Sin npiir tuaf hiut he npairoir a'baut ein
6
Oras naan, Usif Yesus Iin na na'baab ok piut tar antea namfaun. Mes sin na'kon uab pukan nua. Bian atoin Yahudis re' na'uab ein neik uab Aram. Ma bian antein atoin Yahudis re' na'uab ein neik uab Yunani. Namuni te, rais jes anboor anbi puukn nua' ein sin atnaank ein. Pukan re' neik uab Yunani sin nasurin akre'o nok pukan re' neik uab Aram. Sin nak, “Ia nsaan! Karu hi mbait bukaet neno-neno te, hi kais ampaek neek ao-biaf. Natuin hai baun ein ka napenin fa sin sapaak ein.”2 Natuin rasi naan, es na' Uisneno In haef ein, tuaf bo'es am nua, no'en nabuaba' apirsait ein. Rarit sin na'uab ein am nak, “Aok-bian aar ki ok-oke'! Hai bisa misnasab barab bukaet meu ki, mes naan ka pantas fa neu kit. Natuin hai ro he minoni' ki Uisneno In Kabin ma Prenat piut-piut. 3 Onaim anbi hai teenb ii on nai: reko nneis, hi mpiir maan tuaf hiut na'ko ki. Hi maim tuaf re' too mfaun ii anhormaat ee, ma in nahiin in tuan, in nahiin rasi mfaun ma neek ma'nura', ma Uisneno In Asmaan Akninu' an'ator in a'monin. Karu hi mpiir maan tuaf ein on re' naan ate, of hai mait sin he sin n'urus rais bukaet. 4 Nok ranan naan, na' hai mipein mainuan he m'onen ma minoni' Uisneno In Kabin ma Prenat.”
5 Rarit sin aar sin anromin ma natuina' nai' Petrus in uaban naan. Sin npiir naan tuaf hiut.
Tuaf es in kaann ee, nai' Stefanus. In npirsai batuur-batuur neu Usif Yesus, ma Uisneno In Asmaan Akniun' ee npaek je. In aok-bian sin esan re':
nai' Felipus,
nai' Prokorus,
nai' Nikanor,
nai' Timon,
nai' Parmenas,
ma nai' Nikolas re' antaam nok anbi pirsait Yahudi, mes in ka atoin Yahudis fa. In na'ko kota Antiokia.
6 Rarit sin neik tuaf hiut re' sin npiir naan sin naan neun Usif Yesus In haef ein. Rarit haef ein antao sin a'niimk ein, ma n'onen sin he njarin ameput neu barab-roitan bukaet, he a'baut ein napenin batis namnes-nesan.
7 Onaim Uisneno In Kabin ma Prenat matona' ma mateka' ansuun-suun bare. Ma too re' natuina' Usif Yesus In Raan A'honis naan, na'baab ok piut-piut anbi Yerusalem. On naan amsa', a'naak rais pirsait Yahudi bian amfaun antaam nokan njarin Usif Yesus Iin na.
Sin nheek nai' Stefanus
8 Oras naan, Uisneno nakrira' In nekan arekot nho-hoe neu nai' Stefanus. In nfee kuasat he nai' Stefanus anmoe' rais sanmakat huma'-huma' amsa', he too mfaun ein nitan nok sin maatk ein. 9 Anbi naan, anmui' atoin Yahudis fauk re' neman na'kon bare 'roo. Sin na'kon kota Kirene, kota Aleksandria, propinsi Kilikia, ma propinsi Asia. Nahunu te, sin njarin ate neu atoni' bian, mes namuni te, sin aam uisf ein nafetin sin. Rarit sin nabuan nbin Yerusalem. Nati' te, sin ntaman anbi uim onen re' sin nmoe' kuuk ee. Uim onen naan, sin nteek ee te nak, “Fetin na'ko Ate.” Oras sin nneen anrair nai' Stefanus in uaban, sin ka nroim je fa. Es naan ate, sin nmurain nmatoen nok ne. 10 Mes nai' Stefanus in mahiin ii kah een, natuin in na'uab neik kuasat na'ko Uisneno In Asmaan Akninu'. Onaim sin ka nabei' je fa. 11 Rarit sin namin raan re'uf. Onaim sin nnaon nbaen atoni' bian, he na'uab napoin am nak, “Hai mneen atoni' ia na'uab na're'uf ka'o Musa nok Uisneno!”
12 Sin nhuita' too mfaun, tar antea atoni mnais harat Yahudi sin ma tunggur agaam ein anneen nokan. Rarit sin nato'on. Onaim sin nnaon nheek nai' Stefanus, ma nheer neik je nnao neu bare feek rais pirsait. 13 Sin saksii nggwin naan, ansaksiin uab poi anmatoom nok nai' Stefanus am nak, “Atoni' re' ia, na'uab na're'uf Uim Onen Uuf piut-piut. Ma in na'uab na're'uf amsa' prenat Uisneno re' ka'o Musa nasanut sin neman neu kit. 14 Hai mneen amsa' in na'uab am nak, Nai' Yesus, atoin Nasaretas naan, of naseer Uim Onen Uuf re' ia. Ma In of annoes ma ansenu' nain hit atoran haart ein ok-oke', re' ka'o Musa nasanut sin neman neu kit!”
15 Rarit are' too mfaun re' antokon nbi bare feek rais pirsait naan, sin nkius na'tesan neu nai' Stefanus, natuin in human namaasb on, on re' ameput Uisneno na'ko sonaf neno tunan.