Uisneno In Asmaan Akninu' antaam neu sin
2
1-2 Nateef nok atoin Yahudis sin neon ko'u re' sin nteek ee tnak ‘Neon Pantekosta’,a are' too mfaun re' natuina' Nai' Yesus, sin nabuan anbin uim jes.b Nok askeken ate, sin nnenan a'ruuf es neem na'ko neon gwe tnanan nahuum on re' ain nautus. A'ruuf naan kou' re'uf, tar abitan re' naan ka nmanenan fa hanaf es nok es karu sin na'uab ein. 3 Rarit sin niit anteni' nahuum on re' ai pina' ansakan anbi sin mese'-mese'. 4 Onaim Uisneno In Asmaan Akninu' antaman sin aar sin. Rarit sin na'uab ein neik uab pah bian, anmatoom nok saa' re' Asmaan Akninu' natoon ee neu sin. 5 Oras naan, atoin Yahudis na'kon bare-bare et pah-pinan ia, neem nabuan anbin kota Yerusalem. Sin neek ein nmarinan he natuin Uisneno. 6 Oras sin nneen a'ruuf naan, sin aar sin neem nabuan anbin bare naan. Ma mese'-mese' anneen in uaba' na'ko Usif Yesus In haef ein sin ruurk ein. Onaim sin aar sin ansanmakan. 7 Sin aar sin anmasahun tar sin na'uab ein am nak, “A'uab ein ia sin aar sin atoin Galileas, ai'? 8 Nansaa' am es hit tneen sin na'uab ein neik uab na'ko hit pah aa kuuk mese'-mese'? 9 Hit aar kit teem ta'ko propinsi Partia, Media, Elam, Mesopotamia, Yudea, Kapadokia, Pontus, Asia, 10 Frigia, Pamfilia, Masir, ta'ko Libia re' anhaumaak kota Kirene; hit bian neman na'kon kota Roma; 11 ma bian anteni' neman na'kon puru Kreta, ma pah Arap. Hit atoin Yahudis ma atoni' pah bian re' attaam atbi rais pirsait Yahudi. Hit aar kit atneen sin na'uab ein neik hit uab mese'-mese', anmatoom nok are' rais ma'tain reu'f ein re' Uisneno anmoe' nain sin. Aijoo! Hit tsanmaak ma tamkaak batuur-batuur!”
12 Sin aar sin namkakan, ma sin nmaktaan ein es nok es am nak, “On mee m'es bisa anjair on re' ia? In a'moufn ii, saa'?”
13 Mes bian na'akan sin, ma na'uab ein am nak, “Phueh! Kais amtoe mok sin, natuin sin nmafu nmaten, tua!”
Nai' Petrus na'uab neu too mfaun ein
14 Nai' Petrus, ma Usif Yesus In haef ein tuaf bo'es am mese', nokan nbin naan. Rarit nai' Petrus neiki ntaam akre'o, ma na'uab neu too mfaun ein re' nabuan anbin naan. In na'uab naher-heer am nak, “Aina'-ama', aok-bian ki ok-oke'! Hi re' atoin Yahudis, ma hi re' iim ma mitua ambi kota Yerusalem re' ia! Amtakan hi ruikm ein ma mneen mirek-reko' meu saa' re' au he u'uab, natuin anmui' uab uuf es, re' au he utoon ee 'eu ki ok-oke'. 15 Hi kais mitenab mak sin re' ia anmafun raur tua min-kase. Sin ka neu he nmafun fa, tua! Mimnau, ka tiit fa es he niun raru he namauf gwe kik-kiku. Saa' anteni' fe' anreuk seo! 16 Hi mneen sin aar sin na'uab ein neik hi uab ein ii mese'-mese'. Amneon ii on nai: oras naan, Uisneno natoon anrair rasi ia neu In mafefa kninu' nai' Joel am nak,
17 ‘Uisneno na'uab am nak, “Anbi neon amsoupt ein,
Au of usanut Au Smanak 'eu bifee-atoni' sin ok-oke'.
Hi aan feto ma hi aan mone,
of Au 'paek sin anjarin Au mafefa kniun' ein.
Hi aan muinf ein naan,
of niit saa' re' Au he ururu' 'eu sin anbin amnitas.
Ma hi atoni mnais ein naan,
of niit saa' re' Au he ukrira' 'eu sin anbin amneit.
18 Nateef neon amsoupt ein,
Au 'fee Au Smanak 'eu Au aan renu'-aan reka' sin.
Au 'fee 'eu atoin ein,
ma Au 'fee 'eu bifee nggwin amsa'.
Of sin na'uab saa' re' Au utoon ee 'eu sin.
19-21 Of Neon Uisneon nggoe ntea, mes nahuun na'ko neno naan antea,
Au of a'moe' uhunun rais sanmakat huma'-huma' anbi neon gwe tnanan.
Rais sanmakat on re' maans ee nameis'ook;
ma fuun ee of mee' rare on naa'.
Au he 'moe' rais sanmakat maineun re'uf anbi pah-pinan ia msa'.
Rasin naan, on re' naa', ai, ma masu' re' ansae kbo'es-akbo'es neu neon gwe tnanan.
Ma nbi Uisneno In nenon re' maineun reu'f ein naan, sekau es re' anhunun ma antoit rais turun-babat na'ko Uisneno te,
Uisneno of nsoi nafetin sin.’”c
Naan re' nai' Joel antui nain je, et afi unu'.
22 Aok-bian atoin Israelas aar ki! Hi mtakan hi ruikm ein ma mneen saa' re' au he utoon ki oras ia. Uisneno nruur ma nreek nain Nai' Yesus, atoin Nasaretas naan. Hai mihiin batuur, natuin hai miit meik hai matam, nak Uisneno anpaek Je he nmoe' rais sanmakat anjair rasi mkakan re' maineun re'uf. Hi mihiin rasi ia msa', natuin Nai' Yesus anmoe' rais sanmakat huma'-huma' nbi hi sonam ma hi tnanam. 23 Mes hi mroor miis Ne, meik ranan amtoit meu amoe' re'uf he nkuus na'peti' In tuan ee nbi hau nehe. Te kaah, naan Uisneno nahini nrair na'ko afi unu', ma naan antoom In sarit.d 24 Namneo hi mmoe' on re' naan tar antea In nmaet batuur. Mes Uisneno ka nroim fa he Nai' Yesus antuup nabaar. Es naan ate, Uisneno nafeitn Ee na'ko rasi 'maten in kuasan, ma namonib nafain' Ee. Fin rasi 'maetn ii in kuasan ka nabei' Je fa.e
25 Unu' te, usif nai' Daut antui rasi anmatoom nok Nai' Yesus, on nai:
‘Au uhiin 'ak Uisneno nok kau piut-piut.
Es naan ate, ka tiit fa saa' es, re' nabei' he namouf kau,
natuin Uisneno anhaek piut et au bnapak.
26 Au neek ii nmariin, natuin rasi naan;
ma au 'bo'is u'naeba' Uisneno piut,
ma au u'tena' he 'pao Gwe.
27 Fin In ka nkonan fa au smanak he natua nabaar anbi bare neu amaets ein.
Ma Uisneno ka nparakan fa In Tuaf Akninu' In Aon-Ta'un he npuun anbi nopu.
28 Uisneno natoon kau raan a'honis re' amneot.
Es naan ate, au neek ii nmariin anmaet,
natuin Uisneno nok kau piut.’f
Naan re' usif nai' Daut antui nain je, et afi unu'.
29 Aok-bian aar ki! Oras ia mfee kau mainuan akre'o, he au u'uab nok akninu', uab re' anmatoom nok ka'o Daut. In na'uab on naan, mes in ka nteek on fa neu in tuan ii nmees. In nmate nrair, ma nsuub anrair je, ma in naetn ee et hit atnaank ii fe' tar antea neno ia. 30 Usif nai' Daut re' naan, Uisneno In mafefa kninu'. Ma in nahiin nak Uisneno anba'an neik rais supat nak, in sufan-ka'un tuaf es na'ko nai' Daut of es annaa' aprenat, es re' Tuaf re' Uisneno anruur ma nreek nain Je na'ko afi unu'.g 31 Oras naan, nai' Daut ankius na'roo neu neon amnemat. Ma in natoon nahuun anmatoom nok Tuaf re' Uisneno nruur ma anreek nain Je. Nak Tuaf re' naan of anmoni nfain na'ko In a'maten. Ma nai' Daut nak Tuaf naan amsa' of ka nabaar fa nbi bare neu amaets ein, ma in aon-ta'un ka npuun niit fa.
32 Tuaf re' nai' Daut natoon ee naan, es re' Nai' Yesus! Uisneno namonib nafain' Ee na'ko In a'maten. Ma hai aar kai miit nok hai matam. Namneo, In nmoni nfain. 33 Oras ia, Uisneno nait na'rat-ratan anrair Nai' Yesus ma nfee Ne 'toko' ma kuasa ko'u nneis. In ntook et Uisneno In abnapan a'ne'u, et bare re' Uisneno nabarab nain je. In Aamf ee anfee Ne In Asmaan Akninu', on re' Uisneno anba'an nain je et afi unu'. In anba'an amsa' he nfee kit In Asmaan Akninu' naan. Onaim oras ia, saa' re' hi mneen ma miit ee, naan Uisneno anfee In Asmanan. 34 Nai' Daut ka nsae niit kuun fa ntea neon gwe tnanan, mes in ntui niit am nak,
‘Uisneno na'uab neu au usi' mnak,
“Amtook nai mbi Au abnapak a'ne'u, mbi bare re' Au ubarab 'ain je,
35 tar Au 'moe' ho muusn ein anri'tuun neu ko.’”h
36 Es naan ate, hi atoin Israelas aar ki ro he mihiin batuur anmatoom nok Nai' Yesus re' hi mkuus miis Ne naan. In es re' Kristus, re' Uisneno npiir nain Je na'ko un-unu', ma In njair A'nakat neu kit amsa'.”
37 Annenan on naan ate, sin neek ein akrati'-krati'. Onaim sin nataan nai' Petrus nok haef bian sin am nak, “Eee, ba'e sin! Onaim oras ia, hai he mmoe' on mee, tua?”
38 Rarit nai' Petrus nataah sin am nak, “Hi aar ki mese'-mese' ro he misaitan ma mifetin hi sanat ma penu sin, ma mtebi mfain mituina' Uisneno. Rarit hi ro he mnona' hi tuam ein he nasrain ki, he njair tanar nak, hi mi'te'un ma mi'bani' hi 'moint ii he mituina' Yesus Kristus In raan a'honis. Naan njair tanar amsa' nak, Uisneno nsaok nain are' kanan hi sanat ma penu sin. Ma hi of mipein Uisneno In Asmaan Akninu' amsa'.
39 Fin Uisneno nba'an nain he nfee Je neu are' tuaf re' ntaam anjair Iin na. Nok ranan naan, In najarib In rais manba'an neu ki ma neu hi sufam-kau'm ein. In nba'an on re' naan amsa' he nfee Je neu tua sona' antein.”
40 Nai' Petrus na'uab amnanu' neu sin fe', am nak, “Oras ia, too mfaun ein anseken ma nbeon ok na'kon raan a'honis amneot. Es naan ate, hi ro he mpanat mirek-reko' he kais hi mituina' amoe' reu'f ein sin ranan. Hi ro he mituin meu Uisneno In raan amneot ma amnonot naan. Nok ranan naan ate, of Uisneno nsoi nafetin ki, he hi mmoin mibaar mok Ne.”
41 Rarit too mfaun ein antoup nai' Petrus in uaban. Onaim sin ntaam natuin Nai' Yesus In Raan A'honis, ma sin nnona' sin tuak ein he nasrain sin. Neno naan, tuaf nifu teun antaam anjarin apirsait neu Nai' Yesus. 42 Sin nromin he nabua nok biak ein re' natuina' Nai' Yesus. Ma sin nmonin reko es nok es. Neno-neno te, sin nmakoen he nneen noni'-taru' na'ko Usif Yesus In haef ein. Sin n'oen ein te nabuan. Sin nbukaen nabuan amsa'.
Apirsait ein sin a'moink ein
43 Oras naan, Usif Yesus In haef ein anmo'en rais sanmakat amfaun, tar antea are' too mfaun ein ansanmakan ma namtaun amsa'. 44 Apirsait e0in re' natuina' Usif Yesus In Raan A'honis naan, nabuan ma nmonin nok nekaf mese', tar saa'-saa' re' sin nmui' je te, sin aar sin anpaek nabuan.i 45 Bian na'sosa' sin baer' ein ma sin a'mui'k ein, rarit anbait roit ein naan neu apirsait ein, mese'-mese' natuin in perluut. 46 Neno-neno te, sin nromin he nabuan anbin Uisneno In Uim Onen Uuf. Sin aar sin anbukaen natnan-nanin na'kon uim jes neun uim jes nok neek marine. Sin aar sin anmatuurn ein es nok es, ma ka napain nitan fa. 47 Ansuun neno, sin npures ma nbo'is Uisneno ka natfeek niit fa. Biak ein re' ka nabua nok sin fa anmarinan sin amsa'. Neno-neno te, Uisneno nsoi nafetin tuaf bian, ma sin antaam nabuan nok Usif Yesus Iin na. Tar antea sin nma'baab ein amfaun piut.