Èdhi hud'i mamuri pabe'a èci dènge èci
13
De a'ari aa'i-aa'i! Abhu pèri-pèri j'ara dhu ja'a neo pasanèd'e miu.Baku bhèlu pasue taruu a'ari dhèu parcaya.
2 Baku bhèlu bhoke d'ara sèna ka sèmi mere dhèu dhu miu tadhe boe asa d'ara èmu mi. Te abhu pèri-pèri a'ari dhu sèmi rare dhèu, te ngaa re'a boe, na, dhèu sèra, ana pajuu Ama Lamatua nèti sorga.a
3 Baku bhèlu tao ai-hèb'a mi dhèu ètu d'ara bui, te ra kèpa si lula ra parcaya Kristus. Nèti èèna ka, miu hud'i soru-bara si, nuka sèmi miu ka dhu ra kèpe rare.
Aa mage bhèlu soru-bara dhèu dhu lèke j'aj'èra nèti dhèu. Lalau si pabe'a-be'a, nuka sèmi miu mesa mi ka dhu abhu j'aj'èra èèna.
4 Paleo èmu èèna, mola-mèci. Te ngaa mage paleo èmu dhu mola-mèci ne, j'aj'i mi kaj'alu. Te tatu Ama Lamatua huku dhèu aa'i-aa'i dhu tao j'ara makae dènge dhèu èmu nèngu boe.
5 Baku manga'a doi-dhari. Te ngaa miu hud'i mamuri nèti ngaa dhu miu abhu, te èèna d'ai le. Ama Lamatua dhu peka le, na,
“Ja'a bhèlu boe miu.
Ja'a soro tèke boe miu.”b
6 De pa'èra d'ara miu, nuka sèmi dhu ra suri, na,
“Lula Lamatua ja'a neo soru-bara ja'a,
nèti èèna ka, ja'a madha'u boe.
Te abhu boe ca dhèu sa hèi,
dhu bisa cèri eele ja'a nèti Ama Lamatua.”c
Madhutu ia ka atora agama dhu dhui, te ngaa parcaya taruu Yesus
7 Baku bhèlu dhèu-dhèu dhu uru sèra aj'a-nori miu Lii Holo-Nori Ama Lamatua. Pajiko paie-iie j'ara mamuri ra, aa madhutu lalèka ra. Te, dhu rèngu parcaya, nuka:
8 Yesus Kristus ub'a nèdhi boe.
Nèti uru, doe ne'e, toke d'ai mia-mia la'e,
Nèngu hali boe.
9 Nèti èèna ka, miu baku madhutu rii nèti a'aj'a dhu sala. Ama Lamatua tao pa'èra le d'ara miu, lula Na pad'elo le d'ara hua iia Na dènge miu. Lula boe nèti miu madhutu atora nganga'a-nganginu dhu guna boe.
10 Uru-uru sèra, ètu madha Paleo Manèngi-Mangaj'i Ama Lamatua, abhu mei èci dhu era tèka badha korban. Ama agama ka dhu lalau ètu sèra, dhu dènge hak ra'a sisi dhu sisa nèti dedha mei ne. Te ngaa limuri ne, èdhi dhu dènge le mei leo.d Aa ama agama rupa dhui dènge boe hak ra'a ètu mei èèna. 11 Uru èèna, tèu mai-tèu mai kètu kapai risi agama nèti raa badha korban, sèna ka tèke asa d'ara Kama Luri Mola-Mèci Ama Lamatua. Dènge j'ara ne'e, Lamatua pabhèlu eele sasala ra. Èle na, pasae rèti badha ne lasi tunu asa li'u rae.e 12 Sèmi èèna kahèi dènge Yesus. Nèngu j'aj'i korban kahèi, sèna ka Ama Lamatua bisa saku eele sasala dhèu rai-haha. Aa lod'o j'aj'èra Na èèna, ra nuni rèti Ne kahèi, ho pamadhe Ne asa li'u kota Yerusalem. 13 Nèti èèna ka, mai ka èdhi lati asa Yesus, ho parcaya Ne taruu. Masi ka dhèu pahahe èdhi, èdhi hud'i pa'èra sèmi tare ne, nuka sèmi Yesus. 14 Te èdhi dhoka manubha taha ètu rai-haha ne. Te ngaa èdhi sanao-maena, sèna ka pea ètu kota hiu cue ètu sorga toke d'ai mia-mia la'e. 15 Lula Yesus j'aj'i le korban pala èdhi, nèti èèna ka èdhi parluu heka tèti badha korban asa Ama Lamatua. Te ngaa abhu mèdha korban dhu leo era, dhu èdhi hud'i tèti ku hia Ne, nuka, koa-kio dhu ded'e padedha-dedha kolongara Na. 16 Aa mage bhèlu tao j'ara be'a hia dhèu leo. Ladhe ra parluu ngaa, lami soru-bara si. Te sèra sa, j'aj'i nuka sèmi mèdha persembahan dhu pakarej'e d'ara Ama Lamatua.
17 Miu hud'i nanene ku dhèu aa'i-aa'i dhu uri miu. Te dhèu se'e ka dhu j'aga miu mèda-mèu ètu d'ara mamuri miu dènge Ama Lamatua. Bèli-camèd'a rèngu hud'i lapor ku sasab'a rèngu asa Ama Lamatua. De nanene paie si, sèna ka ra bisa sab'a aa lapor dènge d'ara karej'e. Mage dhoka ra peka dènge d'ara dhu laho mae-mae, lula miu tèke eele j'ara mamuri Yesus Kristus. Te ladhe sèmi èèna, na, miu oto boe.
Dhu suri sasuri ne, manèngi makasi dènge sabaj'a hia dhèu Ibrani
18 Sabaj'a taruu hia ji'i. Te d'ara ji'i mema mola, aa ji'i neo tao j'ara be'a taruu. 19 Aa be'a risi hari, sabaj'a sèna ka ja'a bisa lèpa malai asa miu.
20-21 Ama Lamatua ka dhu pamau d'ara èdhi. Ja'a manèngi sèna ka Na soru-bara miu, ho miu bisa madhutu aa'i dad'èi Na. Ja'a manèngi kahèi, ho Na soru-bara èdhi aa'i-aa'i ti, sèna ka te'a pakarej'e d'ara Na. Te Ama Lamatua pake le raa Yesus Kristus dhu suti èèna, sèna ka pa'èki lii pajaji hiu dènge èdhi. Lii pajaji ne j'aj'i taruu toke d'ai mia-mia. Ka Ama Lamatua pamamuri hari Kètu èdhi, Yesus Kristus. De Yesus ka dhu ladhe-leru èdhi limuri ne, nuka sèmi dhèu madhenga badha dhu be'a risi. Nèti èèna ka, èdhi ded'e kolongara Na padedha-dedha, aa koa-kio Ne taa-taa! Èèna ka dhu lèke.
Saloom
22 A'ari pasue! Ja'a manèngi sèna ka miu sèmi mere lii holo ja'a ne dènge d'ara kateme. Te sasuri ne bab'a iiki di. 23 Abhu lii lolo dhu ja'a neo miu aa'i-aa'i mi me'a, nuka: a'ari èdhi Timotius dhu kalua le nèti d'ara bui. Ladhe na mai malai paraga dènge ja'a, èèna na ji'i dua mi palere-lere dhiu asa miu.
24 Ja'a pa'adhu lii maho'o hia kètu miu sèra, aa lii maho'o hia miu aa'i-aa'i dhu parcaya Yesus Kristus. A'ari nèti propensi Italia hia miu lii maho'o kahèi.
25 Ja'a manèngi sèna ka Ama Lamatua pad'elo d'ara hua iia Na dènge miu aa'i-aa'i mi.
D'ai sange ne'e ka!