Nai' Paulus sin nfanin ntenin neun propinsi Makedonia
20
Oras too mfaun ein ka ntaisibu ntein' ein fa nbin kota Efesus, kota naan mamut on re' biasa. Rarit nai' Paulus nabuaba' naan apirsait ein abitan re' naan, ma nha'tain sin neek ein. Rarit in nasee, ma nnao neu propinsi Makedonia. 2 In nnao na'ko kuan neu kuan anbi pah naan, ma nha'tain apirsait ein sin neek ein. In nmoe' on naan, tar antea in ntaam neu pah Yunani. 3 In natua nbi naan funan teun. Rarit in nabarab he nsae bnao oe ma nnao neu propinsi Siria, mes in nneen am nak, atoin Yahudis sin nma'akoran he nroor niis ne. Oras in nneen on naan ate, in ka nroim fa he nsae bnao oe ma nnao he ntea nain neu propinsi Siria. Onaim in nnao nfain anpeo' raan meto' nbi propinsi Makedonia.4 Puuk aan es annao nabua nok nai' Paulus. Sin esan re': nai' Timotius, aam Pirus in anah nai' Sopater na'ko kota Berea; tuaf nua na'kon kota Tesalonika, sin esan re' nai' Aristarkus ma nai' Sekundus; tuaf es na'ko kota Derbe, kaann ee nai' Gayus; ma tuaf nua na'kon propinsi Asia, esan re' nai' Tekikus ma nai' Trofimus.
5-6 Rarit au (es re' nai' Lukas atui surat ia), uteef a'teni' 'ok nai' Paulus a'bi kota Filipi, nbi propinsi Makedonia. Nai' Paulus in soob ein nnao nahunun ma npao kai nbi kota Troas et tais je panin. Oras atoin Yahudis sin neon ko'u Paskaa oke' nrair, hai nua kai msae bnao oe ma mnao meu kota Troas. Oras naan, hai maan neno niim. Oras hai mtea Troas, hai msaun mi'ko bnao oe naan. Hai miteef mok hai soba' bian sin re' nahunun kai, onaim hai mitua mbi naan neno hiut.
Nai' Yutikus anmouf na'ko uim jes in eno sneer anbi kota Troas
7 Neno naan, neno krei. Nai' Paulus nafeek anrair nak, “Aok-bian aar ki! Noka' te, au he 'nao 'koon.” Onaim hai nonot apirsait ein ok-oke' iim he mibarab bukae. Natuin nai' Paulus he nnao, onaim in na'uab nok kai tar antea fai ji natnaan. 8 Hai mibua mbi uim jes in a'tuta' teun ii. Mabe' naan, sin noutun paku mfau re'uf.
9 Oras naan anmui' aan moen muinf es, kaann ee nai' Yutikus,b antook anbi eno sneer. In nok anneen nai' Paulus amsa'. Ka 'roo fa te, in maatk ein ii anma'fenan, onaim in ntuup anfiin. Nok askeken ate, in nmouf na'ko eno sneer naan. In nmaet nain. 10 Nai' Paulus ansaun natuin amoufut naan, ma nhoo naan ee, ma in na'uab am nak, “Kaisa' mimtau. In nmoin.” 11-12 Hai aar kai mmariin, fin aan munif naan anmoin. Rarit sin neik nafain' ee neu in umi. Onaim hai msae mfain, ma hai mbukae mibu-bua. Rarit nai' Paulus na'uaba' tar antea nmeu nfiin. Oras maans ee npe'e te, hai misee sin ma mnao misaitan sin.
Na'kon kota Troas annaon neu kota Miletus
13 Rarit hai mma'akor ma mbaits om, tar antea hai miteef amteni' mbi kota es, kaann ee, Asos. Onaim hai msae bnao oe meu Asos. Mes nai' Paulus annao raan meto' neu kota naan.
14 Oras hai miteef amteni' nai' Paulus anbi kota Asos, nai' Paulus ansae bnao oe ia, ma hai mnao piut meu kota Metirene. 15 Mi'ko naan, hai mnao mkoon. Noka' te, hai mpaumak-maak puur gwes, kaann ee, Kios. Anmeu te, hai mnao mkoon meu puru Samos. Esah te, hai mtea kota Miletus. 16 Mes nai' Paulus in neekn ii anroim, he karu reko te, hai mtea rabah meu kota Yerusalem, he in napein mainuan maut he nok na'naeba' neon ko'u Pantekosta. Rarit in ka nroim fa he npori' oras, he nnao nsae neu kota Efesus, natuin in ka nmu'i ntein fa mainuan.
Nai' Paulus na'uab nok atoni mnasi Kristen abitan kota Efesus
17 Onaim anbi Miletus, nai' Paulus anfee hanaf neu atoni mnasi' Kristen abitan kota Efesus, he sin neem nateef nok ne. 18 Oras sin neem antean on naan ate, nai' Paulus na'uab neu sin am nak, “Aok-bian aar ki. Hi mihiin main au 'moink ii, anmurai na'ko neno un-unu' au 'terin au haek ii nbi propinsi Asia, tar antea oras ia. 19 Hi mihini msa' au 'meup ma'tani' 'bi hi tnaanm ein, mes au ka u'naeb ok fa. Anbi au meupk ein, au maat nuu nggui nsain, ma 'ha'mui't ii ka ana' fa. Au upein 'ha'mu'it amfaun na'kon atoin Yahudis sin. 20 Oras au unoni' ki, au upoin 'ain are' rais rekon re' au uhiin sin neu ki. Ma au unoni' ki maat-maat. Au 'nao 'eu umi mese'-mese', he umnauba' sin anmatoom nok Uisneno In romin. 21 Au utoon 'eu atoin Yahudis, ma atoni' 'teta', 'ak sin ro he nasaitan sin saant ein, he natuin Uisneno. Ma sin ro he npirsain neu hit Usi', es re' Usif Yesus.
22 Onaim au he u'uab on nai: oras ia, au 'roim he 'nao 'eu Yerusalem, fin Uisneno In Asmaan Akninu' anheer neik kau 'nao 'eu bare naan. Au utuin aah, maski au ka uhiin fa saa' re' of he njair neu kau nbi bare naan. 23 Mes na'ko kota es neu kota es, Asmaan Akninu' natoon nahuun neu kau mnak, of au he 'taam bui ma 'sutai ha'mu'it amfaun anbi bare naan. 24 Au uhiin urair on naan, natuin Usif Yesus es re' nasaeb kau mepu ia, he au 'nao utoon Rais Reko 'ak, Uisneno nneek kit, ma In maneekn ii kah een. Karu au ka utuin fa In romin, he usoup In mepu, au 'naben au 'monik ia ka ma'osa' fa.c
25 Oras ia, au uhiin 'ak, hi of ka miit amteni' kau fa heen. Es re' hi re' au unoni' ki 'roo-'roo re' ia, anmatoom nok rasi he ttaam atjair Uisneno In nonot-asar. 26-28 Es naan ate, amneen. Au usopu 'rair au meup gwi 'eu ki. Onaim oras ia, hi ro he mmepu mkoon. Karu anmui' tuaf na'ko ki, re' ka ntaam fa anbi Usi' In nonot apirsait ate, hi es mitaah kiim, oo! Au ka usanab fa. Mimnau! Au utoon 'ain Uisneno In romin ok-oke' neu ki. Ka tiit tain fa rais jes re' ma'koro' neu ki. Onaim hi ro he mpanat hi 'monim, ma mpairoir main are' tuaf re' Asmaan Akniun' ee nreun ki he mpanat sin. Kaisa' mnikan mak, Usif Yesus nmate nrair, he nbaen nafeek sin oosk ein nok In naa' ee Kuun. In nruur ki msa', he hi mkius sin, nahuum on re' atukus natuuk in a'bib-kasen.
29 Oras ia, au 'nao usaitan ki. Mes mimnau! Of anmui' atoni' neem ma nanoni' rafu'-rafu' anbi hi sonam ma hi tnaanm ein. Sin nahuum on re' aus fui ji antaam anseor gon neu 'bib-kasen nbi o'of. 30 Anmui' tuaf aputa-kriu on re' naan, na'ko bare bian. Mes mimnau. Bian anteni' nboor ma nbotos na'ko ki. Onaim sin nanoni' rais ruman neu ki. Sin nromin he atoni' natuin ahaa sin. Onaim sin nsoob ein he nheer neik tuaf he kaisa' natuin Usif Yesus In raan amneot ma amnonot anteni'. 31 Es naan ate, hi mpaant om rek-reko. Kaisa' amnikan, fin au utua 'ok ki, toon teun. Au 'faineek ki fai-manas amsa', ma au ka utenab fa au suus-haet. Au maat nuu nggwin ansain neu ki.
32 Oras ia, hit he tbaits ok. Onaim au 'nona' ki 'eu Uisneno In a'niman, he In npairoir ki. Hi mnaa' miher-heran saa' re' au utoon ki na'ko nmurai, re' nmatoom nok Uisneno In nekan arekot. Uisneno In nmui' kuasat he nha'tain ki. In nba'an he nfee tetus-athoen neu In apirsait ein amsa'. Onaim karu hi mituin piut mok neek a'kninu' meu Uisneno, of hi mipein In tetus naan.
33 Oras au 'mepu 'bi hi tnanam, au ka 'sinmakan fa saa' es na'ko ki. Au ka 'toit 'iit fa hi bare mnatu', ai' noin muti', ai' pake, ai' baer saa'-saa'. 34 Hi mihini msa', oras au utua 'ok ki, au 'meup ma'tani' he au bisa 'moin. Ka neu au 'mees fa, mes au 'mepu msa' 'eu sin re' nok kau. 35 Onaim nok re' rasin re' ia, au utoon ki ranan he hi msa' mok amturun atoin asusat, re' ka nmu'in fa saa'-saa'. Mimnau, goo! Usif Yesus na'uab niit nak, ‘Hit tfee te, reko nneis na'ko hit 'toup.’”
36 Nai' Paulus na'uab anrair on naan ate, in nri'tuu ma n'onen nok sin ok-oke', ma ntoit he Uisneno npanat sin. 37-38 Sin neek ein ansusan nmaten, natuin nai' Paulus nak, sin of ka nateef anteni' fa nok ne. Onaim oras sin he nbaits ok, sin nhoo ma nneek nai' Paulus, ma nkaen nme'-meu'r ein. Rarit sin nnaon naat kaid neu bnao oe.