Ana-ana Ama Lamatua hud'i mage-mage ku, sèna ka baku lèke tipu
4
Ana-ana pasue! Baku lèka leli lii padhai ladhe dhèu mai, peka na, nèngu nèti lii moa Ama Lamatua. Te ngaa miu hud'i dadoo ne paie-iie, ho me'a mèu lii padhai na tare'a-re'a nèti Lamatua, do aad'o. Te limuri ne, ae le dhèu kapod'e-kabèli dhu kako pale-lème rai-haha ne. Dhèu se tipu dhèu, peka na, rèngu sèra dhèu rèti lii padhai Ama Lamatua. 2 Èdhi bisa te'a mèu lii moa dhu tare'a-re'a mai nèti Roh Lamatua, dènge j'ara sèmi ne'e: Ama Lamatua padhadha tèke le karèi nèti uru ka, sèna ka neo hia Ana Na mai asa rai-haha ne. Ladhe dhèu dhu nèti lii moa èèna mangaku, peka na, Yesus Kristus èèna tare'a-re'a Ana Ama Lamatua, dhu j'aj'i dhèu rai-haha sama sèmi èdhi, na, lii moa èèna mema nèti Lamatua. 3 Te ngaa dhèu dhu mangaku boe Yesus sèmi èèna, nèngu mai boe nèti Ama Lamatua. Te èèna mai nèti dhu lab'a Kristus. Miu tadèngi le dhu peka na, dhu lab'a Kristus èèna, bèli-camèd'a cèu mai. Madhutu mola-mola na, dhu sèmi èèna abhu le ètu rai-haha ne.4 Ana-ana pasue! Miu se, mema mai nèti Ama Lamatua, aa koasa Na ètu d'ara miu. Nèti èèna ka, miu segi le dhèu dhu lab'a Lamatua. Te Roh Na dhu pea ètu d'ara miu, èra risi nèti koasa dhu ètu rai-haha ne. 5 Dhèu dhu lab'a Lamatua sèra, j'aj'aj'i ra nèti rai-haha. Nèti èèna ka, lii padhai lii ra pa'èki mèno madhutu dad'èi rai-haha. Hèia dhèu rai-haha ne d'èi nanene si. 6 Te ngaa j'aj'aj'i èdhi nèti Ama Lamatua. Nèti èèna ka, dhèu dhu tadhe Lamatua d'èi nanene lii padhai èdhi. Te ngaa dhèu dhu mai boe nèti Lamatua, ro'o boe nanene lii padhai èdhi. Dènge j'ara ne'e, ladhe dhèu peka na, nèngu nèti lii moa Lamatua, bisa te'a mia ka dhu lèke dhu mai nèti Roh Lamatua, aa mia ka dhu kapod'e-kabèli.
Sasue dènge Parcaya -- Sasue èèna, ngaa?
7 Ana-ana pasue! Èdhi hud'i pasue ku èci dènge èci, lula kapua sasue nèti Ama Lamatua. Dhèu aa'i-aa'i dhu mamuri pasue mai nèti Ama Lamatua kahèi, aa ra tadhe mèu Ne. 8 Te ngaa dhèu dhu dènge boe sasue tadhe boe Lamatua. Lula Lamatua èèna, nuka sasue. 9 Lamatua pad'elo sasue Na mi èdhi sèmi ne'e: Na pua Ana Na dhu dhodhoka ca Dhèu èèna ka, mai asa rai-haha ne sèna ka bhoke j'ara hia èdhi. Dènge j'ara sèmi èèna, èdhi bisa mamuri taruu dènge Lamatua. 10 Ladhe neo me'a sasue dhu lèke tare'a, baku pasoro sasue èdhi dènge sasue Lamatua. Te ngaa ladhe sasue Lamatua mi dedha èdhi, lula Ama Lamatua pua Ana Na mai, ho j'aj'i korban sèna ka gati èdhi. Dènge j'ara ne'e, Lamatua saku eele sasala-sasigo èdhi, sèna ka èdhi bisa pabe'a hari dènge Nèngu.
11 Ana-ana pasue! Lula Ama Lamatua sue èdhi seli eele, na, èdhi hud'i pasue ku èci dènge èci kahèi. 12 Abhu boe ca dhèu sa dhu ladhe nèdhi mèu Ama Lamatua. Masi ka sèmi èèna, te ngaa ladhe èdhi pasue èci dènge èci, sasoa na, Ama Lamatua bera-bera dènge èdhi. Aa sasue Na asa tabha ètu d'ara mamuri èdhi, toke j'aj'i sasue dhu kateme.a
13 Ama Lamatua pangèd'u le Roh Na ètu d'ara èdhi. Nèti èèna ka, te'a, na, èdhi mamuri d'ara èci dènge Ne, aa Nèngu mamuri d'ara èci dènge èdhi kahèi. 14 Ja'a dènge angalai ja'a ngèdhi le Ana Ama Lamatua dènge musi madha ji'i. Ka ji'i peka palème dènge dhèu aa'i-aa'i, na, Ama Lamatua hia le Ana Na mai, sèna ka patabuli dhèu ètu rai-haha ne nèti koasa sasala-sasigo ra. 15 Dhèu aa'i-aa'i dhu mangaku, peka na, Yesus, Ana Ama Lamatua, nèngu mamuri pabe'a dènge Ama Lamatua, aa Ama Lamatua pabe'a dènge nèngu kahèi. 16 Èdhi te'a kahèi, peka na, Lamatua sue èdhi titu kèna. Nèti èèna ka, èdhi parcaya, Nèngu sue èdhi taruu.
Lamatua sue dhèu rai-haha ne titu kèna. De dhèu dhu mamuri pasue, nèngu mamuri d'ara èci dènge Ama Lamatua, aa Lamatua mamuri d'ara èci dènge nèngu kahèi. 17 Aa ladhe èdhi d'ara èci dènge Lamatua, sasue èdhi j'aj'i kateme. Hèia, ropa d'ai lod'o èle ka rai-haha ne, Lamatua parisa mamuri dhèu aa'i-aa'i, na, èdhi madha'u boe ara lati asa madha Na, lula èdhi dhu j'aj'i le sèmi Kristus, lod'o dhu Na mamuri ètu rai-haha ne. 18 Ladhe èdhi mamuri pasue, na, èdhi dènge heka d'ara madha'u ciki sa. Te ladhe èdhi pasue dènge mola, èèna nuka sèmi èdhi pakaj'èu eele aa'i le madha'u nèti d'ara èdhi. Ladhe dhèu madha'u, d'ara na susa, lula nèngu madha'u lèke huku. Dhèu ne, nuka sèmi ana iiki dhu ne'a mèka sue dhèu dènge mola.
19 Èdhi pasue, lula Ama Lamatua dhu sue uuru le èdhi. 20 Ladhe dhèu padhai lii, peka na, “Ja'a sue Ama Lamatua”, te ngaa nèngu tèka d'ara dènge a'ari na, nèngu monya di. Te ladhe dhèu sue boe a'ari na dhu ètu katanga madha nèngu, tasamia hari nèngu sue Ama Lamatua dhu nèdhi mèka? Bisa boe, sina ma? 21 Te Ama Lamatua unu Na ka dhu papuru paredha, peka na, èdhi baku sue dhodhoka Nèngu di, te ngaa sue ku a'ari èdhi dhèu parcaya sèra.