Oras naan, nai' Paulus annao nasaitan kota Atena, ma in nnao neu kota Korintus amsa'. Anbi naan, nai' Paulus anmakhiin ein nok nai' Akila ma bi Priskila, natuin in amoe' bare na'ko pasu msa'. Sin natua nabuan, ma nmeup nabuan.

4 Karu ntea atoin Yahudis sin neno snasat, nai' Paulus antaam neu sin uim onen. Anbi naan, in nsoba' he nfuri' atoin Yahudis ma atoni' 'teta' sin, he sin npirsain neu Usif Yesus.

5 Mes oras nai' Silas ma nai' Timotius neman na'kon propinsi Makedonia, nai' Paulus nasnasab meup pasu naan. Fai-manas in nmeup ma'tani' ma natoon neu atoin Yahudis sin am nak, “Atoni' re' hit tpa-pao na'ko un-unu', re' Uisneno nba'an he nreek Ee neem naan, neem anrair jen. In es re', Nai' Yesus!”

6 Mes anmui' atoin Yahudis re' nraban nai' Paulus piut, ma sin na'uab namouf gwe. Rarit in ntekar afu skukuk na'ko in baer paken, njair tanar nak, in ka nfairori nteni' sin fa, natuin sin ka nromin fa he ntoup Rais Reko re' in natoon neu sin. Onaim in na'uab am nak, “Hi re' ia, ro bainesi' ki! Hi on he mikosob kiim hi ruikm ein! Mes maut nai! Hi of mitaah kiim hi saant ein. Anmurai na'ko oras ia, au ka 'mu'i 'teni' fa urusan 'ok atoin Yahudis ki. Au he 'nao unoni' uuf a'teta' re' ka atoin Yahudis fa.”

7 Anmui' uim jes anpaumaak uim onen naan. In tuan ee, kaann ee nai' Titius Yustus. In ka atoin Yahudis fa, mes in neekn ee nmariin neu Uisneno. Rarit oras nai' Paulus annao nasaitan atoin Yahudis sin, in nnao ma ntaam neu aam Titius in umi.

8 Ka 'roo fa te, uim onen naan in a'naakt ee npirsai neu Usif Yesus amsa'. In kaann ee, nai' Krispus. In uim je naan ee nok atoin Korintus bian re' nneen nai' Paulus, sin anpirsain neu Usif Yesus amsa'. Rarit nai' Paulus an'ator he nasrain sin ok-oke'.

9 Anbi fai jes ate, anbi amnitas, nai' Paulus anneen Uisneno na'uab am nak, “Paulus, ho kaisa' mumtau, ma kaisa' m'oer meu mepu ia, natuin ho 'sutais ein ka oek' ein fa fe'. Ho ro he munoni' sin piut meik Rais Reko na'ko Kau. 10 Mumnau! Ho ka mmepu mmees fa. Au 'ok ko. Maski atoni' nasusab ko, mes Au 'pasan Au haek 'eu ko. Ma Au 'kius ko fai-manas. Kaisa' mnikan, anbi kota re' ia, Au nggwin namfaun.”

11 Anneen on naan ate, nai' Paulus natua sero 'roo nbi kota Korintus. In nanoni' Uisneno In Raan A'honis anbi naan, tar antea toon es ma stena'.

12 Oras naan, sin nasaeb tuaf es njair gubernur anbi propinsi Akaya. In kaann ee, nai' Galio.^a Onaim atoin Yahudis sin anma'akoran ma sin nheer neik nai' Paulus annao neu gubernur fe'u, anbi bare feek rasi. 13 Onaim sin natraak nai' Paulus am nak, “Atoni' re' ia, anfuri' too mfaun he natuin pirsait fe'u. Maski anaa' aprenat pah Roma ka nahiin fa pirsait naan!”

14 Mes oras nai' Paulus he nfei in fefan he namneob in tuan, gubernur ee nsenu nfeek in uaban. In nakaina' nain atoin ein re' natraak nai' Paulus nak, “Haeh! Atoin Yahudis ki. Mitniin fe'! Karu hi mitrakan kau rais re'uf, ai' rais marorot, au ro he 'neen hi rasi naan. 15 Mes rasi re' hi meik je neem re' ia, naan rasi et hi uim je nanan! Suma hi misurin rasi re' nmatoom nok atoran rais pirsait Yahudi, ma nok in uab ein, ma nok in kaank ein. Anaa' apreent ii ka n'urus fa rasin on re' naan!”^b

16 Rarit gubernur naan anriu' napoitan sin na'ko bare feek rasi naan. 17 Onaim atoin Yunanis sin anheek naan tuaf es, kaann ee nai' Sostenes. In re' naan, a'nakat na'ko atoin Yahudis sin uim onen. Onaim sin nheer neik je, ma nbeos gwe anbi gubernur ee in matan. Mes gubernur naan ka nfairoir sin fa.

18-19 Rarit nai' Paulus natua nabaar anbi Korintus. Mes a'roo-'roo te, in nasee neu apirsait ein abitan naan. Rarit in, bi Priskila ma nai' Akila, annaon neu kota es, kaann ee, Kengkrea, he npaon abnao oe. Anbi naan, nai' Paulus ankeu in a'nakan he njair tanar nak, saa' re' in nba'an nrair je nok Uisneno, oras ia, in nmoo' je gwen.^c Rarit sin nsaen abnao oe, ma nnaon neu kota Efesus. Antean naan, sin nsanun na'kon abnao naan. Rarit nai' Paulus nasaitan tua nua' ein naan, ma in ntaam neu atoin Yahudis sin uim onen. Anbi naan, in nmakoni' penit nok atoin Yahudis sin. 20 Sin na'ub-uab ein on naan ate, atoin Yahudis sin antotin he nai' Paulus natua nteni' nok sin sero 'roo. Mes in ka nroim fa. 21 Rarit in nasee sin am nak, “Aok-bian aar ki, kaisa' hi neekm ein nabatin! Karu Uisneno nfei ranan neu kau te, of au a'fain 'uum he 'kisu 'teni' ki.” Na'uab anrair on naan ate, in nnao nasaitan kota Efesus.^d

22 Rarit in nsae bnao oe nteni' ma nnao nkoon tar antea kota Kaisarea. Ma in nsanu nbi naan. Rarit in nnao neiki nsae neu Yerusalem, ma nmataeb nok apirsait ein anbi naan. Rarit in nfain neu kota Antiokia. 23 In natua sero 'roo nbi naan, rarit in nnao nteni', he in nnao nfuun am nateef anbi propinsi Galatia ma propinsi Frigia. Anbi naan, in nha'tain apirsait ein sin neek ein.

24 Oras naan, anmui' atoin Yahudis tuaf es na'ko kota Aleksandria et pah Masir. In kaann ee, nai' Apolos. In re' naan, atoin mafefa'. In nahiin Uisneno In Suur Akniun' ee in aafn ee namnuut. In fe' neem antea kota Efesus. 25 In nneen anrair reta' anmatoom nok Usif Yesus, ma in nmariin he nareta' nafain' ee neu tuaf bian. In nareta' nok marinet, ma saa' re' in na'uab ee naan, ro namneo. Suma in ka nahiin narair fa fe' are' rasi naan ok-oke'. In suma nahiin nak, nai' Yohanis nasrain atoni', karu sin nasaitan sin saant ein. 26 Neot es, in na'uab ka na'nifa' fa nbi atoin Yahudis sin uim onen. Ain Priskila nok aam Akila sin nok annenan amsa'. An'oen ein anrarin ate, sin naskau neik je neu sin umi. Anbi naan, sin natoon ee Usif Yesus In Raan A'honis, tar antea namnuut.

27 Rarit nai' Apolos nafeek he nnao neu propinsi Akaya. Apirsait ein kota Efesus anneek mesen nok in romin. Rarit sin ntui suurt es neu sin aok-bian sin abitan Akaya, ma ntotin he sin ntoup nai' Apolos nok reko. Antoup surat naan, rarit in nnao ntea Akaya. Anbi naan, in nturun apirsait ein batuur-batuur. 28 In anmakoin ein penit nok atoin Yahudis sin anbi too mfaun ein maatk ein, mes sin ka niis ee fa. In nroim he npaek Uisneno In Suur Akninu' he nanoni' sin nak, “Tuaf re' Uisneno nba'an he nreek Ee neem, re' hit tpa-pao Gwe 'roo-'roo, In es re' Nai' Yesus!”