Nai' Petrus nareko' atoin ameen bua' es
3
Anbi neon gwes, nreuk teun maans ii nmaeb, nai' Petrus nok nai' Yohanis annaon anbin Uisneno In Uim Onen Uuf he n'oen ein nok tuaf bian. 2 Sin he nnao ntaman natuin eon kou' gwes re' in kaann ee, ‘Eno' Amasat’. Anbi naan, sin niit atoin es, re' haen ein anbuan na'ko oras in ainf ee nahoins ee ji. Neno-neno te, atoin ein anbaib neik je neu bare naan, he in bisa ntoit saa'-saa' na'ko sekau-sekau re' anpe'on eno' naan he ntaam neu Uim Onen Uuf. 3 Ma oras in niit nai' Petrus nok nai' Yohanis he ntaman neun Uim Onen naan in nanan, in nnona' in a'niman ma antoti mnak, “Airoo, ama' sin! Hi mturun maan kau fe'. Amfee maan kau saa' akre'o.” 4 Sin nua sin ankius na'tesan atoin ameen bua' naan, rarit nai' Petrus na'uab am nak, “Ba'e! Amkius uum fe'!”
5 Atoni' naan nait in matan ma nkius sin nua sin. In natenab am nak, “Sin nua sin of he nfee kau saa' es.”
6 Mes nai' Petrus na'uab am nak, “Ba'e! Au ka 'mui' fa roit sen mese'. Mes oras ia, au he 'fee ko saa' re' au 'mu'i. Amneen murek-reko', tua! Nok kuasat na'ko Yesus Kristus, atoin Nasaretas naan, au 'ak ko: amfeen he mnao nai!”
7 Rarit nai' Petrus annaa' atoin ameen bua' naan in a'niman a'ne'u ma nfiit nahake'. Oras naan, in haen ein nareok nanin. 8 Nok askeken, in ntaikreit, ma annao neu-mneem he na'taka' in haen ein. Rarit in nok antaam anbi Uim Onen nok sin nua sin. In nnao nok, antaikreit nok, ma anbo'is Uisneno. 9 Are' too mfaun ein nbin bare naan niit ee annao ma nbo'is Uisneno.
10 Oras sin nahiin je te, sin nsanmakan ma na'uab ein am nak, “Atoni' re' ia, in es re' atoin ameen bua' re' ntoit roit neno-neno nbi Eon' Amasat, ai'? On mee m'es in nareok?”
Nai' Petrus na'uab anbi Uim Onen Uuf ee nanan
11 Rarit atoni' naan annao nabua nok nai' Petrus ma nai' Yohanis. Sin teun sin antean roop mainuan es, kaann ee ‘Ropo Usif nai' Soleman’. Rarit are' too mfaun ein neman ma nauban sin nok neek sanmakat. 12 Oras nai' Petrus niit too mfaun ein naan ate, in nmurai na'uab am nak, “Atoin Israelas ki! Nansaa' am es au aok-bian aar ki, hi msanmaak oras hi mkius rasi ia? Nansaa' am es hi mkius kai piut? Oni' hi mak atoni' ia bisa nnao, natuin hai mpaek re'u oo, ai' natuin hai mmakoe he mituina' Uisneno? Ai' on mee? 13 Au he utoon ki on nai: hit be'i-na'i sin, esan re' nai' Abraham, nai' Isak, ma nai' Yakop, sin na'ruir ein ma na'besan neu Uisneno. Uisneno re' naan, es nait na'ratan In Atoni' re' In npiir nain Je naan, es re' Nai' Yesus. Nai' Yesus re' naan, es re' maeb es ii, hi mait maan Ee ma minaa't Ee meu gubernur Pilatus. Gubernur ee he nafeitn Ee, mes hi mraban in nromin re' naan, he kais nafetin Nai' Yesus.a 14 Mes Nai' Yesus naan, Atoni' re' ka nmui' fa sanat. In neekn ee reko. Gubernur ee he nafetin Atoni' re' ka nmui' fa sanat naan, mes hi aar ki mraabn ee nok ma'tani'. Re' re'uf anneis-neis ji hi mikeekt ee, he nafetin atoin amoe' re'uf es, re' aroor atoni', he nnona' nafain' ee neu ki.b 15 Onaim hi es re' amroor miis Nai' Yesus. Te kaah, In es re' Uuf neu 'Monit. Amneon ii, In nmaten nrair jen, mes Uisneno namonib nafain' Ee na'ko In a'maten. In re' ia, es re' hai miit Ee nok hai maatm ein kiim.
16 Hi mihiin main atoin ameen bua' re' ia. Oras ia, in ma'tain jen, mes ka hai fa es re' mireok' ee. Hai ka mmui' fa kuasat saa'-saa'. Kuasat naan neem na'ko Nai' Yesus kuun. Atoni' ia anfeen ma nhaek natuin in npirsai neu Usif Yesus. Fin Usif Yesus naan es re' nareko' nain je ma hi miit mok hi maatm ein.
17 Aok-bian aar ki! Oras ia, au uhiin 'ak hi mok hi a'naakt ein ammoe' amre'ut meu Nai' Yesus. Mes hi ka mihiin fa in a'poin ii on mee. 18 Mes Uisneno natoon anrair et afi unu', npaek In mafefa kninu' sin am nak, Anah re' In npiir anrair Je naan ro he napein ma'ne'at. Rasi naan, njari nrair. 19 Es naan ate, hi ro he misaitan hi saant am penu sin, ma mtebi mfain iim meu Uisneno, maut he In nnoes nain sin, ma ka namnau nteni' sin fa. 20 Uisneno of anha'tain hi neekm ein. Ma Uisneno of ansonu' nafani' neu ki, Kristus re' In npiir anrair Je naan. Ma Kristus re' naan, es re' Nai' Yesus re' In nreek anrair Je neem neu ki. 21 Na'ko afi unu', Uisneno na'uab anpaek In mafefa kninu' ein am nak, ‘Uisneno of nanoon ma naneo are' kanan rasi, tar antea sin njarin fe'u.’ Es naan ate, Nai' Yesus ro he npao nbi In Baran Akninu' tar antea In neem he na'fe'u are' rasi.
22 Ka'o Musa na'uab niit amsa' neu atoin Israelas am nak,
‘Hi A'nakat naan, es re' Uisneno, of In nreek haefan Atoin es na'ko ki he njair In mafefa kninu', on re' In npaek kau a'jair In mafefa'. Es naan ate, hi ro he mtakan hi ruikm ein ma mneen are' saa'-saa' re' In natoon ki sin.c 23 Mes sekau re' ka nroim fa he nneen narek-reko' Atoni' naan In uabn ate, Uisneno of nait inporin nain je na'ko Iin na, ma ka nmui' fa hak antein nok sin.’d
24 Ka ka'o Musa nmees na'uab aah fa rasi naan. Mes Uisneno msa' anpaek tuaf bian antein, he njarin In mafefa', ma sin natonan are' rasin naan amsa'. Re' afi ahunut, Uisneno npaek ka'o Samuel, he natoon rasin re' muni' ia hit tiit sin teik hit maatk ein. 25 Uisneno anba'an amsa' neu ka'o Abraham am nak,
‘Na'ko ho sufam-ka'um tuaf es, Au of a'fee tetus-athoen 'eu are' uuf am pah anfuun am nateef pah-pinan ia.’e
Are' rais manba'an re' Uisneno nfee sin neu In mafefa kniun' ein unu' naan, oras ia najairb ok anbi hi sonam ma hi tnanam, es re' au aok-bian ki atoin Israelas ki. 26 Uisneno nreek haefan In Anah re' In npiir nain Je, he naruru' ma nakrira' ranan, maut he hi misaitan hi saant am penu sin. Nok ranan naan, In nakrira' In nekan arekot neu ki. Uisneno nreek haefan In Anah naan nahuun neu ki, rarit na' In nreek haefn Ee neu uuf am pah bian ein. Naan anjari tetus-athoen neu kit aar kit.”