Usif Yesus naruru' ma nakrira' In tuan ee neu In atoup noni' tuaf hiut
21
Ankoon neno fauk on naan ate, Nai' Yesus nakrira' In tuan ee ntein anbi nefo Tiberias in ninin. In reetn ii, on nai: 2 Oras naan, Nai' Yesus In atoup noni' tuaf hiut nabuan. Sin re' naan esan re':Nai' Simon Petrus,
nai' Tomas, re' sin nteek ee mnak, ‘ri'aan koen’,
nai' Nitanel, na'ko kuan Kana et propinsi Galilea,
nai' Sebedius in anah tuaf nua,
ma Nai' Yesus in atoup noni' tuaf nua ntein.
3 Nai' Simon Petrus na'uab neu in partei nggwin am nak, “Au he 'nao 'okar au pukat.”
Onaim sin natahan am nak, “Neu, reko! Hai mok amsa'.” Rarit sin nnaon neun neof gwe in ninen. Onaim sin nsaen kofa' he nnao namin ika'. Mes mabe' naan sin ka napenin fa saa'-saa'.a
4 Noka' kiku on naan ate, Nai' Yesus anhake nbi neof gwe ninen. Mes In atoup noin' ein ka nahinin fa neu In re' naan, Nai' Yesus. 5 Onaim In n'aupun he nataan sin im nak, “Aupuu! Ba'e sin! Mipein imrair ika, oo?”
Sin natahan am nak, “Kaah fa, tua! Hai ka mipein fa kre'o msa'.”
6 Onaim Nai' Yesus natoon neu sin im nak, “Am'okar miit pukat naan neu koof' ee aon-bian. Hi of mipein.”
Rarit sin nmoe' natuin ein. Onaim sin napenin ika'. Mes iik' ein naan namfa-faun, tar antea sin ka bisa nheer fa pukat naan anfain neu koof' ee nanan.b
7 Au 'bi naan amsa'. Au re' ia, atoup noni' re' Nai' Yesus anneek. Rarit au utoon 'eu nai' Petrus 'ak, “Airoo! Hit Usi' es re' nee!”
Anneen au uab ii on naan ate, nai' Simon Petrus anpaek nafani' in baru, rarit an'ookr on antaam anbi nefo he nabhae' neu meto'. 8 Fin kofa' naan na'roo of oni' suma meter nautn es na'ko meto'. Rarit in partei nggwin nfoe' kofa' nfain neu meto', ma nheer neik pukat re' naheun nok ika' na'ko kofa' naan in kotin.
9 Oras sin ntean anbin meto', sin nkius ai makraha' re' npiin anbi naan. Anbi ai je fafon, anmui' ika', ma nmui' utunu' msa'. 10 Nai' Yesus na'uab neu sin im nak, “Meik neem ika' fua' fauk mi'ko re' hi mheek maan sin fe'e na.”
11 Rarit nai' Simon Petrus ansae nfani nbi koof' ee nanan, he in nheer pukat naan neu meto'. Pukat naan naheun nok iik ko'u. Sin amfauk ein, nautn es bo' niim am teun (153). Maski iik' ein namfaun on naan, mes pukat naan ka natpisu' fa.
12 Rarit Nai' Yesus anhaman sin im nak, “Iim, he mbukae fe'!”
Sin nahini nrarin nak, In re' naan, sin Usin. Es naan ate sin ka nabranin fa he nataan am nak, “Ba'e re' ia, sekau?” 13 Rarit Nai' Yesus nait utunu' ma ika', onaim annao nfee sin.
14 Naan, es re' no teun ii Nai' Yesus naruru' ma nakrira' In tuan ee neu In atoup noin' ein, oras In nmoni nfain na'ko In a'maten.
Usif Yesus na'uab nok nai' Petrus
15 Oras sin anbukae nrarin, Nai' Yesus nataan nai' Simon Petrus am nak, “Simon, nai' Yohanis in anah. On mee? Ho mneek Kau mneis mu'ko ho partei nggwin ia nneek Kau, oo?”
In nataah am nak, “Batuur, Usi'! Ho muhiin amrair mak, au 'neek Ko, tua.”
Onaim Nai' Yesus anbaasn ee mnak, “Karu on naan ate, mutuuk murek-reko' Au 'bib-kaes aan ein he sin napenin amnahat.”
16 Rarit Nai' Yesus nataan antein' ee mnak, “Simon, nai' Yohanis in anah. On mee? Ho mneek Kau, oo?”
In nataah am nak, “Batuur, Usi'! Ho muhiin amrair mak, au 'neek Ko, tua.”
Onaim Nai' Yesus anbaasn ee mnak, “Karu on naan ate, mpijaar ma mpairoir murek-reko' Au 'bib-kasen.”
17 Rarit Nai' Yesus nataan antein' ee mnak, “Simon, nai' Yohanis in anah. On mee? Ho re' ia, Au partei ja, oo?”
Onaim nai' Petrus in neekn ee nsuus nain, natuin Nai' Yesus nataan no teun gwen nak, “Ho mneek Kau, oo?” Rarit in nataah am nak, “Ho es re' muhiin main raisn ein ok-oke'. Onaim Ho muhini mrair mak, au re' ia, Ho partei ja, tua.”
Rarit Nai' Yesus anbaasn ee mnak, “Karu on naan ate, mutuuk murek-reko' Au 'bib-kasen he sin napenin amnahat. 18 Ho mheke mrair Au sairt ii, oo? Au he utoon ko on nai msa': unu' te, oras ho munif ko fe'e te, ho biasa mpaek kuum baru, ma mpaek kuum pasu 'futu', rarit ho mnao meu mee ja haa, mutuin ho romim. Mes oras ho mumnasi mrair, ho of amnona' ma mfee ho 'nimam he atoni' bian anfuut sin, anpaek kuuk ho pasu 'futu'. Rarit sin nheer neik ko msa' meu baer jes re' ho ka mroim je fa.” 19 (Nai' Yesus na'uab on naan, he natoon neu nai' Petrus anmatoom nok saa' re' of anjair neu in tuan. Fin nai' Petrus in a'maten of naruru' ma nakrira' Uisneno In pinan ma krahan.)c
Rarit Nai' Yesus na'uab neu nai' Petrus am nak, “Uum he mjair Au nggwin nai!”
Atoup noni' re' Usif Yesus anneek
20 Oras naan, nai' Petrus nabani' he nkius neu koit. In nkius kau utuin sin nua sin na'ko sin koitk ein. Au re' ia, atoup noni' re' Nai' Yesus anneek. Au es re' a'took a'bi Nai' Yesus In aon-bian amsa', oras hai mtook ma mbukae fesat Paska. Au re' ia, es re' utaan Ee m'ak, “Usi'! Sekau of es re' na'sosa' Ko, tua?”d 21 Oras nai' Petrus ankius niit kau te, in nataan Nai' Yesus am nak, “Usi'! Ho mu'uab amrair meu kau fe'e na. Mes on mee, nok tuaf re' nee?”
22 Nai' Yesus na'uab neu nai' Petrus am nak, “Ka ho urusn aa fa. Kar-karu Au 'roim he in suma npao nbi ia gwah tar antea Au 'fain 'uum ate, in raisn ii saa'? Re' pentiing ii, ho ro he mumnau saa' re' Au 'ba'an ko fe'e na, es re': uum he mjair Au nggwin nai.”
23 Natuin Nai' Yesus na'uab on naan, In atoup noni' bian anmurai na'uab ein am nak, “Nai' Yohanis naan, ka neu nmaet fa.” Te kaah, Nai' Yesus ka na'uab fa on naan. Re' In nak ii, es re': “Ka ho urusn aa fa. Kar-karu Au 'roim he in suma npao nbi ia gwah tar antea Au 'fain 'uum ate, in raisn ii saa'?”
Nai' Yohanis nasoup in surat
24 Atoup noni' re' Nai' Yesus na'uab naan, es re' au, nai' Yohanis kau. Au es re' ureta' rasin ia ok-oke' 'eu ki. Au es re' a'kius 'eik au matak fuak ein. Rarit au 'tui sin ok-oke'. Onaim hit tahiin tak, rasin re' au utoon ki sin re' naan, ro batuur, tua.
25 Ma nmui' rasi mfaun bian fe' re' Nai' Yesus anmoe' sin. Karu atoni' nsoba' he ntui nain sin ok-oke', nmurai na'ko Nai' Yesus nanaob In mepu tar antea narair sin ate, au 'ak pah-pinan ia 'teme-'teme msa' ka bisa nasaeb fa suurt ein naan ok-oke'.
On re' naan, tua,
Au, nai' Yohanis kau, tua.