Nai' Paulus sin nnaon neu kota Tesalonika
17
Rarit nai' Paulus ma nai' Silas annaon nkonon. Sin nkono haa kota es, kaann ee, Amfipolis, neun kota es anteni', kaann ee, Apolonia. Na'ko naan, sin nnaon nkonon ma ntean kota Tesalonika. Anbi kota naan, anmui' atoin Yahudis sin uim onen es. 2 Karu sin ntean baer jes re' nmui' uim onen, nateef nok atoin Yahudis neno snasat ate, nai' Paulus biasa ntaam ma nok an'onen nok abitan naan. Anbin Tesalonika msa', in nok antaam anbi sin uim onen. Onaim in nok anmakoni' penit nok sin anbi naan, sin npaek Uisneno In Suur Akninu'. In nok an'onen nok sin anbi neno snasat era' teun natut-tuut aah. 3 In na'uab neu sin am nak, “Karu hit ttae tarek-reko' tbi Uisneno In Suur Akninu' naan, hit tahiin tak sin na'uab anrarin na'ko un-unu' nak, Tuaf re' Uisneno nba'an he nreek Ee neem neu kit, of In napein ha'mu'it amfaun. In of anmaet. Mes rarit Uisneno of anpaek In kuasan he namonib nafain' Ee. Oras ia, hit tahini trair tak, Tuaf re' Uisneno nba'an nain Je, es re' Nai' Yesus!”
4 Annenan on naan ate, anmui' atoin Yahudis bian antoup nai' Paulus in uab ein, rarit sin nabuan nok nai' Paulus sin. Na'ko tuaf-tuaf re' antoup uab ein naan, anmu'i msa' atoin Yunanis re' sin namnau niis Uisneno, nok bifee bian re' nmu'in kaan reok mateka' anbin kota naan.
5 Mes atoin Yahudis sin a'naet ein ansaken ma nneek menan. Onaim sin nhuita' are' atoes ein he sin ntaisibun. Oras too mfaun ein nabuan anrarin on naan ate, sin nmurai nmo'en taisibu nbin kota naan. Sin naim nai' Paulus ma nai' Silas he sin nheer neik sin neu too mfaun ein re' antaisibun fe'. Rarit sin nnaon nareu' nai' Yason in umi, natuin nai' Paulus nok nai' Silas natua ntaahn ein anbin naan. 6-7 Mes sin ka napein fa nai' Paulus sin anbin naan. Rarit sin nheer neik nai' Yason ma nonot apirsait bian neu bare feek rasi. Sin nakuu nai' Yason am nak, “Oras ia, anmui' asusit re' neman et hit kota. Sin nnaon neu bare mee-mee te, sin nmo'en taisibu! Oras ia, sin neman he nareu' hit atoran anbi bare ia, rarit anseun ee neik sin atoran! Nai' Yason re' ia, antoupu nrair tuaf ein naan, ma nfeen sin bare 'tupa' anbi in umi! Ma sin aar sin anraban hit atoran, natuin sin ka nromin fa he nmanaku' neu hit uis ko'u, keser. Sin nmanauk ein neu sin Uis Kou' gwes aah, kaann ee Nai' Yesus.”
8 Annenan on naan ate, a'naet ein ma atoin ein re' nbin bare naan, sin teenb ein anrikraakn ok. 9 Rarit a'naet ein kota naan anreun nai' Yason ma nonot apirsait ein he nbaen ein roit he sin nmana'fefan am nak, sin of ka nmo'en fa taisibu ntein' ein, ma ka naenan fa. Anbaen ein anrarin ate, sin nafetin nai' Yason sin.
Nai' Paulus sin nnaon neun kota Berea
10 Mabe' naan, nonot apirsait ein abitan kota Tesalonika naten-teenb ein ate, nak reko nneis sin nreek nai' Paulus ma nai' Silas he nnaon neu bare bian. Rarit sin nreun atoin nua' ein naan nnaon neu kota es, kaann ee, Berea. Antean naan ate, sin ntaman neu atoin Yahudis sin uim onen. 11 Mes atoin Yahudis abitan Berea naan, ka on fa abitan Tesalonika. Sin nromin nmaten he nneen ma nabaarb ok he ntoup nai' Paulus sin uabk ein. Fin abitan Berea anneen narek-reko' nai' Paulus sin, onaim sin nkius ma ntae narek-reko' Uisneno In Suur Akninu'. Sin namin he nahinin nak, nai' Paulus sin uabk ein naan batuur, ai' kaah. Es naan ate, fai-manas sin nparikas Uisneno In Suur Akninu' naan, tar namnuut. 12 Nok ranan naan ate, atoin Yahudis amfaun anbi bare naan, anpirsain neu Usif Yesus. On naan amsa', atoin Yunanis sin. Apirsait ein neu Usif Yesus naan, et bifee ma atoni', anmu'in pengaru ko'u.
13 Mes oras naan, atoin Yahudis abitan Tesalonika annenan nak nai' Paulus sin nanoni' Uisneno In Kabin ma Prenat et kota Berea. Sin neem natuin ein, ma sin nhuita' too gwe, he nmo'en taisibu nteni' anbi bare naan. 14 Es naan ate, abitan Berea nnao naat nai' Paulus rabah neu tais je ninin. Mes nai' Timotius ma nai' Silas natua nabaran anbin Berea. 15 Atoin ein naan, annaon naat nai' Paulus antean kota es, kaann ee, Atena. Rarit sin namaik ee anbi naan, ma sin nfanin neun kota Berea. Sin neikin uab manbasan na'ko nai' Paulus nak, nai' Silas ma nai' Timotius ro he neman rabah nai he nabuan nok ne.
Nai' Paulus anbi kota ko'u Atena
16 Oras nai' Paulus anpao nai' Silas ma nai' Timotius sin amneemk ein neu Atena, in neekn ii nsuus, natuin in niit baer fuat amfaun anbi kota naan.
17 Mes anbi naan, anmui' atoin Yahudis nok atoni' 'teta' bian re' n'oen ein neun Uisneno. Nai' Paulus antaam neu sin uim onen, ma nmakoin ein penit nok sin. Neno-neno te, in nnao neu 'masa' ma na'uab nok tuaf sekau-sekau gwah anbi naan. 18 Rarit in nmaktaan ein nok tungguru bian na'kon pukan nua anbin kota naan. Puukn es, es re' Epikoros, ma pukan es anteni', es re' Stoa.a Mes oras in na'uab anmatoom nok Usif Yesus nak, In nmoni nfain na'ko In a'maten, anmui' tuaf re' naronon hape nak, “Thfoe'! Poit ii tuan ee, es re' ia!” Bian na'aakn ein mnak, “Airoo! Atoni' ia he na'seke' kit, he hit tfua teu sin pah tuaf soon ein!”
19-21 Abitan Atena ma anao-amneemt ein abitan kota naan, karu nneen rais feu' gwes te, on re' noin fe'u, penit fe'u, sin biasa ntook nabuan ma nmakoin ein penit anbi 'toe' aan es, sin nteek ee te, Areopagus. Rarit anmui' tuaf na'ko sin neik nai' Paulus annao neu bare naan, ma sin ntoot je nak, “Neu! Mutoon miit kai noin fe'u naan! Natuin ho mu'uab rais fe'u re' nmoe' kai he mtaka'nana' kre'o. Onaim hai mtoit he ho mu'uab amteni' fe', he hai mihiin batuur.”
22-23 Rarit nai' Paulus anhaek ma na'uab am nak, “Hi atoin Atenas aar ki! Au 'nao 'noon urair hi kota ia, ma au 'iit urair 'ak namneo, hi ammakoe he minaoba' atoran rais pirsait. Au 'iit hi baer fuat ein et mee-mee. Mes au 'iit baer fuat es maruna' nak, ‘Ia fuat neu pah tuaf ka mahini' fa’. He tabaint ee te tak, hi mfua mrair meu Uisneno, mes hi ka mihiin Je fa fe'. In es re' au utoon ki Je naan.
24 Natuin In es re' nmoe' neno tunan ma pah-pinan nok in afan ok-oke'. In es re' Usif neu are' saa' et neno tunan ma pah-pinan. Onaim In ka natua fa et uim fuat re' mansian ii nmoo' je. 25 In es re' anfee snasaf ma namonib hit mansian. Onaim In es anfee are' saa' re' hit tperluu. Mes In ka nperluu fa saa'-saa'. Es naan ate, mansian ii ka nabei' fa he ntuurn Ee.b 26 Na'ko tuaf mese', In namonib too nbi pah-pinan nfuun am nateef. In es anbait neu are' uuf ma pah, es-es ate nok in pah. Ma In es an'ator are' uuf ma pah sin a'hakek ma sin a'moufuk, mese'-mese' te nok in oors am in etin.
27 In nmoe' on naan, natuin In nroim he hit mansian kit, taim Je ma tahiin Je rek-reko. Mansian sin ro namin kar-karu sin bisa nateef nok Ne. Mes amneon ii, In ka na'roo fa na'ko kit. 28 Anmui' tuaf na'uab niit nak,
‘In es re' uuf neu hit asnasak.
In es re' 'ba'af na'ko hit a'monik.’
Anmui' hi amnait nee msa', na'uab ein am nak,
‘Hit tmoin, ta'ko ne.
Etun hit tjair in sufan.’
29 Naan ro batuur. Hit aar kit re' ia, Uisneno In suufn aa kit. Onaim kais mitenab mak Uisneno nahuum on re' baer fuat mahuma', re' mansian bisa nmoo' je neiki mnatu', ai' noin muti', ai' fatu, natuin sin teenb ein kuuk. 30 Nahunu te, batuur mansian ii ka nahiin fa rasi naan. Etun es re' Uisneno nafetin kit he hit tmoin tatuin hit monok. Mes oras ia, In ka nroim fa he hit tmoin on naan antein. Etun In nfee prenat nak, hit ro he tnao tasaitan ma tparakan fuat ein re' naan, rarit atnao tatuin Ee nai. 31 In n'ator nain oors es, he nhukun are' mansian nbi pah-pinan ia, natuin sin saant ein. Ma In nruur ma nreek nain Tuaf es anjair In Afeek Rasi. Tuaf naan of nafeek rasi te, natai. Oras ia, hit tahiin nok akninu', Afeek Rasi naan es re' sekau. In es re' anmate nrair, mes Uisneno namonib nafain' Ee.”
32 Mes oras re' abuat ein naan anneen nai' Paulus nak, anmui' atoin amates anmoni nfain, sin nmains ee. Mes anmui' tuaf bian anromin he nneen ee. Sin na'uab neu nai' Paulus am nak, “Hai mroim-roim fe' he mneen ho uab ein naan. Mes maut he anbi oors es anteni'.” 33 Rarit nai' Paulus annao nasaitan bare naan. 34 Mes anmui' tuaf fauk re' annao nabua nok ne, natuin sin anpirsain nrair neu Usif Yesus. Tuaf es na'ko sin re' biasa n'ator rasi anbi Areopagus, kaann ee nai' Dionisius. Nok bifee jes, kaann ee bi Damaris. Ma nmui' bian anteni' re' nnaon nabuan nok sin.