Baku pa'iga mia ka dhèu kapai aa mia ka dhèu ana iiki
2
A'ari! Tasamia ka miu peka, na, miu parcaya Yesus Kristus, Kètu èdhi dhu Kapai èèna, ladhe miu patema hag'e rèhu dhèu? Baku sèmi èèna! 2 Sèmi abhu dhèu dua dhu lasi asa d'ara èmu sabaj'a miu. Ca dhèu pake mèdha-papake dhu kale'e dènge kadheli hualaa pènu kacui-aai na. Ca dhèu hari pake kodho kaj'alu. 3 Hèia miu bhute lami soru dhèu dhu pake mèdha-papake kale'e èèna, ho hia ne madhèdi ètu era be'a re madha. Te ngaa dhu pake mèdha-papake kaj'alu èèna, miu pua ne, peka na, “Lamu titu sa kabodho nèi, ee! Do aad'o na, madhèdi ètu rai ne!” 4 Dènge j'ara miu laladhe rèhu dhèu sèmi èèna, miu nuka sèmi dhèu pama'ète lii dhu bia cabèka. Èèna mai nèti ngangee karehe dhu uli miu.5 A'ari pasue! Ama Lamatua hag'e nare le dhèu unu aad'o ètu rai-haha ne'e, sèna ka ra parcaya pa'èra mi Nèngu. Masi ka rèngu dhu dènge boe unu, te ngaa d'ara ra kaja. Aa Na hag'e si, ho ra abhu unu kahèi ètu d'ara paredha Ama Lamatua, dhu Na pajaji hia mi dhèu-dhèu dhu sue Ne. 6 Te ngaa dènge miu ladhe rèhu dhèu sèmi èèna, miu pahaha le dhèu unu aad'o sèra. Te ngaa rèngu tao boe ngaa-ngaa dhu karehe mi dedha miu. Bhèlu le, do? Dhèu kaja sèra ka dhu jajuku mi la'e-mai. Aa rèngu sèra ka dhu tenge j'ara ho nuni pa'oro miu asa era pama'ète lii langu. Rèngu abhu dhu kee, aa miu abhu sota na. 7 Miu se, dhèu unu Lamatua Yesus. Te ngaa dhèu kaja sèra ka dhu padhai pa'ele iie kolongara Lamatua Yesus! Nga tao ka miu lami pahaha iisi mi rèngu?
8 Heka lèke kèna, ladhe miu tao madhutu atora èci dhu dedha risi, dhu peka na, “Èu hud'i sue ku dhèu leo, nuka sèmi èu sue ngi'u èu unu mu.” Atora ne dhu suri le ètu d'ara Sasuri Mola-Mèci Ama Lamatua.a 9 Te ngaa ladhe miu pili madhutu rèhu dhèu, aa mere d'ara dhèu kaja di, miu sisu le atora èèna. Madhutu Atora Lamatua, miu sala le. 10 Dhèu dhu tao madhutu aa'i Atora Ama Lamatua, te ngaa sisu atora èci di, èci èèna ka dènge nèngu sisu aa'i Atora Lamatua. 11 Lamatua hia le atora dhu peka, na, “Miu bhèni-mone baku tao j'ara karehe dènge dhèu dhu j'aj'i boe dhèu èmu-kamali miu.” Aa Na hia atora dhu leo kahèi, peka na, “Baku pamadhe dhèu.” De ladhe miu tao boe j'ara karehe, te ngaa miu pamadhe dhèu, èci èèna ka, miu sisu le Atora Lamatua.b
12 De ladhe miu neo padhai lii, ho neo tao madha j'ara èci, miu hud'i sanèd'e sèmi ne'e ku: pe Ama Lamatua ka dhu pama'ète, na, èdhi madhutu atora Na ho sue dhèu leo, do aad'o. Lula atora èèna ka dhu bisa patabuli èdhi nèti hahuku Lamatua. 13 Te Lamatua pusi-pahae boe dhèu dhu sue boe dhèu leo. Te ngaa ladhe miu sue dhèu leo, tatu Lamatua pahae miu kahèi. Miu baku madha'u ladhe abhu hahuku nèti Lamatua, lula Na ige nare le sèra aa'i-aa'i ra.
Ladhe èdhi parcaya tare'a Lamatua, hud'i madhutu ku Lii Holo-Nori Na
14 A'ari! Ladhe dhèu peka, na, nèngu parcaya Lamatua, te ngaa tao boe ngaa-ngaa èci sa ho pad'elo parcaya na, èèna dènge boe guna ngaa-ngaa. Parcaya sèmi èèna, bisa boe hia nèngu mamuri. 15 Ladhe abhu dhèu sarani ca dhèu dhu dènge boe mèdha-papake do nganga'a dhu na'a bèli-bèli, 16 te ngaa miu dhoka dènge lii padhai lii di, peka na, “Kako paie-iie, oo! Hud'i laa Lamatua hia èu berkat! Mage lèke lai ngèlu toke pèd'a! Baku madhe manganga!” Guna ngaa padhai lii sèmi èèna, ladhe tao boe ngaa èci sa ho soru-bara si?
17 De d'ai mèka ladhe peka, èu parcaya di! Dènge parcaya di, aa dhu palèke boe dènge tatao, èèna peka mèka, na, ‘parcaya’. Te tatao sèmi èèna, nuka sèmi parcaya dhu madhe le, dhu gaguna na aad'o ciki sa.
18 Abhu dhèu dhu tao lii langu, peka na, “Sad'i dhèu parcaya dhoka Lamatua di, parluu heka tao j'ara dhu be'a. Dhèu leo dhu tadhe boe Lamatua, re'a tao j'ara dhu be'a kahèi.” Te ngaa j'ara nèngu sèmi ne'e: tadha nèti parcaya èu èèna, nuka tatao èu dhu be'a. Te ngaa ladhe èu tao boe dhu be'a, ja'a kèdhi boe tadha nèti parcaya èu ne. Ja'a bisa pad'elo parcaya ja'a, dènge j'ara ad'u-ue dhu be'a. 19 Èu madhutu a'aj'a dhu peka, na, “Ama Lamatua èèna, dhoka Nèngu di. Dhu leo aad'o.” Be'a kahèi! Te ngaa nidhu sèra be'a risi nèti èu, lula rèngu parcaya sèmi èèna kahèi, toke ra karèbha. De baku ngee, na, te'a dènge dhoka kahadhu di, d'ai le èèna. Dhae!
20 Goa, ee! De me'a mèu le, si? Parcaya dhu pad'elo boe dènge tatao be'a, gaguna na aad'o kahèi.
21 Tare conto nèti Abraham. Uru èèna, na sab'a madhutu ngaa dhu Lamatua paredha ne, ho nèti ana na Isak, sèna ka tao asa dedha mei sogo-tagu ho j'aj'i mi korban. Nèti èèna ka, Ama Lamatua peka na, “Abraham tao le dhu lèke.”c 22 Abraham parcaya Ama Lamatua, ka na sèmi nare paredha èèna, hèia na tao madhutu. De èdhi te'a, na, nèngu lèka tare'a-re'a Lamatua, lula na tao madhutu lii paredha èèna. 23 De se'e se j'aj'i sèmi dhu suri ètu d'ara Sasuri Mola-Mèci, dhu peka na, “Abraham parcaya Ama Lamatua, hèia Ama Lamatua sèmi nare nèngu ho j'aj'i dhèu dhu d'ara mola.” Aa dhu suri kahèi, peka na, “Abraham èèna, angalai Lamatua.”d
24 Me'a mèu le, si? Èdhi te'a, na, Ama Lamatua sèmi nare dhèu, ladhe parcaya na mi Lamatua dhu tao nèngu d'èi sab'a madha j'ara hua iia. Te ngaa ladhe dhoka parcaya di, d'ai mèka.
25 Conto leo, nuka Rahab, dhu uru èèna bhèni kajeo. Lod'o dhèu kota Jeriko tenge neo pamadhe dhèu mata-mata nèti Isra'el, Rahab ka pahuni si. Hèia na pua si rai asa li'u re j'ara leo, sèna ka dhèu Jeriko baku kèpe rare si. Hèia Lamatua sèmi nare ne, nuka sèmi dhèu bhèni dhu d'ara mola, lula na tao dhu be'a.e
26 Parcaya dhu nèti boe hua-hela, èci èèna ka dènge ngi'u dhu dènge boe a'ae. Sasoa na, madhe. Sèmi èèna kahèi, ladhe dhèu peka, na, nèngu parcaya Lamatua, te ngaa tao boe ngaa-ngaa dhu be'a, sèra dhu leko-monya! Èèna peka mèka, na, parcaya dhu mamuri.