Nai' Petrus namneob on anmatoom nok sranit neu tuaf re' ka atoin Yahudis fa
11
Nai' Petrus ka nfain fa fe', mes Usif Yesus In haef ein ma apirsait bian abitan Yerusalem, annenan anrair nak, tuaf re' ka atoin Yahudis fa sin antoupu nrair Usif Yesus In Rais Reko. 2 Onaim oras nai' Petrus anfani ntea Yerusalem on naan ate, anmui' apirsait na'ko partei Yahudi tuaf fak-fauk,a nasaan ee 3 mnak, “Hoe! Ho mmoe' on mee es re' naan? Ho muhiin hit haart ii oo, ai' kaah? Ho ro mubrain he mtaam meu tuaf re' ka atoin Yahudis fa sin umi? Ho mbukae mok sin! Kais on re' naan, natuin sin ka na'heir ein fa on re' hit harat! Ka nabei' fa he hit tseor gok tok sin!”4 Rarit nai' Petrus npeon sin are' rasi re' anjarin nrarin naan am nak, 5 “Neon gwes, oras au 'bi kota Yope, au 'onen. Anbi naan, Uisneno nakrira' neu kau nbi mnitas. Nak, on re' au 'iit neon gwe natfe'i, ma isparei kou' gwes anboor, ma nakfiirt ee nbi in suusk ein haa sin. Isparei naan ansaun neem neu kau. 6 Oras au 'kisu 'taam 'eu isparei naan ate, au 'iit mu'it huma'-huma', esan re': mui' hae haa', anonok, nok koro huma'-huma'. Sin aar sin re' naan, mui't ein re' hit tanunin sin. 7 Rarit au 'neen hanaf es anreun kau mnak, ‘Pe'u! Amfeen nai! Amroor mui't ein ia, mubarab sin ma mbukae nai!’
8 Mes au utaah am 'ak, ‘Ka bisa fa, tua! Kais on re' naan, tua! Fin au ka 'euk 'iit fa sisi huma'-huma' on re' naan. Hai atoin Yahudis minunin are' mui't ein re' naan!’
9 Mes hanaf naan nataah am nak, ‘Karu Uisneno nak baer es kninu' te, ho kais mak bare' naan 'oemetan!’
10 Au 'kius 'iit isparei naan anboor no teun, ma in na'ait on anfain neu neon gwe tnanan.
11 Nateef oras naan, atoni' teun neem antean umi naan. Sin neman na'kon Kaisarea he naim kau. 12 Rarit Uisneno In Asmaan Akninu' natoon kau mnak, ‘Ho msaun he mnao mok atoin ein naan nai. Kaisa' ho neekm aan ma'fena'! Maski sin atoni' 'teta', mes kaisa' ho mmai'nisin sin, ma maan sin on re' atoin 'oemetan.’ Rarit hit aok-bian sin tuaf nee re' ia, nokan amsa' anbin Kaisarea. Anbi naan, hai mtaam meu a'naak soraurs es na'ko pah Roma in umi. 13 In na'uab am nak, neno fauk akonot, in niit Uisneno In ameput sonaf neno tunan, anhake nbi in umi, ma na'uab am nak, ‘Amreek tuaf he nnaon neu Yope he naskau neik naan atoin es, kaann ee nai' Simon Petrus. 14 Atoni' naan of natoon ko mok ho uim ji in nanan, Uisneno In ranan he nsoi nafetin ki, ma annoes nain hi saant ein.’
15 Es naan ate, au 'murai utoon 'eu sin Uisneno In Raan A'honis. Nok askeken ate, Uisneno In Asmaan Akniun' ee neem antaam neu sin ok-oke', on re' neon gwes ii hit ttoupu trair Je. 16 Oras au 'iit sin antoup In Asmaan Akninu' on naan ate, au umnau Usif Yesus In uaban uhunut re' nak, ‘Nai' Yohanis nasrain ki neik oe nmees, mes Uisneno of anmo'e nneis na'ko naan neu ki, es re' In of anfee ki In Asmaan Akninu'.’b 17 Uisneno neikn On es re' anfee In Asmaan Akninu' neu atoni' 'teet ein, namnees on re' In nfee Je neu kit. Onaim hi mroim he au 'raban Uisneno oo, ai' on mee? Onaim au he u'uab 'ak saa' a'tein?”
18 Anneen nai' Petrus natoon nanoon on naan ate, sin ka nasaan antein' ee fa. Rarit sin npures ma nbo'is Uisneno nak, “Aijoo! Maineun besi! Uisneno nfei ranan he atoin sona' amsa' bisa nasaitan sin 'monit asanat, he In nnoes nain sin saant ein, ma sin nmonin piut nok Ne.”
Usif Yesus Iin na anbaits ok neun bare-bare. Bian etan kota Antiokia
19 Neon gwes ii, oras sin na'mate nrair nai' Stefanus, sin nmurai nha'mui' ma nasusab apirsait ein neu Usif Yesus. Es naan ate, sin naen anbaits ok neun bare-bare. Bian naenan neun propinsi Finisia. Bian naenan neun puru Siprus, ma bian anteni' naen na'roon tar antean kota Antiokia et propinsi Siria. Amnaent ein naan natoon Usif Yesus In Rais Reko anbin mee-mee msa'. Mes sin natonan neu haa sin atoin Yahudis anmesen. Sin ka natonan fa atoni' 'teta'.c
20 Ma anmu'i ntein Uisneno Iin na na'kon puru Siprus ma na'kon kota Kirene. Bian sin nnaon nkonon neun kota Antiokia et propinsi Siria. Anbin bare naan, sin es re' natonan Usif Yesus In Rais Reko neu tuaf re' ka atoin Yahudis fa. 21 Uisneno nfeen sin In kuasan, tar antea too mfaun anpirsain neu Usif Yesus.
22-24 Oras naan, apirsait ein abitan Yerusalem annenan nak, atoni' 'teta' abitan Antiokia npirsain neun Usif Yesus amsa'. Onaim sin nreek haefan tuaf es, kaann ee nai' Barnabas, he nnao nkius sin. Nai' Barnabas naan, atoin neek reko, ma npirsai batuur-batuur neu Uisneno. Asmaan Akninu' natuuk gwe msa'.
Oras in neem antea bare naan, in niit nak, batuur-batuur Uisneno nmeup ma'tani' anbi atoni' 'teta' sin a'moink ein. Onaim in nmariin. Rarit in nha'tani nteni' sin, he sin nabei' ein he natuin piut-piut anbin Uisneno In Raan A'honis. Nok ranan naan, apirsait ein neu Usif Yesus na'baab ok piut na'ko neno neu neno.
25 Rarit nai' Barnabas annao nkoon neu kota Tarsus he naim nai' Saulus. 26 Oras in nateef nok nai' Saulus, in nfuir ee he nfanin bu'-bua' neun Antiokia. Rarit sin nua sin natua nabaran toon es, nok Usif Yesus Iin na re' abitan Antiokia. Neno-neno te, sin nanoni' Usif Yesus In Raan A'honis neu too mfaun ein. (Anbi kota Antiokia re' ia, na' atoni' anteek apirsait ein neu Usif Yesus nak ‘atoni Kristen’).d
27 Oras sin nua sin nbin Antiokia fe', anmui' tuaf fauk neman na'kon Yerusalem. Uisneno biasa npaek atoin ein naan he njarin In mafefa kniun' ein. 28 Tuaf es na'ko mafeef ein naan, kaann ee nai' Agabus. Uisneno In Asmaan Akniun' ee natoon ee mnak, “Of amnaahs ii ma'tani' antaman pah-pinan fuun am nateef.” Onaim nai' Agabus natoon ee neu bian anteni'. (In uaban naan anjair batuur oras nai' Klaudius, uis ko'u keser Roma, na'naak.)e 29 Anneen nai' Agabus in uaban on naan ate, Usif Yesus Iin na re' abitan Antiokia namin ranan ma nabuab ein roit, he nsonu' sin neu sin aok-bian anbi Usif Yesus, re' nmonin nbin susat anbi propinsi Yudea. Tuaf mese'-mese' anfee natuin in a'be'in. 30 Nabuab anrair on naan ate, sin nreek nai' Barnabas nok nai' Saulus, he sin nua sin nnaon naat roit ein naan neu a'naak jemaa't ein nbi bare naan, he nbait sin neu asuust ein.