Èdhi j'aj'i dhèu mola-mèci unu Ama Lamatua
2
De miu baku tao bhabhelu èci sa. Baku padhai-kakoli do kapod'e-kabèli dhèu. Baku padhai lii leo tao leo. Baku tèka d'ara ladhe mamuri dhèu leo risi èu. Baku pa'ele iie kolongara dhèu. Core eele tatao se'e se! 2 Ana rara iisi hiu d'èi dhoka èi susu ina ra. Sèmi èèna kahèi d'ara miu hud'i d'èi dhoka me'a mèu Lii Holo-Nori Ama Lamatua. Te ne'e ne ka dhu asa pa'èra parcaya miu nèti ca lod'o asa ca lod'o. Dènge j'ara ne'e, miu juu noo-noo j'aj'i kapai, dhu mamuri madhutu dad'èi Lamatua. 3 Te miu dhu rasa mèdhi le d'ara hua iia Lamatua èdhi.a4 Pa'èki ngi'u miu dènge Kristus. Te Nèngu nuka sèmi hadhu cue dhu mamuri. Tuka hadhu core eele ne, lula ra ngee, na, hadhu ne guna boe. Te ngaa madhutu ngangee Ama Lamatua, na, hadhu ne kab'ua titu kèna, hèia Na pili nare ne, tao mi hadhu padhèdi dhu kab'ua risi eele. 5 Miu hud'i pa'èki ku dènge Kristus, sèna ka Ama Lamatua pake miu kahèi. Dènge j'ara ne, miu sama sèmi hadhu dhu Ama Lamatua hag'e nare ho patitu èmu hia Roh Na. Miu nuka sèmi hadhu dhu mamuri kahèi, sama sèmi Kristus. Miu èci èèna ka dènge ama agama sèra, dhu mamuri mola-mèci hia mi Ama Lamatua. Èèna nuka sèmi miu mèti mèdha korban hia Ne. Mèdha korban dhu miu mèti ne pakarej'e d'ara Ama Lamatua, lula Yesus Kristus madhe le hia miu aa'i-aa'i mi. 6 Te dhu suri tèke ètu d'ara Sasuri Lamatua, peka na,
“Ladhe ku laa! Te Ja'a padhèdi le hadhu uuru,
ètu kota Yerusalem ne'e,
dhu ra pangare, na, ‘kota Sion’.
Ja'a pili kore hadhu ne kahèi.
Madhutu Ja'a, nèngu kab'ua bia.
De dhèu dhu parcaya Ne,
bèli-camèd'a ra'e boe makae.”b
7 Hadhu ne, nuka Yesus. Ka Nèngu kab'ua titu kèna bagi mi dhèu dhu parcaya Ne. Te ngaa bagi mi dhèu dhu parcaya boe Yesus Kristus, Sasuri Mola-Mèci Ama Lamatua suri, peka na,
“Hadhu dhu tuka sèra core eele,
limuri ne j'aj'i le hadhu uuru,
dhu kab'ua titu kèna.”c
8 Abhu dhu suri kahèi, peka na,
“Abhu hadhu dhu pakadhunu dhèu.
Abhu hadhu dhu pabèbhe dhèu.”d
Rèngu bèbha lula ro'o boe tao madhutu Lii Holo-Nori Lamatua. Te Ama Lamatua dhu ator mema le, sèna ka ra bèbha.
9 Te ngaa miu aad'o sèmi èèna. Te miu j'aj'i dhèu dhu Ama Lamatua hag'e unu Na. Miu j'aj'i dhèu unu Nèngu. Miu sama sèmi ama agama dhu ladhe-leru dhèu aae. Miu èci èèna kahèi dènge dhèu ca suku dhu mamuri mola-mèci hia mi Ama Lamatua. Miu j'aj'i sèmi èèna, sèna ka miu bisa lole dènge dhèu aa'i-aa'i lula-nèti d'ara hua iia Ama Lamatua dhu Na pala-bagi hia miu. Te Lamatua pua le miu ho tèke eele bhabhelu-katub'a, sèna ka mamuri madhutu j'ara dhu be'a. Se'e se nuka sèmi miu kalua nèti d'ara maroga, ho mamuri ètu d'ara saraa Na dhu be'a risi eele.e 10 Uru èèna, miu sama sèmi ca suku dhu dènge boe kolongara. Te ngaa limuri ne miu j'aj'i le dhèu unu Ama Lamatua. Uru èèna, miu pahae boe rasa kasia Lamatua. Te ngaa limuri ne, miu sèmi mere le.f
J'aga paie-iie sèna ka èdhi mamuri mola
11 A'ari pasue aa'i-aa'i! Miu dhoka mai manubha ètu rai-haha ne. Te miu nuka sèmi dhèu tao-mai dhu mamuri ètu dedha rai dhèu. Nèti èèna ka, ja'a loe boe manèngi sèna ka miu baku mamuri sama sèmi dhèu leo ètu rai-haha ne, dhu ad'u-ue bhabhelu-katub'a madhutu dad'èi d'ara ra. Te ètu d'ara miu nuka sèmi pamusu sa. D'ara dhu neo tao karehe lab'a dènge d'ara dhu neo tao be'a. De baku soro tèke d'ara neo tao karehe èèna segi miu. Te ladhe j'aj'i ka sèmi èèna, na, miu laho mae-mae! 12 J'aga paie, sèna ka miu mamuri mola ètu madha dhèu dhu tadhe boe Lamatua. Dènge j'ara ne, ladhe ra galaa leli miu, na, dhu rèngu rèdhi, dhoka babe'a miu di. Hèia ropa Yesus Kristus lèpa hari mai, rèngu unu ra ka dhu ded'e padedha-dedha Ama Lamatua, lula tatao miu dhu be'a sèra.
Èdhi hud'i nanene ku dhèu dhu rèd'u paredha
13 Dad'èi Lamatua èdhi, sèna ka miu nanene dhèu aa'i-aa'i dhu rèd'u paredha. Nuka sèmi: nanene mi dhèu aae, te nèngu ka ama paredha dedha. 14 Nanene mi gubernur, te dhèu aae ka dhu pua ne, ho huku dhèu dhu ad'u-ue bhabhelu, aa na koa-kad'iri dhèu dhu tao j'ara dhu lèke. 15 Nèti èèna ka, Ama Lamatua d'èi miu tao dhu lèke, sèna ka dhèu goa dhu re'a boe ngaa-ngaa sèra, abhu boe j'ara ho galaa miu. 16 Masi ka miu dhèu bebas dhu dènge hak sèna ka madhutu dad'èi d'ara mi, te ngaa miu baku tao leli hak ne ho ad'u-ue bhabhelu. Pake hak ne sèna ka sab'a hia Ama Lamatua, te miu j'aj'i le dhèu unu Na. 17 Miu hud'i pakab'ua ku dhèu aa'i-aa'i. Miu hud'i sue ku dhèu aa'i-aa'i dhu parcaya Kristus. Miu hud'i mamuri dhu lèke ètu madha Lamatua, te Nèngu ka dhu pama'ète lii langu miu. Aa miu hud'i pakab'ua ku rèngu aa'i-aa'i dhu rèd'u paredha.
Èdhi hud'i taha ku ètu d'ara sasusa madhutu j'ara mamuri Kristus
18 Ana pua-paleha sèra! Nanene paie-iie lamatua miu sèra, aa pakab'ua si. Mage nanene dhoka lamatua dhu d'ara be'a aa lii mako di. Masi ka lamatua miu bhelu titu kèna, te ngaa miu hud'i nanene paie ne kahèi. 19 Ladhe nèti miu abhu huku dhu lèke boe j'ara nèti lamatua miu masi ka miu sala boe ngaa-ngaa, aa ladhe miu taha ètu d'ara sasusa èèna, lula miu ngee mèdhi dad'èi Lamatua, pe Ama Lamatua pad'elo d'ara hua iia Na mi dedha miu. 20 Ladhe sèmi miu tao sala, hèia abhu gama, na, a'oto na ngaa, ladhe miu taha ètu d'ara j'aj'èra èèna? Abhu boe, si? Te ngaa ladhe miu abhu susa lula tao dhu be'a, hèia miu taha mere d'ara, na, Lamatua ladhe-leru miu. 21 Te Kristus neo kahèi sèna ka miu mamuri mola, masi ka miu abhu susa. Te Nèngu dui j'aj'èra kahèi pala èdhi. Dènge sèmi èèna, Nèngu j'aj'i mi conto, sèna ka èdhi madhutu Ne, èci èèna ka èdhi madhutu kab'a-j'èla Na. 22 Sasuri Mola-Mèci Lamatua, peka na,
“Nèngu tao nèdhi boe sala.
Abhu boe lii kapod'e-kabèli kalua nèti hèb'a Na.”g
23 Lod'o ra padhai lii pa-aape Ne, Nèngu bhoka boe hèb'a. Ropa dhèu pasusa Nèngu, Na b'ala boe. Te ngaa Na soro ngi'u Na asa d'ara adhe-aai Ama Lamatua. Te ne'a, na, Ama Lamatua èèna Dhèu Pama'ète Lii Langu dhu mola.h 24 Kristus ka dhu pasae nare sasala èdhi ropa madhe ètu aj'u palolo-palèbha. Na ad'u-ue j'ara ne, ho patabuli èdhi nèti koasa sasala, sèna ka èdhi mamuri ia ka dènge tao sasala. Ka limuri ne èdhi mamuri heka tao sasala, dhoka mamuri dènge tao dhu lèke di. Te Nèngu gati èdhi, sèna ka pasae nare hahuku èdhi. Hahuku ne'e ka dhu panu'a Nèngu toke madhe. Te nu'a dhu pamadhe Yesus èèna ka puri-pa'èle miu.i 25 Te miu nuka sèmi kahib'i-kalèbho dhu uru èèna sigo eele nèti j'ara. Te ngaa limuri ne miu lèpa hari le asa j'ara Lamatua dhu mola. Te Nèngu ka dhu madhenga dènge kab'oi miu, nuka sèmi dhèu madhenga badha dhu j'aga dènge ladhe-leru kahib'i-kalèbho na sèra.