Kètu èdhi, Yesus Kristus neo lèpa hari mai
3
A'ari pasue aa'i-aa'i! Ne'e ne, sasuri ka dua kèna nèti ja'a dhu ja'a pa'adhu hia miu. Ètu d'ara sasuri dua se, ja'a pasanèd'e le miu ho bisa pangee j'ara-j'ara dhu mola. 2 Sanèd'e paie-iie lii lolo nèti dhèu mola-mèci dhu rèti lii padhai Lamatua uru-uru sèra. Sanèd'e kahèi dhèu pajuu-paleha Yesus. Pangee paie ngaa-ngaa dhu Lamatua èdhi paredha mi rèngu ho peka mi miu. Te Nèngu ka dhu patalale miu nèti koasa sasala mi! 3 Sanèd'e sèmi ne'e: d'ara lod'o èle rai-haha sèra, abhu le dhèu dhu padhèto d'ara lii, dhu tao leli madhutu dad'èi ra. Rèngu padhai lii pa'ele iie aa'i j'ara-j'ara dhu lèke.a 4 Dhèu se, peka na, “Baku pusi-pahae! Yesus padhadha, na, Nèngu neo mai hari, do? Ladhe sèmi èèna, Nèngu buli mia? Te karèi nèti bèi-baki èdhi madhe, toke d'ai doe ne'e ne, ngaa-ngaa èci sa dhu ub'a boe. Ngaa aa'i-aa'i sama sèmi uru-uru sèra, karèi nèti Ama Lamatua paj'aj'i liru dènge rai-haha.”5-7 Te ngaa abhu ca j'ara dhu dhèu kapod'e-kabèli se ro'o boe sanèd'e. Nuka, karèi nèti uru j'ara ka, Ama Lamatua dhoka padhai lii di, ka liru j'aj'i dènge. Ka Na paj'aj'i èi. Hèia Na hag'e èi nèti rai-dedha, ka rai-dedha cèu nèti d'ara èi. Ladhe Lamatua padhai lii sèmi mia, na, j'aj'i dènge sèmi èèna ka.b Nèbhu ae ku, lod'o Noh mamuri era, Ama Lamatua pake èi aae lala ho palaho aa'i mèu-mèu dhèu ètu rai-haha ne.c Te ngaa limuri ne, Lamatua dhu peka tèke le ngaa dhu bèli-camèd'a Na tao ètu dedha-liru dènge rai-haha ne. Limuri ne Lamatua tatae era, te ngaa ropa d'ai lod'o èèna, tatu Na neo tunu pakèpu aa'i si. Te Lamatua bèli-camèd'a papuru hahuku, sèna ka palaho dhèu dhu pusi-pahae boe Nèngu. Masi ka sèmi èèna, te ngaa dhèu kapod'e-kabèli se ro'o boe re'a, na, bèli-camèd'a Ama Lamatua tatu tao madhutu ngaa dhu Na peka sèra.
8 A'ari pasue aa'i-aa'i! Baku bhèlu j'ara ne'e. Lamatua èdhi ige boe lod'o sama sèmi dhu èdhi ige. Te madhutu Nèngu, na, ca lod'o bisa sama sèmi ca riho tèu. Aa ca riho tèu bisa nuka ca lod'o doko di.d 9 Ladhe Lamatua èdhi pajaji neo tao ngaa èci sa, Na tao pamèci dènge lod'o na, aa pamata boe. Abhu dhèu cahag'e dhu pangee, na, Nèngu sab'a nena di. Madhutu iia-iia na, sèmi boe èèna! Te Na taha d'ara, ho tatae d'ai ku lod'o na. Dad'èi Lamatua èdhi, ho dhèu aa'i-aa'i hud'i ele-ho'a ku, sèna ka tèke eele sasala-sasigo ra, hèia lèpa madhutu Nèngu. Te d'ara Na la'e boe, ladhe dhèu pacèri nèti Nèngu.
10 Te ngaa lod'o Kètu èdhi, Yesus Kristus, lèpa hari mai, abhu boe ca dhèu sa dhu re'a mema. Te mamai Na dènge sahèka, nuka sèmi dhèu mana'u maso asa d'ara èmu. Lod'o èèna, aa'i-aa'i dhu ètu dedha-liru kèpu aa'i mèu-mèu, nuka madha lod'o, liru dènge hua-hètu. Aa'i-aa'i ra ele! Sèmi èèna kahèi, rai-haha ne dènge isi na aa'i-aa'i. Kèpu eele!e
11 De ladhe aa'i-aa'i kèpu ladhu ai sèmi èèna, na, mamuri miu hud'i sèmi ngaa sa? Miu hud'i pa'èra-èra mamuri madhutu dad'èi Lamatua. Miu hud'i mamuri mola-mèci! 12 Miu hud'i tatae mamai Lamatua kahèi. De miu hud'i pa'èra taruu, sèna ka lod'o èèna j'aj'i malai risi hari. Lod'o èèna, liru kèpu ladhu ai kahèi. Aa ngaa aa'i-aa'i ètu dedha-liru kèpu toke roe eele aa'i si.
13 Te ngaa èèna na, abhu liru rupa hiu dènge rai-haha rupa hiu. Ama Lamatua dhu moa tèke le sèmi èèna ka. J'ara se'e se ka dhu èdhi mate tae-tae. Ètu era nèi abhu dhoka dhèu dhu mamuri mola di.f
14 De a'ari pasue aa'i-aa'i! Lod'o miu tatae j'ara se'e se era, miu hud'i bori pa'èra dhari ho j'aj'i dhèu be'a madhutu a'abhu Ama Lamatua. Dènge sèmi èèna, abhu boe ca dhèu sa dhu bisa pèci sasala asa miu. Pa'èra sèna ka mamuri padame èci dènge èci.
15a Te Lamatua èdhi taha d'ara, ho Nèngu patalale miu nèti koasa sasala-sasigo miu.
Petrus suri pa'èle sasuri na
15b A'ari èdhi Paulus suri nèdhi le hia miu madha j'ara ae-ae dhu sama hua, si? Lamatua ka dhu hia ne mamèu sèmi èèna, nèti èèna ka nèngu suri madhutu sèmi èèna kahèi. 16 Lod'o-lod'o dhu Paulus suri sasuri, na peka kahèi j'ara se'e se. Nèti sasuri na, abhu kahèi dhu èdhi te'a tare mèka sasoa na. Abhu kahèi dhèu dhu pakapod'e asa j'ara leo nèti naneo Paulus. Dhèu se'e kahèi pakapod'e j'ara-j'ara dhu leo nèti isi Sasuri Mola-Mèci Lamatua. Dhèu sèra, nuka dhèu bai-eed'a dhu ro'o boe pakanucu Lii Holo-Nori Lamatua dhu lèke, aa rèngu dhèu dhu parcaya èra boe. Dhèu sèmi se'e se, bèli-camèd'a laho unu ra.
17 A'ari pasue aa'i-aa'i! Miu me'a le j'ara mamuri nèti mese kapod'e-kabèli sèra. De baku pamud'e! Te rèngu d'èi boe nanene atora èci sa. Rèngu neo cob'a ho kapod'e miu nèti j'ara dhu mola. Te ngaa baku soro tèke si segi miu. Miu hud'i pakadhii ku lalèka miu. 18 Be'a risi parcaya miu asa tabha èra. Te miu me'a le Kètu èdhi, Yesus Kristus ka dhu patalale èdhi nèti koasa sasala-sasigo èdhi. Nèngu neo pad'elo d'ara hua iia Na mi dedha miu. Aa Nèngu neo miu tadhe Ne be'a risi hari kahèi.
Ja'a d'èi ladhe dhèu aa'i-aa'i ded'e padedha-dedha Yesus Kristus nèti doe ne'e toke d'ai mia-mia la'e!g
Saloom,
Petrus