Ja'a suri sasuri ne hia mi ina, dhu Ama Lamatua hag'e nare le j'aj'i dhèu unu Na, aa dènge ana-ana ina sèra.^a Ja'a sue miu aa'i-aa'i mi, dhu d'ara miu pa'èki dènge j'ara-j'ara dhu lèke. Dhèu leo aa'i-aa'i, dhu re'a j'ara-j'ara dhu lèke, ra sue miu kahèi. 2 Ji'i sue miu, lula j'ara-j'ara dhu lèke sèle ètu d'ara èdhi, aa èèna na muri taruu ètu d'ara èdhi.

3 Ja'a sabaj'a, manèngi sèna ka Ama Lamatua, dènge Ana Na Yesus Kristus, pad'elo d'ara hua iia dènge rasa kasia Ra mi èdhi, sèna ka èdhi mamuri dame, mamuri pasue, aa pa'èki taruu dènge j'ara-j'ara dhu lèke.

4 Ja'a karej'e titu kèna, lod'o ja'a paraga dènge ana ina cahag'e, dhu ra mamuri dènge be'a, madhutu j'ara mamuri dhu lèke, sama sèmi dhu Ama Lamatua hia le paredha mi èdhi.

5 Ina pasue! Ne'e ne, ja'a manèngi sèna ka èdhi aa'i-aa'i ti mamuri ètu d'ara pasue. Dhu ja'a manèngi èèna, paredha hiu boe, te ngaa ja'a dhoka pasanèd'e di nèti paredha dhu èdhi unu le karèi nèti uru ka mai.^b 6 Èdhi bisa pad'elo sasue èdhi, ladhe èdhi tao madhutu paredha Ama Lamatua. Karèi nèti uru ka, Na paredha le èdhi, sèna ka èdhi mamuri pasue èci dènge èci. Ne'e ne j'ara hiu boe, te miu tadèngi le karèi nèti uru ka mai.

7 Dhèu kapod'e-kabèli ae kako palème le rai-haha ne. Rèngu aj'a, na, Yesus Kristus mai asa rai-haha ne, te ngaa Nèngu dhèu rai-haha tare'a-re'a boe. Dhèu se'e dhèu kapod'e-kabèli kahèi dhu lab'a Kristus, aa ro'o boe sèmi rare, peka na, Yesus, nuka Kristus dhu Ama Lamatua hag'e nare karèi nèti uru ka. 8 J'aga paie-iie, ho èi kabhèsu èdhi baku core eele iia d'ara. De miu hud'i maj'èni sab'a taruu, sèna ka miu bisa sèmi mere mèngi-nale aa'i-aa'i dhu Lamatua moa neo hia miu ètu sorga.

9 Te dhèu dhu sigo eele nèti aj'a-nori Kristus, nèngu pa'èki boe dènge Ama Lamatua. Te ngaa dhèu dhu kèpe pa'èra a'aj'a Na, nèngu pa'èki dènge Ama Lamatua, aa dènge Ana Na, Yesus Kristus.

10 Ladhe abhu dhèu dhu mai aj'a j'ara-j'ara dhu leko-leo lula-nèti Kristus, na, baku sèmi mere ne asa d'ara èmu miu, aa baku soro-suu hia ne. 11 Te ladhe pusi-pahae ne, na, miu sèmi mere le sasab'a na dhu bhelu-katub'a èèna.

12 Madha j'ara ae era, dhu ja'a neo peka dènge miu, te ngaa be'a risi ja'a baku suri ètu d'ara sasuri. Te nèbhu heka, ja'a neo dhiu padhai lii dènge miu, sèna ka èdhi sama-sama bisa karej'e-karae tare'a-re'a.

13 Ama Lamatua hag'e nare kahèi a'a ina. Ana-ana na hia lii maho'o mi ina si aa'i-aa'i ètu èèna.

Sange ne'e ka.