2 Onaim in nataan sin am nak, “Aok-bian aar ki! Anbi neno re' hi mpirsai meu Usif Yesus, hi mtoup In Asmaan Akniun' ee, ai' kaah?”

Sin natahan am nak, “Kaah fa, tua! Hai ka mneen miit fa fe', nak Uisneno nmui' Asmanaf on re' naan, tua.”

3 Rarit nai' Paulus nataan anteni' sin am nak, “Karu on naan ate, sin nasrain ki neik srani' mee?”

Onaim sin natahan am nak, “Sin nasrain kai, npaek nai' Yohanis in asranit, tua.”

4 Onaim nai' Paulus nak, “Amneen fe'! Nai' Yohanis nasrain atoni' he njair tanar nak, sin nasnasab sin tuak ein na'ko sin saant ein, ma ntebi nfanin he natuin Uisneno In raan amneot. Mes mimnau! Neno-neno, in es neikn on nanoni' too Isra'el nak, sin ro he npirsain neu Nai' Yesus, Tuaf re' Uisneno of he nreek Ee neem.”^a

5 Annenan on naan ate, sin ntotin he in nasrain sin, he sin ntaman njarin Usif Yesus Iin na. 6 Rarit oras nai' Paulus antao in a'niman neu sin ma n'onen ate, sin ntoup Uisneno In Asmaan Akninu'. Onaim sin nmurai na'uab ein neikin uaba' 'teta' re' sin ka nahiin je fa fe'. Ma Uisneno npaek sin he natoon saa' re' of he njair. 7 Sin nabu-bua, tuaf bo'es am nua.

8 Oras nai' Paulus natua nbi kota Efesus, in biasa ntaam neu atoin Yahudis sin uim onen, ma nanoni' sin ntea namnuut anmatoom nok Uisneno In Aprenat. In na'uab ka na'koro' fa saa' es. In nmoe' on naan, tar antea funan teun. 9 Mes anmui' tuaf re' ka ntoup fa noni' naan, onaim sin nraabn ee. Sin nhuita' atoni' anbi bare naan, he sin kaisa' natuin Usif Yesus In Raan A'honis. Nok rasi naan, nai' Paulus nok apirsait ein nasaitan uim onen naan. Rarit sin nnao nabuan anbin umi skoor es. Uim tuaf skoor naan, kaann ee nai' Tiranus. 10 Nai' Paulus nanoni' sin Usif Yesus In Rais Reko, tar antea toon nua. Onaim too mfaun ein abitan propinsi Asia nfuun am nateef, sin nneen anrair Usif Yesus In Rais Reko. Anenat sin, esan re' atoin Yahudis, ma atoni' 'teta' amsa'.

11 Oras naan, Uisneno nfee kuasat neu nai' Paulus, he nmoe' rais sanmakat huma'-huma'. 12 Tareta', on re' karu atoni' ntoti ntahan nai' Paulus in a'piru', ai' in a'futu', ma sin ntao bare' naan neu ameent ein, onaim sin meens ein naan namneuk nanin. Tar niut reu'f ein amsa', nasaitan nain ameent ein naan.

13-14 Anbi naan, anmui' a'naak pirsait Yahudi tuaf es, nok in aan moen ein, sin tuaf hiut. A'naak pirsait naan, kaann ee nai' Sakewa. In aanh ein biasa nnaon neu mee-mee ma anriu' napoitan niut reu'f ein na'ko aniut saes ein. Sin nsoba' niit he nriu' niut re'uf, neik Usif Yesus In kanan nak, “Ho muhiin Usif Yesus re' nai' Paulus natoon Ee, ai' kaah? Oras ia, au uprenat ko, a'paek Usif Yesus In kanan 'ak, ho mpoi nai mu'ko atoni' ia!” Ma nmui' atoin ahinit Yahudi bian re' nsoba' he nmo'en on naan amsa'.

15 Onaim oors es ate, nai' Sakewa in aanh ein napreent ein on re' naan, anmui' niut aburarut es nataah sin am nak, “Au uhiin Usif Yesus. Au uhiin nai' Paulus amsa'. Mes hi re' ia, hi sekau ki?” 16 Rarit tua aniut saes re' naan natoo' re'uf. Rarit in nasaap ma nbeos sin imsa'. In napapa' sin, ma npius nain sin barun, tar antea sin naenan aaf'-afa' na'ko umi naan.

17 Rarit uab naan nabeon on, tar antea abitan kota Efesus nahinin ok-oke'; et atoin Yahudis, ma atoni' 'teta' msa' nahinin. Onaim sekau-sekau re' nneen rasi naan ate, sin namtaun ma nsanmakan. Onaim sin na'naeba' Usif Yesus, fin In es re' anfee kuasa ko'u neu nai' Paulus. 18 Rarit apirsait fe'un naan neman neu sin aok-bian sin re' npirsain nrarin, ma nfei sin neek ein, rarit sin manaku' sin saant ein. 19 Na'ko sin re' naan, anmui' atoin ahinit amfaun. Rarit sin na'bua' naan sin suur noin' raut ma hiinf ein naan, ma nout sin nputu nmaten. Karu he tsoi' suurt ein naan, sin oosk ein nabu-buan noin muti' nifu bo' niim.^b

20 Rarit bifee-atoni' nareta' Uisneno In Rais Reko et fai ma manas anbi mee-mee. Onaim apirsait ein na'baab ok piut. Natuin Uisneno In Kabin ma Prenat naan, antaam senan sin, tar antea sin nekak naank ein.

21 Rarit nai' Paulus nafeek he nfain neu kota Yerusalem. Mes in nroim he nnao nahuun neu propinsi Makedonia ma propinsi Akaya, rarit na' in he nnao nkoon neu Yerusalem. In natenab anrair nak, “Reko nneis au 'nao 'kius apirsait ein anbi baren re' ia fe', fin maski on mee msa', au ro he 'tea kota Roma.” 22 Rarit in nreun in soba' tuaf nua, es re' nai' Timotius ma nai' Erastus, he nnaon nahunun neun Makedonia. Mes in natua sero 'roo nteni' anbi propinsi Asia.

23 Oras naan, rais kou' gwes re' nmatoom nok Nai' Yesus In Raan A'honis, anboor anbi kota Efesus. 24 Rasi naan in uun ii, on nai: anbi naan, anmui' naan atuut noni tuaf es, kaann ee nai' Demetrius. In biasa nmoe' uim fuat aan'-ana' amfa-faun na'ko noin muti' neu pah tuaf es, kaann ee bi Artemis. Natuin in mepun naan nrauk batuur, onaim in npaek ameupt ein amfau re'uf. Etun roit ii ntaam piut amfaun. 25 Neot es, nai' Demetrius na'bua' naan in ameupt ein ee, ma bian anteni', rarit in na'uaba' sin am nak, “Sin ama' ma au aok-bian aar ki! Hi mihiin main mak hit a'moink ii on re' ia, natuin roit ii neem na'ko hit mepu. 26 Mes oras ia, hit tiit tok hit matak, ma hit tneen teik hit rukik, naan nai' Paulus in kakain aa. In nfuir ma nkopo' too mfaun ii nak, baer' ein re' hit tmoe' sin re' ia, ka ma'upa' fa. In nak, baer fuat re' hit tmoe' sin re' ia, suma pah tuaf ein ruum-ruum aah.

Onaim ka abitan kota Efesus fa es re' anmesen nenan, mes propinsi Asia nfuun am nateef annenan amsa'. 27 Onaim amneen mirek-reko'! Of hit he trair saa' ntein, karu too mfaun ii natuin nai' Paulus sin piut? Of atoni' ka neu he nsoos anteni' fa hit baer fuat ein re' ia. Mimnau! Oras ia, too mfaun ii na'bees neu hit pah tuaf bi Artemis amasat. Anbi propinsi Asia, tar antea pah-piin ii nfuun am nateef, onaim a'beest ein naan neman ma na'besan anbi in uim fuat uuf, es re' anbi hit kota Efesus. Onaim kais-kaisa' atoni' ka nfairoir je fa heen, ma sin ka nromin fa he neman anteni' neu bare ia!”

28 Annenan on naan ate, sin nato'on batuur-batuur. Rarit sin nhuun ein am nak, “Artemis, neek reko! Artemis namaas! Hai abit Efesus, mi'naeb Artemis!” 29 Too mfaun ein anneen sakanat naan, ma sin naen neman, tar antea kota naan naheun nok too mfaun. Sin ntaka'naan ein. Onaim atoin ein anmurai nmo'en taisibu npe'-peo'n ahaa ranan, tar antea kota naan in amneer ko'u.^c Sin nheek naan tuaf nua, ma nheer neik sin neu bare naan. Sin kaank ein: nai' Gayus ma nai' Aristarkus. Atoin ein anheek sin, natuin sin nua sin re' naan, nai' Paulus in soob ein na'kon Makedonia. 30 Anneen on naan ate, nai' Paulus anroim he nnao ntaam neu too ataisiubs ein naan sin atnaank ein, mes too apirsait ein anpeen ee. 31 A'naet bian na'kon propinsi Asia nokan nbin naan, sin nahiin narek-reko' nai' Paulus. Sin nreun tuaf he natoon am nak, nai' Paulus ka nabei' fa he ntaam neu too mfaun re' nmo'en taisibu naan.

32 Anbi mnera' naan, atoni' nmurai naim rasi naan in uun. Bian anhunun neik haan poi nak, “On nai!” Bian nkoa' ein nak, “On naan!” Te kaah, too mfaun ein naan ka nahinin fa rasi naan in a'naon. Sin naen nokn ahaa. 33 Anbi bare naan, anmui' atoin Yahudis msa' re' nmurai namtaun. Sin teenb ii nak, kais-kaisa' too mfaun ein nakuu sin nak sin es re' nafuuk namonib rasi ia. Etun sin nahake' naan tuaf es antoom maat, anjair atuut hanaf neu too Yahudis sin. In kaann ee, nai' Aleksander. Sin ntotin he in namneob sin nak, atoin Yahudis sin ka nahiin fa rasi naan. Rarit nai' Aleksander nait in a'niman, he nakaina' sin he na'teen ein. Rarit in na'uab he namneoba' atoin Yahudis sin. 34 Mes oras sin nahinin nak, in re' naan atoin Yahudis te, sin nsakanan piut am nak, “Artemis neek reko! Artemis namaas! Hai abit Efesus mi'naeb Artemis!” Sin nsakanan on re' naan, tar jam nua.

35-36 Rarit a'nakaf kota Efesus anhaek ma nakaina' sin am nak, “Aok-bian aar ki, abitan kota Efesus! Are' uuf ma pah nahiin nak, hit pah tuaf bi Artemis, in amneemn ii na'ko neon gwe tunan neu kit. Onaim hit abit Efesus, es re' atpairoir tarek-reok' ee. Ka tiit tain fa tuaf es, nait nain hit paa' naan, natuin rasi naan anjair reta' nmoin piut ma are' pah-pah nahinin nrarin. Onaim nansaa' am es hi msakaan on naan? Maski anmui' aboot natuin sin roimk ein, mes hi kais ammoe' taisibu human on re' ia! 37 Hi mheer meik tua nua' ein re' ia, nahuum on re' sin nmo'en rais re'uf. Te kaah, sin ka nabakan fa saa'-saa' na'ko bi Artemis in uim fuat uuf. Sin ka na'uab namouf fa hit pah tuaf bi Artemis in kanan. Onaim hi he misaan sin nok rais saan saa'? 38 Mimnau! Hit tmui' bare he tafeek rasi. Afeek raisn ee msa', sin npao nanin. Onaim karu nai' Demetrius sin he nmo'en rasi te, sin ro he natuin in atoran, he sin neik rasi naan neu bare feek rasi. 39 Ma karu nmui' rasi 'teta' nteni' re' sin he nait je, nbain he sin nnaon nma'akoran nok atoni mnais ein. 40 Kais-kaisa' anaa' aprenat pah Roma nasaan kit, natuin taisibu re' ia. Karu sin he namin rasi re' ia in a'naon ii te, hit of he tataah on mee? Natuin rasi ia, ka ma'u'u fa!” 41 Na'uab anrair on naan ate, a'nakaf naan anreun sin he sin nsisa'en. Onaim sin natuin ein.