5
Dhèu parcaya aa'i-aa'i dhu peka na, Yesus, tare'a-re'a Kristus dhu Ama Lamatua pua mai, dhèu sèra j'aj'i le ana-ana Ama Lamatua. Te dhèu dhu sue ca dhèu ama, tatu sue ana na kahèi. 2 Ladhe èdhi sue Lamatua, aa sab'a madhutu paredha Na, èèna peka na, èdhi sue ana-ana Lamatua kahèi. 3 De ladhe èdhi sue Nèngu, èdhi hud'i tao madhutu ku paredha Na sèra. Aa paredha Na bia boe.a 4 Èdhi dhu j'aj'i le ana-ana Lamatua, bisa segi dad'èi rai-haha ne, lula èdhi parcaya Ne. 5 Te dhèu dhu segi dad'èi rai-haha, nuka dhèu dhu parcaya, peka na, Yesus, Ana Ama Lamatua.Parcaya Yesus, gaguna na ngaa?
6 Sad'i miu me'a, na, Yesus, dhèu rai-haha kahèi, aa Nèngu ne, Kristus kahèi dhu Ama Lamatua hia mai asa rai-haha ne. Lod'o Nèngu neo pakako sasab'a-la'a Na, Yohanis sarani Ne pake èi. Èle èèna ka, Nèngu madhe aa pasuti raa Na kahèi. De dhu lèke ka, mesa boe èi di dhu Yohanis pake sarani Nèngu, te ngaa raa Na dhu suti eele èèna dhu kab'ua risi. Te Roh Ama Lamatua mesa Na ka dhu peka sèmi èèna, aa dhu ne'a boe leko-monya. 7 Te abhu tèlu j'ara dhu j'aj'i sakasii:b 8 nuka Roh Lamatua, èi dhu Yohanis pake sarani Yesus, aa raa Yesus unu Na. Tèlu j'ara se'e ka, pad'elo ca j'ara dhu sama lula-nèti Yesus. 9 Ladhe dhèu rai-haha ka j'aj'i sakasii, na, èdhi bisa parcaya ne. Risi-risi hari ladhe Ama Lamatua unu Na ka dhu j'aj'i sakasii lula-nèti Ana Nèngu unu Na. Aa te ngaa tèlu j'ara se'e dhu Ama Lamatua pake, ho j'aj'i mi tadha dhu peka na, Yesus mesa boe dhèu rai-haha biasa di, te ngaa Nèngu ne Kristus kahèi. 10 Dhèu dhu parcaya Ana Ama Lamatua, sasoa na, dhèu ne sèmi nare le Lii Holo-Nori Lamatua, lula-nèti Ana Na. Te ngaa dhèu dhu lèka boe Lamatua, nèngu nuka sèmi dhèu dhu padhai lii, peka na, “Ama Lamatua leko-monya!” Dènge j'ara ne'e, nèngu sèmi boe Lii Holo-Nori Lamatua lula-nèti Ana Na. 11 Isi nèti Lii Holo-Nori Lamatua nuka sèmi ne'e: Lamatua hia le èdhi mamuri dhu lèke, toke d'ai mia-mia. Aa èdhi abhu mamuri ne, lula èdhi parcaya Ana Na.c 12 De dhèu dhu pa'èki dènge Ana Ama Lamatua abhu mamuri toke d'ai mia-mia dènge Ne. Te ngaa dhèu dhu pa'èki boe dènge Ana Ama Lamatua, abhu boe mamuri sèmi èèna.
Nga tao ka Yohanis suri sasuri ne?
13 Ja'a suri madha j'ara se'e aa'i-aa'i hia miu dhèu parcaya Ana Ama Lamatua, sèna ka me'a mèu, na, miu unu mamuri toke d'ai mia-mia.
Yohanis suri tabha j'ara-j'ara sabaj'a
14 Ladhe èdhi sabaj'a mi Ama Lamatua, sad'i èdhi manèngi ngaa èèna ka madhutu dad'èi Na, èdhi bisa te'a tare'a-re'a, na, Nèngu tadèngi lii manèngi èdhi sèra. 15 Aa ladhe èdhi parcaya tare'a-re'a sèmi èèna, èdhi te'a kahèi, na, èdhi abhu ngaa-ngaa dhu èdhi manèngi nèti Ama Lamatua.
16 Ladhe èu mèdhi a'ari mu tao sala dhu nèti boe mamadhe, be'a risi èu sabaj'a sèna ka Ama Lamatua soru-bara a'ari èu èèna ho na abhu sod'a. A'abhu ja'a sèmi ne'e ka: abhu sasala dhu nèti boe dhèu asa d'ara mamadhe. Abhu kahèi sasala dhu nèti dhèu asa mamadhe. Te ngaa ja'a pua boe miu ho sabaj'a ladhe abhu sasala sèmi èèna. 17 Tatao karehe aa'i-aa'i, sala ètu madha Ama Lamatua. Te ngaa abhu kahèi sasala dhu nèti boe mamadhe.
Yohanis pasanèd'e hari j'ara-j'ara dhu kab'ua risi
18 Dhèu dhu pa'èki le dènge Ama Lamatua, mamuri heka tao sala, te Ana Ama Lamatua dhu ladhe-leru ne. Aa dhu bhelu-katub'a bisa boe segi ne kahèi.
19 Èdhi te'a, na, èdhi kapua ètu d'ara Ama Lamatua. Te ngaa èdhi te'a kahèi, na, dhu bhelu-katub'a dènge koasa ho ator dhèu aa'i-aa'i ètu rai-haha ne.
20 Èdhi te'a, na, Ana Ama Lamatua mai le, sèna ka hia èdhi te'a mèu j'ara se'e, ho èdhi bisa tadhe mèu Ama Lamatua dhu tare'a. Limuri ne, èdhi bisa mamuri pabe'a dènge Ne, lula èdhi mamuri d'ara èci dènge Ana Na, Yesus Kristus. Te Yesus Kristus èèna, tare'a-re'a Lamatua kahèi.d Aa Nèngu ka hia dhèu abhu mamuri toke d'ai mia-mia la'e.
21 Ana-ana, ee! J'aga paie-iie mamuri miu. Mage abhu dhu seti eele ho gati Ama Lamatua nèti d'ara miu.
D'ai sange ne'e ka.
Nèti ja'a, Yohanis