Bi Rut anmeup anbi nai' Bo'as in rene
2
Anbi Betlehem anmui' atoin amu'it es, kaann ee nai' Bo'as. In nmaba'aasr ein nok nai' Elimelek, es re' ain Na'omi in mone re' anmate nrair. Onaim tuaf ein re' abitan naan, nak nai' Bo'as re' naan, bi Na'omi in naof es.2 Neot es, bifee na'ko pah Moapas naan, es re' bi Rut, annao neu in ain babaf he ntoit je mnak, “Ain! Reko oo! Karu au 'nao 'eu rene he 'siun 'aan reen je in afan re' anmofun ma nabaran anbin ameupt ein sin koitk ein? [Fin Uisneno In atoran antui' mnak maut re' ama'mu'it sin anmo'en on naan.]a Kais-kaisa' anmui' atoni' re' naruru' in nekan arekot neu kau on naan. Reko, oo?
Bifee mnais' ee nataah am nak, “Reko, mnao nai.”
3 Rarit bi Rut annao he nsiun naan reen je in afan amouft ein naan re' ameupt ein ka napenin fa mainuan he nseik sin. Rene naan, es re' nai' Bo'as iin ja. In es re' anmaba'asar nok nai' Elimelek, es re' bi Rut in aam babaf re' anmate nrair.
4 Oras bi Rut ansiun on naan ate, nok akseken, reen tuaf ee, es re' nai' Bo'as neem na'ko kuan he nkius in ameupt ein. In nasee sin am nak, “Hoore, tua! Maut he UISNENO anpafa' ma npanat narek-reko ki, tua!”
Sin nataah am nak, “Hoore, tua! Maut he UISNENO es re' naruru ma nakrira' In nekan arekot neu ko, tua!”
5 Ankius niit naan bifee jes ansiun reen je in afan on naan ate, nai' Bo'as nataan in a'naak mepu mnak, “Amoo! Bifee munif re' nee, sekau in nonot?”
6 A'naak mepu naan nataah am nak, “In re' naan, atoin Moapas re' fe' neem nok ain Omi na'ko nee. 7 Kiuk gwi in neem nateef nok kau ma ntoti mnak, ‘Aam! Maut he au 'siun 'aan reen je in afan aneist ein re' ameupt ein ka nsiun ma nfuut sin fa.’ Onaim au utaah am 'ak, ‘Reko, tua!’ Onaim in nmeup ma'tani na'ko kiuk gwi tar antea oras ia. In suma nasnaas akre'o anbi uim rene.”
8 Rarit nai' Bo'as annao na'uab nok bi Rut am nak, “Feto'! Ho re' ia amneem fe'u, onaim amneen murek-reko' kau fe'. Maut he ho msiun maan reen ji in afan aneist ein ambi ia. Kais munani' meu tua teta' in rene. Mes reko nneis, kais mu'roo-roo mu'ko bifee ngwin re' anmepun neu kau. 9 Amkius rek-reko karu sin nonun anbi mee te, rarit sin nkoon bare naan on naan ate, ho msiun ai' main maan reen je in afan aneist ein anbin sin koitk ein. Au utoon urair 'eu atoin ein re' ia he kais noik ko. Rarit karu mmeon oe te, amnao he mbukae oe meu kusi re' sin narai narair sin nok oe re' sin naitin na'kon oe 'none'.”
10 Anneen on nane te, bi Rut naruri' tar antea afu. Rarit in nak, “Au 'toit makasi ko'-ko'u, aam'! Mes au he utaan 'aan ko. Ho of muhini mrair mak au re' ia, ka u'ko fa kuan re' ia. Onaim, nansaa' am es ho mururu' ho neek reko meu kau?”
11 Onaim nai' Bo'as nataah am nak, “Batuur. Au uhini 'rair. Tuaf amfaun ok-oke' abitan bare ia nareta' anmatoom nok ho neek reko meu ho ain baba' oras ho moen je nmate nrair. Sin natonan amsa' oras ho mnao mporin ho aina'-ama' ma ho kuan aa kuum, he uum meu tua sona' sin atnaank ein, maski ho ka muhiin sin fa.
12 Rarit au 'toit he UISNENO,
es re' hit atoin Israelas sin Uisneno,
anbaras ho neek arekot naan ok-oke'!
Au 'toit he In nfee ko tetus anho-hoen neu ko,
natuin ho neek maan reko meu ain Omi.
Maut he UISNENO es anpanat ko mbi ia,
natuin ho maim apafa' ma 'ne'o na'ko Na,
on re' maun ana' re' naim pafa' ma panat anbi maun ainf ee in ninin nanan.”
13 Rarit bi Rut nataah am nak, “Aam! Maski au ka ho ameupt ein fa msa', mes au he 'harineb ho nekam piut. Fin ho mha'tain au neek ii, rarit mururu' neek arekot meu kau msa'.”
14 Oras sin nasnasan he nbukaen, nai' Bo'as anhaman bi Rut am nak, “Uum meu ia, tua! Ambukae mubua mok kai. Mait utunu' ia kre'o, karu mromi te, mureep ee meu raur mai'ninu ia.” Rarit bi Rut annao ma ntoko npaumaak ameupt ein. Onaim nai' Bo'as anfee ne peen beti' he nbukae. Bi Rut anbukae tar namseen, ma anmui' nesif amsa'.
15-16 Oras in nfain neu reen je he nsiun reen je in afan aneist ein re' ameupt ein ka nsiun ma nfuut naan sin fa, nai' Bo'as natonan in ameupt ein am nak, “Amneen mirek-reko! Kais moki. Maut he in npiir naan reen je in afan anbi mee-mee jaah. Anpaumaak nok re' mafuut ein naan amsa' ka saa'-saa' fa. Au ka utoo' fa karu hi mheer puin es ai' puni nua na'ko aist es re' hi mfuut maan ee, rarit maut he in nsiun naan. Kais mitoo' ne, ma kais mimae je msa'.”
17 Bi Rut anmeup neon gwes a'teme. Oras maans ee he noi nmouf, in nbeson naan punif na'ko 'hauf ein naheun a'poin jes.b 18 Rarit in neik nafani' 'poni naan naan neu Betlehem. Onaim in naruru' in mepu naan in afan anbi in ain babaf. Rarit in napoitan amnahat na'ko in amnaah nesif maans ii, he nfee je neu in ain babaf.
19 Rarit ain Na'omi nataan bi Rut am nak, “Amoo! Neno ia ho msiun peen' ein ia ambi mee? Ho mmepu mbi sekau in rene? Maut he Uisneno anfee tetus anho-hoe neu tuaf re' ankius ko.”
Onaim bi Rut nataah am nak, “Ain! Reen tuaf naan, in kaann ee nai' Bo'as.”
20 Ain Na'omi na'uab in aan naenf ee mnak, “Maut he UISNENO anfee tetus anho-hoe neu nai' Bo'as. Fin Uisneno ka nnika' fa he naruru' in nekan arekot neu kit re' tmoin, ma hit moenk ein re' nmaten nararin msa'. Au utoon ko on nai: nai' Bo'as re' naan, hit nonot umi nanan. Hit tak in es re' anmui' ‘hak he nsoi ma nafetin.” In oetn ii nak, in anmui' hak he nsao naan ko, he mfee anah meu ho mone re' anmate nrair re' naan.”c
21 Bi Rut nataah am nak, “Ain! Neno ia nai' Bo'as anba'an kau mnak, ‘Noka' te uum amtein meu ia. Ho bisa mutuin au ameupt ein tar sekit ma mnonut oke'.’”
22 Ain Na'omi anbaras am nak, “Reko! Naan tanar reko. Fin ho bisa mmeup mubua mok in bifee ameupt ein tar antea sekit ma mnonut oke'. Karu anbi tuaf a'teta' in rene anmui' tuaf re' noik ko. Mes anbi nai' Bo'as in renen, ho mtaa' kuum.”
23 Onaim maan-manas ate bi Rut ansiun reen je in afan aneist ein anbi nai' Bo'as in rene anpaumaak nok bifee ameupt ein tar antea sekit ma mnonut oke'. Fa-fai te, in ntuup nok in ain babaf ma natua nabaar nok ne.