Nai' Ananias nok bi Safira nmaten, natuin sin he nsoba' Asmaan Akninu'
5
Mes anbi oras naan, anmui' atoin es amsa', kaann ee nai' Ananias. In fee je, kaann ee bi Safira. Sin nua sin na'sosa' sin afu piis es amsa'. 2 Mes sin nua sin nma'akoran he na'koro' afu naan in osan bian. Oras na'sosa' nrair afu naan ate, nai' Ananias annao natoon neu Uisneno In haef ein am nak, “Hai fe' mi'sosa' mrair hai afu piis es. Oras ia, hai he mfee in osan ok-oke' meu Uisneno.” 3 Mes nai' Petrus nakain ee mnak, “Ananias! Ho ro bainesi' ko! Ho mmoe' on mee? Nansaa' am es ho mu'koro' afu naan in osan bian? Ho neek maan nameis'ook, fin ho mutuina' niut reu'f ein sin a'naakt ee in romin. Ho mubrain he mputa-kriu Uisneno In Asmaan Akninu'! 4 On nai! Ho he mu'sosa' afu naan, ai' kaah, naan es re' ho. Ai' karu ho mu'sosa' murair je, ma ho mroim he mfee in oosn ee oke', ai' kaah fa msa', naan es re' ho. Mes nansaa' am es ho mmoe' rasi naan? Ho he mupoi mansian ii, mes ka tiit fa es nabei' he napoi naan Uisneno!”
5 Anneen nai' Petrus in uaban naan ate, nok askeken nai' Ananias antaikoib, ma in nmaet nain oras naan. Are' too re' nneen rasi naan, namtaun nmaten. 6 Rarit muinf ein tuaf fauk antaam neman, ma sin n'aum nai' Ananias in aon, ma neik je nnao he nsuub.
7 Rarit of oni' tabu teun namuni te, nai' Ananias in fee je ntaam neem. In ka nahiin fa neu saa' na es re' anjari nrair. 8 Onaim nai' Petrus nataan ee mnak, “On mee, ain? Hi mi'sosa' afu naan, ma in oosn ii es re' ia, gwah, aa oo?”
In nataah am nak, “Batuur, tua. In oosn ii ro es re' naan, tua.”
9 Rarit nai' Petrus nakain ee mnak, “Nansaa' am es ho mok ho 'naef ee mma'akor he msoba' Uisneno In Asmaan Akninu'? Ho mkius! Tuaf-tuaf re' annao nsuub ho moen je, fe' anfain neman. Kreo' gwes anteni' te, sin of anroi neik ho ta'um ma nsuub ee nbi ho moen je in abnapan.”
10 Nai' Petrus na'uab on naan ate, nok askeken, bifee naan antaikoib ma nmaet nain. Oras muinf ein antaam anfanin te, sin niit bifee naan anmate nrair. Rarit sin nroi neik bifee naan, ma nsuub ee nbi in moen je in abnapan.
11 Rarit apirsait ein neun Nai' Yesus, sin namtaun nmaten. Ma are' too mfaun re' nnenan rasi anmatoom nok nai' Ananias ma bi Safira sin a'maetk ein ate, sin namtaun amsa'.
Nai' Petrus sin nareko' amenat amfaun
12 Oras naan, Nai' Yesus In haef ein anmo'en rais sanmakat amfaun, ma too mfaun ein nitan. Haef ein sin ntaman fani-fani nbin Uisneno In Uim Onen Uuf. Sin nabuan nok nekaf mese' anbi Ropo Usif nai' Soleman. 13 Oras naan, too mfaun ein anpures Usif Yesus In apirsait ein. Mes neu sekau re' fe' ka npirsai fa Nai' Yesus te, in neekn ee na'oni' fe' ma ka nabrain fa he ntaam nabua nok sin.
14 Mes apirsait ein neun Nai' Yesus naan, na'baab 'ok amfaun piut na'ko oras neu oras, et bifee ma atoni'. 15 Onaim oras atoin ein niit anrair nai' Petrus sin anmo'en rais sanmakat huma'-huma', tuaf amfaun neikin amenat anbin a'nahek, ma natupa' sin anbin raan ee ninin. Fin sin natenab am nak, “Kar-karu nai' Petrus ma nai' Yohanis ankonon natuin ranan ia te, ma sin haofk ein antoom ahaa ameent ein on naan ate, sin bisa narekon.” 16 Anbi oras naan, atoni' ma bifee nnaon neman, ka natfeek niit fa. Sin neman na'kon kuan-kuan re' anhaumaak kota Yerusalem in ninin. Sin nroi neik ameent ein, ma Uisneno In haef ein nareko' sin ok-oke'. Sin neik aniut saes amsa', ma Uisneno In haef ein anriu' napoitan niut re'uf na'ko sin ok-oke'.
Usif Yesus In haef ein napenin ha'mu'it
17 Oras naan, natuin Usif Yesus In haef ein sin meup gwe, es na' rais pirsait Yahudi sin a'naak ko'u nok in haef-nimaf sin na'kon partei Saduki, sin nato'on. 18 Es naan ate, sin nnaon ma nheek Usif Yesus In haef ein, ma nataam sin anbin bui.a
19 Mes mabe' naan, Uisneno In ameput na'ko sonaf neno tunan tuaf es, neem anbi bui naan, ma nasoit bui naan in enon. Rarit in nok sin anpoin neu mainuan, ma in nbasan sin am nak, 20 “Oras ia, hi mnao nai meu Uisneno In Uim Onen Uuf. Amnao mitoon meu are' too mfaun ein anbi naan, he sin natuina' Usi' In Raan A'honis fe'u ia.”
21 Kik-kiuk ana' te, sin natuina' haan manbasan na'ko Uisneno In ameput sonaf neno tunan naan. Ma sin ntaman neu Uim Onen Uuf in a'fe'on, ma sin nanoni' too mfaun ein anbin naan.
Ka 'roo fa te, rais pirsait Yahudi sin a'naak kou' gwe neem nok in aok-bian sin ma nok atoni mnais harat na'ko pah Isra'el. Sin neem nabuan he ntae rais pirsait anmatoom nok Usif Yesus In haef ein. Rarit sin nreun no'en nai' Petrus sin na'kon bui, he sin n'aa' rasi naan.
22 Mes oras sin ntean bui je te, nai' Petrus sin ka etan fa naan. Es naan ate, atoin apaot ein annaon ma natonan a'naet ein anbin baer buat naan. 23 Sin natonan am nak, “Sin ama' aar ki, kais mitoo'. Oras hai iim amtea bui je te, hai miit in eon' ein ma'retu' mates. Ma apaot ein anhaken anbin naan. Mes oras hai mreun sin he nfei eno', ma hai mtaam. He'e! Hai ka miit fa saa'-saa', tua.”
24 Anneen on naan ate, a'naak rais pirsait Yahudi sin a'naakt ein, ma a'naak paot Uisneno In Uim Onen Uuf, sin aar sin antaka'naan ein ma ka fefa' mese' fa, fin sin neek ein namnekun.
25 Rarit atoin es neem ma natoon neu sin am nak, “Sin ama' aar ki, au 'baiseun, tua! Tuaf ein re' hi mitaam sin anbi bui, sin etan mone' ia! Oras ia, sin nhaken ma nfeen noni' neu too mfaun ein etan Uim Onen Uuf ia, tua!”
26 Ma oras sin nnenan on naan ate, a'naak paot Uim Onen Uuf, anreek in haef-nimaf sin he nnaon ma nheek anteni' nai' Petrus nok in aok-bian sin. Mes in haef-nimaf sin namtaun, natuin too namfau ein anneen nai' Petrus in uaban. Sin natenab nak, “Kais-kaisa' too mfaun ein nato'on ma npoir kit nok fatu.” Es naan ate, oras sin nheek anteni' nai' Petrus sin, sin ka nabe'in fa he na'seke' sin.
27 Rarit sin neik nai' Petrus sin neu bare re' npaek je he nafekan rasi. Ma a'naak kou' gwe nmurai nataan sin 28 am nak, “Hai mtaar mirair ki he kais minoni' too gwi nmatoom nok Atoni' re' he nmoe' raan a'honis fe'u naan, ai'? Hi ro mi'naak-faut! Hi ka mitniin fa hai prenat, mes hi mituin kiim hi roimk ein kiim! Hi mnao ma minoni' ka misnaas fa anfuun am nateef kota Yerusalem re' ia. Hi on re' he misaeba' kai ma'fena' mak, hai es re' amreun tuaf he na'maet Nai' Yesus naan.”b
29 Rarit nai' Petrus anhaek ma njair mafefa' neu haef ein ok-oke'. In nataah am nak,
“Sin ama' aar ki! Karu anmui' mansian nanaoba' prenat re' nasuir ma ka natai fa nok Uisneno In romin, hai ka bisa mituina' fa, tua. Mes hai ro he mituin ahaa Uisneno In aprenat! 30 Atoni' re' anfei kai ranan neu 'monit fe'u naan, es re' Nai' Yesus. In es re' Atoni' re' hi mkuus mi'peit Ee anbi hau nehe. Na'ko afi unu', hit be'i-na'i sin anromin he n'oen ein neun Uisneno. Uisneno re' naan, es re' namonib nafani' Nai' Yesus na'ko In a'maten!
31 Oras ia, Uisneno nait na'ratan Nai' Yesus, he njair In Tua Pirsa'i. Nai' Yesus annaa' kuasat on re' uis kou' gwes. In nfei ranan, he nsoi nafetin mansian ii na'ko sin saant am penu sin. In nfee kit ranan, neu too Isra'el, he tasaitan hit saant ein ok-oke', ma ttebi tfain tatuin Uisneno in raan amneot. Nok ranan naan, Uisneno In neekn ee na' ansesuum ma nmuin een, tar antea In ka nso'i ntein fa too Isra'el hit saant ein. 32 Fin hit tiit teik hit maatk ein tak, Nai' Yesus anmate nrair, mes In nmoni nfain jen amsa'. Oras ia, Uisneno In Asmaan Akninu' natoon rasi ia neu bifee-atoni' re' natuina' Nai' Yesus In Raan A'honis.”
33 Anneen anrair nai' Petrus in uab ein on naan ate, atooks ein anbin baer aa' rasi naan, anmurai ntaisibun, tar antea aar akre'o te, bait sin he na'maet niis Uisneno In haef ein. 34 Mes anbi naan, anmui' atoin es, re' nok antook he n'aa' rasi naan. In kaann ee, nai' Gamalial. Too mfaun ein anhormaat ee, natuin in re' ia tunggur ahinit na'ko partei Farisi. Oras nai' Petrus na'uab anrair, ma sin he na'maet je te, nai' Gamalial anfeen anhaek ma nreek sin he neik nai' Petrus nok in aok-bian sin anpoin ntaahn ein. 35 Oras sin anpoin, in na'uab neu a'naakt ein anbi naan am nak,
“Aok-bian aar kit! Hit ro he tpanat! Kais-kaisa' hit tmanaap he tmoe' re'uf teu sin. Hit ro he tatenab tarek-reko' fe'. 36 Hi mimnau atoin es re' in kaann ee, nai' Teudas. In nmate 'roo reu'f een. Mes oras in nmoin fe', in nait in tuan ii nak in atoin ko'u, tar antea of oni' tuaf natun haa natuin ee. Mes oras atoin ein na'maet je, in haef-nimaf sin naen namnekun. Antea oras ia, in tuaf ein re' natuin ee, ka tiit fa sin humak-matak!
37 Ma hi ro he mimnau rasi es anteni'. Oras naan, anaa' aprenat sin nanaoba' tui kanaf. Sin nsoi' too anbi pah es a'teme-'teme. Atoin es in kaann ee, nai' Judas, na'ko propinsi Galilea. Too mfaun ein natuin ee msa'. Mes sin nroor niis ne msa'. Es naan ate, in atuin ein naen namnekun, tar ka mniit ein fa gwen.
38 Onaim oras ia, au aok-bian aar ki, au utenab on nai: kaisa' mi'maet sin. Mifetin sin. Natuin karu sin nonik ma sin a'mo'ek naan na'ko mansian, tebes of namneuk. 39 Mes karu batuur nak sin nonik naan in amneemn ii na'ko Uisneno, hi of ka mibei' fa he mimouf sin. Onaim hi mpanat fe'. Kais-kaisa' hi mraban Uisneno.”
Ma oras sin anneen rasi naan ate, sin nromin he natuina' nai' Gamalial in fainekat. 40 Rarit sin no'en nataam haef ein. Ma sin nreek atoni' he nbeos sin. Rarit sin ntaar antein sin he kaisa' anteek anteni' Nai' Yesus In kanan. Onaim sin nafetin haef ein naan.
41 Rarit haef ein naan annao npoi nasaitan bare naan. Sin natenab am nak, maut he sin kaank ein namre'un natuin sin nok Nai' Yesus, mes sin nmarinan, natuin Uisneno nahiin nak sin ro pantas he nasaah ha'mu'it on re' naan. Etun sin neek ein anmariin anmaten. 42 Onaim neno-neno te, sin nnaon nfee noni' neu bifee-atoni' mfaun am nak, “Atoni' re' Uisneno nruur nain Je naan, es re' Nai' Yesus.” Ma sin natoon rasi naan piut-piut anbi umi mese'-mese', ma anbi Uim Onen Uuf amsa'.