Apirsait ein Antiokia nreek haefan nai' Barnabas nok nai' Saulus
13
Anbi kota Antiokia, tuaf amfaun anpirsain anrarin neu Usif Yesus. Anmui' tuaf-tuaf re' Uisneno anpaek sin he njarin In mafefa kninu'. Ma bian anteni' In npaek sin he nanoni' too srani'. Sin esan re':nai' Barnabas,
nai' Simeon, (sin biasa anteek nain je mnak, ‘nai' Metan’),a
nai' Lukius, na'ko kota Kirene,
nai' Menahem, (re' sin npairoir je na'ko aan'-ana' nok usif Herodes),b
ma nok nai' Saulus.
2 Neot es, sin nanaah ok, ma sin nabuan ma na'besan neun Uisneno. Rarit Asmaan Akninu' natoon neu sin am nak, “Ampiir maan nai' Barnabas nok nai' Saulus. Fin Au meup gwi mfaun. Onaim sin ro he nait mepu re' Au he unaa't ee neu sin.”
3 Oras sin nanaah anrair jok ma n'oen ein anrarin on naan ate, sin ntao sin a'niimk ein neu nai' Barnabas ma nai' Saulus, he ntabis sin. Onaim sin nreek haefan sin nua sin, he nanaoba' Uisneno In mepu.
Nai' Barnabas ma nai' Saulus antean puru Siprus
4-5 Oras Uisneno In Asmaan Akninu' naprenat nai' Barnabas ma nai' Saulus he nua sin nnaon natoon In Kabin ma Prenat neu bare-bare, sin nnao nahunun neun kota es et tais je ninin, kaann ee, Sereukia. Nai' Yohanis (re' sin nteek ee msa' ate, nai' Markus) nnao nabua nok sin. Antean bare naan ate, sin nsaen abnao oe he nnaon neun puru Siprus. Antean Siprus, sin nsanun anbin kota es, kaann ee, Saramis. Anbin kota naan, sin ntaman nbin atoin Yahudis sin uim onen fani-fani he nanoni' Uisneno In Kabin ma Prenat neu abitan naan.
6-8 Rarit sin npoi-ntaman na'kon kuan es neu kuan es, tar sin neman ntean kota es et puru naan in tukan bian, re' nteek ee te nak, Pafos. Gubernur ee natua et kota naan. In kaann ee, nai' Sergius Paulus. In roen ii na'aik. Oras in nneen nak nai' Barnabas sin neman anrarin etan kota naan, in nreek tuaf he no'en sin, natuin in nmariin he nneen fainekat na'ko Uisneno.
Mes anbi naan, anmui' atoin Yahudis es, kaann ee nai' Bar Yesus (in kanan es anteni' re' neik uab Yunani te nak, ‘Elimas’). In atoin araut. In biasa napoi atoni' nak, in njair Uisneno In mafefa' amsa'. In nmapartei reko nok gubernur naan. Onaim oras nai' Barnabas sin neman, in nkopo' gubernur naan he kais antoup sin. In nsoba' he nakeku' gubernur naan, he kais anpirsai neu Nai' Yesus.
9 Mes Uisneno In Asmaan Akninu' nfee kuasat neu nai' Saulus (re' sin nteek ee msa' ate nai' Paulus). Es naan ate, in na'ke'en in matan fuan neu araut naan. Rarit in na'uab am nak, 10 “Hoe! Elimas! Ho on re' niut re'uf! Ho poi moro' ko! Ho he mupoi tar antea mee? Ho mraban are' kanan rais reko. Es naan ate, hai mihini mrair, ho mutuin niut re'uf ein sin a'nakat. Kais ammo'e mteni' nai! Kaisa' mu'eka' ranan Uisneno re' amneo tiro kuun naan! 11 Ho mneen, fe'! Uisneno of anhukun ko. Ho of amfoor, ma ho of ka miit fa saa'-saa', tar neno fauk ankoon.”
Nai' Paulus na'uab anrair on naan ate, atoni' naan anfoor nain. Onaim in nabreo ranan he naim tuaf he nnaa' in a'niman, he nheer neik je.
12 Oras gubernur naan niit nok in matan fuan, ma nneen nok in rukin, noni'-taru' na'ko nai' Barnabas sin anmatoom nok Nai' Yesus, in nsanmaak, rarit in npirsai neu Usif Yesus.
Sin neik Rais Reko neu kota Antiokia es, et propinsi Pisidia
13 Nai' Paulus sin nsaen abnao oe na'kon kota Pafos et puru Siprus, he nnaon neu kota es et propinsi Pamfilia, re' nteek ee nak, Perga. Antean bare naan ate, sin nsanun na'ko bnao oe, rarit nai' Yohanis Markus anbaits on nok sin he in ntebi nfain neu Yerusalem. 14 Na'kon Perga, sin nnaon raan meto' neu kota Antiokia et propinsi Pisidia.
Sin antean kota naan. Rarit, nateef nok atoin Yahudis sin neno snasat, sin nokan n'oen ein anbin atoin Yahudis sin uim onen. 15 Oras naan, sin nresan na'ko ka'o Musa in surat, ma na'ko Uisneno In mafefa kninu' bian sin suurt ein. Rarit a'naak uim onen sin antoit nai' Paulus sin am nak, “Sin ama' aar ki! Karu hi mmui' uab saa' neu kai te, hai mtoit he mi'uab meu kai, he mha'tain hai neekm ein.”
Nai' Paulus anmurai na'uab nok atoin Yahudis anbi Antiokia
16 Rarit nai' Paulus anhake nbi sin maatk ein. In nait in a'niman ma ntoit sin he nta'-ta'an. Rarit in na'uab am nak, “Aok-bian aar ki, too Isra'el! Ma aina'-ama' sin re' ntaam meu rais pirsait Yahudi, natuin hi neekm ein naan namnau niis too Israelas sin Uisneno. Au 'toit ki he mpasan hi ruikm ein ma mneen kau!
17 Uisneno npiir ma nbeit anrair hit be'i-na'i too Isra'el na'ko afi unu'. Oras sin nnaon natuan anbin pah Masir, re' ka sin pah aa fa, Uisneno nfeen sin tetus ma ao-mina', tar antea sin nasuufn am namsa'in. Rarit Uisneno npaek In kuasan ma neik sin npoin na'kon pah Masir.c 18 Rarit sin nnaon na'kon baer jes neun bare bian, tar antea toon bo' haa. Maski sin na'naak-fatun, mes Uisneno natuuk sin nok neek sabaar.d 19 Rarit Uisneno nnoes naneuk nain too pah hiut anbi pah Kana'an. Onaim In nbait afu pah naan neu hit be'i-na'i sin, he njair sin auf pusaak.e 20 Sin nmonin on naan, tar antea toon natun haa mbo' niim (450).
Rarit Uisneno naiti nfeen sin afeek rasi tuaf amfaun, he na'naak sin, tar antea Uisneno npiri nfeen sin In mafefa kniun es, kaann ee nai' Samuel.f 21 Oras nai' Samuel anjair Uisneno In mafefa kninu', hit be'i-na'i sin anromin he nmu'in kuuk usif. Es naan ate, Uisneno nbeiti nfeen sin nai' Kisi in anah, es re' nai' Saul, na'ko uuf nai' Benjamin. Nai' Saul anjair usif ma naprenat tar toon bo' haa.g 22 Rarit Uisneno nasaunt ee. Ma In nait nai' Isai in aanh es, kaann ee nai' Daut, he njair uis fe'u, anseka' nai' Saul. Uisneno nahiin narek-reko' nai' Daut in nekan, es naan ate, In na'uab am nak, ‘Nai' Isai in anah nai' Daut re' ia, in neekn ii he noi natai nok Au nekak. In of anmoe' natuin are' Au roimk ein oke'.’h 23 Oras naan, Uisneno nba'an nak In of anfee tuaf es na'ko nai' Daut in sufan-ka'un, he nsoi nafetin too Isra'el na'kon sin saant am penu sin. Au he utoon ki 'ak, nai' Daut in sufan re' Uisneno nba'an nain je naan, es re' Nai' Yesus.”
Nai' Paulus na'uab nak Usif Yesus naan, Tuaf re' Uisneno nba'an he nreek Ee neem
24 Nai' Paulus antuut antein in uaban am nak, “Oras Usif Yesus ka nait In meup gwe fa fe', tuaf es, kaann ee nai' Yohanis, annao natoon neu too Israelas sin, nak sin ro he na'pisan na'ko sin saant am penu sin, rarit sin ro he nasranin he njair tanar nak, sin nareko nfanin nok Uisneno.i 25 Oras nai' Yohanis in meup gwi he noi namsoup, in natoon am nak, ‘Hi kais mitenab mak, au re' ia Tuaf re' Uisneno anba'an he nreek Ee neem. Mimnau mirek-reko'! Hi ro he mpao Tuaf es, re' of In he neem. In ma'tani' nneis na'ko kau, tar antea au ka maso'ik kau fa, maski bait au 'jari haa In aan reka', fin au ka umnees 'ok Ne fa.’j k
26 Aok-bian aar ki! Hi re' ka'o Abraham in sufan, ma tuaf bian re' hi neekm ein namnau Uisneno. Amneen kau fe'! Uisneno natoon rasi ia neu kit, he hit tahiin In Raan A'honis. In nsoi nafetin kit ma nsaok nain hit saant ein. 27 Na'ko afi unu', Uisneno npaek In mafefa kniun' ein, he ntui natoon rasi nmatoom nok Tuaf re' Uisneno nba'an he nreek Ee neem. Onaim hit a'naak rais pirsait Yahudi sin a'naakt ein, nok atoni' bian anteni' abitan Yerusalem, anrees nafan-fanik tuis ein na'kon mafefa kniun' ein. Anbi neno snasat, sin ntaman neun uim onen, he sin nresan rasin naan nbin Uisneno In Suur Akninu'.
Mes sin ka nahinin fa nak Tuaf re' Uisneno nba'an he nreek Ee neem naan, es re' Nai' Yesus. Rarit sin namin ranan he nhukun na'maet Je. Mes rasi naan, nanokab manba'an re' Uisneno In mafefa kniun' ein antui nain sin. 28 Sin nmo'en rasi huma'-huma' neu Nai' Yesus he nakreo namouf Gwe, mes sin ka niit fa In sanat saa'-saa'. Maski on naan, mes sin nnaon neu gubernur Pilatus ma ntotin he nroor na'maet Je.l 29 Gubernur naan anroim natuin sin. Onaim sin nkuus nakfirit Nai' Yesus anbi hau nehe, tar In nmaet. Mes are' rasin naan, ka nasuir fa nok are' saa' re' mafefa kniun' ein sin antui nain je. Rarit sin nasanut In aon na'ko hau neeh je in tunan, sin naskau neik Je ma natuun Ee nbi noup fatu.m 30 Mes Uisneno npaek In kuasan, ma namonib nafani' Nai' Yesus na'ko In a'maten.
31 Oras Nai' Yesus anmoni nfain, In nakriir On fani-fani neu tuaf amfaun. Sin esan re' neman bu'-bua' nok Ne na'kon propinsi Galilea neun Yerusalem. Ma oras ia, sin es re' ansaksii ma natoon neu too Israelas sin ok-oke'.”n
Nai' Paulus natoon nak Uisneno npake nrair In mafefa kniun' ein he natoon nanin anmatoom nok Usif Yesus
32-33 Nai' Paulus antuut in uaban naan am nak, “On nai! Hai nua kai re' ia, au 'ok nai' Barnabas, iim mi'ko raan a'roo, he mitoon ki mak, saa' re' Uisneno nba'an neu hit be'i-na'i sin, oras ia, nanookb on een. Uisneno namonib nafani' Nai' Yesus na'ko In a'maten. Anbi Surat Pures-Bo'is bata' nua, Uisneno npaek tuaf he ntui rasin re' anmatoom nok Nai' Yesus, re' Uisneno nba'an he nreek Ee neem. In ntui mnak,
‘Ho re' ia, Au Aanh aa ko.
Neno ia, Au 'ait Ko mjair anaa' aprenat.’o
34 Na'ko un-unu' Uisneno nba'an nrair nak, In of namonib nafani' Tuaf re' In nba'an he nreek Ee neem naan, ma Tuaf naan of ka nmate nteni' fa. Es naan ate, Uisneno npaek In mafefa kninu' he ntui mnak,
‘Nahunu te, Au 'uhake' 'ain rais manba'an 'ok usif nai' Daut, he 'fee tetus-athoen neu ne.
Onaim oras ia, Au he uhake' 'teni' rais manba'an 'ok ko, natuin nai' Daut in sufan-ka'un es re' ho.’p
35 Anmu'i nteni' Surat Pures-Bo'is bian re' ntui mnak,
‘Uisneno ka nparakan fa Ho Tuaf Amneot In aon-ta'un,
he npunu nbi In nopu.’q
36-37 Amneon ii, on nai: Surat Pures-Bo'is re' ia, ka nruur fa neu nai' Daut kuun! Hit tahiin on naan, natuin usif nai' Daut anmoe' anrair rais reko mfaun neu in too, rarit in nmaet. Ma sin nsuub in aon-ta'un naan. In aon naan, anpunu nrair. Onaim hit tahiin tak Surat Pures-Bo'is naan ka nruur fa neu nai' Daut, mes anruur atoin sona'. Karu Atoni' re' anruur gwe naan anmaet, Uisneno namonib nafain' Ee. Es naan ate, In aon-ta'un naan, of ka npuun niit fa.
38-39 Onaim aok-bian aar ki, amneen mirek-reko'! Atoni' naan, es re' Nai' Yesus! Karu hit tpirsai teu Ne, In of nasaah are' sanat, re' in amneon ii hit es re' he tasaah kuuk sin. Nok ranan naan ate, Uisneno annoes nain are' hit saant ein ok-oke'. Mes hit tahini trari msa', tak maski hit tmoe' tatuin ka'o Musa in atoran haart ein ok-oke' on naan amsa', ka neu he namneoba' kit fa nbi Uisneno In human ma In matan. 40-41 Etun hi ro he mitenab mirek-reko'. Kais-kaisa' saa' re' Uisneno In mafefa kniun' ein sin natoon nain je et afi unu' naan, antoom anfain neu ki. Sin antuin am nak,
‘Ampaant om, are' atoin am'akan sin, re' ka nfairoir fa es-es!
Fin Au, Uisneno, a'moe' rais sanmakat huma'-huma' re' namkakab tuaf amfaun;
mes hi of amtoup in seun-baran, he hi mmate mkoon.
Au 'moe' rais jes, oras hi mmoin fe',
mes hi ka mroim fa he mtoup gwe.
Maski atoni' nanoni' ki,
mes hi ka mroim fa he mihiin rasi naan.
Reko nneis, hi mitenab mifan-fani' rasin naan, he hi msanmaak amsa'.’r
Onaim aok-bian aar ki. Mitenab mirek-reko' saa' re' au utoon ki fe'e na. Kais amporin main saa' re' hi mneen amrair je fe'e na, on re' tuaf-tuaf am'akan sin a'moe'k ein. Au uabk ein na'tuuk ma na'paar on re' naan. Makasi, tua.”
42 Na'uab anrair on naan ate, nai' Paulus ma nai' Barnabas anfeen anhaken he nnaon nasaitan uim onen naan. Mes abitan naan antotin, he reko te, sin nfain neman anbi neno snasat amnemat, he naknutu' nteni' saa' re' sin na'uab anrair je fe'e na. 43 Oras sin anpoin na'kon uim onen naan, anmui' tuaf amfaun anbi bare naan, re' annaon natuin nai' Paulus ma nai' Barnabas. Ma sin nua sin anfaineek sin am nak, “Hit tahiin tak Uisneno In nekan reokn ii kah een neu kit. Es naan ate, hi ro he mnaa' miheran Uisneno In manekan naan.”
Atoin Yahudis sin a'naet ein ka ntoup fa nai' Paulus sin
44 Nateef nok atoin Yahudis sin neno snasat amnemat, aar akre'o te abitan kota naan anpoin ok-oke' he nneen Uisneno In Kabin ma Prenat. 45 Mes oras atoin Yahudis sin a'naet ein niit too mfaun ein neman he nnenan nai' Paulus sin uabk ein, sin neek ein namenan. Rarit oras nai' Paulus na'uab, sin nraban foro-koos gwah, ma sin na'uab ein he namouf sin.
46 Mes nai' Paulus sin ka nteet ok fa, ma sin na'uab ein maat-maat. Sin na'uab ein am nak, “Batuur! Uisneno anfei ranan nahuun neu hit atoin Yahudis, ma nfee kit Rais Reko. Ma tebe ro he on re' naan! Mes hi ka mtoup gwe fa. Es naan ate, hi ka maso'ik fa he mmoin piut mok Uisneno. Onaim oras ia, hai he meik Rais Reko naan meu uuf ma pah a'teta' antein, natuin hi mtorak main je. 47 Fin Uisneno anreek haefan kai, nahuum on re' ka'o Yesaya antui nain je mnak,
‘Au 'ait ki nahuum on re' paku re' ntana' neu atoni' 'teta' nteni', re' ka atoin Yahudis fa,
he hi mtana' ranan re' neem neu Kau,
he Au 'soi ufetin sin na'ko sin sanat.
Rarit hi ro he miruru' ranan naan amsa', anbi pah-pinan anfuun am nateef.’”s
48 Oras atoni' 'teta' sin annenan on naan ate, sin nmariin anmaten. Ma sin bo'is Uisneno mnak, “Hai mbo'is Uisneno! Uisneno In Rais Reko naan, reokn ii kah een!” Anbi naan, anmui' tuaf-tuaf re' Uisneno nafeek anrair et afi unu', he sin anmonin nabar-baran nok Uisneno. Ma sin ok-oke' anpirsain neun Usif Yesus.
49 Uisneno In Kabin ma Prenat nabeon On, na'ko tuaf neu tuaf anbi pah naan anfuun am nateef.
50 Anbi kota naan, anmui' atoin makana', et bifee ma atoni'. Bian sin anneek ma namnau Uisneno. Mes atoin Yahudis sin a'naet ein neman ma ntaon sin uaba', tar antea atoin makaan ein naan nriu' napoitan nai' Paulus nok nai' Barnabas na'ko sin pah naan. 51 Oras sin npoin na'kon kota naan, sin nua sin nait naan 'mo'et es natuin harat. 'Mo'et naan es re' ntekar askuku' na'ko sin haek ein, anjari 'takaf mese' nak, abitan kota naan ka nromin fa he natniin Uisneno In Rais Reko re' sin nua natoon ee naan. Rarit sin nnaon nasaitan kota naan. Onaim sin nnaon neun kota es anteni', kaann ee, Ikonium.t
52 Mes apirsait ein neun Usif Yesus abitan Antiokia, sin neek ein anmarinan, natuin Uisneno In Asmaan Akninu' neiki 'be'if ma ma'tanif neu sin neek ein.