3 Uru èèna, lod'o ae le ka dhu miu bisa pake ho ad'u-ue bhabhelu ngaa èèna ka, sama sèmi dhèu dhu tadhe boe Lamatua. Nuka sèmi: rèngu tao j'ara dhu lèke boe. Tao j'ara makae. Tao bhabhelu madhutu dad'èi d'ara ra. Rinu mahu. Rèngu tao pesta liar. Rèngu tao pesta j'ara makae rupa-rupa. Ra sogo-tagu nidhu dènge j'ara dhu pamamuru iisi èdhi. 4 Rèngu padhai pa'ele iie kolongara miu, lula rèngu re'a boe, nga tao ka miu tao boe madhutu bhabhelu sèmi rèngu dhu seli-kolane èèna.

5 Te ngaa sanèd'e, bèli-camèd'a rèngu hud'i lasi ku asa madha Ama Lamatua, dhu j'aj'i Dhèu Pama'ète Lii Langu. Rèngu hud'i lole dènge Ama Lamatua nga tao ka rèngu mamuri ètu d'ara bhelu-katub'a sèmi sèra. Baku bhèlu, te dhèu aa'i-aa'i bèli-camèd'a hud'i lasi ku asa madha Nèngu. Dhèu dhu mamuri era, do dhu madhe le, aa'i-aa'i hud'i lasi ku asa madha Lamatua. 6 Lèke tare'a! Ama Lamatua neo parisa dhèu dhu madhe le, nuka sèmi dhu Nèngu parisa dhèu rai-haha leo sèra. Te Nèngu neo ne'a j'ara mamuri rèngu uru sèra. Nèti èèna ka, Yesus la'e le peka-padhai Lii Lolo Be'a Lamatua mi dedha rèngu, sèna ka rèngu kahèi bisa abhu mamuri dhu lèke ho tao madhutu dad'èi Lamatua.

7 Lod'o èle rai-haha ne oe dètu ae le. Nèti èèna ka, miu hud'i pajiko paie-iie dènge d'ara dhu mau, sèna ka Lamatua sèmi nare lii manèngi miu. 8 Dhu lèke ka, miu hud'i mamuri pasue taruu èci dènge èci. Te masi ka dhèu leo tao sasala ae-ae, te ngaa miu bisa pa'angalai era dènge ne, lula miu sue ne.^a 9 Pakabhèle ai sèna ka sèmi mere dhèu tao-mai ho manubha ètu d'ara èmu miu. Te ngaa sanèd'e, baku sèmi mere si dènge d'ara ka'uu-kamuki.

10 Èdhi dhèu parcaya aa'i-aa'i abhu le karunya nèti Lamatua. De èdhi hud'i pake karunya ne ho lalau-lalo'o a'ari dhèu parcaya. Haduli aa pake pabe'a-be'a karunya èèna, te èèna ka dhu dènge guna hia mi Lamatua. 11 Nuka sèmi: ladhe abhu karunya aj'a-nori dhèu, na, sanèd'e te miu hud'i lole dènge dhèu aa'i-aa'i pake Lii Holo-Nori Ama Lamatua. Ladhe abhu karunya ho ladhe-leru dhèu, na, sab'a pake a'èra dhu Lamatua pala-bagi mi miu. Dènge j'ara ne, dhèu aa'i-aa'i tadhe, na, miu dhèu unu Yesus Kristus. Dènge sèmi èèna, rèngu ded'e padedha-dedha Ama Lamatua. Te Nèngu èèna, kapai titu kèna! Aa koasa nèd'u paredha Na dhu dènge boe too-lane! Lèke tare'a-re'a sèmi èèna!

12 A'ari pasue aa'i-aa'i! Mage malaa ladhe paraga dènge dadugu-rariu dhu bia. Te èèna neo uji parcaya miu. Baku pangee, na, dhoka èu di dhu abhu dadugu-rariu sèmi èèna. 13 Te ngaa d'ara miu bisa karej'e-karae, lula miu abhu j'aj'èra sama sèmi Kristus dhu abhu j'aj'èra kahèi. Dènge j'ara ne, èèna na d'ara miu asa karej'e-karae ropa dhèu aa'i-aa'i ladhe rèdhi dadedha Kristus. 14 Ropa dhèu pahahe miu, lula pa'èki dènge Kristus, miu oto, lula dadedha Roh Lamatua pa'èra miu. 15 Te ngaa ladhe miu abhu j'aj'èra, na, baku lula miu pamadhe dhèu, do, dhèu mana'u, dhèu bhelu-katub'a, do, dhèu dhu d'èi soro iisi asa lii langu dhèu. 16 Te ngaa ladhe dhèu pasae j'aj'èra lula j'aj'i dhèu unu Kristus, nèngu baku makae. Hua iia risi rèngu koa-kio Ama Lamatua, lula rèngu j'aj'i dhèu Kristen.

17 Lod'o d'ai le ho dhèu lasi asa madha Ama Lamatua. Na parisa uuru mamuri dhèu-dhèu unu Na. De pangee paie-iie! Ladhe Na mulai nèti èdhi dhèu Kristen, na, tasa mera mia dènge rèngu dhu ro'o boe sèmi Lii Lolo Be'a Na? Tatu hahuku rèngu bia risi hari! 18 Te abhu dhu suri ètu Sasuri Mola-Mèci Lamatua, na,

19 De ladhe Ama Lamatua soro tèke dhèu unu Na abhu susa madhutu dad'èi Lamatua, na, rèngu bisa lèka, peka na, èèna na Nèngu j'aga si kahèi. Te Nèngu ka paj'aj'i si. Nèngu kahèi tao madhutu ngaa dhu Na peka le. Lula Nèngu j'aga si sèmi èèna, nèti èèna ka rèngu bisa tao taruu j'ara dhu lèke.