50
Onaim nai' Yusuf anhoo in aamf ee, ma nkae nme'-me'ur. Ma in nneek nafan-fain' ee. 2 Rarit nai' Yusuf naprenat tua a'urus uis-mina' he npairoir nai' Yakop in aon-ta'un he kais anpuun. 3 Onaim tua a'urus uis-miin ein naan, anpairoir nai' Yakop in aon-ta'un naan neno bo' haa, on re' nati' te, sin nmoe' nani. Onaim abitan Masir ankaen amsa' oras nai' Yakop anmaet. Sin nkaena' nai' Yakop tar antea neno bo' hiut (70), on re' sin a'naet es anmaet.4 Neno bo' hiut namsopu te, nai' Yusuf natoon neu in a'naak meupn ee mnak, “Amneen mirek-reko'! Au 'toit ki he meik au hanak ia meu uisf ee. Hi mak on nai: 5 ‘Oras au ama' he noi nmate te, in ntoit kau he 'nao 'suub in aon-ta'un ia 'eu pah Kana'an. Onaim au 'baiseun ko usi' he mfee kau mainuan, he au 'eik au ama' in aon-ta'un ma 'nao 'suub ee 'eu pah Kana'an. Rarit, na' au 'fain 'uum.’”
6 Oras uisf ee nneen hanaf naan ate, in nataah am nak, “Karu ho msuup amrair meu ho ama' on naan ate, maut he mnao ma msuub ee.”
7 Onaim nai' Yusuf annao he nsuub in amaf. Too mfaun ein nokan amsa'. Sin esan re' uisf ee in a'naak meupn ein ok-oke', ma kaes ko'un na'kon pah Masir. 8 Nai' Yusuf in orif-tataf sin, ma sin ameupt ein ok-oke' msa' nokan nbin subat naan. Amaika' nbi Gosen, arahaa sin feek ein, ri'aan ein, ma mui't ein. 9 Soraurs ein nokan namfa-faun. Bian ansaen akreet bikase', bian ansaen bikase'. Natuin amnokat sin namfaun, es na' pukan anaot neu subat naan, naraor gok pirore mnanu'.
10 Rarit sin aar sin nnaon ma nraak noe Yarden, nbi baer jes in kaann ee, Atat. Nati' te, abitan naan neman ma nterin maka' nbin bare naan. Anbi naan, nai' Yusuf sin nkaena' sin amaf. Sin nbe'en ntein' ein fai hiut.
11 Oras abitan Kana'an niit sin nsusan on naan ate, sin na'uab ein am nak, “Hae! Hi mkius miit. Atoin Masiras sin nbe'en amates ate, nuu' gwi ka aan'-ana' fa. Sin ankaen ate, on re' ne joo!” Etun sin nakanab bare naan Abel-Misraim. In a'moufn ii, nak ‘atoin Masiras sin nukat’.
12 Rarit nai' Yakop in aanh ein nmoe' natuin saa' re' sin nba'an anrari. 13 Onaim sin nroi neik nai' Yakop in aon-ta'un naan, ma nnaon nsuub ee nbi nuat re' npaumaak kuan Makpera ma kuan Mamre. Nai' Abraham ansoos nafeek bare naan na'ko atoin es na'ko uuf Hetes, kaann ee nai' Efron; he nmoo' je njair sin baer subat.
Nai' Yusuf anhaan mau in taatf ein
14 Oras ansuub anrair sin amaf nai' Yakop ate, nai' Yusuf nok in orif-tataf sin, annaon nfanin neun pah Masir. Too mfaun re' nokan nbin subat naan amsa' on naan.
15 Oras sin ntean pah Masir ate, nai' Yusuf in taatf ein nmurai namtaun, natuin sin aamf ee nmate nrair. Onaim sin na'uab ein es nok es am nak, “Hae! Hit tatenab tarek-reko' tiit fe'! Kais-kaisa' nai' Yusuf natenab kit fe'. Karu in he nmoe' rais re'uf neu kit ate, on mee?” 16 Rarit sin n'akoran ma nsoun ein hanaf neu nai' Yusuf am nak, “Usi'. Hai mimnau fe', oras hit ama' anmoin fe', in nreun kai 17 he mitoon ko, tua, mak, ‘Nai' Usu ro he nnikan nain in taatf ein sin saant ein. Natuin sin nmo'e nrarin rais re'uf neu ne.’ Hai mimnau msa' am mak, hit ama' in na'ruri' ma na'bees neu Uisneno na'ko afi unu'. Hai mfain Uisneno naan In aten amsa'. Onaim oras ia hai iim amtoit saok sanat, natuin hai mmo'e mrair sanat meu ko, tua.”
Anneen on naan ate, nai' Yusuf ankae.
18 Rarit in taatf ein neikn ok neman ma nri'tuun nbin in matan, ma na'uab ein am nak, “Mait kai mjair ho aten, tua.”
19 Mes nai' Yusuf nak neu sin am nak, “Sin au tata' aar ki! Hi kais mimtau mtein! Uisneno nmees kuun es re' anmui' hak he nhukun tuaf. Mes au re' ia, ka 'mui' fa hak, tua. 20 Unu' te, batuur hi m'akoor he mmoe' re'uf meu kau. Mes Uisneno nabanit hi sair amre'ut naan, he nmoo' je njair reko. Etun In nait kau 'jair a'naet a'bi pah ia, henati' too mfaun ein napenin a'honis. 21 Onaim oras ia, au utoon ki, he kais mimtau mten-teni'. Au ufeek kuuk am 'ak, au of a'kius ki, ma hi aanh ein ok-oke'.”
Nok uab naan ate, nai' Yusuf nhaan mau in taatf ein.
Nai' Yusuf in a'maten
22 Rarit nai' Yusuf natua nabaar anbi pah Masir nok in orif-tataf sin ok-oke'. In nmoin naan toon nautn es toon bo'es. 23 In niit nai' Efraim in anah-upuf sin fe'. Ma in nkauh nai' Manase in upuf, es re' nai' Makir in aanh ein.
24 Nai' Yusuf na'uab neu in taatf ein am nak, “Sin au tata' aar ki! Au 'naben ate, au neno 'maet ki he ntea gwen. Mes au 'pirsai 'ak Uisneno of anpairoir ki. In of neik ki mpoi mi'ko pah re' ia. In of na'naak neu ki he mfain meu pah re' In nfee je neu hit nai'-ka'o Abraham, na'i nai' Isak, ma hit ama' nai' Yakop. In nfee bare naan neik rais supat.” 25 Onaim nai' Yusuf antoit in orif-tataf sin he nsupan am nak, “Hi ro he mba'an meu kau. Karu ntea oras re' Uisneno neik ki mfain on hit pah ee te, hi ro he meik au aok-ta'uk ia.”
26 Rarit nai' Yusuf anmate nbi pah Masir, ma in nmoin naan toon nautn es toon bo'es (110). Rarit sin npairoir in aon-ta'un. Onaim sin natunu' in aon-ta'un naan nbi in noup paran.