Nai' Bo'as antook rasi
4
Rarit nai' Bo'as annao neu eno' re' attaam teu kota he ntoko nbi naan. Anbi bare naan, amnaist ein kota naan biasa sin antokon ma naroit ein uab ma n'a'an rasi. Antea on naan ate, in nonot-asar tuaf es antein, re' anmui' hak ansoi ma nafetin he bisa nmafee' ma nsao bi Rut annao npeo' naan amsa'. Rarit nai' Bo'as anhaman naan ee mnak, “Koi ba'e, au uskau he mkoen om uum meu ia fe', tua! Fin au 'perluu ko, tua.” Onaim tuaf naan neem ma ntoko nbi naan amsa'. 2 Rarit nai' Bo'as anhaman naan amnaist ein tuaf bo'es he ntoko njarin saksii mnak, “Au uskau ki, amnaist ein he mtook ma mneen maan rasi ia, tua.”3 Onaim nai' Bo'as n'etu ma natoon neu in nonot-asar re' anmui' hak ansoi ma nafetin anbi bi Rut am nak, “On nai. Ba'e, ho mumnau afu piis' es re' anjair nai' Elimelek in auf gwah fe', ai'? Unu', oras amnahas antaman kit, in nfeen annao neu pah Moab, rarit anmate nbi naan. Oras ia in banu' ain Na'omi, anfain neem een na'ko nee, ma he na'sosa' afu naan. 4 Oras au 'neen rasi naan, au utenab am 'ak: maut he au utoon ko fe', natuin ho es re' ammui' hak ansoi ma nafetin’ afu naan. Fin ho mok nai' Elimelek hi umi nanan! Onaim, karu ho he msoos maan afu naan, mutoon main kai, maut he amnaist ein ia njarin saksii. Mes karu kah fa te, mutoon main meu saksii nggwin sin humak ma sin matak, fin au es re' he 'soos ma 'baen. Re' batuurn ii, ho es re' ammui' hak muhuun. Mes karu ho ka mroim fa te, naan au hak.”
Onaim tuaf naan nataah am nak, “Reko. Au 'soos ma 'baen ee, tua.”
5 Onaim nai' Bo'as natoon antein am nak, “Kais mutoo', mes ho ro he mumnau, fin karu ho msoos ma mbaen maan afu pisa' naan na'ko ain Omi, ho ro he mait bifee Moapas naan, kaann ee bi Rut. Fin in es re' ansao nai' Elimelek in anah re' anmate nrair naan. Onaim ho ro he msao maan ee, he in anfee anah-upuf neu in mone re' anmate nrair naan. Nok ranan naan, in auf pusaak ee ka npoi fa na'ko hit nonot-asar.”
6 Tuaf naan nataah am nak, “Karu on naan ate, kais mutoo' natuin au ka 'jair fa he 'soos ma 'baen afu pisa' naan. Fin karu au 'soos ma 'baen, naan on re' au pusaak ee namneuk nain. Au pusaak ma au anah of anjarin nai' Elimelek in pusaak. Maut he au kais a'soos ma 'baen. Maut he nai' Bo'as es ansoi ma nafetin naan afu naan, rarit anmafee' ma nsao bifee naan.”
7 (Uun-unu', oras atoin Israelas he nnona' sin hak he nsoi ma nafetin naan baer es neu tua 'teta', sin anfei sin a'pein' haef ein he nfee sin neu atoni' naan. Naan anjair tanar re' sah anbi tuaf in human ma in matan am nak, sin nnona' nrair hak naan.)a
8 Onaim oras tuaf naan annona' in hak ansoi ma nafetin neu nai' Bo'as, in na'uab am nak, “Maut ho kuum es amsoos ma mbaen,” onaim in nous in a'pein' haef ein he nfee sin neun nai' Bo'as anbi amnaist ein sin huumk ein ma sin maatk ein.
9 Rarit nai' Bo'as natoon neu amnaist ein ma too mfaun ein re' antokon anbin naan am nak, “Amnaist ein aar ki. Hi aar ki ok-oke' amjair saksii neno ia. Hak naan anmofu nrair ai' antea nrair kau gwen. Au utoon 'ain 'ak, au he ufetin 'ain ain Na'omi in are' saa'-saa' ein oke' re' unu' te anjarin in a'mu'in sin na'kon nai' Elimelek ma nok in aan moen ein, es re' nai Kilyon ma nai' Mahlon re' nmate nrarin naan. 10 Au sairt ii, ka neu he afu pisa' naan anmees jaah fa, fin au 'ait bifee Moapas naan, kaann ee bi Rut, re' anjair nai' Mahlon in banu 'honis. Au he 'sao 'aan ee, fin au 'soi ma ufetin hak naan. Nok ranan naan, hai nua kai karu hai mihoni' te, hai aanh ein anjarin nai' Mahlon in anah-upuf sin. Onaim in nonot-asar sin ma in abitan kuan ii nanan ka nnikan ma nniahan fa in kanan. Hi re' ia es re' amjair saksii neno ia, tua.”b
11 Rarit amnaist ein abitan kota naan ma are' too mfaun re' antokon ma nabuan nbin naan, natahan am nak, “Batuur! Hai mkius ma miit meik hai maatm ein kiim. Hai es re' amjair saksii, tua.
Bifee re' ntaam an'ain ho umi ma ropo,
maut he UISNENO anmoo' je anjair on re' bi Rahel ma bi Lea.
Fin are' atoin Israelas sin naan sufaf-ka'uf na'kon sin nua sin.
Maut he Uisneno anmoe' ko amjair atoin ko'u anbi nonot Efrata,
ma mjair tuaf re' ammui' kaann reko ma nfoo mein neu koot Betlehem.c
12 Maut he Uisneno anfee ko anah mok bifee munif naan,
maut he hi sufam-ka'um sin anjarin ma'tani',
on re' ho nai'-ka'o nai Peres in sufan-ka'un,
re' bi Tamar ma nai' Yahuda in anah.”d
Nai' Bo'as ma bi Rut napenin anah-upuf
13 Rarit nai' Bo'as ansao bi Rut. Oras sin nua sin antuup nabuan, UISNENO anfei bi Rut in apun he in na'apu'. Onaim in nahoni naan ri'aan moen jes.
14 Nahoni' narari te, bifeen abitan Betlehem sin natonan ain Na'omi mnak,
“Pures-bo'is neu UISNENO!
Fin In es re' anfee ko anah-upuf, sufaf-ka'uf,
maut he ho nonot-asar in nono kais anfiin ma namneuk.
Maut he ri'ana' ia anjair atoni 'naek anbi pah Isra'el.
15 Maut he ri'ana' ia,
anmoe' ko he mnaben ate on re' amfain munif!
Maut he ri'ana' ia,
anpairoir ma npanat ko oras ho mumnais!
Fin ho aan nanef es re' nahoni' naan ho upuf re' ia,
naruru' ma nakrira' nrair ko in manekan naan neu ko.
Ho aan nanef re' ia,
reko nneis na'ko ri'aan mone tuaf hiut!”
16 Bi Na'omi anhoo naan ri'ana' naan, onaim in nparoir ri'ana' naan on re' in nparoir in tuan aa kuun.
17 Rarit bifeen abitan kota naan na'uab ein am nak, “Amoo! Oras ia on re' bi Na'omi nahoni' ntein ri'ana'. Ma'tain re'uf, jo!” Onaim sin nakanab ri'ana' naan ‘nai' Obet’.
Oras nai' Obet na'nae neem ate, in napein ri'aan' es, in nakaanb ee nai' Isai. Nai Isai napein ri'aan' es, in nakaanb ee nai' Daut, re' anjair usif.
18 Re' ia, nai' Peres in sufan-ka'un:
Nai' Peres nahoni' nai' Hesron.
19 Nai' Hesron nahoni' nai' Ram.
Nai' Ram nahoni' nai' Aminadab.
20 Nai' Aminadab nahoni' nai' Nahason.
Nai' Nahason nahoni' nai' Salmon.
21 Nai' Salmon nahoni' nai' Bo'as.
Nai' Bo'as nahoni nai' Obet.
22 Nai' Obet nahoni nai' Isai.
Nai' Isai nahoni usif nai' Daut.