J'aga paie hèb'a, sèna ka baku padhai leli
3
A'ari aa'i-aa'i! Abhu dhèu ae dhu neo aj'a-nori dhèu parcaya sèra. Be'a kahèi! Te ngaa sanèd'e paie-iie, bèli-camèd'a Ama Lamatua parisa toke lutu dhèu dhu aj'a dhèu parcaya sèra. De dhèu baku sad'i aj'a di. 2 Èdhi aa'i-aa'i ti ae ka padhai lii sala. Te ngaa dhèu dhu taha nare hèb'a na, ho baku padhai leli, ne'a kahèi uri mamuri na. 3 Tare conto sèmi jara. Èdhi te'a uri jara dhu kapai ho madhutu dad'èi èdhi, dhoka dènge ère rarapa na. 4 Conto leo hari, nuka kapa. Ngèlu mèdhu tiu kapa aae madhutu dad'èi na. Te ngaa uli dhu ana iiki-iiki bisa pod'e kad'uru kapa ne madhutu dad'èi juraga. 5 Èci èèna kahèi dènge he'o èdhi. Masi ka he'o ana iiki, te ngaa tatao na kapai titu kèna!
Èèna nuka sèmi he'o ai dhu ana iiki te ngaa bisa tunu eele j'ami dhu kapai aae. 6 Hèb'a ne nuka sèmi he'o ai. Re hèb'a, èdhi bisa pa'ele iie madha j'ara ae-ae. Hèb'a èdhi bisa pa'ele iie kateme mamuri èdhi. Bhelu-katub'a ae-ae ètu rai-haha ne, mai nèti d'ara hèb'a dhèu. Aa dhèu aae nidhu pake hèb'a dhèu ho pakako sasab'a na.
7 Dhèu pamau rare rupa-rupa badha hui, badha dhu rod'o re rai, manu-bhui, dènge i'a ètu d'ara dhasi. 8 Te ngaa abhu mèka ca dhèu sa dhu pamau rare he'o na. Te he'o ne, mèdha dhu bhelu, dhu uri tare boe. Nèngu èci èèna ka dènge raco dhu lale lème d'ara ngi'u, toke pamadhe dhèu.
9-10 Dènge hèb'a èèna ka, dhèu koa-kio, aa dhèu padhèd'a. Se'e se, lèke boe! Èdhi pake hèb'a ho koa-kio Ama Lamatua. Aa dènge hèb'a èèna kahèi, èdhi padhèd'a aapa dhèu dhu Lamatua paj'aj'i madhutu rupa Na. Tasamia ka j'aj'i sèmi èèna?a
11 Abhu ètu mia èi ca madha, bisa kalua èi nèta dènge èi sèro. 12 Bisa boe, sina ma, nèti kanana kalua hua dhimu? Aa tarae sina bisa kalua hua anggor? Te aj'u ladhe hua na, hua madhutu rupa ra.b Èci èèna ka, èdhi bisa boe dhui èi nèta nèti dano èi sèro.
Ngangee madhera dhu mai nèti Lamatua
13 Dhèu dhu ngangee madhera, aa ne'a j'ara dhu madhutu dad'èi Lamatua, baku padedha iisi. Te ne'a, mamèu na mai nèti Lamatua. Hud'i laa nèngu pad'elo mamèu na dènge j'ara mamuri dhu mola. 14-15 Baku padedha iisi, peka na, èu dhèu dhu dènge ngangee madhera, ladhe èu tèka d'ara era ho pabèbhe dhèu leo. Èci èèna ka èu ne, dhèu kapod'e-kabèli. Te mamuri sèmi èèna, peka boe, ‘ngangee madhera’. Tatao nuka sèmi, tèka d'ara, d'èi pabèbha dhèu, sèra sa mai boe nèti Ama Lamatua. Èèna na tatao dhèu rai-haha. Sèra sa lèke mi dhèu dhu soro boe mamuri ra mi Ama Lamatua. Tatao sèra madhutu dad'èi nidhu. 16 Te ladhe tèka d'ara aa d'èi pabèbha dhèu, tatu abhu kahèi patao-palaha dènge rupa-rupa bhabhelu-katub'a.
17 Te ngaa ngangee madhera dhu mai nèti Ama Lamatua, nuka: dhu tao èdhi mamuri mola, pamau d'ara èdhi, d'èi pa'uru dhèu, taha tare d'ara, dènge lii mako. Hua-hela nèti ngangee madhera èèna, nuka: tao èdhi d'ara hua iia, d'èi soru-bara dhèu, bia boe cabèka, aa kapod'e-kabèli boe dhèu leo. 18 Dhèu dhu uri padame, bèli-camèd'a nèngu abhu babe'a. J'ara èèna nuka sèmi dhèu dhu sèle hini, ho nèbhu-nèbhu na puu hua dhu be'a.