Lii Holo-Nori dhu Hia Mamuri ne, abhu mema le karèi nèti rai-haha j'aj'i. Ne'e ne, ja'a dènge angalai ja'a ladhe ngèdhi le Nèngu dènge musi madha ji'i. Ji'i tadèngi le lii Na dènge ro'a dhilu ji'i. Aa ji'i g'ag'e ngèdhi le Nèngu dènge kacui-aai ji'i unu mi. Ji'i ladhe ngèdhi Ne sèmi èèna ka,^a 2 lula Na cèu mai ètu talora aae ji'i. Uru èèna, Nèngu pea dènge Ama Na, te ngaa limuri ne Na pad'elo le ngi'u aae Nèngu mi ji'i. Nèti èèna ka, ji'i bani lole dènge miu tasa mera mia dhèu rai-haha bisa abhu mamuri mola dhu dènge boe too-lane. Te Nèngu ne Lii Holo-Nori dhu Hia Mamuri.^b 3 Ji'i neo peka dènge miu, aa'i-aa'i dhu ji'i ngèdhi le aa aa'i-aa'i dhu ji'i tadèngi le, sèna ka miu dènge ji'i sama-sama bisa mamuri d'ara èci. Te èdhi aa'i-aa'i ti dhu pa'èki le dènge Ama Lamatua, aa dènge Ana Na dhu Nèngu pua mai, nuka Yesus Kristus. 4 De ji'i suri sasuri ne, sèna ka pamaho'o d'ara miu. Dènge j'ara ne'e, d'ara ji'i asa tabha karej'e kahèi.

5 A'aj'a dhu Yesus lole dènge ji'i, èèna ka dhu limuri ne ji'i neo peka dènge miu. Sèmi ne'e: Ama Lamatua be'a seli eele. Bhabhelu-katub'a ciki sa abhu boe ètu Nèngu. Te Nèngu ne nuka sèmi saraa dhu heo lo'a-lo'a, dhu pab'ali boe dènge maroga ciki sa. 6 Ladhe èdhi padhai lii, peka na, “Èdhi mamuri d'ara èci dènge Lamatua,” aa te ngaa èdhi mamuri tao bhelu era, na, èèna sama sèmi èdhi mamuri ètu d'ara maroga. Te èdhi padhai lii kapod'e-kabèli aa mamuri madhutu boe j'ara dhu mola. 7 Te ngaa ladhe èdhi mamuri madhutu j'ara mola, èdhi èci èèna ka dènge dhèu dhu mamuri ètu d'ara saraa Ama Lamatua. Dènge j'ara ne, èdhi aa'i-aa'i ti bisa mamuri d'ara èci. Aa d'ara èdhi mola-mèci, lula mamadhe Yesus Kristus, Ana Ama Lamatua, aa raa Nèngu rase pamèu-mèu sasala èdhi.

8 Ladhe èdhi padhai lii, peka na, “Èdhi tao boe sala,” èèna j'aj'i tadha, peka na, èdhi tipu ngi'u èdhi unu ti, aa te'a boe mia ka dhu lèke. 9 Te ngaa ladhe èdhi mangaku sasala èdhi, tatu Ama Lamatua dhu d'ara mola, saku eele sasala èdhi madhutu lii pajaji Na, aa Na pamèu d'ara èdhi. 10 Ladhe èdhi peka, na, “Èdhi tao tèdhi boe sasala,” sasoa na, èdhi tao Ama Lamatua dhèu leko-monya! Te Nèngu ka dhu peka tèke, na, dhèu aa'i-aa'i dhu manahu asa d'ara sasala-sasigo. Aa ladhe lii padhai èdhi sèmi èèna, tadha na, Lii Holo-Nori Nèngu abhu boe ètu d'ara èdhi.