Sasuri hia dhèu
Ibrani
dhu heka parcaya Yesus Kristus
aa tèke eele agama bèi-baki ra
Ama Lamatua pua Ana Na dhu kapai risi nèti dhèu rèti lii padhai Na uru sèra
1
Uru èèna, Ama Lamatua pake dhèu rèti lii padhai Na, ho padhai lii dènge bèi-baki èdhi dhèu Ibrani.a Nèngu pake rupa-rupa j'ara, sèna ka peka pahari-pahari dènge rèngu.b 2 Te ngaa limuri ne, Na pua le Ana Na mai, sèna ka padhai lii dènge èdhi.Karèi nèti uru-uru j'ara ka, Ama Lamatua hag'e nare le Ana Na,
ho nèd'u paredha sama-sama dènge Nèngu.
Te lod'o Na paj'aj'i liru dènge rai-haha dènge isi ra aa'i-aa'i,
Ana Na dhu sab'a sama-sama dènge Ne kahèi.
3 Ana Lamatua ne, pad'elo dadedha Ama Na,
nuka sèmi saraa madha lod'o dhu lèke tèru.
Te Nèngu ne, ca ropa dènge Ama Na.
Aa nèti Lii Holo-Nori Na dhu èra titu kèna,
Na pakako aa'i-aa'i ètu dedha-liru dènge rai-haha.
Nèngu bhoke j'ara kahèi,
ho saku eele sasala-sasigo dhèu,
sèna ka ra j'aj'i mola-mèci.
Hèia Na lèpa hari asa sorga,
ho madhèdi ètu baboa g'ana Ama Lamatua,
ètu era dhu kab'ua aae.
Ana Ama Lamatua kapai risi nèti ana pajuu ètu sorga
4 Ana-ana pajuu Ama Lamatua ètu sorga mema kapai. Te ngaa Ana Na kapai risi eele nèti rèngu aa'i-aa'i ra. Kapai dènge dadedha Ama Lamatua risi eele nèti aa'i-aa'i ra. Aa kapai dènge dadedha èèna, Na pangèd'u le mi Ana Na. Nèti èèna ka, Ana Na kapai risi eele nèti ana-ana pajuu Na ètu sorga.
5 Ama Lamatua peka nèdhi mi Ana Na, aku Nèngu na,
“Doe ne'e, Ja'a ded'e Èu ho mèd'u paredha.”c
Ama Lamatua, peka kahèi, na,
“Ja'a ne, Ama Na.
Aa Nèngu ne, Ana Ja'a.”d
Ama Lamatua peka dènge Ana Na sèmi èèna, te ngaa Ama Lamatua peka nèdhi boe sèmi èèna, mi ana-ana pajuu Na ètu sorga.
6 Lod'o Ama Lamatua pua mai Ana Na dhu kapai risi eele èèna, Na paredha ana-ana pajuu Na ètu sorga, aku Nèngu na,
“Miu ana pajuu aa'i-aa'i!
Lami ho pakab'ua,
aa pahaha iisi mi Ana Ja'a!”e
7 Ama Lamatua padhai lii kahèi mi ana pajuu Na ètu sorga, peka na,
“Ja'a tao ana-ana pajuu Ja'a ètu sorga,
j'aj'i malai sama sèmi lai ngèlu.
Ja'a tao ènu-ènu Ja'a,
j'aj'i nuka sèmi ai.”f
Ama Lamatua peka dènge ra sèmi èèna, lula rèngu dhoka ana pua-paleha Na di.
8 Te ngaa mi Ana d'èlu Na, Nèngu peka dhu leo, na,
“Èu ne, Ama Lamatua.
Èu, èèna na madhèdi ètu kadera paredha toke d'ai mia-mia.
Èu èèna na mèd'u koasa, ho paredha dènge d'ara mola.
9 D'ara Èu karej'e, ladhe mèdhi dhèu dhu mamuri mola.
Te ngaa d'ara Mu susa, ladhe mèdhi dhèu dhu mamuri koe-kapengo.
Nèti èèna ka, d'ara Èu karej'e,
ka Ja'a pasuti èi lèngi mi kètu Èu,
ho ded'e Èu j'aj'i Dhèu Aae, dhu risi nèti dhèu aae leo sèra.”g
10 Ama Lamatua peka mi Ana Na kahèi, na,
“Ana, ee!
Èu ne, Kètu dhu mèd'u paredha karèi nèti uru ka.
Èu ne'e ka dhu pua liru j'aj'i, hèia na j'aj'i dènge.
Èu ne'e ka dhu paredha rai-haha, hèia na j'aj'i dènge.
11-12 Bèli-camèd'a liru dènge rai-haha laho aa'i si.
Bèli-camèd'a liru dènge rai-haha ele aa'i si.
Te ngaa Èu mesa mu, mamuri toke d'ai mia-mia.
Èèna na Èu core eele liru dènge rai-haha,
nuka sèmi dhèu core eele kaha'i soho dhasi.
Bèli-camèd'a Èu gati eele liru aa rai-haha,
nuka sèmi dhèu silu mèdha-papake hiu.
Te ngaa Èu mesa Mu sèmi boe èèna.
Lula Èu mamuri toke d'ai mia-mia.”h
13 Ama Lamatua peka kahèi dènge Ana Na, aku Nèngu na,
“Ana, ee!
Mai madhèdi asa era dhu kab'ua titu kèna,
ètu baboa g'ana Ja'a ne.
Pe Ja'a tao musu Èu sèra,
toke ra pahaha iisi mi Èu.”i
Ama Lamatua peka-padhai mi Ana Na sèmi èèna, te ngaa Na padhai lii nèdhi boe sèmi èèna mi ana-ana pajuu Na ètu sorga. 14 Ana pajuu Na sèra mema panting. Te Nèngu paleha si lasi lalau-lalo'o dhèu unu Na aa'i-aa'i dhu èèna na Nèngu patabuli eele si nèti koasa sasala-sasigo ra. Masi ka sèmi èèna, te ngaa Ana Ama Lamatua risi nèti rèngu era.