3 Èdhi te'a, na, èdhi tadhe mèu Ama Lamatua ladhe èdhi madhutu paredha Nèngu. 4 Dhèu bisa peka, na, “Ja'a tadhe Ama Lamatua.” Te ngaa ladhe nèngu madhutu boe paredha Lamatua, èèna j'aj'i mi tadha, na, nèngu dhèu kapod'e-kabèli dhu padhai lii leo tao leo. 5 Te ngaa dhèu dhu tao madhutu paredha Lamatua, èèna j'aj'i tadha, peka na, sasue nèngu mi Lamatua èèna, dhu lèke tare'a. Dènge j'ara ne'e, èdhi te'a, na, èdhi dhèu unu Lamatua. 6 De ladhe dhèu padhai lii, peka na, “Ja'a mamuri pa'èki dènge Ama Lamatua,” sasoa na, nèngu hud'i mamuri ku sama sèmi Yesus Kristus.

7 Ana pasue aa'i-aa'i! Lii paredha dhu ja'a suri hia miu ne, j'ara hiu boe. Te paredha ne dhu suri le ètu d'ara Lii Holo-Nori Lamatua dhu miu tadèngi le karèi nèti uru ka.^a 8 Masi ka sèmi èèna, te ngaa abhu j'ara hiu dhu ja'a neo suri lula-nèti paredha Lamatua. Lii paredha ne, j'aj'i le dènge be'a ètu d'ara mamuri Yesus. Aa paredha ne mulai sab'a le ètu d'ara miu, lula maroga ètu d'ara miu mulai ele, aa saraa dhu tare'a èèna, pasaraa le ètu d'ara mamuri miu.

9 Dhèu bisa padhai lii, peka na, “Ja'a mamuri ètu d'ara saraa.” Te ngaa ladhe nèngu tèka d'ara dènge a'ari na, sasoa na, nèngu mamuri ètu d'ara maroga era. 10 Lula dhèu dhu mamuri ètu d'ara saraa, nèngu hud'i pasue ku dènge a'ari na, aa abhu boe bhabhelu-katub'a ètu d'ara na dhu pamanahu nèngu. 11 Nèti èèna ka, ladhe abhu dhèu dhu tèka d'ara dènge a'ari na, èèna j'aj'i tadha, na, nèngu mamuri ètu d'ara maroga. Nèngu gogo ai lae-lae, lula maroga pabèdhu le musi madha na.

15 Miu baku sue dad'èi rai-haha, dènge mèdha-panyau na. Te dhèu dhu sue rai-haha, bisa boe sue Ama Lamatua. 16 Madha j'ara dhu abhu ètu rai-haha ne, pa'èki boe dènge Ama Lamatua. Nuka sèmi, dhèu dhu mamuri pakarej'e dhoka ngi'u na; dhèu manga'a; aa dhèu dhu d'èi padedha iisi lula kakaja-sasu'i na. J'ara sèmi se'e se mai boe nèti Ama Lamatua, te ngaa mai dhoka nèti rai-haha di. 17 Aa te ngaa rai-haha ne bèli-camèd'a ele, palere-lere dènge ngaa aa'i-aa'i dhu dhèu neo unu. Te ngaa dhèu dhu d'èi madhutu dad'èi Ama Lamatua, dhèu ne ele boe, te nèngu mamuri toke d'ai mia-mia.

18 Ana-ana! Lod'o-lod'o èle rai-haha ne oe d'ai kèna. Miu tadèngi le, peka na, dhèu dhu lab'a Kristus, bèli-camèd'a cèu mai. Madhutu iia-iia na, rèngu mai le. Te ètu mia-mia, abhu le dhu lab'a Kristus. Se'e se j'aj'i mi tadha, na, lod'o-lod'o èle rai-haha ne dètu ae le.^b 19 Dhèu palab'a sèra cèu nèti talora aae èdhi. Te ngaa rèngu se dhèu èdhi boe. Te, ladhe rèngu tare'a-re'a dhèu èdhi, tatu ra tèke eele boe èdhi, te ngaa ra taha taruu dènge èdhi. Aa te ngaa rèngu rai aa'i le nèti èdhi. De lèke tare'a, rèngu se dhèu èdhi boe, si?

20 Te ngaa miu sama boe sèmi rèngu. Te miu dhu sèmi mere le Roh nèti Dhèu Mola-Mèci Ama Lamatua. Aa Nèngu soru-bara le miu, sèna ka me'a mèu ngaa dhu lèke. 21 Miu pangee, na, ja'a suri sasuri ne'e, lula ja'a pangee, na, miu me'a boe ngaa dhu lèke, do? Aad'o! Te miu me'a mèu le mia ka dhu lèke, aa mia ka dhu leko-monya.

22 Madhutu mola-mola na, abhu le ètu rai-haha ne dhèu kapod'e-kabèli. Tasamia sèna ka èdhi tadhe si? Rèngu sèra, nuka dhèu dhu padhai lii, peka na, Yesus èèna Kristus boe. Madhutu a'abhu rèngu, Yesus èèna, Dhèu Mola-Mèci boe, dhu Lamatua pajaji tèke hia mai. Dhèu dhu padhai lii sèmi sèra palab'a dènge Kristus, te rèngu tule eele Ama Lamatua dènge Ana Na. 23 Dhèu dhu tule eele Ana Ama Lamatua, rèngu tule eele Ama Na kahèi. Te ngaa ladhe dhèu mangaku Ana Ama Lamatua, sasoa na, dhèu sèra j'aj'i le ana-ana Ama Lamatua.

24 De miu hud'i kèpe ku pa'èra-èra ngaa dhu miu tadèngi mere le karèi nèti uru sèra. Dènge j'ara ne'e, miu pa'èki taruu dènge Ama Lamatua, aa dènge Ana Na kahèi. 25 Aa Nèngu unu Na ka dhu padhadha le dènge èdhi, peka na, pe èdhi mamuri taa-taa dènge Ne.

26 Ja'a suri sasuri ne, sèna ka miu tadhe dhèu dhu neo leko-monya miu. 27 Miu sèmi mere le Roh Mola-Mèci Lamatua, aa miu mamuri pa'èki le dènge Nèngu kahèi. De miu parluu heka dhèu leo aj'a-nori hari miu. Te Roh Lamatua nia le, lula Nèngu ka dhu bisa aj'a aa'i-aa'i dhu lèke. Roh ne kapod'e-kabèli boe, sèmi dhèu leko-monya sèra. De kèpe pa'èra-èra mi ngaa dhu Nèngu nori le, ho miu mamuri d'ara èci taruu dènge Kristus.

28 De sèmi ne'e ana-ana! Miu hud'i mamuri pa'èki taruu dènge Kristus. Sèna ka ropa Na mai hari, miu madha'u boe, aa dènge boe d'ara makae lami titu ètu madha Na. 29 Lula miu dhu me'a le, na, Nèngu tao dhoka ngaa dhu lèke, nèti èèna ka bisa me'a kahèi, peka na, dhèu aa'i-aa'i, ladhe tao ngaa dhu lèke, rèngu j'aj'i ana-ana Lamatua.