Lii holo hia mi dhèu èmu-kamali
3
Bhèni aa'i-aa'i dhu leo le èmu! Deo na ja'a peka, na, èdhi hud'i nanene paie-iie ku dhèu dhu rèd'u koasa. De miu hud'i nanene ku dhèu èmu miu. Sanèd'e, te abhu dhèu mone cahag'e dhu leo le èmu, ro'o boe tao madhutu Lii Holo-Nori Lamatua. Masi ka rèngu ro'o boe nanene lii padhai miu, te ngaa èèna na, rèngu neo parcaya Lamatua, lula rèdhi j'ara mamuri miu.a 2 Te rèngu rèdhi miu sab'a aa'i-aa'i dènge d'ara mola-mèci aa mamuri dhu pakab'ua Ama Lamatua.3 Bhèni dhu bhèni iia, mai boe nèti ngaa dhu tèdhi nèti li'u. Nuka sèmi: sageri kètu madhutu rupa-rupa mod'e, do, pake mèdha hualaa dhu risi eele, do, pake mèdha-papake dhu kab'ua aae dhu lèke boe j'ara.b 4 Te ngaa dhu tao bhèni iia dhu lèke, nuka: d'ara dhu tèdhi boe nèti li'u. Conto sèmi: d'ara hua iia, dènge lii mako. Te bhèni iia sèmi èèna ka dhu taha taruu, masi ka toke d'ai heka bhora. Madhutu a'abhu Lamatua, bhèni iia sèmi èèna ka dhu kab'ua risi. 5 Te uru-uru sèra, dhèu bhèni dhu d'ara mola-mèci, dhu parcaya Ama Lamatua, rèngu sèra ka dhu bhèni iia. Rèngu nanene aa madhutu dhèu èmu ra dènge be'a. 6 Tare conto nèti Sara. Nèngu nanene mi dhèu èmu na Abraham. Nèngu soro iisi na, sèna ka dhèu èmu na ator nèngu. Miu bhèni aa'i-aa'i hud'i madhutu ku j'ara nèti Sara ne. Ladhe miu tao dhu lèke, na, miu madha'u boe.c
7 Mone aa'i-aa'i dhu leo le èmu! Mamuri d'ara èci dènge dhèu èmu miu. Ngee paie-iie ngaa dhu be'a hia mi nèngu, aa tao madhutu. Pakab'ua ne ètu j'ara aa'i-aa'i, lula a'èra bhèni sama boe dènge a'èra dhèu mone. Te miu sama-sama abhu pusaka dhu Ama Lamatua neo hia miu. Nuka, mamuri hiu dhu Lamatua hia miu nèti d'ara hua iia Na. Te ngaa miu mone dhu ngara na dhèu èmu-kamali, hud'i mamuri d'ara èci dènge dhèu èmu miu, sèna ka ladhe miu dua mi sabaj'a d'ara èci manèngi ngaa èèna ka nèti Lamatua, na, Lamatua nanene lii manèngi miu.d
Masi ka miu tao dhu lèke, te ngaa bèli-camèd'a miu abhu sasusa kahèi
8 A'ari pasue aa'i-aa'i! Ja'a pab'ab'e lii holo ja'a aa'i-aa'i sèra sèmi ne'e ka: miu hud'i mamuri ku d'ara èci. Ladhe ca dhèu abhu susa do karej'e, na, miu dhu leo hud'i rasa sèmi èèna kahèi. Sue dhèu dhu parcaya Kristus. Pad'elo d'ara hua iia èci dènge èci. Baku padedha iisi, te miu hud'i pahaha iisi ku. 9 Baku b'ala bhabhelu dènge bhabhelu. Ladhe dhèu padhai lii padhèto dènge miu, baku b'ala kahèi. Te ngaa manèngi sèna ka Lamatua hia dhu be'a mi nèngu. Te Lamatua dhu paroa nare le miu j'aj'i mi dhèu unu Na, sèna ka miu bisa sèmi mere dhu hua iia nèti Nèngu. 10 Te dhu suri tèke ètu d'ara Sasuri Mola-Mèci Lamatua, na,
“Dhèu dhu tenge mamuri be'a,
aa dhu tenge mamuri madhera,
dhèu èèna hud'i j'aga hèb'a na sèna ka baku ore leli,
aa baku pakapod'e d'ara lii.
11 Nèngu hud'i ele-ho'a, sèna ka tao heka bhelu,
te ngaa tao dhu lèke di.
Nèngu hud'i patema mamuri padame dènge dhèu aa'i-aa'i,
aa tenge j'ara ho pabe'a taruu dènge ra.
12 Te Lamatua èdhi dhu haduli
dhèu dhu mamuri mola.
Aa Nèngu kahèi neo nanene lii manèngi-mangaj'i rèngu.
Te ngaa Lamatua èdhi loe boe lab'a
dhèu dhu ad'u-ue taruu bhabhelu-katub'a.”e
13 Ladhe miu d'èi tao dhu lèke, cee ka dhu neo paj'èra hari miu? Abhu boe, si? 14 Te ngaa masi ka miu tao dhu lèke, hèia abhu dhu pasusa miu, miu oto. Ladhe abhu dhèu dhu tadhe boe Kristus j'aj'i madha'u lula madha j'ara èci, na, miu baku madhutu ho madha'u sèmi èèna. Ngangee miu baku kahèlu, aa d'ara miu baku susa èci èèna ka dènge rèngu.f 15 Pamau d'ara miu, lula miu dhu ded'e le Kristus ètu d'ara miu ho j'aj'i Lamatua miu dhu mola-mèci.
Ladhe sèmi dhèu manèngi sèna ka miu lole parcaya miu aa sanao-maena miu, dhu peka na, bèli-camèd'a Kristus tao aa'i j'aj'i mi be'a, na, miu hud'i pa'èra ku ho dhaa lii karèi rèngu sèra.g 16 Te ngaa miu hud'i dhaa ku nèti d'ara dhu hua iia, aa pakab'ua si, sèna ka re'a, na, miu tao dhu lèke mai nèti d'ara dhu mola. Masi ka miu tao dhu be'a sèmi èèna, te ngaa tatu abhu dhu padhai lii neo pamanahu miu, lula miu pa'èki dènge Kristus. De ladhe miu tao taruu dhu be'a, na, rèngu dhu pa-aape miu èèna na ra'e makae. 17 Ladhe èèna palèke dènge dad'èi Lamatua, na, baku bhèlu, te be'a risi miu abhu j'aj'èra nèti tao j'ara dhu lèke; baku nèti miu ad'u-ue j'ara karehe.
18 Te Kristus madhe ca tèka di,
lula èdhi dhèu rai-haha tao sala.
Nèngu dhu mamuri mola,
madhe le pala èdhi dhu mamuri koe-kapengo.
Nèngu madhe sèna ka miu bisa pabe'a hari dènge Ama Lamatua.
Kristus èèna, dhèu rai-haha sama sèmi èdhi kahèi,
Dhèu pamadhe Ne,
te ngaa Roh Lamatua pamamuri hari Ne.
19 Roh èèna kahèi lere nèti Nèngu la'e aj'a-nori mi roh-roh dhu lèke bèdho ètu era èci, nuka sèmi d'ara bui. 20 Roh se, nuka samanga nèti dhèu dhu uru-uru sèra ro'o boe nanene Lamatua. Lod'o èèna, Noh tao kapa aae cue. Lamatua tatae sèna ka neo nèdhi dhèu sèra tao madhutu dad'èi Na, te ngaa rèngu pusi-pahae boe. Nèti èèna ka, abhu dhoka dhèu aru di, dhu mamuri nèti èi aae lala.h 21 Èi aae lala ne j'aj'i conto, nuka sèmi lod'o sarani miu. Sarani ne j'aj'i tadha, peka na, Lamatua patabuli eele miu nèti koasa sasala-sasigo miu, lula Kristus mamuri hari le. Lod'o sarani miu, ra padiu boe miu, ho pamèu ngi'u mi. Te dhu lèke ka, nuka, miu padhadha mi Lamatua, ho neo tao pamèu d'ara miu. Dènge sèmi èèna, na, miu bisa mamuri mola. 22 Limuri ne, Yesus lèpa hari le asa sorga. Ètu nèi, Na madhèdi ètu era dhu kab'ua risi eele, re baboa g'ana Ama Lamatua. Ka ana-ana pajuu ètu sorga, koasa aa'i-aa'i, dènge dhu rèd'u koasa, hud'i nanene ku Kristus.