Sasab'a miu ètu rai-haha ne, dhoka tao pagaa ngi'u miu mesa mi, ka mamuri mi ha'a-ha'a, hèti-hèti. Limuri ne miu nuka sèmi sapi kab'oi dhu neo lèke roro. Miu huku dènge pamadhe le dhèu be'a sèra, dhu re'a boe siri iisi ra ètu madha miu.

Miu dhèu kaja sèra! Tangi ka laa! Pe miu pasae mere rupa-rupa j'aj'èra. Mèdha-panyau miu, ele iia kèna. Aa mèdha-papake miu dhu be'a sèra, ana ca ngèpi na'e aa'i si. Hualaa iia dènge hualaa pudhi miu sèra, dènge heka kab'ua. Aa bèli-camèd'a hualaa miu sèra ra'e hari miu, sèmi ai na'e aj'u mango. Rai-haha oe èle kèna, te ngaa tasamia ka miu kabhèsu lutu pakaboko taruu mèdha dhu madhe sèra? Mèdha-panyau miu unu mi ka dhu j'aj'i tadha, peka na, miu me'a boe mia ka dhu dènge kab'ua ètu madha Lamatua!^b

7 A'ari aa'i-aa'i! Miu hud'i taha d'ara ku, tatae mamai hari Lamatua. Ladhe ku laa dhèu sab'a oka-tedhe, dhu tatae hèru puu-g'ètu. Èj'i hua hiu, na sèle hini. Mate hari èj'i limuri, ho na pamangèru ana nganga'a sèra. Nèbhu-nèbhu ku heka hua kèna. D'ai lod'o puu-g'ètu, dhèu ne la'e puu. 8 Miu hud'i taha d'ara sèmi èèna kahèi. Pa'èra ngi'u, te nèbhu heka Lamatua mai!

9 A'ari aa'i-aa'i! Baku ka'uu-kamuki èci dènge èci. Ka'uu-kamuki taruu, pe Lamatua ka dhu huku èu! Ladhe ka, te Ama Hakim ètu dedha nèi, titu le ètu madha miu.

10 A'ari aa'i-aa'i! Madhutu conto nèti dhèu rèti lii padhai Lamatua sèra. Masi ka rèngu paraga dènge susa rupa-rupa, te ngaa rèngu taha taruu ètu d'ara sasusa. 11 Ladhe abhu dhèu dhu taha ètu d'ara sasusa, èdhi d'èi padedha ngara dhèu ne. Nuka sèmi Ayub. Masi ka na abhu susa rupa-rupa, te ngaa na kalau-karèto boe. Hèia Lamatua sue ne, ka Na ator aa'i-aa'i j'aj'i mi be'a hia Ayub. Lamatua tao sèmi èèna, lula d'ara Na hua iia, pènu dènge sasue.^c

12 A'ari aa'i-aa'i! Dhu be'a risi miu baku j'oka subha. Ladhe neo peka, “oo”, na, dhaa la “oo”. Aa ladhe peka “aad'o” na, dhaa la “aad'o”. Sèmi èèna, d'ai le! Baku parisi dènge j'oka subha dhu ale ngara dhèu madhe ètu rai-haha ne. Ngaa hari pasubha dènge “kolongara Lamatua” dhu mamuri ètu dedha-liru. Gaguna na aad'o dènge pasubha rupa-rupa. De ladhe taruu sèmi èèna, miu pasae mere huku, lula lii subha sèra.^d

13 Ladhe nèti miu abhu sasusa, be'a risi na sabaj'a. Aa dhu ètu d'ara karej'e, be'a risi na sod'a koa-kio Lamatua. 14 Ladhe ètu talora miu abhu dhu pèd'a, be'a risi paroa ina-ama juma'at. Manèngi sèna ka ra pasuti èi lèngi mi dhèu pèd'a ne, aa sabaj'a pake kolongara Lamatua, ho hud'i laa Lamatua ka dhu puri-pa'èle ne.^e 15 Aa ladhe miu sabaj'a dènge lèka tare'a-re'a Lamatua hia dhèu pèd'a, èèna na Lamatua puri-pa'èle ne. Aa ladhe na tao sala, pe Lamatua saku eele sasala na sèra. 16 Ladhe nèti talora miu abhu dhu manahu asa d'ara sasala, na, miu mangaku sasala èci dènge èci. Dènge j'ara èèna, miu èci sabaj'a hia èci, sèna ka miu j'aj'i be'a.

Dhèu dhu d'ara na mola-mèci, lii manèngi na pènu dènge koasa, aa nèti babe'a. 17 Tare conto nuka sèmi Elia. Nèngu ne dhèu rai-haha cakaraa èdhi kahèi. Te ngaa ropa na sabaj'a, manèngi èj'i mai boe, ka èj'i puru heka toke tèlu tèu dènge ca èta.^f 18 Hèia na sabaj'a hari ho èj'i mai, hèia èj'i mai dènge. J'u'u mangèru bidhu-bidhu, aa oka-tedhe hia hari isi rai.^g

19 A'ari sèra! Ladhe abhu nèti miu dhu bèbhe asa d'ara sasala, ka rai eele nèti j'ara dhu lèke, hèia abhu dhèu dhu pamako ho na lèpa hari asa j'ara dhu mola nèti Lamatua, èèna na be'a! 20 Sanèd'e ne'e paie-iie! Ladhe miu soru-bara dhèu dhu tao sala, hèia na lèpa hari asa Lamatua ka na tao heka sala, miu se pasod'a le dhèu èèna, hèia na mamuri taa-taa dènge Lamatua. Dènge j'ara ne'e ka, Lamatua saku eele aa'i sasala na.^h

D'ai sange ne'e ka!