Atoni mnasi' Kristen sin nabuan anbin Yerusalem
15
Oras naan, anmui' atoin Yahudis fauk re' anpirsain neu Usif Yesus neman na'kon raan a'roo, na'kon propinsi Yudea neu kota Antiokia. Neem antean on naan ate, sin nanoni' nonot apirsait ein am nak, “Hi mpirsai meu Nai' Yesus ate, reko msa'. Mes naan ka nanokab fa fe'. Karu batuur-batuur hi mroim he hi mipein rasi 'honis, hi ro he mi'heri' mituin hai harat atoin Yahudis, re' Uisneno neikn On nahakeb nain je neu ka'o Musa.”a2 Mes nai' Paulus ma nai' Barnabas anraban ma'tani' nok atoin ein naan sin uabk ein. Sin nmatoen nok ma'tani'. Onaim nai' Paulus nak, “Hi msaan! Apirsait ein na'ko atoni' 'teta', hit kaisa' ta'seke' sin he natuina' hit harat ma'heri' na'ko atoin Yahudis!” Natuin sin nmatoena' rasi naan, es naan ate sin nma'akoran he nreek haefan nai' Paulus ma nai' Barnabas nok atoni' bian na'kon Antiokia, he neik rasi ia neu Usif Yesus In haef ein, ma atoni mnais Kristen bian abitan Yerusalem.
3 Es naan ate, too srain ein abitan Antiokia nreek nai' Paulus sin he nnaon neun Yerusalem. Sin nnaon npe'on raan meto', neis nokan propinsi Finisia ma propinsi Samaria. Anbin raan atnana' on naan ate, sin neisin nmakisun nok nonot apirsait ein anbin sin umin. Rarit sin nareta' tar namnuut nak, “Atoni' 'teta' amsa' ate, nabani' sin tuak ein ma npirsain neun Usif Yesus!” Annenan on naan ate, sin aar sin anmarinan.
4 Oras sin ntean Yerusalem on naan ate, apirsait ein neu Usif Yesus antoup sin nok reko. Usif Yesus In haef ein nok atoni mnais Kristen sin antoup sin amsa'. Rarit nai' Paulus sin nareta' are' rasi re' Uisneno nmo'e nrair sin neu sin, tar antea atoni' 'teta' mfaun natuina' Usif Yesus amsa'. Ma sin nareta' sin matoes anmatoom nok rais ma'heri' amsa'. 5 Anbi tuaf ein re' anneen nai' Paulus sin reta', anmui' atoin Yahudis Kristen fauk na'kon partei Farisi. Sin anfeen anhaken ma na'uab ein naher-heran am nak, “Amneen mirek-reko', hee! Karu nmui' atoni' 'teta' re' ka atoin Yahudis fa, re' anroim he natuin Usif Yesus, sin ro he natuin hit harat ma'heri', nok are' hit atoran harat bian re' Uisneno neikn On anfee nain sin neu ka'o Musa.”
6 Rarit nonot apirsait ein ok-oke' anma'akoran he Usif Yesus In haef ein nok atoni mnais Kristen sin, nabuan he ntai narek-reko' rasi naan. 7 Rarit sin nmakoin ein penit ma tenab neu-mneman. Namuni te, nai' Petrus anfeen anhake ma na'uab am nak, “Aok-bian aar ki! Hi mihini mrair mak, nahunu te, Uisneno anpiir nain kau na'ko kit, he au 'nao utoon Usif Yesus In Rais Reko neu atoni' 'teta' re' ka atoin Yahudis fa, natuin Uisneno nromi msa' he sin npirsain neu Usif Yesus.b 8 Uisneno nahiin narek-reko' hit mansian ii hit nekak mese'-mese'. Ma In es anfee In Asmaan Akninu' neu sin amsa', namnees on re' In nfee nrair Je neu kit. Nok ranan naan, hit tahiin tak Uisneno antoup sin imsa'.c 9 Uisneno ka npiir fa humaf, sin ai' hit. Ma In ka nbetis fa sin na'ko kit. Natuin In nakninu' sin neek ein, fin sin npirsain nrarin neu Usif Yesus amsa', namnees on re' In nakninu' nain hit nekak.
10-11 Onaim on mee? Karu Uisneno ntoup anrair sin, nansaa' am es hit he tasaeb atteni' sin 'baut ma'fena' teik harat ma'heri' naan? Te kaah, karu hit ta'uab batuur-batuur, hit tok hit be'i-na'i sin, ka troi tabei' fa hit atoran rais pirsait ein ok-oke'! Onaim hit kaisa' ta'seke' sin on re' naan! Au he utaan on nai: Uisneno nsoi nafetin kit, natuin hit tatuin atoran rais pirsait ein, ai' kaah? Kahaf, ai'! In nsoi nafetin kit, natuin Usif Yesus anneek ma nkasian kit. Es naan ate, kais amnika'! Uisneno nneek ma nkasian atoni' 'teta' msa' on re' naan.”
12 Annenan on naan ate, ka tiit fa es anteni' re' he na'uab napoin in penit ma tenab.
Rarit nai' Paulus ma nai' Barnabas nareta' nafani', anmoe' on mee m'es na' Uisneno anpaek sin. Sin nareta' rais sanmaakt ein re' Uisneno anmo'e nrair sin anbi atoni' 'teta' re' ka atoin Yahudis fa. 13 Nareta' anrarin on naan ate, tuaf es, kaann ee nai' Yakobus, anfeen anhaek, ma na'uab am nak, “Aok-bian aar ki! Hi mneen kau fe'! 14 Hit tata' nai' Petrusd fe' nareta' anrair kit am nak, Uisneno nait anrair atoni' 'teta' re' ka atoin Yahudis sin fa, he nataam anjarin Usif Yesus In nonot apirsait ein. 15 Onaim rasi naan, natai nok saa' re' Uisneno In mafefa kniun' ein natoon nain je anbi afi ahunut. Sin ntui nain je mnak:
16 ‘Nateef nok in oors ii ntea te, Au of a'fain 'uum.
Natuin Au he uhakeb ufani' usif nai' Daut in aprenat.
Fin in sufan-kau'n ein re' namre'un nrarin naan,
Au of ufena' ufani' sin, ma 'ha'tain sin.
17-18 Nok 'mo'et naan, too na'ko pah a'teta' amsa', neem namin he nateef nok Kau.
Natuin Au 'piir 'aan sin he njarin Au nggoa.
Fin Uisneno na'uab anrair on naan na'ko afi unu'!’e
19-20 Onaim anbi au teenb ii te, on nai: karu tuaf a'teta' na'ko uuf bian re' anromin he natuin Uisneno, hit atoin Yahudis kais tasusab sin. Hit kais taroiba' sin ma'fena' nteni' nok he treun sin he natuin hit harat ma'heri'. Onaim hit ro he ttui taan suurt es ma tsoun ee neu sin tak, sin kaisa' natuin hit atoran harat Yahudi sin ok-oke'. Hit tamnauba' sin imsa' tak, sin kaisa' nmakaken ma nmakonin karu ka fee-mone fa. Sin kaisa' nbukaen amnaah fuat. Sin kaisa' nbukaen naa' na'ko mu'it. Ma sin kaisa' nekun sisi na'ko mu'it re' tuaf anfuut gwe ma nkeer niis ne, tar in naa' ee ka nsai npoi fa.f 21 Onaim karu hit ttao atoran nahuum on re' ia te, ka rais fe'u fa ntein. Natuin too mfaun ein nahinin nrarin nak, atoin Yahudis hit atoran harat ro on re' naan. Fin atoran naan na'ko ka'o Musa sin, hit trees sin ok-oke' anbi uim onen, ansuun neno snasat et bare mee-mee. Onaim atoni' 'teta' amfaun ein nahinin nrarin.
Au uabk ii antuu' on re' naan, tua!”
Surat neu apirsait ein re' ka atoin Yahudis fa
22 Rarit Uisneno In haef ein nok atoni mnasi' bian anma'akoran he nreek tuaf he nnaon natonan sin rasi tfeka' naan neu nonot apirsait anbi mee-mee. Ma sin namin tuaf-tuaf re' nonot apirsait ein anhormaat sin, re' natai nok mepu naan. Rarit sin npiir naan tuaf nua. Es kaann ee, nai' Silas; es anteni' kaann ee, nai' Judas (re' sin nteek nain je nak, nai' Barsabas). Rarit sin nreun sin nua sin nnaon nabu-buan nok nai' Paulus ma nai' Barnabas. 23 Sin neik surat he nfee je neu apirsait ein re' ka atoin Yahudis fa abitan kota Antiokia et propinsi Siria, nkono nteni' tar antea propinsi Kilikia. Surat naan, in aafn ee nak on nai:
“Tabe ma haan buseet na'ko kai, Usif Yesus In haef ein, ma atoni mnasi' bian anteni' abitan kota Yerusalem. Hai mtui surat re' ia meu ki, natuin hai mneek maan ki, nahuum on re' hai ori' ma hai tata' sin.
24 Hai mtui surat re' ia, natuin hai mneen ate nak, anmui' tuaf-tuaf na'ko Yerusalem ia, re' neitin ma nateef nok ki nbi naan. Sin nanoni' ki rafu'-rafu', tar antea nasusab ma ntaka'nanab ki. Maut he hi mihiin mak, hai ka mreek miit fa tuaf ein re' naan. 25 Oras hai mneen mak anmui' tuaf re' nasusab ki on re' naan, hai mibua mbi ia, ma hai mtai rasi naan. Onaim hai m'akoor amrair, ma mifeek amrair rasi naan. Oras ia, hai mpiir tuaf-tuaf he neman ma natoon ki hai rasi tfeka' naan. Sin neem nabuan nok nai' Barnabas ma nai' Paulus, re' hai mneek sin. 26 Tua nua' ein re' naan ansutain ha'mu'it, tar antea aar akre'o te sin nmaten. Sin napenin ha'mu'it on re' naan, fin sin natuin Usif Yesus, Tuaf re' Uisneno npiir nain Je na'ko unu'. 27 Onaim hai mreek nai' Judas ma nai' Silas, maut he sin es re' natoon ki surat re' ia in afan.
28 Uisneno In Asmaan Akninu' natoon anrair kai, ma hai mroim mituin on naan amsa' nak, hi kaisa' mituin hai harat Yahudi ok-oke', on re' harat ma'heri' naan. Natuin harat huma' re' naan, anha'fenab hi tuam ein naan ruum am parsuum. Mes anmui' rasi bian, re' ro he hi mimnau sin:
29 Kais ammakaek ma mmakoin karu ka fee-mone fa.
Kaisa' meuk sis-fuat.
Kaisa' miah naa'.
Ma kaisa' meuk sisi na'ko mu'it re' nfuut niis on.
Karu hi bisa mpanat hi tuam ein na'kon rasin naan, hi ka meik fa hai'nisit meu hi aom-bian nonot apirsait atoin Yahudis Kristen sin. Nok rasi naan ate, hi bisa mibua reko mok sin. Hai surat re' ia, antuu' on re' naan, tua.”
30 Sin ntoupu nrair surat naan ate, nai' Paulus sin naseon ein, ma nnaon nkonon neun kota Antiokia. Antean bare naan ate, sin no'en nabuab nonot apirsait ein, ma nfeen sin surat naan. 31 Oras sin nrees anrair surat naan, sin aar sin anmarinan nmaten, natuin surat naan in aafn ee nha'tain sin neek ein.
32 Uisneno npaek nai' Judas ma nai' Silas amsa', anjarin In mafefa kninu'. Sin nua sin nareta' are' rais reta' amfaun neu nonot apirsait ein anbi kota naan. Sin nfaineek ma naheran nonot apirsait ein sin neek ein. 33 Sin nua sin natuan a'roo anbin bare naan, rarit nonot apirsait ein abitan Antiokia naseon sin he nfanin neun Yerusalem neu nonot apirsait re' anreek haefan sin neman. Sin naseon sin nok neek marinet. 34 [Mes nai' Silas annaben ate, reko karu in natua nabaar anbi Antiokia.]g
35 Nai' Paulus ma nai' Barnabas natuan sero 'roo anbin bare naan. Sin anturun ma nbaab sin aok-bian amsa' re' nanoni' Usif Yesus In Raan A'honis.
Nai' Paulus ma nai' Barnabas anbaits ok
36 Oras nai' Paulus ma nai' Barnabas natuan sero 'roo nbin Antiokia, nai' Paulus nak neu nai' Barnabas am nak, “Ba'e! Uum he hit tfain teu baren re' nahunu te hit ttaam teis tok sin. Hit tnao he tkius tiit hit aok-bian sin a'moink ein. Ka tahiin he sin on mee. Fin tuaf ein re' naan, fe' anpirsain neun Usif Yesus ka 'roo fa fe'. Neon gwes ii, hit tanoni' sin. Onaim uum he hit tnao tkius tiit sin.” 37 Anneen nai' Paulus na'uab on naan ate, nai' Barnabas anroim natuin.
Nai' Barnabas anroim he nai' Yohanis nok sin. (Fe'-fe'e te sin nteek nai' Yohanis ia nak, nai' Markus msa'). 38 Mes nai' Paulus anpeen. Natuin neon gwes ii, oras sin nbin propinsi Pamfilia te, nai' Markus annao nasaitan sin.h 39 Nai' Paulus nok nai' Barnabas nasurin ko'u, tar antea sin nua sin anbaits ok. Onaim nai' Barnabas neik nai' Markus, sin nua sin ansaen abnao oe ma nnaon ntean puru Siprus.
40 Mes nai' Paulus nok nai' Silas. Oras sin he nnaon, nonot apirsait ein abitan Antiokia n'onen antoit Uisneno he npanat sin, ma Uisneno nakrira' In nekan arekot neu sin amsa'. An'oen ein anrarin ate, sin nua sin annaon. 41 Rarit sin nnaon neun propinsi Siria ma propinsi Kilikia anfuun am nateef. Anbi bare mee-mee, sin nha'tain nonot apirsait ein sin neek ein.