Baku madhutu dad'èi rai-haha
4
Miu loe boe patao-palaha aa pagama èci dènge èci. Tasamia ka sèmi èèna? Èèna, lula ètu talora aae miu abhu dhèu dhu dhoka tenge j'ara ho pakarej'e d'ara na. 2 Miu neo ae le abhu mèdha èci, te ngaa ai d'ai boe. Hèia mi tèke d'ara, patao-palaha, dènge pagama, toke mangingi boe pamadhe dhèu.Lula miu sabaj'a boe, aa manèngi boe nèti Lamatua, nèti èèna ka miu abhu boe. 3 Te ngaa masi ka miu sabaj'a toke padhe aj'u-hadhu, miu abhu boe ngaa dhu miu manèngi, lula manèngi madhutu dhodhoka dad'èi d'ara miu di.
4 Mema miu satia boe! Miu nuka sèmi dhèu èmu-kamali dhu èci pusi-pahae boe èci, aa tao j'ara makae di. Ladhe miu pa'angalai dènge dad'èi rai-haha, miu pamusu dènge Ama Lamatua. J'ara èèna la'e sèmi èèna ka! 5 Nèti èèna ka, Sasuri Mola-Mèci Lamatua, peka na, “Lamatua hia le Roh Na ètu d'ara èdhi. Aa madhutu dad'èi Roh, èdhi madhutu Ne taa-taa. Te Ama Lamatua ne d'ara kura kahèi.” 6 Ngaa hari, Ama Lamatua neo hia tabha hari babe'a d'ara Na. Ka Sasuri Mola-Mèci, peka na,
“Lamatua lab'a dhèu dhu padedha iisi ra,
te ngaa Na pad'elo d'ara hua iia Na mi dhèu dhu pahaha iisi ra.”a
7 De soro iisi mi asa adhe-aai Ama Lamatua, sèna ka madhutu dad'èi Na. Miu baku madhutu dad'èi dhèu aae nidhu. Lab'a ne pa'èra-èra; baku golo. Dènge sèmi èèna, na rai tèke eele miu. 8-9 Tenge j'ara sèna ka mamuri d'ara èci dènge Ama Lamatua. Ladhe sèmi èèna, Nèngu padètu-dètu dènge miu kahèi.
Wee, miu dhu mamuri ètu d'ara kaj'alu sèra! Miu hud'i pamola ku j'ara mamuri miu. Aa miu dhu d'ara kajari sèra! Miu hud'i kako mola-mola madhutu Lamatua, aa baku piku hari g'ana do kariu. Nèbhu nare sange ne'e, miu mamuri karae dènge pasoa-pasoka di. De hua iia, ae eele ka! Miu me'a le, na, d'ara miu kajari lula sasala-sasigo miu sèra. Be'a risi miu ele-ho'a aa tangi dènge d'ara manyasa. 10 Ladhe tare'a-re'a miu me'a, na, miu dhu nia boe ètu katanga madha Ama Lamatua, bèli-camèd'a Na ded'e nare miu, sèna ka j'aj'i mi dhèu dhu nia ètu madha Na.
Baku padhai pakarehe dhèu
11 A'ari! Baku padhai pakarehe kolongara èci dènge èci. Te ladhe miu padhai le sèmi èèna, aa d'èi pèci sasala nèti èci asa èci, miu lab'a le atora nèti Lamatua dhu peka na, “Èu hud'i sue ku a'ari èu, nuka sèmi èu sue ngi'u èu unu mu.” Aa ladhe miu madhutu boe atora ne, miu ded'e iisi mi dedha risi nèti Atora Ama Lamatua. 12 Dhodhoka Lamatua mesa Na dhu tao Atora èèna, dhu dènge hak ho pama'ète lii langu èdhi. Dhoka Nèngu di mesa Na dhu dènge hak, sèna ka hia mamuri mi èdhi, do huku pamadhe ti. Miu dènge boe hak ho pama'ète lii langu dhèu, do padhai pakarehe kolongara dhèu.
Nelu tao ngaa, baku bhèlu Lamatua
13 Sèmi ne'e! Madhutu iia-iia na, miu me'a le ho baku peka na, “Deo ne'e, do bèli, ji'i neo la'a sa kota nèi! Ji'i neo pea mi era nèi pe d'ai ca tèu sa. Aa ji'i neo d'aga sèna ka abhu ku leto d'ai ciki sa.” 14 Èu me'a ngaa dhu j'aj'i lod'o bèli? Dhèu èci sa re'a boe tasamia mamuri na. Mamuri èdhi dhèu ne nuka sèmi sèb'u dhu tèdhi dhoka ètu d'ara ciki oo'e èèna, kaca'a laa ele.b 15 Be'a risi miu peka na, “Ladhe Lamatua sue, na, ji'i mamuri madhera. Aa ladhe Lamatua d'èi, hud'i laa ji'i tao ne'e.” 16 Te ladhe peka boe sèmi èèna, miu dhodhoka padedha iisi di. Èci èèna ka dènge miu bhèlu eele Lamatua ètu d'ara nanelu miu sèra. Èèna sala kapai titu kèna!
17 Sanèd'e paie-iie! Dhèu dhu re'a le ngaa dhu lèke, te ngaa tao boe madhutu, èci èèna ka dènge nèngu tao sala le.