2-3 Nai' Stefanus nataah am nak, “Sin ama' aar ki! Hi mneen kau fe'. Afi unu' naan, hit ka'o Abraham ka npoi nnao fa fe' na'ko in kua mnasi'. Mes Uisneno Apinat-Akrahat naan, nakriir On neu ne. Uisneno napreent ee mnak, ‘Amnao musaitan ho pah, ma ho nonot-asar sin. Ho mnao nai, meu pah re' of Au 'ruur 'aan je 'eu ko!’ Rarit na' in npoi na'ko pah Mesopotamia, ma nanani' bare neu kota Haran.^a 4 Onaim ka'o Abraham annao nasaitan atoin Kasdimas sin pah, ma nanani' neu kota Haran.

Oras in aam hoinf ee nmaet, Uisneno neik je ntaam neem neu pah Kana'an, es re' bare ia re' sin ama' aar kit tatua gwe oras ia.^b 5 Oras naan, Uisneno ka nboo' ma nbait niit fa afu rakat mese', he njair ka'o Abraham in pusaak. Mes Uisneno nba'an nain, he nfee afu ia neu in sufan-kau'n ein he njair sin auf pusaak. Maski oras naan, in ka nmui' fa aan honi' mese' msa'.^c

6 Mes Uisneno na'uab neu ne mnak, ‘Ho sufam-ka'um sin of annao natuan anbin atoni' bian sin pah. Ma abitan bare naan of anha'mui' sin ma na'aet sin ka kre'-re'o fa, tar toon natun haa namsoup. 7 Onaim toon natun haa namsopu te, Au of a'hukun pah re' nmoe' ho sufam-ka'um anjair sin ate. Onaim ho sufam-ka'um sin of annao nasaitan bare naan, ma ntaam neman neun bare ia, he n'oen ein ma nasaeb ein makasi neu Kau.’^d

8 Ma oras In na'uab anrair on naan ate, In nfuut rais manba'an neik herit, re' njair tanar nak, ka'o Abraham sin anjarin Uisneno In too gwah. Es naan ate, oras nai' Abraham in anah nai' Isak fe' nmoin neno faun, in aamf ee na'heir ee. Namuni te, nai' Isak na'heri' in anah nai' Yakop. Rarit nai' Yakop na'heri' in aan mone bo'es am nua, oras es-es ate fe' anmoin naan neno faun. Sin aar sin esan re' anjarin be'i-na'i neu hit atoin Yahudis.^e

9 Neot es, hit be'i-na'i sin ansaken sin orif nai' Yusuf, rarit sin na'soos ee, ma in njair ate anbi pah Masir. Mes Uisneno nok ne piut.^f 10 Es naan ate, Uisneno nafeitn ee na'ko in suust ein ok-oke'. Uisneno nfeen ee ronef ahinit he nahiin rasi mfaun, tar antea usif pah Masir anneek niis ne, ma nait je njair gubernur neu pah Masir anfuun am nateef. Ma in na'naak anbi usif pah Masir in sonaf amsa'.^g

11 Rarit, oras amnahas antaman pah Masir ma pah Kana'an. Amnahas naan mainenu', tar antea too mfaun ein ansuus ma nana'reen anbin mee-mee. Es naan ate, anbi oras naan, hit be'i-na'i sin imsa' ka napenin fa mnaah saa'-saa'.^h 12 Mes ka'o Yakop anneen hanaf nak, anmu'i mnahat et pah Masir. Es naan ate, in nreun in aanh ein, esan re' hit be'i-na'i sin, he nnaon neun pah Masir he nsosan amnahat.

13 Ansosa nrarin on naan ate, sin nfanin. Oras sin amnaaht ein naan oek' ein ate, nai' Yakop anreek sin he nfani ntenin ma nsosan amnahat neun pah Masir. Ha'e re' ia, na' nai' Yusuf natoon in tuan ii, nak in es re' nai' Yusuf, re' sin orif. Namuni te, nai' Yusuf nakrira' in nonot-asar sin neu usif pah Masir.ⁱ 14 Nai' Yusuf antoit he in amaf ma in orif-tataf sin neem natuan anbin pah Masir. Sin amnemat neun pah Masir naan ok-oke' of tuaf bo' hitu mniim.^j

15 Onaim nai' Yakop nanani' bare neu pah Masir, tar antea hit be'i-na'i sin nmaten nbin naan.^k 16 Ma toon bani' toon ate, sin neik nafani' hit be'i-na'i sin nuif ein neu kuan Sikem et pah Kana'an. Sin nsuub nuif ein naan anbi nopu re' nahunu te ka'o Abraham ansoos ee na'ko nai' Hemor in sufan.”^l

17 Nai' Stefanus antuut antein in uaban am nak, “Are' rasin re' ia, anjarin natuin Uisneno anba'an anrair nak, In of anfee auf pusaak neu nai' Abraham anbi bare naan. Oras anmurai anhaumak-maak he Uisneno nanokab In rais manba'an naan ate, hit atoin Yahudis sin na'baab ok amfaun ii kah een anbin pah Masir. 18 Oras naan, anmui' uisf feu' gwes re' annaa' aprenat anbi pah Masir. In ka nahiin fa nai' Yusuf in retan ma in a'naon.^m 19 Usif naan na'aet hit be'i-na'i sin. In mapuutn ii kah een neu hit be'i-na'i sin. In na'seke' sin he nasaitan ri'ana kruu'f ein, he sin nmaten kuuk.ⁿ

20 Oras naan, ka'o Musa in ainf ii nahoins ee. In aon ii kmoerf aah! In ainaf-amaf sin ka natniin fa uisf ee in aprenat. Sin npairoir na'koro' ri'ana' naan anbi sin umi, tar antea in nmoin naan funan teun.^o 21 Oras sin ka bisa na'koro' naan fa ri'ana' naan anteni' te, sin npoirn ee. Onaim usif pah Masir in aan feot gwes, es re' niit ri'ana' naan. In nait ri'ana' naan ma npairoir je nahuum on re' in aan honi'.^p 22 Es naan ate, atoni' pah Masir nanoni' are' sin mahiink ein oke' neu nai' Musa, ma in njair atoin ahinit ma amanoet. In nahiin et uaba' ma mepu.

23 Oras in nmoin naan toon bo' haa, nai' Musa nnao naim he nahiin kuun in atoin Israelas sin. 24 Oras in npoi nnao te, in niit atoin Masiras es antuuf atoin Israelas es. In nturun atoin Israelas naan, ma in nroor niis atoin Masiras naan. 25 Nai' Musa natenab nak, of oni' in aok-bian sin nahinin nak, Uisneno nsoun ee, he nafetin sin na'kon sin susat. Mes sin ka nahinin rasi naan fa fe'. 26 Noka' on naan ate, nai' Musa npoi ntein he nnao nkius in atoin Israelas sin. Rarit in niit atoni' nua nmabanan. Ma in he nsoba' he narame' sin am nak, “Hoe! Hi nua ki mma'ori-tatan. Mes nansaa' am es hi nua ki mmatuuf?”

27 Mes atoni' re' nbaan in aok-bian naan antitar na'roob ka'o Musa mnak, ‘Sekau es re' nait ko he mjari 'nakaf meu kai? Ma sekau es anruur ko he mjair afeek rasi meu kai? 28 Ho mak oni' ho bisa mroor miis kau, on re' afi naa ho mroor miis atoin Masiras naan?’ 29 Nai' Musa anneen anrair on naan ate, in nfeen naen nasaitan pah Masir. In naen ma natua nbi atoin Midianas sin pah. In matsao nbi naan, ma nahoni' ri'aan mone nua.^q

30 Toon bo' haa namsopu te, nai' Musa annao nbi baer jes re' ka nmui' fa oe, anhaumaak nok a'toe'f es, re' sin teek ee te nak 'to'ef Sinai. Anbi bare naan, Uisneno In ameput na'ko sonaf neno tunan, neem nateef nok nai' Musa, anbi ai re' anpiin anbi hau aan es. Hau naan anpiin, mes ka npuut fa. 31 Niit ee on naan ate, nai' Musa nsanmaak. Ma in nnao nhaumaak he nkius niit saa' re' njari nbi naan. Nok askeken, in nneen Uisneno na'uab na'ko ai naan in nanan nak, 32 ‘Au re' ia, ho nai'-ka'o sin Uisneno; esan re' ka'o Abraham, ka'o Isak, ma ka'o Yakop.’ Anneen hanaf naan ate, ka'o Musa namtau nmaet, tar antea in huumn ii nmouf, ma in ka nabrain fa he nait in matan he nkius ai pina' naan.

33 Rarit Uisneno na'uab anteni' mnak, ‘Musa! Ho mhaek et afu kninu'. Amnui main ho 'pein haef ein naan! 34 Kaisa' muteenb am mak, Au 'nikan 'ain Au too Israelas sin abitan pah Masir. Kahaf! Au umnau sin fe'. Au uhiin sin nana'renat. Au 'neen a'rair sin haan sakoit antotin turun ma babat. Oras ia, Au 'saun ma 'nao he ufetin sin. Uum fe'! Au he 'reek ko mfain meu pah Masir.’^r

35 Onaim Uisneno re' nakriir On anbi ai naan, naprenat nai' Musa he nfain neu pah Masir. Uisneno nruur ma nreek ee, he nafetin too Isra'el na'ko nana'renat. Nai' Musa ia, es re' afi unu' nataan ee nak, ‘Sekau es re' nait ko mjair a'nakat neu kai?’ Oras ia, Uisneno neikn On es re' nait je!^s 36 Es naan ate, ka'o Musa ntebi nfain neu pah Masir. Anbi naan, in nmoe' rais sanmakat huma'-huma'. Rarit in napoitan too Israelas sin na'kon pah Masir. In neik sin nnaon natuin Tais Me'e, ma sin nnao natuin baer ruman tar antea toon bo' haa.^t

37 Ka'o Musa neikn on natoon neu too Isra'el am nak, ‘Uisneno of nait naan tuaf es na'ko hi tnaanm ein, he njair In mafefa kninu', namnees on re' In nait kau re' ia.’^u 38 Ka'o Musa neik hit be'i-na'i sin anbin baer ruman. In kuun es anjair nete-ranan neu hit be'i-na'i nok Uisneno In ameput na'ko sonaf neno tunan. Ameput naan, es re' nasanut Uisneno In Kabin ma Prenat neu nai' Musa, re' natoon kit raan a'honis amneot. Uisneno In Kabin ma Prenat naan, es re' nasanut sin anbi 'to'ef Sinai naan.^v

39 Maski on naan amsa', hit be'i-na'i sin ka natniin fa nai' Musa. Sin npenan nain je, ma sin he nfanin kuuk neun pah Masir. 40 Rarit sin nnaon nkopo' nai' Harun nak, ‘Ho ori' nai' Musa nok kit tpoi ta'ko pah Masir. Mes oras ia, hai ka mihiin fa neu in et kona' mee! Es naan ate, hai mtoit ko he mmoe' baer fuat mahuum es neu kai. Maut he in neikn on es re' njair maat-ranan neu kai.’^w 41 Rarit sin nmo'en baer fuat mahuma' naan. In huumn ii on re' bijae aan es. Rarit sin nroron mu'it ma nafuat ee neu ne. Ma sin nfeest ein nok neek marinet ko'u, natuin sin neek ein anmarinan nok bare' re' sin nmoo' je neik sin a'niimk ein kuuk.^x 42 Oras ankius niit 'mo'et naan ate, Uisneno ankoit sin. Onaim sin nmurain nfua bare' anbi neon gwe tnanan, on re' manas, funan, ma kfuun-akfuun. Onaim Uisneno nparakan sin on re' naan. Naan namnees nok saa' re' Uisneno In mafefa kninu' ntui nain am nak,

44 Nai' Stefanus antuut ma ntaur in uaban naan nak, “Uisneno naruru' neu ka'o Musa 'tope' na'ko uim onen es. Onaim ka'o Musa sin nahake' Tenar Onen es, re' sin nmoo' je na'ko pasu ma tais, natuina' masaf naan. Onaim too Israelas sin neman ma n'oen ein neun Uisneno anbin In Tenar naan. Karu sin nanain ein bare, sin npukai Tenar Onen naan, sin nfuut gwe, ma sin nroi neik je neu bare bian. Anbi naan, sin nahake' nteni' Tenar naan.^z

45 Oras nai' Yosua sin nmakenan suuk a'roo nok uuf-uuf bian anbin pah Kana'an re' ia te, Uisneno nriu' napoitan uuf ein naan. Rarit In nbait pah naan neu hit be'i-na'i sin. Oras sin ntaam nasiik pah naan, sin neik Tenar Onen naan amsa'. Tenar naan anhaek nabaar tar antea usif nai' Daut annaa' aprenat.^a 46 Usif nai' Daut an'onen neu Uisneno, on re' hit ka'o Yakop amsa' an'onen neu Ne. Ma nai' Daut anharineb Uisneno In nekan, onaim Uisneno nakriir ee In nekan arekot. Onaim in ntoit Uisneno he in es re' nafena' Uim Onen Uuf fe'u.^b 47 Mes namuni te, nai' Daut in anah nai' Soleman es re' nafena' Uim Onen Uuf naan.^c

48 Mes hit tahiin tak, Uisneno ka natua fa anbi umi re' mansian ii anmo'e. Rasi naan natai nok saa' re' Uisneno In mafefa kninu' tuaf es antui nain je mnak,

51 Rarit nai' Stefanus antaru ntein in uaban. In naskara' sin am nak, “Batuur, ro hi 'naak-fatun ki! Hi on re' tuaf re' ka nahiin niit fa Uisneno, ma ka mitniin Ee fa. Hi mraban Uisneno on re' be'i-na'i sin ankoit Je! Onaim oras ia, hi he mraban amtein Uisneno In Asmaan Akninu', oo?^e 52 Hi be'i-na'i sin nasusab niis are' Uisneno In mafefa kniun' ein. Hi mitoon miit kau, mafefa kninu' mee, es re' ka napein fa ha'mu'it na'ko sin? Ka tiit fa fe', ai'? Un-unu' Uisneno In mafefa kniun' ein natoon nanin nak, Uisneno of ansonu' In Atoni Kninu'. Mes hi be'i-na'i sin anroor niis Uisneno In mafefa kninu' sin. Tar antea hi msa' ampaek tua 'teta' he nroor niis Uisneno In Atoni Kninu'. 53 Uisneno In ameput na'ko sonaf neno tunan sin imsa', es re' neik are' atoran harat re' Uisneno anroim he nfee sin neu kit, mes hi ka mfairoir sin fa.”

54 Oras sin re' nokan ntokon anbi bare feek rasi naan, anneen nai' Stefanus in uab ein naan, sin nahiin nanin nak in nasaan sin. Es naan ate, sin neek ein namenan ma neik-neuk nisik.

55 Mes nai' Stefanus, re' Uisneno In Asmaan Akniun' ee ntaam neu ne, nait matan ma nbaiseun neu neon gwe tnanan. Anbi naan, in niit Uisneno In pinan ma krahan no mes-mese', ma Usif Yesus anhake nbi Uisneno In abnapan a'ne'u anbi baer amasat naan. 56 Ma nai' Stefanus na'uab am nak, “On nai, sin aam ein! Au 'iit neno tunan natfe'i, ma Mansian Batuur-Batuur ee anhaek et baer amasat et Uisneno In abnapan a'ne'u.”

57 Annenan on naan ate, aparikas raisn ee ankeeh sin ruik ein. Rarit sin nakain ee nok haan ma'tani' he nai' Stefanus kais na'uaba' nteni'. Ma sin nfuat ok bu'-bua' he n'usa' niis ne. 58 Rarit sin nheer anfonat nai' Stefanus ma neik je npoi na'ko kota naan. Ma saksii nggwin sin anpuu' sin baru mnaun kotif, ma nana'at sin anbi atoin muinf es. In kaann ee, nai' Saulus. In es re' anfuaruut sin. Onaim sin npoir nai' Stefanus neikin fatu.

59 Oras sin npoir nai' Stefanus, in nhunun naher-heer am nak, “Koi, Usi' Yesus! Au oors ii nhaumaak een. Amtoup kau nai!” 60 Rarit in nri'tuu ma nhunun anteni' naher-heer am nak, “Koi, Aam! Kaisa' muroiba' sanat ia meu sin!” Rarit in asnaasn ii natfeek, ma in nmaet.