Ja'a tao sasuri ne'e hia miu dhèu Yahudi dhu pea ètu kabarai dhèu, dhu d'èi madhutu Lamatua Yesus.^{a b}

2 A'ari! Ja'a neo peka sèmi ne'e: ladhe miu abhu rupa-rupa j'aj'èra, na, baku paroe d'ara. Sèmi mere dènge d'ara karej'e, te bèli-camèd'a abhu babe'a. 3 Te èdhi te'a, na, ladhe miu pa'èra-èra ètu d'ara j'aj'èra sèmi èèna, aa pakaj'èu le nèti dadugu, aa miu parcaya Lamatua era, èèna ka dhu asa tabha pa'èra d'ara miu, ladhe mi paraga hari dènge dadugu dhu leo. 4 Baku hari kabodho nèti j'aj'èra. Te ngaa miu hud'i taha ètu d'ara j'aj'èra, toke miu abhu mamèci, aa kura boe ngaa-ngaa èci sa.

5 Ladhe abhu nèti miu dhu re'a mèka j'ara kalua nèti j'aj'èra, miu bisa pakarèi mi Lamatua dhu ne'a aa'i ngaa-ngaa. Nèngu ka dhu bisa pad'elo j'ara kalua hia miu. Nèngu ka dhu bhoke j'ara dènge d'ara karej'e, aa dhu ne'a boe nasa, ladhe miu manèngi. 6 Te ngaa ladhe manèngi mi Nèngu, na, baku dènge d'ara kacanga. Miu hud'i parcaya tare'a ku, na, Nèngu bisa hia ngaa dhu miu manèngi. Te ladhe dhèu manèngi dènge d'ara kacanga, èèna na nuka sèmi laka dhasi dhu pahaka la'e-mai ladhe lèke ngèlu. 7-8 Dhèu dhu parcaya kalili boe sèmi èèna, èra boe ètu d'ara j'ara aa'i-aa'i ra. Baku maena, na, nèngu abhu ngaa-ngaa nèti Lamatua.

9 Dhèu unu aad'o dhu parcaya Lamatua Yesus, nèngu hud'i pakarej'e d'ara na, lula Ama Lamatua ded'e le nèngu j'aj'i dhèu unu Na. 10-11 Aa dhèu kaja dhu parcaya le Lamatua Yesus, nèngu hud'i karèj'e kahèi, lula Lamatua aj'a ne sèna ka baku padedha iisi. Limuri ne nèngu ne'a, na, bèli-camèd'a mèdha-panyau na ele aa'i mèu-mèu, nuka sèmi hela bunga dhu saraga, te ngaa ladhe lèke lod'o pana, na kamale eele. Sèmi èèna kahèi dènge dhèu kaja sèra. Masi ka rèngu bhute dènge urusan ra, te ngaa rèngu ele kahèi.^c

12 Lamatua hia berkat mi dhèu dhu taha ètu d'ara dadugu-rariu. Hèia na sèmi nare bab'ae rui-j'aj'èra na, nuka mamuri dhu Lamatua padhadha le ho pala-bagi mi dhèu dhu sue Ne. Èèna nuka sèmi dhèu dhu segi ètu pa'uji olaraga dhu abhu solo juara.^d

13 Sanèd'e paie-iie! Ladhe nèti miu abhu dhu paraga dènge dadugu-rariu, aa neo ad'u-ue madha j'ara dhu sala, baku peka, na, “Ama Lamatua ka dhu sèku ja'a”. Te Ama Lamatua neo boe tao sala. Aa Na sèku nèdhi boe dhèu, sèna ka tao sala. 14 Te sasala mai nèti d'ara dhèu. Ropa d'ara na neo ad'u-ue j'ara karehe, hèia na kapod'e kahadhu na, sèna ka tao j'ara kaj'alu. 15 Hèia na tao madhutu ngangee na dhu kaj'alu èèna. D'ai lod'o limuri, Ama Lamatua huku pamadhe dhèu dhu tao bhabhelu.

16 A'ari pasue! Baku lèke tipu nèti j'ara se'e aa'i-aa'i.

17 J'ara karehe sèra mai boe nèti Lamatua. Te ngaa Nèngu ka dhu pala-bagi mèngi-nale aa'i-aa'i, dènge ngaa aa'i-aa'i dhu mola-mèci. Nèngu ka dhu paj'aj'i madha lod'o, hèru dènge hua-hètu. Aa'i-aa'i ra pea boe kalili mi ca'era ètu dedha-liru, aa tao mamaho ra dhu ub'a-ub'a. Dhoka Ama Lamatua di dhu ub'a boe. 18 Dad'èi Lamatua hia mi èdhi sèmi ne'e: Na hia mi èdhi Lii Holo-Nori Na dhu lèke. Aa Na pake Lii Holo-Nori Na ho hia èdhi mamuri. Nèti ngaa aa'i-aa'i dhu Na paj'aj'i ètu rai-haha ne, Na hag'e nare le èdhi j'aj'i mi hua-hela dhu uru tèka.

19 A'ari pasue! Sanèd'e, ee! Dhu be'a èèna sèmi ne'e ka: dhèu baku padhai lii leli di. Be'a risi, ropa dhèu leo peka dhu be'a, nèngu pasa dhilu ho nanene uuru ku! Aa dhèu baku nasa malai. 20 Te ladhe dènge nasa, dhèu bisa boe tao ngaa-ngaa dhu be'a madhutu dad'èi Ama Lamatua.

21 De miu hud'i tunu eele ku sasala mi aa'i-aa'i, sèmi dhèu dhu ko'o pamèu oka-tedhe, ka ra tunu maruru sèra. Aa miu hud'i sèmi dènge pahaha iisi mi Lii Holo-Nori Lamatua. Lii Holo-Nori sèra, nuka sèmi hini dhu sèle ètu d'ara miu. Ladhe miu tao sèmi èèna, bèli-camèd'a Lamatua saku eele sasala mi, aa Na sèmi nare miu, sèna ka mamuri taa-taa dènge Ne.

22 Ladhe miu me'a le Lii Holo-Nori Lamatua, miu hud'i tao madhutu. Baku dhoka nanene di! Ladhe miu d'èi dhoka nanene di, te ngaa tao madhutu boe, miu kapod'e-kabèli ngi'u miu unu mi. 23-24 Ladhe dhèu tadèngi le Lii Holo-Nori èèna, te ngaa madhutu boe, èci èèna ka dènge dhèu dhu lee rèhu na ètu d'ara tèru. Ropa na hari kabodho nèti tèru, nèngu bhèlu eele dènge ka, rèhu na. 25 Te ngaa miu baku loe parisa paie-iie Lii Holo-Nori Ama Lamatua dhu tesa, dhu bisa pakaj'èu dhèu nèti koasa sasala ra. Pe Lamatua hia mèngi-nale mi ngaa-ngaa dhu miu tao, sad'i miu nanene, aa tao madhutu lii-lii sèra. Baku maso dhoka re dhilu kariu, aa kalua re dhilu g'ana!

26 Ladhe dhèu ngee, nèngu maj'èni ètu d'ara agama, te ngaa ne'a boe j'aga hèb'a na, nèngu monya ngi'u nèngu unu na. Agama nèngu parcuma. 27 Te ngaa agama dhu lèke, nuka dhu dènge boe kaj'alu. Èèna ka dhu pakarej'e d'ara Ama Lamatua. Agama dhu lèke èèna, tao d'ara dhèu d'èi soru-bara bhèni balu dènge ana lalu. Dhèu dhu dènge agama sèmi sèra, hia boe dhèu ètu rai-haha ne dadugu rèngu asa j'ara karehe.