Lii holo hia kètu juma'at sèra
5
Ja'a ne, ca dhèu kètu kahèi. Uru èèna, lod'o Kristus pasae j'aj'èra Na, ja'a kèdhi unu ku dènge musi madha ja'a. Aa bèli-camèd'a ladhe dhèu aa'i-aa'i laladhe rèdhi dadedha Ama Lamatua, ja'a kahèi neo kèdhi dènge musi madha ku. De ja'a neo holo kètu juma'at dhu leo sèra, na: 2 miu nuka sèmi dhèu madhenga badha dhu ladhe-leru kahib'i-kalèbho ra. De miu hud'i leru paie-iie dhèu dhu Lamatua pangèd'u asa miu. Uri si paie-iie. Mage miu ladhe-leru si, lula dhoka sasab'a miu di, te ngaa lula miu d'èi tao sèmi èèna. Uli si madhutu dad'èi Lamatua. Baku d'èi tenge oto, te ngaa sab'a dènge karej'e ho soru-bara dhèu unu Lamatua.a 3 Baku paredha leli, ho pabia dhèu dhu Lamatua hia miu ladhe-leru si. Te ngaa miu hud'i j'aj'i conto dhu be'a, dhu bisa paj'uj'u j'ara hia rèngu. 4 Yesus, nuka sèmi Kètu nèti Dhèu Madhenga badha. Bèli-camèd'a ladhe Na lèpa hari mai, Ama Lamatua neo b'ae rui-j'aj'èra miu, lula miu uri dhèu miu dènge be'a. Upa ne, bisa boe ele iie, te ngaa taha taa-taa d'ai mia-mia.Lii holo hia ana-ana ngèru
5 Ana ngèru aa'i-aa'i! Miu kahèi hud'i nanene ku kètu juma'at sèra. Miu aa'i-aa'i mi baku padedha iisi. Te ètu Sasuri Mola-Mèci Lamatua, dhu suri, peka na,
“Lamatua lab'a dhèu dhu padedha iisi,
te ngaa Nèngu d'èi pad'elo d'ara hua iia Na mi dhèu dhu pahaha iisi.”b
6 Nèti èèna ka, miu hud'i sanèd'e ku koasa Lamatua, sèna ka miu baku pamone-pabhèni. Hèia ropa d'ai lod'o na, Lamatua koa-kad'iri miu.c 7 Pataleo d'ara miu, sèna ka Lamatua uri j'ara aa'i-aa'i dhu tao miu madha'u. Te Nèngu ka dhu haduli miu.
8 Mage-mage! Pake ngangee madhera. Aa j'aga paie-iie, te musu èdhi, nuka dhèu aae nidhu, neo palaho miu. Neo dhèle aa'i miu, nuka sèmi singa dhu manganga, dhu patangi-tenge badha neo na'a. 9 Te ngaa baku madha'u. Miu hud'i lab'a dhèu aae nidhu èèna. Miu hud'i pa'èra lalèka miu mi Lamatua kahèi. Te miu me'a le, na, a'ari miu dhèu parcaya buli mia-mia ètu rai-haha ne, abhu sasusa sama sèmi miu kahèi. 10 Te ngaa sanèd'e, te Ama Lamatua d'èi pad'elo d'ara hua iia Na mi èdhi kahèi. Nèngu ka dhu paroa le miu, sèna ka j'aj'i dhèu unu Na, lula miu sèmi mere le Kristus. Nèti èèna ka, Nèngu neo ded'e miu padedha-dedha, sèna ka miu bisa mamuri taruu dènge Nèngu. Te ngaa ladhe miu abhu le j'aj'èra dhoka ètu d'ara ciki oo'e di ètu rai-haha ne, Lamatua neo pabe'a hari miu. Na neo pa'èra miu, aa tao miu bisa taha. Nèngu pamadhèdi miu kahèi mi dedha fanderen dhu èra. 11 Ji'i manèngi sèna ka Lamatua nèd'u koasa aa'i-aa'i toke d'ai mia-mia. Lèke tare'a!
Petrus suri pa'èle sasuri na
12 Silasd ka dhu soru-bara ja'a ho suri sasuri dhu bab'a ne. Nèngu ne, a'ari èdhi dhèu parcaya, aa ai g'ana ja'a. Ja'a holo-nori miu sèna ka miu taha pa'èra, te Lamatua d'èi pad'elo d'ara hua iia Na taruu mi èdhi. De miu hud'i èra ku, sèna ka baku hari kabodho.
13 Dhèu parcaya dhu pakaboko ètu kota Babele hia miu lii maho'o. Ama Lamatua hag'e nare le rèngu, sama sèmi Na pili miu.
Ana ja'a Markus pa'adhu lii maho'o kahèi.f
14 Ladhe miu paraga, na, pa'uu èci dènge èci ho pad'elo pasue miu.
Ja'a d'èi ladhe miu aa'i-aa'i mi dhu parcaya Kristus bisa mamuri dame dènge mera-milu.
Saloom,
Petrus