A'naak rais pirsait Yahudi sin a'naakt ein no'en nai' Petrus ma nai' Yohanis
4
Oras nai' Petrus ma nai' Yohanis na'uab ein nok atoni' fauk fe'e te, kaes kou' gwin neman. Kasen naan esan re': a'naak rais pirsait Yahudi sin a'naakt ein, tuaf bian na'kon partei pirsait Saduki, ma a'naak paot Uim Onen Uuf. Sin neman he nmatoen nok nai' Petrus ma nai' Yohanis. 2 Kasen naan nato'on nai' Petrus ma nai' Yohanis, natuin sin nua sin natoon neu too mfaun am nak, “Nai' Yesus anmoni nfain na'ko In a'maten! Nok ranan naan, In nfei ranan neu amaets ein he nmoni nfanin amsa'.”a 3 Onaim sin nreun tuaf he nheek sin nua sin. Mes, natuin maans ii nmaeb jen, onaim sin nataam sin nua sin anbi bui. He noka' on naan ate, na' anparikas sin rasi. 4 Mes na'ko tuaf ein re' anromin he nneen ma ntoup haef ein sin noin' ein, tuaf amfaun anmanauk ein nak saa'-saa' re' haef ein nanoni' sin re' naan, ro batuur. Es naan ate, tuaf-tuaf neman ma na'baab ein piut, tar antea of oni' sin bu'-bua' tuaf nifu niim. 5 Noka' on naan ate, atoin Yahudis sin a'naet ein nabuan anbin kota Yerusalem. Sin esan re': a'naakt ein, atoni mnais haart ein, ma tunggur agama Yahudi sin. 6 A'naak rais pirsait Yahudi sin a'naak kou' gwe msa' nok anbi naan. In kaann ee, nai' Hanas. A'naet bian antein, esan re' nai' Kayafas, nai' Yohanis, nai' Aleksander, ma nai' Hanas in uim je nanan sin nokan anbin naan amsa'. 7 Oras sin aar sin antaam nabuan ate, sin nreek tuaf he neik nai' Petrus ma nai' Yohanis, he sin nateef nok sin. Oras sin nua sin ntaman nrarin ate, a'naet ein natanan am nak, “Anmoe' on mee m'es re' hi bisa mireko' atoin ameen bua' naan? Hi mpaek kuasat mi'ko sekau? Ma sekau es re' anreun ki he hi mibrain he mmoe' on re' naan?”
8 Rarit Uisneno In Asmaan Akniun' ee nha'tain nai' Petrus in nekan. Onaim in nataah am nak,
“Sin ama' aar ki! Hi es re' amjair a'nakat ma atoni mnais harat meu too Isra'el ok-oke'! Kais mitoo', karu hai on re' mtaka'nana' kre'o. 9 Atkisu te, hi on re' he mmaka'rasi' mok kai, natuin hai mturun ma mireko' atoin ameen bua' tuaf es. Onaim hi mitaan kai, hai mireko' atoni' naan, mpaek sekau in kuasa? 10 Onaim au he utoon 'eu ki on nai: ama' sin aar ki mimnau atoin Nasaretas es, re' In kaann ee Nai' Yesus. In es re' Kristus, re' Uisneno nruur ma nreek nain Je na'ko unu'. Ma hi es re' amkuus mi'peit Ee nbi hau nehe. Mes Uisneno namonib nafain' Ee na'ko In a'maten. Au 'roim he sin ama' aar ki mok too Isra'el ok-oke' mihiin mak hai mireko' atoin ameen bua' re' ia, meik Nai' Yesus re' ia In kuasan. 11 Anbi Uisneno In Suur Akninu' matu'i nrair anmatoom nok Nai' Yesus re' ia mnak,
‘Anmui' faut gwes re' atukan fautn ein nait inporin,
mes namuni te, fatu naan anjair fatu 'sukif neu nii ainaf.’b
12 Anbi pah-pinan ia no mes-mese', Uisneno ka nfei fa ranan 'teta' he nsoi nafetin kit ta'ko hit saant am penu sin. Suma arahaa ranan mese', es re' Nai' Yesus. Karu ka In fa te, ka tiit fa es, re' bisa nfee kit a'honis.”
13 Atooks ein anbin naan nahinin nak, nai' Petrus ma nai' Yohanis, sin nua sin too amonot, ka on fa askoort ein. Mes sin nsanmakan, natuin sin nua sin na'uab ein maat-maat ma nabranin. Sin nahinin nak nua sin a'hakef mese' ma 'naof mese' nok Nai' Yesus. 14 Etun sin amninu'-mniun ein, ma ka fefa' mese' fa. Saa' antein, atoni' re' nareok na'ko meen bua' naan anhaek nakeit nok nai' Petrus ma nai' Yohanis anbi naan. 15 Rarit sin nreun Nai' Yesus In haef ein nua sin nak, “Hi mpoi mtahan meu mone'.” Onaim sin na'uab ein he namin ranan he namouf sin. 16 Sin nmaktaan ein am nak, “On mee? Hit he tmoe' sin on mee? Natuin abitan kota Yerusalem ok-oke' nahinin nak sin re' naan es re' nmoe' rais sanmakat ia. Hit he tpeen teik uab saa' attein? Fin rasi ia mamnita' maat-maat. 17 Reko nneis, hit taim ranan he rasi ia ma'kuba' ma ma'koro', ma kais natoon on anbi mee-mee. Reko nneis, hit aka'tau sin ma ta'kua' sin, he sin kais anfeen noni' antein anmatoom nok Nai' Yesus In Raan A'honis. Karu sin ka natninan fa te, of sin nahinin, aa oo!”
18 Rarit a'naet ein no'en nataam sin ma na'uab neu sin am nak, “Amneen mirek-reko'! Ka nabei' fa he mfee noni' amtein anmatoom nok Nai' Yesus!”
19 Mes nai' Petrus ma nai' Yohanis natahan am nak, “Bait hi mitenab mirek-reko', tua. Mee es re' reko nneis? Tatuina' hi preent ii te, es re' reko nneis ii oo, ai' tatuina' prenat Uisneno? 20 Hai miit meik hai maatm ein, ma hai mneen meik hai ruikm ein are' kanan rasi namfau. Nansaa' am es hai bisa mimninu'? Hai ro he mitoon rasin naan!”
21 Mes a'naet ein re' antokon ma n'aa' rasi naan, antaar antein sin. Rarit sin nafetin tua nua ein naan, natuin sin ka nahini ntenin fa neu he nhukun sin nok saa'. Ma sin namtaun amsa', kar-karu too mfaun ein antaisibun. Fin too mfaun ein anbo'is Uisneno In kanan, natuin atoin ameen bua' naan nareko nrair. 22 (Atoin ameen bua' naan, nameen naan toon bo' haa nneis, es na' in bisa nnao naan.)
Usif Yesus Iin na an'oen ein ma ntotin he sin kais namtaun
23 Oras sin nafetin nai' Petrus ma nai' Yohanis, sin nua sin antebi nfanin ma natefan nok sin aok-bian sin. Rarit nua sin natonan sin are' uab ma taras re' sin nneen sin na'ko a'naet ein. 24 Anneen anrair on naan ate, sin aok-bian sin nabuan nok nekaf mese', ma an'oen ein am nak, “Uisneno, Akuasat Afin-finit. Uisneno Amo'et-Apakaet neno tunan ma pah-pinan nok in afan.c 25 Unu' te, Ho Asmaan Akninu' anpaek ka'o Daut anjair Ho mafefa kninu', he ntui nain rasi anmatoom nok atoni' re' anraban Nai' Yesus am nak:
‘Atoni' na'ko uuf ma pah bian, nato'on natuin sin nnenan uab anin.
Sin nrunan rafu'-rafu' ma nanaoba' rasi re' ka ma'u'u fa.
26 Are' usif pah-pinan nabuan he sin nmakenan ma nmaraban Uisneno.
Ma a'naakt ein anneek a'buan he nraban Uisneno nok Kristus,
es re' Atoni' re' Uisneno nruur nain Je na'ko afi unu'.’d
27 Namneo, saa' re' ka'o Daut antui nain je naan, njari nrair oras ia. In a'moufn ii mamniit een. Anbi kota ia in nanan, usif Herodes ma gubernur Pontius Pilatus nabuan nok hai atoni mnais ein pah Isra'el, ma nok a'naakt ein na'kon pah bian. Sin aar sin namin ranan he nraban Nai' Yesus, Tuaf re' Uisneno Ho mbetis main Je ji.e 28 Mes oras ia, hai mihiin namneo-namneo mak, are' saa' ein naan antoom Uisneno Ho romim, natuin saa' re' Ho mufeek main je mbi afi unu'. 29 Koi Usi' Ho miit! Fin oras ia, sin n'aka'tau kai. Onaim hai mbaiseun ma mtoit Ko Usi', amfee kai neek ha'tanis, he oras hai mnao ma mitoon Rais Arekot anmatoom nok Nai' Yesus, kais nok neek amtaus. 30 Hai mtoit Ko, he mfee kai kuasa, he hai bisa mireko' are' ameent ein. Ma hai mtoit kuasa msa' he hai mmoe' are' rais sanmakat huma'-huma' he sin nahinin nak, kuasat naan in amneemn ii na'ko Atoni Kninu' re' Uisneno nreek haefn Ee, es re' Nai' Yesus. Hai onen na'tuuk ma na'paar on re' naan, tua!”
31 Oras sin n'oen ein on naan ate, umi re' sin nabuan anbi naan, na'hasu'. Ma sin aar sin annaben Uisneno In Asmaan Akninu' antaam neu sin. Rarit sin npoin ma natoon Uisneno In Rais Reko nok maat-maat.
Apirsait ein nmoin nabuan anbi suust am marinet
32 Onaim are' apirsait ein neun Nai' Yesus, sin nekaf mese' ma ansaof mese', ma nmanekan es nok es. Ka tiit fa apanit, fin sin nmabatin es nok es. Bare' mee re' tuaf es iin ja, anfee je he sin aar sin npaek namnes-nesan.f 33 Ma Uisneno nfee In kuasat neu In haef ein, he natonan neun too mfaun ein am nak, “Usif Yesus anmoni nfain na'ko In a'maten. Ma hai miit amrair Je meik hai maatm ein kiim.” Rarit Uisneno nfeen sin tetus natho-hoe. 34-35 Anmui' tuaf na'ko sin re' naan, na'sosa' in afu, ai' in uim je. Ma osaf na'ko baer' ein naan, sin nnona' sin neun Uisneno In haef ein. Onaim sin npaek sin he nturun ma nbaab sekau-sekau re' anma'nuuk. Onaim ka tiit fa tuaf es re' ankuran saa' es anbi sin.
36-37 Tareta' on re' nai' Yusuf. In re' ia, na'ko uuf nai' Lewi, ma in na'ko puru Siprus. (Uisneno In haef ein sin nteek ee te nak ‘Barnabas’, re' in a'moufn ii nbi hit uab ii te nak, ‘atoni' re' anha'tain nekaf neu tuaf bian’.) In nnao ma na'sosa' in afu piis es, rarit in nnona' roit ein naan neu Uisneno In haef ein.