Nai' Timotius nabua nok nai' Paulus ma nai' Silas
16
Rarit nai' Paulus sin nnaon nkonon neun kota Derbe. Rarit sin nnaon nkonon neun kota Listra. Anbi naan, sin nateef nok atoin muinf es, kaann ee nai' Timotius. In aamf ee, atoin Yunanis. Mes in ainf ee, bifee Yahudis re' npirsai nrair neu Usif Yesus. Nai' Timotius njair apirsait neu Usif Yesus amsa'. 2 Are' apirsait ein abitan kota Listra ma kota Ikonium nahinin nak nai' Timotius naan, atoin reko. 3 Nai' Paulus anroim he nai' Timotius nok sin. Mes anmui' atoin Yahudis et bare naan nahinin nak nai' Timotius in aamf ee, atoin Yunanis, onaim in re' naan, ka na'heri' fa fe', natuin harat atoin Yahudis. Es naan ate, nai' Paulus an'ator ma sin na'heri' nai' Timotius.a 4 Rarit sin nnaon na'kon bare neu bare, he natoon rasi tfeka' re' Usif Yesus In haef ein ma atoni mnasi' Kristen sin nafeek anrair je nbi Yerusalem. 5 Nok ranan naan, sin nha'tani ntein nonot apirsait ein sin neek ein. Ansuun neno, nonot apirsait feu'n ein sin na'baab ok piut.
Nai' Paulus napein hanaf he nnao neu Makedonia
6 Rarit nai' Paulus sin nnaon nkonon. Sin nnaon neun propinsi Frigia ma propinsi Galatia, natuin Uisneno In Asmaan Akninu' npenan sin he kaisa' nnao natoon Usif Yesus In Rais Reko anbi propinsi Asia. 7 Oras sin ntean baer jes re' anmanakan nok propinsi Misia, sin nsoob ein he ntaman neun propinsi Bitinia. Mes Usif Yesus In Asmaan ee npenan sin he kaisa' nnaon neun bare naan.b 8 Rarit sin nnaon nkonon npeo' ranan re' nbi propinsi Misia, ma ntean kota Troas.
9 Mabe' naan, Uisneno nakrira' mnitas neu nai' Paulus. In niit tuaf es anhake nbi tais je panin, anbi propinsi es, kaann ee, Makedonia. Atoni' naan anhunun ma ntoti mnak, “Aam! Au uskau ko he uum meu ia, he mturun kai, tua!” 10 Nai' Paulus niit on naan ate, haic mifeek he mnao meu Makedonia. Hai mitenab mak, naan Uisneno es re' anreun kai, he mnao mitoon In Raan A'honis meu abitan tais je panin. Etun In npenan kai, he kaisa' mnao meu baer sona'.
Anbi kota Filipi, ain Lidia anpirsai neu Usif Yesus
11 Rarit hai msae bnao oe mbi kota Troas, he mraak meu puur aan es, kaann ee, Samotrake. Noka' te, hai mraak amtein ma mtea kota es, kaann ee, Neaporis. Hai msanu mbi naan. 12 Mi'ko bare naan, hai mnao raan meto' meu kota kou' gwes, kaann ee, Filipi. (Filipi naan mateka' nbi propinsi Makedonia, ma anaa' aprenat pah Roma msa' nnaa' kuasat anbi kota naan.) Hai mitua neno fauk aah ambi bare naan.
13 Nateef nok neno snasat atoin Yahudis sin, hai mnao maim baer onen atoin Yahudis. Hai mitenab mak baer onen naan of et noe je ninin. Es naan ate, hai mnao mpoi kre'o mi'ko kota naan, tar amtea hai mi'euk mok noe jes. Hai miteef mok bifee puukn es anbi naan.d Onaim hai mtoko ma mi'uab mok sin. 14 Na'ko bifee pukan naan, anmui' bifee jes, kaann ee bi Lidia. In na'ko kota es, re' na'roo et propinsi Asia, kaann ee, Tiatira. Bifee re' ia, na'sosa' tai maas me-umub re' ma'osa', neu atoin makana'. In nmakoe nbi rais onen neu Uisneno. Onaim in nneen nai' Paulus in uab ein, ma in ntoup nain sin oras naan.
15 Rarit hai misrain ain Lidia nok in uim je naan ee oke'. Misrain amrair sin ite, sin nfee haan askaut neu kai mnak, “Sin ama' aar ki. Karu hi mitenab mak au 'pirsai 'rair 'eu Usif Yesus te, hi iim meu hai umi ma mitua mtahan mok kai.” In nfuir kai piut, tar antea hai mituin.
Sin nataam nai' Paulus ma nai' Silas nbi bui et kota Filipi
16 Neon gwes, oras hai mnao meu baer onen, hai miteef ri' feot gwes. In re' naan, atoni' in ate. Niut reu'f es antaamn ee, onaim in bisa ntae ma nrees atoni' in uan. In bisa nahiin atoni' in rasi na'ko uun a'ba'an amsa'. Onaim atoni' mfaun anromin he nfeen roit neu ri'aan feto naan, ma ntotin he in ntae sin uak ein. Mes aan feto naan, in a'naet ein es re' napein are' roit ein naan, tar antea sin a'mui'k ein kah een. 17 Neno naan, oras hai mnao te, aan feto naan natuin kai piut. Ma in nhunun am nak, “Atoin ein re' ia, aten na'ko Uisneno Akuasat. Sin neman he nakrira' ranan, he on mee te atoni' bisa napeni 'honis, ma nafeitn ok na'ko sin saant ein!”
18 Ri'aan feto naan anmoe' on naan, tar antea neno nua-mteun. Kro-roo te, nai' Paulus ka nroim he nneen anteni' fa ri'aan feto naan in uaban. Onaim in nabani' ma nkius na'ke'en ri'aan feto naan, ma in napreent ee mnak, “Hoe! Niut re'uf! Au 'eik Usif Yesus In kuasan, ma uprenat ko, ampoi nai mu'ko ri'aan feto ia, oras ia!” Nai' Paulus na'uab anrair on naan ate, niut re'uf naan anpoi nain.
19 Oras in a'naet ein nahinin nak, sin ate naan in ma'tanin ma mainenun naan namneuk, sin nato'on, natuin sin ka napenin fa roit antein' een. Rarit sin nnaa' neik nai' Paulus ma nai' Silas neu 'masa', re' nmui' baer jes re' biasa sin npaek je he nafekan rasi. 20 Anbi bare naan, sin nkoa' ein naher-heran am nak, “Atoin ein ia neman he nareu' hit kota. Sin ka na'kon fa bare ia. Sin atoin Yahudis re' neman na'kon bare 'roo-'roo he nmo'en taisibu nbin ia! 21 Sin nanoni' too mfaun am nak, hit kaisa' attoe anaa' aprenat pah Roma sin atoran, he tatuin sin atoran.”
22 Annenan on naan ate, too mfaun ein antaisibun, ma nnaon nbaan nai' Paulus ma nai' Silas. Onaim atoin a'nakat tuaf es anbi naan, anreun sin anpius nareu' nai' Paulus ma nai' Silas sin paken, rarit anbeos sin. 23 Sin nbeos nai' Paulus nok nai' Silas, rarit sin nataam sin neu bui. Sin nreek a'naak paot anbi naan, he npanat atoin nua' ein naan rek-reko. Kais-kaisa' sin naenan. 24 Anneen on naan ate, a'naak paot naan nataam sin neu ke'en es anbi bui naan in atnanan. Onaim in nhaip sin haek ein neik hau 'hapit.
25 Of ai' oras fai tnana' te, nai' Paulus ma nai' Silas an'oen ein ma nsiin he nbo'is Uisneno. Atoin hukun bian nokan nbin re' naan, nokan nnenan sin nsiin. 26 Nok askeken, auf gwe na'beko' ko'u on re' ntainuun, tar antea bui naan ok-oke' na'beko' msa'. Bui naan in eon' ein nasoitn ok mainua fekon. Onaim atoin huukn ein, sin korein fuuts ein natseif' ein oke'.
27 Oras naan, a'naak paot anbi bui naan, naskeke nfeen, ma in nkius bui naan in eon' ein nasoitn ok mainua fekon. Ankius on naan ate, in natenab nak ai' atoin huukn ein naenan nrarin. Rarit in nfaik in beens ee he nheo niis on. 28 Mes nai' Paulus ankoa' naher-heer ma nakain ee mnak, “Airoo, aam! Kaisa' mheo miis om! Hai es ia fe', tua!”
29 Anneen hanaf naan ate, a'naak paot naan namtau nmaet, ma in ntaka'nana' amsa'. Rarit in nreun he neikn ee 'nopo', onaim in naen antaam neu bui naan in nanan, mes in aon ii ta'i-ta'i. Ma in nri'tuu anbi nai' Paulus ma nai' Silas sin haek ein.
30 Onaim in napoit sin na'kon bui, rarit in nataan sin am nak, “Sin ama' aar ki! Au neek ii nsuus anmaet. Au he 'moe' saa' he au bisa ufeitn ok u'ko suust ein ia?”
31 Nai' Paulus sin ntonin am nak, “In raan ii on nai: ho mpirsai meu Usif Yesus, he In nsoi nafetin ko mu'ko ho saant ein naan. Ho uim je naan ee msa'.” 32 Rarit nai' Paulus ma nai' Silas na'uab nok a'naak paot bui naan, ma in uim je naan ee aar sin. Sin natoon Usif Yesus In Raan A'honis neu sin. 33 Ankono kre'o na'ko fai tnana' naan, a'naak bui naan neik nai' Paulus ma nai' Silas he nboe ma npairoir papa' re' afi sin nbeos sin. Rarit sin nasrain a'naak paot naan nok in uim je naan ee ok-oke'. 34 Rarit in nok sin antaman neu in uim je, ma ntuthae sin. In nok in uim je naan ee nmariin anmaten, natuin sin npirsain Uisneno.
35 Kik-kiku te, a'naet ein re' nafeek rasi, sin nfeen hanaf neu a'naak paot bui, he in napoitan nai' Paulus ma nai' Silas.
36 Anneen on naan ate, a'naak bui naan na'uab neu nai' Paulus am nak, “Sin ama' aar ki! A'naet ein nafeek anrarin he nafetin ki. Es naan ate, hi mnao nai nok ao-mina'.”
37 Anneen on naan ate, nai' Paulus ka ntoup fa reko. Onaim in natoon neu aan renu' tuaf es am nak, “Kais on naan! Natuin hai mmui' hak too Romas kai. Onaim hai mtoit hai hak! Anaa' apreent ein ro he n'ator hai rasi ia natuin atoran. Amneon ii te, ro ttook he t'aa' rasi fe', rarit na' thukun atoni'. Mes sin ka nmo'en fa on re' naan. Sin ka ntokon fa he n'a'an rasi nahuun, he naim nahiin hai saant ii saa', mes sin nbeos na'ba'-ba'e kai nbi too mfaun ein sin maatk ein. Ka tiit fa sanat saa' re' he njair tu'in, he sin nataam kai neu bui. Ia ro namneo-namneo, sin ntanhai nrair atoran prenat pah Roma. Onaim oras ia, sin he napoitan kai mninu'-mninu' na'ko bui, maut he atoni' kais nahinin nak, hai saant ii saa'? Ka on fa naan! Amreun a'naet ein neikn ok neman, he nafetin kai. Nok ranan naan ate, na' hai of amtoup.”
38 Oras aan renu' naan anfain ma natoon nai' Paulus in uab ein naan, a'naet ein nahinin nak sin nua sin anmu'in hak too Romas. Onaim sin namtaun nmaten. 39 Rarit a'naet ein neman neun bui ma nmanaku' sin saant ein, rarit antotin saok sanat na'ko nai' Paulus ma nai' Silas. Rarit sin nafetin sin nua sin, ma sin ntotin he sin nua sin nasaitan kota naan. 40 Anpoin na'ko bui naan ate, nai' Paulus sin nnaon neu ain Lidia in umi. Anbi naan, sin nabuan nok apirsait ein. Sin nanoni' sin ma nha'tani nteni' sin neek ein. Rarit sin nnaon nasaitan kota naan.