Bi Rut nok nai Bo'as anbi bare re' anterin maka'
3
Neot es, ain Naomi natoon neu in aan nanef bi Rut am nak, “On nai. Oras ia in oors aa he au 'aim ko atoni' he njair ho mone re' reko neu ko, maut he ho mmui' kuum umi ma ropo, ma bisa mmoin nok tainina' ma mamut ambi naan. On mee?2 Amneen murek-reko'. Ho mumnau atoni' re' kaann ee nai' Bo'as, ai'? In es re' an'ator he ho bisa msiun reen je in afan ambi in bifee ameupt ein sin koitk ein. In nok kit umi nanan, mape'ot na'ko au mone re' nmate nrair re' naan. Mabe' ia too mfaun he nabuan neun in baer teri' maka'. Nai' Bo'as of anbi naan amsa'. 3 Onaim au 'roimk ii on nai: ho mnao muniu fe'. Rarit amtao miin fubona' kre'o, ma mpaek tai-runat re' mamasa' msa'. Rarit ho meki msaun meu baer teri' maka' naan. Mes ampanat murek-reko. Ampao he nai' Bo'as naah-niun narari te, na' ho mukrira' ho tuam aan. 4 Anbukae narari te, in of antuup. Natuin anmeis'okan, etun ho ro he mkius murek-reko' in he nnao ntuup nbi bare mee. Karu in ntuup anrair ate, ho mutuin ee. Amsika' tais re ankuub naan in haek ein he msein ne,a rarit ho mtuup anbi naan amsa'. Nai' Bo'as nahiin hai harat, rarit in of natoon ko he mmoe' on mee.”
5 Onaim bi Rut nataah am nak, “Reko, tua. Au of a'moe utuin on re' naan.” 6 Rarit in nnao nsaun neu baer teri' maka'. Onaim in nmoe' natuin saa' re' in ain baabf ee natoon.
7 Oras nai' Bo'as naah-niun narari on naan ate, in nnaben nak in namseen een. Rarit in annao ma ntuup anbi bare re' ntupu' maka' in bian. Anpao tar in nfiin, bi Rut annao mninu'-mninu' anbi nai' Bo'as in baer tupas. Onaim in ansika' tais re' ankuub naan nai' Bo'as in haek ein, rarit in ntuup anbi naan. 8 Of oni' fai atnanas on naan ate, nai' Bo'as naskeek ma anfeen. Rarit in nabani' ma in naskeek, natuin anmui' bifee jes antuup et in haen! 9 Rarit nai' Bo'as nataan am nak, “Ho sekau ko?”
Onaim bi Rut nataah am nak, “Au re' ia, bi Rut, on re' ho bifee ameupt ein. Mes ho es re' ‘ammui' hak he msoi ma mufetin’ kau. In oetn ee nak, ho mmui' hak he mmafee' ma msao maan kau, he mfee anah-upuf meu au mone re' anmate nrair naan. Onaim au 'toit he mkuub maan kau meik tais ee in tukan, he njair tanar nak, ho mroim he mmafee' ma msao kau, tua.”b
10 Rarit nai' Bo'as ansanmaak, onaim in na'uab am nak, “Amoo! Au 'toit he UISNENO anfee tetus neu ko! Ho mubei' he maim atoin munif re' amu'it na'ko bare re' ia, mes ho ka mmoe' fa rasi naan. Ho neekm aan reokn ii kah! Fin ho mukrira' manekat ma hormaat meu ho mone re' anmate nrair naan in asar sin. Ho nekam arekot oras ia, ma'tain re'uf anneis na'ko saa' re' ho mukrira' meu ain Omi afi unu' naan. 11 Onaim kais mumtau! Fin au he 'moe' utuin re' ho mromi. Onaim kais mutenab, fin a'naet ein abitan kota ia nahinin nak, ho re' ia bifee neek reko ma ammakoe'. 12 Mes oras ia anmui' rais jes antein. Ka nsaan fa nak, au re' ia ho mone re' nmate nrair naan in asar re' anmui' hak he nsoi ma nafetin ko. Mes anmui' tuaf es re' anpaumaak anneis na'ko kau. Onaim in es anmui hak he nmafee' ma nsao ko. Karu in ka nroim fa te, na' au es a'mui hak.c 13 Onaim au utoon ko on nai: mabe' ia ho mtuup ambi ia. Noka' te au 'nao he u'uab 'ok atoni' naan. Karu in nabarab he n'urus nok ko ma ntoup njair in fee ja te, maut he njair on re' naan. Mes karu kah fa te, au 'suup a'paek Uisneno Amonit In kanan, au kuuk re' ia of a'urus ma 'sao ko. Hai harat anbi ia nak, au es a'roim a'soi 'aan ko. Amtuup nai tar anmeu nfiin.”
14 Rarit bi Rut antuup anbi nai' Bo'as in haen. Ma kik-kiuk ana', oras fe' snaat ee nsae he tuaf kais anmakhiin ein es nok es, bi Rut anfeen anrair he nnao. Fin nai' Bo'as natoon anrari mnak, “Ka reko fa karu tuaf nahiin bifee neem fa-fai anbi baer teri' maka'. 15 Uum, amtao ho tais re' ho mpake he au utua gwe nok maka' 'taum anbi in a'fafan.” Rarit in annau maka' 'taum no nee ma natua bi Rut in tais. Rarit in anturun nasaeb sin neu bi Rut in hanun he nasaah. Rarit nai' Bo'as anfani nbi in kuan amsa'.d
16 Oras bi Rut antea uim je te, in ain baabf ee nataan am nak, “Fini naa, on mee?
Onaim bi Rut natoon are' saa' re' nai' Bo'as anmo'e nfee ne, 17 rarit antuut in uaban naan am nak, “In annau maka' 'taum ma natua au tais ii 'fafan amsa'. Onaim in nak, ‘Ho kais amfain meu ho ain baba' nok ruum-ruum aah.’”
18 Onaim ain Na'omi nataah, “Reko! Oras ia ho ro he msabaar, he mpao gwah. Fin batuur-batuur nai' Bo'as he n'urus rasi ia ma in ka npa-pao fa gwen. In of an'urus neno ia msa'.”