Ja'a suri sasuri ne'e hia miu aa'i-aa'i mi dhu Ama Lamatua hag'e nare le. Nuka miu dhu mamuri pahag'a palème era ètu propensi Pontus, propensi Galati, propensi Kapadokia, propensi Asia, dènge propensi Bitinia.

A'ari pasue aa'i-aa'i! Karèi nèti uru j'ara ka, Ama Lamatua hag'e nare mema le miu ho j'aj'i dhèu unu Na. Roh Na ka dhu pamèu miu j'aj'i mola-mèci hia Nèngu, sèna ka miu bisa tao madhutu paredha aa'i-aa'i dhu Yesus Kristus hia miu. Aa ladhe miu madhutu aa'i paredha Na sèra, èèna nuka sèmi Lamatua pici miu dènge raa Yesus, sèna ka j'aj'i tadha, peka na, miu j'aj'i le dhèu unu Na dhu mola-mèci hia Nèngu.

Ja'a sabaj'a sèna ka Ama Lamatua pad'elo d'ara hua iia Na mi dedha miu, ho mamuri miu asa tabha dame dènge mera-milu.

3 Koa-kio hia aa'i mi Ama Lamatua! Nèngu èèna, Ama nèti Kètu èdhi, Yesus Kristus. Lula d'ara Lamatua hua iia titu kèna, nèti èèna ka Nèngu kasia èdhi seli eele. Yesus Kristus madhe, te ngaa Na mamuri hari. De ladhe Kristus pamamuri èdhi, Na hia èdhi mamuri hiu, nuka sèmi rara iisi hari èdhi. Nèti èèna ka, èdhi parcaya taruu Kristus, lula èdhi sanao dènge èra, bèli-camèd'a Nèngu ladhe-leru èdhi dènge be'a. 4 Sama sèmi èdhi dhèu rai-haha, ladhe ca dhèu ama madhe, tatu nèngu tèke eele mèdha-panyau na hia ana niki na. Sèmi èèna kahèi, Yesus dhu tèke le pusaka hia èdhi ètu sorga. Te ngaa pusaka se dhu ele iie boe, laho boe, aa ele boe. 5 Miu parcaya, na, Ama Lamatua dènge koasa ho soru-bara miu. Na piara dènge madhenga miu, sèna ka baku abhu dhu palaho miu. Aa ladhe èle ka rai-haha ne, Na neo pad'elo dènge j'ara tasamia Nèngu hia miu mamuri.

6 Nèti èèna ka, d'ara miu karej'e, masi ka limuri ne miu rasa bia lula miu sili mere boe rupa-rupa sasusa. 7 Ama Lamatua soro tèke èdhi paraga dènge dadugu-rariu, sèna ka Na sèku neo ne'a mèu parcaya èdhi mi Nèngu. Ladhe èdhi taha ètu d'ara dadugu ne, èèna j'aj'i mi tadha, peka na, parcaya èdhi lèke aa èra. Èdhi bisa pakasame dènge hualaa. Èdhi hud'i tunu pamèu hualaa ètu d'ara ai karoo, sèna ka ai na'e aa'i kaj'alu na, heka èdhi abhu hualaa isi adhu kèna. Aa te ngaa, madhutu ngangee Ama Lamatua, lalèka èdhi kab'ua risi nèti hualaa. De ladhe parcaya èdhi taha ètu d'ara dadugu-rariu sèmi èèna, bèli-camèd'a ropa Yesus Kristus lèpa hari mai, Ama Lamatua koa-kad'iri èdhi, hèia Na pad'elo kolo-karisi èdhi, aa Na pakab'ua èdhi kahèi.

8 Masi ka miu ladhe mèdhi mèka Yesus, te ngaa miu sue Ne. Masi ka limuri ne miu mèdhi mèka Nèngu, te ngaa miu parcaya Ne. Miu karej'e risi eele, masi ka abhu boe lii dhu pamèci, dhu bisa peka dènge dhèu lula-nèti d'ara karej'e miu. 9 Lula miu parcaya Ne, ka upa miu, nuka Ama Lamatua patalale miu nèti koasa sasala-sasigo miu.

10 Dhèu rèti lii padhai Ama Lamatua uru-uru sèra, pakanucu ho neo re'a mèu, j'ara tasa mera mia Lamatua patabuli dhèu nèti koasa sasala ra. Dhèu rèti lii padhai sèra dhu peka tèke le j'ara-j'ara Lamatua pad'elo d'ara hua iia Na mi dedha miu, lula Nèngu dhu pa'èra mema le, sèna ka Na hia miu mamuri. 11 Roh Kristus dhu sab'a ètu d'ara rèngu, sèna ka peka mema, na, bèli-camèd'a Kristus hud'i pasae ku sasusa, aa dènge j'ara tasamia Nèngu dui j'aj'èra. Ladhe èle aa'i ku se'e, heka Ama Lamatua ded'e Ne padedha-dedha kèna. Nèti èèna ka, dhèu rèti lii padhai sèra neo re'a lod'o mia madha j'ara se'e j'aj'i. 12 Ka Roh Kristus èèna peka dènge dhèu rèti lii padhai se kahèi, na, rèngu rèdhi boe, te ngaa miu ka dhu mèdhi j'ara se j'aj'i. Aa miu tadèngi j'ara se kahèi, lula Roh Lamatua dhu Mola-Mèci nèti sorga pua le dhèu leo ho lole dènge miu Lii Lolo Be'a Lamatua. Aa te ngaa, ana pajuu Ama Lamatua ètu sorga neo rèdhi j'ara se'e se kahèi.

13 Nèti èèna ka, miu hud'i pa'èra sèna ka me'a mèu j'ara se aa'i-aa'i. J'aga paie-iie sèna ka ngangee miu mola. Bori pa'èra ho parcaya taruu Yesus Kristus toke Na lèpa hari mai. Lula lod'o èèna, Ama Lamatua neo pad'elo d'ara hua iia Na mi dedha miu. 14 Miu hud'i nanene paie-iie ku Ama Lamatua, sama sèmi ana-ana nanene lii ina-ama ra. Uru èèna, miu me'a iia mèka j'ara mamuri Lamatua dhu mola. Te ngaa limuri ne me'a mèu le. De baku mamuri madhutu dad'èi miu dhu neo tao bhabhelu. Te èèna, j'ara mamuri miu dhu dhui. 15 Nèti èèna ka, limuri ne miu hud'i mamuri mola-mèci. Te Ama Lamatua èèna, mola-mèci. Nèngu ka dhu paroa nare miu ho j'aj'i ana-ana Na. Nèti èèna ka, mamuri miu kateme aae hud'i mola-mèci ku. 16 Te dhu suri tèke ètu d'ara sasuri Lamatua, peka na, “Miu hud'i mola-mèci ku, lula Ja'a ne mola-mèci.”^a

17 Miu d'èi padhai lii dènge Ama Lamatua nuka sèmi Ama miu. Nèngu Dhèu Pama'ète Lii Langu kahèi, dhu parisa mamuri dhèu èci-èci. Te ngaa Nèngu baka-leo nèti dhèu pama'ète lii langu dhu leo sèra. Te Na pama'ète lii langu dhèu dènge mola, dhu dènge boe koe-kapengo. Nèti èèna ka, miu hud'i j'aga paie ku mamuri miu. Te miu nuka sèmi dhèu tao-mai dhu dhoka manubha ètu rai-haha ne.

18 Miu me'a kahèi, na, Kristus ka dhu tihe pama'ète le miu nèti mamuri miu dhu dènge boe kolo-kapua. J'ara mamuri rupa sèmi sèra ka dhu miu sèmi mere nèti bèi-baki miu, nuka sèmi pusaka. Te ngaa sanèd'e, te Kristus sui nare le miu, b'ae boe pake doi pudhi do hualaa dhu ele bèli-camèd'a. 19 Te ngaa Na b'ae-baj'a pake raa Nèngu unu Na. Ne'e ne, kab'ua titu kèna! Nèngu madhe nuka sèmi ana kahib'i-kalèbho dhu ad'u-ue nèdhi boe sasala, dhu ra roro Ne tao j'aj'i korban.

20 Lod'o Ama Lamatua paj'aj'i mèka rai-haha ne, Nèngu ne'a aa'i le aa'i-aa'i dhu èèna na Kristus tao. Te ngaa uru èèna, Ama Lamatua dhae patadhe mèka Kristus mi dhèu rai-haha. Limuri ku, heka Nèngu pad'elo Kristus sèna ka j'aj'i berkat hia miu. 21 Lula tatao Kristus, ka miu bisa parcaya Ama Lamatua. Te Nèngu pamamuri hari Kristus, aa ded'e Ne padedha-dedha. Ama Lamatua ad'u-ue j'ara sèmi èèna, sèna ka miu parcaya Ne, aa sanao ho Na tao madhutu ngaa dhu Nèngu padhadha tèke.

22 Miu tao madhutu j'ara dhu lèke. De limuri ne miu bisa sab'a pa'èra-èra hia Lamatua. J'ara èèna ka tao miu pasue dènge d'ara kateme mi a'ari miu dhu parcaya sèra. Sasue miu hud'i asa tabha èra, lula d'ara miu mola-mèci. 23 Miu limuri ne, abhu le mamuri hiu. Te ngaa mamuri hiu ne, mai boe nèti ina-ama miu dhu bèli-camèd'a madhe ètu rai-haha ne, te ngaa miu abhu nèti Ama èdhi ètu sorga dhu madhe boe. Mamuri hiu unu mi ne, miu abhu re Lii Holo-Nori Ama Lamatua. Lii Holo-Nori Nèngu ne, nèti mamuri dhu lèke, aa taha taruu. 24 Ètu d'ara Sasuri Mola-Mèci Ama Lamatua, dhu suri, peka na,

Lii Holo-Nori Lamatua èèna, nuka Lii Lolo Be'a dhu ji'i peka le dènge miu.^b