 Nai' Paulus na'uab on naan, mes gubernur Feliks nahiin anrair rasi mfaun anmatoom nok ‘Usif Yesus In Raan A'honis’. Onaim in nasnasab a'at naan am nak, “On nai! Au he 'o'en soraru 'naak ko'u Lisias, he 'neen in haan ee fe'. Karu au u'uab urair 'ok ne, na' au bisa ufeek rasi ia.” 23 Rarit in nreun soraru 'naakf es he ntahan nai' Paulus. Mes in napreent ee he nfee ne mainuan maut he in aok-bian sin neman ma nkius gwe ma ntuthae je.

24 Gubernur Feliks in fenai, bifee Yahudis, kaann ee bi Dorsila. Naan neno fauk ate, in naim ranan, he in nok in fenai, he na'uab ein nok nai' Paulus. Onaim in nreun he neik nai' Paulus he neem neu sin nua sin. Onaim nai' Paulus natoon neu sin, ranan on re' mee, he atoni' bisa npirsain neu Usif Yesus Kristus, Tuaf re' Uisneno nba'an nain Je na'ko unu'. 25 In natoon neu sin amsa', ranan on mee he atoni' bisa nmoin nok amneot, ma on mee he atoni' bisa anpaant on he kaisa' anmoe' sanat. In natoon neu sin nak, Uisneno of anhukun mansian ii oke'.

Oras nai' Feliks anneen on naan ate, in namtau nmaet. Rarit in nak nai' Paulus am nak, “Paulus! Noo gwah nai! Mutuu'b ee nai! Karu au upein mainuan, au he 'o'en a'teni' ko.” 26 Oras naan, nai' Feliks naim ranan he on mee te, nai' Paulus anfee ne roit, he in nafeitn ee. Es naan ate, in no'en nai' Paulus piut he na'uab nok ne.

27 Mes anbi ranan bian, gubernur Feliks naim neek ein nok a'naak pirsait Yahudi sin. Etun es in ka nroim fa he nafeek nai' Paulus in rais ji rabah. In nasnasab rasi naan, tar antea toon nua. Rarit anmui' gubernur fe'u re' neem anseka' nai' Feliks, kaann ee, Porkius Festus. Mes sin antahan nai' Paulus fe'.