Nai' Paulus ma nai' Barnabas anbin kota Ikonium
14
Oras nai' Paulus nok nai' Barnabas antean kota Ikonium, sin ntaman nbin atoin Yahudis sin uim onen. Anbi naan, sin na'uab ein rasi mfaun anmatoom nok Uisneno In Rais Reko, tar antea atoin Yahudis ma atoni' 'teta' npirsain neu Usif Yesus. 2 Mes anbi naan, anmui' atoin Yahudis bian re' nnaa' naher-heran sin atoran harat, ma sin ka nromin fa he ntoup nai' Paulus sin uabk ein. Sin esan re' anhuita' atoni' 'teta' mfaun he nato'on niis nonot apirsait ein neun Usif Yesus. 3 Mes nai' Paulus sin ka namtaun fa. Sin natonan piut-piut Usif Yesus In Rais Reko neu sekau-sekau gwah. Sin natonan am nak, Usif Yesus In nekan naan nasoitn On neu sekau-sekau gwah. In nfee kuasat he sin bisa nmo'en rais sanmakat huma'-huma' amsa', he too mfaun ein nahinin am nak, Uisneno npaek sin.Oras naan, nai' Paulus sin natuan a'roo nbin kota naan. 4 Rarit abitan kota naan anbaits ok pukan nua. Puukn es natuin atoin Yahudis re' nnaa' naheran sin atoran harat fe', ma puukn es anteni' anpeis Usif Yesus In haef ein. Puukn nua' ein re' naan, nmasein haen ein es nok es.
5 Ma atoin Yahudis bian re' nnaa' naheran sin atoran harat fe', sin nabuan ma namin ranan nok atoni' bian ma nok sin a'naakt ein, he nasusab Usif Yesus In haef ein. Sin he npoir nai' Paulus sin neikin fatu. 6 Mes tuaf bian natonan nai' Paulus sin am nak, anmui' atoni' puukn es, re' nateenb ein amre'ut neu sin. Onaim sin naenan ma na'koor ein anbin propinsi Likonia, anbin kota Listra, ma kota Derbe, ma kuan-kuan anfuun am nateef anbi naan. 7 Anbin baren naan, sin nmurai natoon Usif Yesus In Rais Reko.
Nai' Paulus sin anbin kota Listra ma kota Derbe
8 Antean kota Listra on naan ate, nai' Paulus nok nai' Barnabas nateef nok atoin es. In haek ein anbuan nanin oras in ainf ee nahoins ee. 9 Atoni' naan antook ma anneen nai' Paulus in reta'. Rarit nai' Paulus ankius na'teesn ee, ma natenab am nak, “Atoni' ia in pirsain ii, ro of nareko' in tuan!” 10 Onaim nai' Paulus anhaman atoni' naan am nak, “Ba'e! Amfeen amhaek nai!” Anneen on naan ate, in n'ookr on anfeen anhaek ma annao nain.
11 Oras sin niit nai' Paulus anmoe' rasi naan ate, sin nmasahun. Onaim sin na'uab ein neik sin uab Likonia mnak, “Hi mneen fe'! Atoin nua' ein re' ia, pah ii tuan. Sin neman na'kon neon gwe tunan ma nabain ok on re' mansian!” 12 Sin na'uab ein on naan, natuin sin natenab am nak nai' Barnabas naan, nahuum on re' sin pah tuaf es, kaann ee nai' Seus. Ma nai' Paulus, atoin a'uaba' naan, sin nak ai' namnees nok pah tuaf es, kaann ee nai' Hermes.a 13 Anbi kota naan in kotin, anmui' uim fuat es neu sin pah tuaf nai' Seus. Sin niit nai' Paulus sin on naan ate, meo na'ko Seus neik fubona' amfaun ma nheer neik bijae keos ko'u fauk, he nafuata' sin neu nai' Paulus sin. Onaim too mfaun ein naan annaon natuin meo naan he nfuan neu Usif Yesus In haef ein.
14 Mes oras sin nahinin nak atoni mfaun ein naan he nfua neu sin, nai' Paulus nok nai' Barnabas anpenan sin. Rarit sin naenan neu too mfaun naan sin maatk ein, ma sin npius nareu' sin barun. Naan anjair tanar nak, sin ka nromin fa saa' re' too mfaun ein anmoo' je naan. Rarit sin nua sin nhuun ein am nak, 15 “Airoo! Nansaa' am es hi mmoe' rasi ia? Kaisa' hi miteenb am mak hai re' ia pah ii tuan. Hai re' ia, mansian ahaa msa' on re' hi. Hai iim meu bare ia, he mitoon ki rais reok gwes. Hi ro he maikoit are' hi pah tuaf ein naan re' ka ma'oos' ein fa. Hi ro he mituin Uisneno 'Honis amneot. Natuin In es re' nmoe' neno tunan ma pah-pinan, nok in afan ok-oke'.b 16 Un-unu te, are' uuf ma pah anmonin natuin sin roimk ein mese'-mese'. Uisneno ankonan sin on naan amsa'. 17 Mes Uisneno ka nnikan fa he nfeen sin tanar huma'-huma', he sin nahinin am nak, Uisneno naan, Arekot kuun. In es re' nasanut uran neem neu kit ok-oke'. In es re' anfee pena'-maka' neu kit. In es re' anhao ma nfait kit, ma anharineb hit nekak.”
18 Maski nai' Paulus ma nai' Barnabas antaar sin he kaisa' anmo'en on re' naan, mes atoin ein naan naseesb ok he neikin fuat he nfee sin neu sin.
19 Oras naan, anmui' atoin Yahudis fauk re' neman na'kon kota Antiokia ma kota Ikonium, sin neman neun kota Listra. Sin nhuita' too mfaun ein he nraban Usif Yesus In haef ein. Onaim sin naitin fatu ma npoir nai' Paulus. Sin nak ai' nai' Paulus anmate nrair. Onaim sin nheer anfonat nai' Paulus he npoirn ee neu kota naan in kotin.
20 Mes oras nonot apirsait neu Usif Yesus sin nhaek ma nauban nai' Paulus on naan ate, in nfeen. Rarit in ntaam anfain neu kota naan. Noka' on naan ate, in nok nai' Barnabas annaon nkonon neu kota es anteni', kaann ee, Derbe.
Nai' Paulus ma nai' Barnabas anfanin ntenin neu kota Antiokia et propinsi Siria
21 Nai' Paulus ma nai' Barnabas natoon Usif Yesus In Rais Reko nbi kota Derbe msa'. Rarit too mfaun ein anpirsain neu Usif Yesus. Rarit sin nua sin nfanin ntenin anbin kota Listra. Na'ko bare naan, sin nfanin neun kota Ikonium. Na'ko naan, sin nnaon nkonon neun Antiokia et propinsi Pisidia. 22 Anbi bare naan, sin na'uab ein nok atoni' re' natuina' Usif Yesus he nha'tain sin neek ein. Sin namnaub sin am nak, “Aok-bian aar ki! Karu hit ttaam atjair Uisneno Iin ja kit, kais mitenab mak hit of ka neu tapein fa susat ma ha'mu'it antein. Natuin maski on mee msa', hit ro he tapein ha'mu'it. Mes hit ro he ttahan ma taran, he tatuin Usif Yesus piut.” Sin nua sin nanoni' rasi naan neun atuina' Usif Yesus anbin kota naan.
23 Rarit nai' Paulus ma nai' Barnabas namin tuaf he nait sin anjarin a'nakatc neu too srani' pukan mese'-mese'. Ma sin n'oen ein ma nanaah ok he nahiin Uisneno In nromin. Onaim sin ntao sin a'nimak ma n'onen, he nait tuaf re' Uisneno nruur sin he njarin a'nakat neu apirsait ein.
24 Rarit nai' Paulus ma nai' Barnabas sin nnaon nasaitan propinsi Pisidia, he nnaon neu propinsi Pamfilia. 25 Sin ntean kota es, kaann ee, Perga. Anbi naan, sin natoon Usif Yesus In Rais Reko. Rarit sin nnao nkonon. Ka 'roo fa te, sin ntean kota Ataria. 26 Na'ko bare naan, sin nsaen abnao oe ma nfanin neun kota Antiokia et propinsi Siria. Neon gwes ii, nonot apirsait neu Usif Yesus abitan kota Antiokia es anreek haefan sin, ma nana'at sin neu Uisneno In a'niman, he In npanat ma ntuntauk sin. Onaim oras ia, nai' Paulus sin nfanin, he natonan neu nonot apirsait abitan Antiokia nak, sin nasopu nrair sin mepun naan.
27 Antean Antiokia on naan ate, nai' Paulus sin na'bua' Usif Yesus In apirsait ein abitan naan. Ma sin natoon are' kanan rasi re' Uisneno nmo'e nrair sin neu sin. Nak, Uisneno nfei nrair ranan neu atoni' 'teta' re' ka atoin Yahudis fa, he sin npirsain neu Usif Yesus amsa'. 28 Rarit nai' Paulus ma nai' Barnabas natuan suuk a'roo nok nonot apirsait neu Usif Yesus anbin bare naan.