2 Masi ka sèmi èèna, te ngaa bèli-camèd'a abhu kahèi dhèu ae dhu madhutu rèngu, aa tao leli dhu re'a heka makae. Bèli-camèd'a dhèu pakarehe a'aj'a dhu lèke, lula tatao rèngu. 3 Mese dhu kapod'e-kabèli sèra manga'a-dèu ngara. Rèngu ad'u-ue rupa-rupa lii padhai, sèna ka tipu rare doi-dhari miu. Te ngaa baku bhèlu, te Ama Lamatua dhu Pama'ète Lii Langu dhu pasaruru nèdhi boe musi madha. Karèi nèti uru ka, Nèngu pa'èra mema le ho huku si. Bèli-camèd'a ra laho aa'i.

4 Conto sèmi, uru èèna, abhu ana pajuu Ama Lamatua cahag'e ètu sorga dhu tao sala. Te ngaa Lamatua dhu Pama'ète Lii Langu soro tèke boe si. Na pèci si asa d'ara naraka, aa bèdho si ètu d'ara Ro'a Maroga dhu Marèma aae. Rèngu pea taha ètu èèna toke d'ai lod'o lasi asa madha Ama Lamatua.

5 Sèmi èèna kahèi dènge dhèu dhu mamuri uru-uru sèra. Tèu èèna, rèngu ad'u-ue bhelu-katub'a dènge pusi-pahae boe Ama Lamatua. Te ngaa Lamatua dhu ator le dhèu Na èci dhu d'ara mola, ngara na Noh, pad'elo j'ara sèna ka dhèu bisa mamuri mola. Te ngaa ro'o boe nanene ne kahèi. Nèti èèna ka, Ama Lamatua hia èi aae lala, ka palaho aa'i dhèu dhu pusi-pahae boe Ne. Te ngaa Lamatua hia mamuri dhoka Noh dènge isi èmu na. Rèngu aa'i-aa'i ra aru dhèu.^a

6 Ca tèka hari, dhèu uru-uru sèra ètu kota Sodom dènge kota Gomora, mamuri dhoka ad'u-ue bhabhelu-katub'a. Hèia Ama Lamatua huku si. Nèngu labhu pakèpu aa'i si j'aj'i ahu, ka dhèu ètu sèra madhe aa'i mèu-mèu. Se'e se j'aj'i mi conto hia mi dhèu leo dhu d'èi mamuri ètu d'ara bhabhelu-katub'a dènge dhu pusi-pahae boe Ama Lamatua. Rèngu bisa re'a mema le mamadhe-mamopo ra, ladhe ele boe ho'a.^b 7 Te ngaa lod'o èèna, abhu ca dhèu ngara na Lot, dhu mamuri mola. Nèngu roca le dènge tatao dhu seli-kolane nèti dhèu bhelu se'e, dhu ro'o boe nanene Ama Lamatua. Ka Ama Lamatua pakaj'èu Lot nèti era èèna.^c 8 Lot ne ca dhèu dhu d'èi tao dhu lèke, te ngaa na pea ètu talora aae dhèu Sodom. Bèli-bèli èèna, Lot nèdhi aa tadèngi kahèi rèngu sisu Atora Ama Lamatua. Se'e se ka dhu pasusa d'ara Lot.

9 Conto sèra sa pad'elo, peka na, Ama Lamatua ne'a j'ara hia mamuri mi dhèu dhu d'èi nanene Nèngu, ka Na pakaj'èu si nèti rupa-rupa dadugu-rariu. Nèngu ne'a pamanahu hahuku dhu bia kahèi mi dhèu dhu mamuri koe-kapengo. Aa Lamatua tao j'ara se'e toke d'ai lod'o Na pama'ète lii langu dhèu aa'i-aa'i. 10 Hahuku dhu bia èèna, lèke risi-risi mi dhèu dhu d'èi dhoka mamuri kaj'alu, madhutu dad'èi d'ara ra. Rèngu ro'o boe nanene ca dhèu sa, aa pahahe dhèu dhu rèd'u koasa. Tatu Ama Lamatua huku si.

De mese kapod'e-kabèli sèra bani titu kèna, aa padedha iisi seli eele. Rèngu ro'o boe pakab'ua aa madha'u boe padhai lii pa'ele iie kolongara Ama Lamatua dènge ana pajuu Na ètu sorga. 11 Madhutu mola-mola na, ana pajuu Lamatua ètu sorga sèra èra risi nèti rèngu mese-mese kapod'e-kabèli se. Masi ka sèmi èèna, te ngaa ana-ana pajuu se padhai lii pa'ele iie boe kolongara mese kapod'e-kabèli sèra ètu madha Lamatua rèngu. Aa ra pèci boe sasala asa mese sèra kahèi.

12 Te ngaa mese kapod'e-kabèli sèra re'a dhoka padhai lii pa'ele iie j'ara-j'ara dhu rèngu mesa ra re'a boe. Te rèngu èci èèna ka dènge badha dhu dènge boe ngangee na! Be'a risi, kèpe ho palaho eele si! Te kalua aapa rèngu, sèmi èèna ka. Tatu bèli-camèd'a rèngu laho aa'i, lula tatao rèngu dhu karehe sèra. 13 Rèngu paj'èra ae le dhèu. Pe, Ama Lamatua pasusa rèngu kahèi, lula tatao rèngu dhu lèke boe sèra. Rèngu d'èi dhoka tao pesta liar. Ladhe re mèu, rèngu d'èi tao leli kahèi, sèna ka dhèu bisa rèdhi bhabhelu rèngu. Rèngu re'a boe makae, ka pa'ele iie kolongara miu. Ladhe rèngu ra'a pesta sama-sama dènge miu, rèngu d'èi dhoka neo tao madhutu bhabhelu ra. 14 Musi madha ra seru lee, ho patangi-tenge dhèu bhèni dhu neo karihu kaj'alu dènge rèngu. Mamuri rèngu dhoka bhelu-katub'a di. Rèngu tenge dhèu dhu parcaya èra boe mi Lamatua, ka pamako si, sèna ka pa'èci dènge rèngu ho tao bhabhelu. Rèngu manga'a, aa re'a boe roca. Tatu Ama Lamatua huku si!^d

15-16 Mese kapod'e-kabèli sèra, uru èèna, rèngu dhèu dhu madhutu j'ara mola, te ngaa nèbhu-nèbhu ka ra sero eele j'ara. Dènge sèmi èèna, rèngu sèra nuka sèmi Balaam, ana Bosor.^e Nèngu ne, dhèu nèti lii padhai Lamatua. Te ngaa nèngu d'èi dhoka tenge doi-dhari di, nèti èèna ka na tao j'ara dhu lèke boe. Ca tèka, Balaam manya'e badha keled'ei. Keled'ei dhu bisa boe padhai lii. Te ngaa lod'o èèna, Lamatua hia keled'ei ne padhai lii sama sèmi dhèu! Ka keled'ei ne kai Balaam, lula bhabhelu na. Dad'èi keled'ei ne, sèna ka Balaam ae eele ka nèti tatao na dhu koe-kapengo, nuka sèmi dhèu huj'u sa.^f

17 Mese kapod'e-kabèli sèra, èci èèna ka dènge madha èi dhu guna boe, lula mèti eele. Rèngu cakaraa kahèi dènge bhuru dhu guna boe, lula lai ngèlu tiu eele. Ama Lamatua tao tèke le era dhu maroga aatu-aatu èci, sèna ka taha si. 18 Te rèngu padhai lii hèb'a-hua dhu dènge boe sasoa. Rèngu dadugu dhèu, sèna ka madhutu tao j'ara dhu lèke-lèke boe. Rèngu d'èi pamako dhèu dhu heka lèpa hari asa j'ara mola, sèna ka tao hari j'ara karehe. 19 Dhèu kapod'e-kabèli se padhadha, peka na, “Ladhe miu nanene ji'i, na, miu neo tao ngaa èèna ka madhutu dad'èi miu, na, tao laa!” Te ngaa dhèu dhu peka sèmi sèra sa, sama sèmi ènu dhu bisa boe pakaj'èu iisi ra nèti bhelu-katub'a. Te dhèu dhu soro tèke j'ara èci ator nèngu, nèngu j'aj'i le ènu ètu j'ara èèna. 20 Ladhe neo pakaj'èu nèti bhabhelu ètu rai-haha dhu pakaj'alu èdhi, na, èdhi hud'i tadhe dènge be'a ku Kètu èdhi, Yesus Kristus. Te ngaa ladhe abhu dhu pakaj'èu nèti Nèngu, hèia pa'èki hari dènge bhabhelu sama sèmi uru sèra, èèna nuka sèmi bhabhelu sèra ka dhu ator rèngu. D'ai lod'o limuri, rèngu asa tabha j'èra! 21 Be'a risi, ladhe dhèu re'a rèdhi mèka j'ara mola. Te ladhe dhèu re'a le j'ara mamuri dhu lèke, te ngaa ra pakaj'èu iisi ra, ka tao boe madhutu j'ara dhu be'a dènge dhu mola, dhu Ama Lamatua paredha le mi èdhi, èèna be'a boe. 22 Abhu lii tate'a dhu palèke dènge mese kapod'e-kabèli se, dhu peka na, “Ladhe busa mèdhu, na'e hari mèdhu na.” Dhu leo hari peka na, “Masi ka padiu tare le hahi ci'u, te ngaa la'e hari loli èi lobho.”^g