2 Ana-ana pasue! Èdhi j'aj'i le ana-ana Ama Lamatua, te ngaa te'a tare mèka, bèli-camèd'a èdhi j'aj'i sèmi ngaa sa. Dhu te'a, sèmi ne'e ka: bèli-camèd'a ropa Kristus mai hari, èdhi j'aj'i sama sèmi Nèngu kahèi, lula èdhi ladhe tèdhi Nèngu iia-iia. 3 Dhèu aa'i-aa'i dhu tatae mamai Kristus, tatu ra pamèu mamuri rèngu, sèna ka mamuri ra mola-mèci sama sèmi Kristus. 4 Sasala aa'i-aa'i ra ka dhu sisu paredha Lamatua. Nèti èèna ka, dhèu aa'i-aa'i dhu tao sala, sisu paredha Ama Lamatua aa palab'a dènge Ne. 5 Miu me'a le, peka na, Kristus j'aj'i dhèu rai-haha sèna ka saku eele sasala-sasigo èdhi. Nèngu bisa tao j'ara èèna, lula Nèngu mesa Na tao nèdhi boe sasala.^b 6 De dhèu dhu mamuri pa'èki taruu dènge Ne, mamuri heka dènge tao sala. Te ngaa ladhe dhèu loe boe ad'u-ue sasala, sasoa na, nèngu tadhe boe aa pa'èki boe dènge Kristus.

7 Ana-ana pasue! Baku lèke tipu. Te dhèu dhu mamuri madhutu ngaa dhu lèke, nèngu dhèu d'ara mola èci èèna ka dènge Kristus. 8 Te ngaa dhèu dhu mamuri ad'u-ue sasala, j'aj'aj'i ra nèti dhèu aae nidhu. Te dhèu aae nidhu ne, baki nèti bhabhelu-katub'a karèi nèti uru j'ara ka. Nèti èèna ka, Ana Ama Lamatua mai ho dhedhe palaho bhabhelu nèti dhèu aae nidhu.

9 Dhèu dhu j'aj'i le ana Lamatua mamuri heka tao sala, lula Lamatua dhu pea le ètu d'ara nèngu. Nèngu bisa heka ad'u-ue sasala taruu, lula j'aj'aj'i na nèti Lamatua. 10 Dènge j'ara ne'e, èdhi bisa tadhe mèu, cee ka dhu j'aj'i nèti Lamatua, aa cee ka dhu mai nèti dhèu aae nidhu. Te dhèu dhu madhutu boe j'ara dhu lèke, aa dhu sue boe a'ari na, sasoa na, j'aj'aj'i na nèti boe Ama Lamatua.

11 Karèi nèti uru ka, miu tadèngi le lii moa dhu peka na, “Pasue èci dènge èci!”^c 12 Miu sanèd'e era lii lolo Kaen dènge Habel, si? Baku tao madhutu Kaen, te nèngu ne dhèu bhelu-katub'a, ka nèngu pamadhe ari na, Habel. Nga tao ka nèngu tao sèmi èèna? Lula Kaen tao j'ara-j'ara dhu bhelu, te ngaa ari na tao j'ara-j'ara dhu mola.^d

13 A'ari aa'i-aa'i! Baku malaa ladhe dhèu dhu madhutu dad'èi rai-haha d'èi boe miu. 14 Èdhi te'a le dhu peka na, dhèu dhu mamuri ètu d'ara sasala, ladhe madhe, nèngu cèri eele nèti Ama Lamatua. Te ngaa, lula èdhi pasue dènge a'ari èdhi, èèna j'aj'i mi tadha, peka na, ropa èdhi madhe, èdhi mamuri taruu dènge Lamatua. Te, ladhe dhèu aa'i-aa'i dhu mamuri dènge boe sasue, bèli-camèd'a madhe, na, rèngu pakaj'èu nèti Ama Lamatua.^e 15 Te dhèu dhu sue boe a'ari na, nèngu cakaraa dènge dhèu dhu pamadhe dhèu. De me'a le, na, dhèu dhu sèmi sèra sa, abhu boe mamuri taruu dènge Ama Lamatua. 16 Èdhi bisa te'a conto sasue dhu lèke nèti Kristus. Te Nèngu sue èdhi, ka soro ngi'u Na, sèna ka madhe gati èdhi. Nèti èèna ka, èdhi hud'i soro ngi'u èdhi kahèi bagi a'ari èdhi. 17 Ladhe abhu dhèu dhu unu d'ai, nèdhi a'ari na ca dhèu dhu mamuri susa, te ngaa na tao boe madha-dhilu mi dhèu susa ne, na, tasamia ka nèngu peka na, “Ja'a sue Ama Lamatua!” Lèke boe!

18 Ana-ana pasue! Baku dhoka sue ètu hèb'a di, te ngaa tao j'ara dhu be'a, ho pad'elo sasue dhu lèke. 19 Te, ladhe èdhi pad'elo sasue dènge ad'u-ue j'ara dhu be'a sèmi èèna, èdhi te'a, na, èdhi abhu mamuri dhu lèke. Dènge sèmi èèna, èdhi madha'u heka, aa èdhi bisa doa kètu ropa èdhi ara lati asa madha Ama Lamatua. 20 Masi ka d'ara iiki èdhi galaa èdhi lula-nèti j'ara dhu lèke boe dhu èdhi ad'u-ue uru èèna, èdhi madha'u ia ka. Te rasa kasia Ama Lamatua kapai risi nèti rasa kasia èdhi. Aa Nèngu dhu ne'a aa'i mèu-mèu kahèi.

21 Ana-ana pasue! Ladhe d'ara iiki èdhi galaa boe èdhi, na, èdhi bisa bani aa makae boe, ropa èdhi ara lati asa madha Ama Lamatua. 22 Lula èdhi tao madhutu paredha Lamatua, aa pakarej'e d'ara Na, nèti èèna ka èdhi bisa abhu ngaa aa'i-aa'i dhu èdhi manèngi nèti Nèngu. 23 Lii paredha Na sèmi ne'e ka: parcaya taruu Ana Na Yesus Kristus, dhu Nèngu pua mai. Aa baku loe pasue èci dènge èci, sama sèmi lii paredha Yesus.^f 24 Dhèu dhu tao madhutu lii paredha Ama Lamatua sèra, mamuri na pa'èki dènge Ne, aa Ama Lamatua pa'èki dènge ne kahèi. Èdhi te'a, na, Ama Lamatua ètu d'ara èdhi, lula Roh Na mamuri ètu d'ara èdhi.