Nai' Yakobus in a'maten, ma nai' Petrus antaam bui
12
Oras naan, usif nai' Herodesa anmurai nha'mui' Usif Yesus In apirsait ein bian. 2 In naprenat tuaf he nroor na'maet nai' Yakobus npaek suni'. Nai' Yakobus naan, nai' Yohanis in tataf. 3 Oras nai' Herodes nahiin nak nai' Yakobus in a'maten anharineb a'naet Yahudi sin neek ein, in nmo'e nneis na'ko naan. Onaim nateef nok neon ko'u re' sin nteek nain je nak, Fesat Utunu' re' ka Maseor Muur fa,b in naprenat tuaf he nnaon nheek naan nai' Petrus. 4 Anheke nrair je on naan ate, sin nataam ee nbi bui. Rarit sin nruur naan sorarus pukan haa, he nmakseun ein et fai ma manas, he npao ma ntiut nai' Petrus. Sorarus pukan es ate, tuaf haa. Nai' Herodes anroim he nafeek nai' Petrus in rasi anbi too mfaun ein sin humak ma sin matak, oras fesat naan namsoup. 5 Onaim oras sin nataam nai' Petrus anbi bui, Usif Yesus In apirsait ein an'oen ein piut-piut, antotin he Uisneno npafa' ma npanat nai' Petrus.cUisneno napoitan nai' Petrus na'ko bui
6 Noka' on naan ate, usif nai' Herodes he nafeek nai' Petrus in rasi nbi too mfaun ein sin humak ma sin matak. Mes mabe' naan, sin nfuut nai' Petrus nok korenit nono' nua anbi bui je nanan. Rarit in ntuup anbi sorarus nua sin atnaank ein. Sorarus bian anteni' anhaken ma npaon anbi eon' ee in matan.
7 Nok askeken ate, Uisneno In ameput es na'ko sonaf neno tunan neem ma nhake nbi naan. Rarit ke'en naan anmeu 'siin-'siin. Rarit ameput naan anpoo' nafena' nai' Petrus am nak, “Pe'u! Amfeen nai!” Oras naan amsa', korenit naan natsefi' nain na'ko nai' Petrus in a'niman. 8 Rarit ameput sonaf neno tunan naan anreun gwe mnak, “Ampaek ho baru! Ampaek ho 'pein haef ein!” Nai' Petrus anpaek anrair on naan ate, ameput naan anrenu ntein' ee mnak, “Ampaek ho baru mnaun kotif, ma uum he mutuin kau nai!”
9 Onaim nai' Petrus natuin ameput naan anpoin na'kon bui. Mes nai' Petrus natenab nak, ai' in suma namnei. Te kaah, naan ro njair tebe. 10 Oras sin nnaon nasoup baer paot nua nmaktun-tuin ein ate, sin ntean eon besi. Eno' naan nasoitn on kuun, ma sin anpoi natuin ranan re' he nnao neu kota. Nok askeken, Uisneno In ameput naan annao nasaitan nai' Petrus anmes-mees.
11 Oras ameput naan namneku nrari te, na' nai' Petrus nahiin ma natenab am nak, “Namneo! Oras ia, au fe' uhiin. Uisneno nsonu' In ameput neem he nafetin kau na'ko nai' Herodes in a'niman. Uisneno nmoe' on re' naan, he atoin Yahudis sin tenab amre'ut re' he najairb ee neu kau, ka ntoom kau fa.”
12 Rarit nai' Petrus annao neu ain Maria in umi. Ain Maria re' ia, nai' Yohanis in ainaf. Nai' Yohanis naan, in kanan es anteni', es re' nai' Markus. Anbi naan, anmui' tuaf amfaun re' nabuan ma n'oen ein. Sin ntotin he Uisneno nturun nai' Petrus nok in rasi. 13 Neem antea umi naan ate, nai' Petrus antee' ma nhaman anbi eno' naan in kotin. Onaim aan feot ameput es anbi umi naan, kaann ee bi Rode, nnao na'me'o he nahiin neu amnemat naan sekau. 14 Anneen nai' Petrus in haan ee te, in nahiin nain je. In nmariin anmaet. In naen antaam, ma natonan neu abitan naan am nak, “Nai' Petrus anhaek et mone'!” Natuin marinet ko'u naan, tar antea in nnikan nain nak in he nasoitan eno' naan neu nai' Petrus.
15 Mes sin natahan am nak, “Kahaf! Kaisa' mu'raru' on naan!”
Mes bifee naan na'kiku' mates nak, “Kahaf! Re' nee, ro nai' Petrus in hanan! In nhaek et mone'!”
Mes sin ka npirsain fa. Sin na'uab ein am nak, “Of oni' Uisneno In ameput sonaf neno tunan, re' anpanat nai' Petrus.”
16 Sin nmatita'-roin rasi naan ate, nai' Petrus anhaman piut, tar antea sin nasoitan eno' naan. Nasoit anrair je te, sin noo mkakan, natuin in re' naan nai' Petrus batuur. 17 Nai' Petrus na'aiti' in a'niman, he namneba' sin. Rarit in npeon sin nok ranan mee m'es Uisneno napoitn ee na'ko bui. Onaim in nreun sin am nak, “Hi mnao nai he mitoon rasi re' ia meu nai' Yakobus ma haef bian sin.” Rarit nai' Petrus npoi nnao neu bare bian anteni'.
18 Kiuk ana' te, oras soraur apaot ein ka niit anteni' fa nai' Petrus, sin ntaka'naan ein ma namtaun nmaten, natuin sin ka nahinin fa rais saa' es re' of he nboor neu sin. 19 Oras usif nai' Herodes nahiin rasi naan, in naprenat sin he naim nai' Petrus. Mes sin ka nateef niit fa nok ne. Onaim nai' Herodes naprenat he nparikas soraur apaot ein. Anparikas anrair sin on naan ate, in nreun he nroor niis sin ok-oke'.
Rarit nai' Herodes annao nasaitan propinsi Yudea, ma natua anbi kota Kaisarea.
Usif Herodes Agripa anmaet
20 Oras naan, abitan kota Tirus ma kota Sidon, sin biasa nsosan amnahat na'kon usif nai' Herodes in pah. Mes a'roo-'roo re' ia, usif naan anmamusun nok sin. Rarit sin nma'akoran ma namin ranan he naraem ok nok ne. Onaim sin npiir naan tuaf fauk he nateef nok usif Herodes. Oras tua mapiir ein naan antean kota Kaisarea, sin makhiin ein nok atoin es, kaann ee nai' Brastus. In njair atoin makana' et uisf ee in sonaf. Sin nma'akoran nok nai' Brastus, he in njair afuri' ma asoitan ranan neu sin, he sin bisa nateef nok usif Herodes.
21 Rarit usif Herodes anroim he ntoup sin, onaim sin npiir naan oors es he natefan. Neno naan, sin nmo'en acara ko'u. Usif Herodes anpaek in baur usif, ma antook anbi in a'toko prenat. Onaim in na'uab nok sin. 22 Anneen in hanan on naan ate, sin nbo'is ma naikas usif Herodes nak, “Amneen nai in hanan naan! Ia ka hanaf mansian fa! Ia pah ii tuan in hanan!” 23 Nok askeken, Uisneno In ameput es neem na'ko neon gwe tunan ma neikin nai' Herodes menas huum es, natuin in antoup pures neu in tuan, tar antea in nsiu' na'roba' Uisneno. Onaim pansoe nggwin na'susu' nai' Herodes in aon, tar antea in nmaet.
24 Rasin naan ok-oke' anjarin, maut he Uisneno In Rais Reko nhanua gon piut, ma tuaf-tuaf re' natuin Usif Yesus In Raan A'honis na'baab ok piut.
25 Oras nai' Barnabas ma nai' Saulus nua sin annaon naat anrair fitis-babat neu abitan Yerusalem, sin ntebi nfanin neun kota Antiokia. Sin nok atoin muinf es, kaann ee nai' Yohanis. Sin nteek ee te, nai' Markus amsa'.