12
De tasamia dènge èdhi dhu mamuri lod'o limuri ne? Èdhi cakaraa dhèu dhu madhutu pa'uji rai. Bèi-baki èdhi dhu parcaya Ama Lamatua, rèngu aa'i-aa'i ra nuka sèmi dhèu dhu titu lingu rare èdhi, ho pa'èra d'ara èdhi. Te ngaa èdhi dhu pa'èki dènge sasala era, sèra sa ka dhu pabia haga èdhi ka rai tara boe. Nèti èèna ka, èdhi hud'i core eele ku sasala sèra aa'i-aa'i, sèna ka èdhi bisa rai èra. Te Ama Lamatua mesa Na ka dhu pili èdhi, ho madhutu pa'uji rai ne, de èdhi hud'i taha ku, sèna ka rai taruu toke d'ai lane. 2 Aa èdhi hud'i rai, mage piku g'ana-kariu, te ngaa ladhe dhoka asa Yesus di. Te Nèngu ka dhu bhoke j'ara, ho èdhi bisa parcaya Ama Lamatua. Aa èèna na Nèngu soru-bara èdhi, sèna ka èdhi parcaya taruu toke èle. Sanèd'e, do aad'o? Lod'o Yesus dui j'aj'èra ètu aj'u palolo-palèbha, dhèu pahahe Ne, te ngaa Na taha taruu, lii boe-ugu boe. Te ne'a, na, j'aj'èra Na èle kèna, ka d'ara Na j'aj'i karae. Èèna ka dhu lèke. Te Na madhe, hèia Ama Lamatua pamamuri hari Ne, èle ka Na nedhe pamadhèdi Kristus ètu baboa g'ana Na, ho paredha sama-sama dènge Ne. 3 Masi ka dhèu paj'èra bia Ne, te ngaa Na taha taruu. De miu baku bhèlu dènge j'aj'èra Yesus, sèna ka miu bisa taha mere, aa baku roe.Ama Lamatua neo kai èdhi, sèna ka nori ti sama sèmi ama aj'a ana na
4 Miu lab'a le j'ara bhabhelu-katub'a, te ngaa lalab'a miu èra mèka, toke raa miu suti. Tare'a si! 5 Ele boe miu bhèlu Lii Holo-Nori Ama Lamatua dhu Na peka le dènge miu, nuka sèmi ca dhèu ama padhai lii dènge ana na, peka na,
“Ana, ee!
Ladhe Ama èdhi dhu huku ho aj'a èu, sèna ka èu mamuri madhutu j'ara dhu lèke, na,
èu baku pamud'e!
Aa ladhe Na kai ho aj'a èu, na,
èu baku paroe d'ara.
6 Te Ama èdhi kai ho aj'a dhèu dhu Na sue.
Mema dhèu-dhèu dhu Na sèmi nare j'aj'i ana Na,
Nèngu kai ho aj'a si.”a
7 De ladhe Ama Lamatua kai ho aj'a miu sèna ka mamuri madhutu j'ara dhu lèke, na, taha taruu aa sèmi mere. Na tao sèmi èèna, lula miu j'aj'i le ana Na. Te ama aa'i-aa'i hud'i kai ho aj'a ana na, toke ana na bisa mamuri madhutu j'ara dhu lèke. 8 Te ladhe Ama Lamatua kai boe ho aj'a miu sama sèmi ana Na dhu leo sèra, sasoa na, miu se ana Nèngu boe.
9 Èdhi tema pakab'ua ama matana èdhi ètu rai-haha ne, lula na kai ho aj'a-nori ti, lod'o èdhi dhu ana iiki era. Dhu lèke na kèna. Te ngaa dhu be'a risi hari, èdhi hud'i nanene ku Ama Lamatua dènge be'a, lula Nèngu ne, Ama èdhi ètu sorga, aa Na kai ho aj'a-nori èdhi, sèna ka èdhi mamuri madhutu j'ara Na dhu lèke. 10 Ama matana èdhi kai ho aj'a èdhi, dhoka d'ara ciki oo'e di, madhutu ngaa dhu na ngee na be'a. Te ngaa Ama Lamatua dhu ne'a risi, ngaa dhu èdhi parluu te'a. Nèti èèna ka, Na kai ho aj'a èdhi, sèna ka mamuri mola-mèci sama sèmi Nèngu. 11 Mema èdhi d'èi boe ladhe abhu lii kai. Te ngaa nèbhu-nèbhu, d'ara èdhi j'aj'i mau, lula te'a tare le mamuri madhutu dad'èi Ama Lamatua.
12-13 A'ari aa'i-aa'i! Pa'èra kacui-aai miu dhu roe, aa pasamaa haga miu dhu bia. Baku rai piku g'ana-kariu, te ngaa rai mola taruu, sèna ka pa'èra d'ara rèngu dhu roe-bhilu ho bisa rai taruu. Miu hud'i pa'èra d'ara miu, sèna ka taha taruu ètu d'ara parcaya mi Kristus.b
Baku tule eele d'ara hua iia Ama Lamatua
14 A'ari dhu parcaya Kristus! Miu hud'i pa'èra ngi'u mi, sèna ka mamuri padame èci dènge èci. Aa baku loe tenge j'ara ho mamuri mola-mèci. Te dhèu dhu mola-mèci boe, bisa boe rèdhi Ama Lamatua.
15 Pa'èra d'ara èci dènge èci, sèna ka mage dhoka abhu nèti miu dhu rai, toke rasa heka d'ara hua iia Ama Lamatua. Aa j'aga paie ho baku soro tèke ladhe abhu dhu papèd'a d'ara ètu talora aae miu. Te èèna nuka sèmi raco dhu pa'ele iie dhèu ae.c 16 Mage-mage aa j'aga ho baku abhu dhèu nèti miu dhu tao j'ara makae dènge dhèu dhu j'aj'i boe dhèu èmu-kamali nèngu. Aa mage-mage aa j'aga ho baku abhu dhèu nèti miu dhu pusi-pahae boe Ama Lamatua, nuka sèmi Esau. Esau ne, ana uuru Isak. Ca lod'o, Esau lèpa dènge kabake manganga. Na manèngi nganga'a ca pega nèti ari na Yakob, ho b'ae pake hak ana uuru.d 17 Te ngaa èdhi te'a, nèbhu boe ka, Esau manyasa. Te ropa Isak neo manèngi Lamatua hia mèngi-nale mi ana uuru na Esau, te ngaa bisa heka, lula Esau dhu hia iia d'ara le hak ana uuru na. Nèti èèna ka, masi ka na tangi roma iisi, tasamia èèna ka, nèngu bisa heka abhu ngaa dhu uru èèna nèngu core eele.e
18 Sèmi ne'e a'ari! Èdhi bisa lati le asa madha Ama Lamatua, madhutu j'ara hiu dhu Na bhoke nare le hia èdhi. Te ngaa uru-uru sèra, bèi-baki èdhi bisa mèka sèmi èèna. Te lod'o Ama Lamatua pa'èki lii pajaji dènge rèngu, rèngu padètu dènge ledhe Sinai. Ètu dedha ledhe ne, abhu ai dhu heo. Abhu ngèlu aae kahèi. Aa maroga saguru nare ledhe ne, ka dhèu se madha'u titu kèna. 19 Rèngu tadèngi lii tiu tèbhe kahèi, hèia lii dhu mèdhu aae nèti Lamatua kalua nèti ledhe ne. Ropa tadèngi lii Lamatua, hèia asa ra madha'u, toke ra manèngi Musa, peka na, “Ira ii! Ji'i bisa heka taha dènge lii nèi!”f 20 Rèngu mema bisa boe taha, lula ngaa dhu Lamatua paredha èèna, bia titu kèna. Te Na peka, na, “Ca dhèu sa bisa boe j'èli ledhe ne! Masi ka dhèu, do badha! Te dhèu cee dhu j'èli ledhe ne, hud'i lèke pèci toke madhe.”g 21 Ngaa dhu rèngu ladhe rèdhi ètu ledhe ne, mema pamadha'u tare'a, toke Musa karèbha kahèi.h
22 Te ngaa limuri ne, j'ara asa Lamatua bhoke tèke le, aa èdhi bisa patoo madha padhai lii dènge Ne. Limuri ne, èdhi lati asa ledhe cue, ngara na Sion. Ètu era ne'e, abhu kota Yerusalem. Kota Yerusalem ne, ètu boe rai-haha ne, te ngaa kota Yerusalem hiu ètu sorga, era pea Ama Lamatua. Ètu nèi, abhu ana pajuu Ama Lamatua ae-ae, toke riho-riho, dhu loe boe tao pesta. 23 Ètu kota nèi kahèi, j'aj'i le era pakaboko dhèu aa'i-aa'i dhu parcaya Kristus. Te Ama Lamatua dhu tao nare le daftar, ho suri ngara ra èci-èci ètu sorga. Ètu era nèi kahèi, Ama Lamatua neo parisa aa tai-dadoo mamuri dhèu aa'i-aa'i ra. Aa ètu nèi kahèi, pakaboko dhèu aa'i-aa'i dhu uru èèna Ama Lamatua sèmi nare si dènge be'a, lula ra parcaya Ne. Ètu nèi, rèngu j'aj'i kateme ètu madha Lamatua. 24 Aa Yesus kahèi ètu era nèi, dhu j'aj'i mi kalete hia Ama Lamatua dènge dhèu rai-haha. Yesus madhe, pasuti raa Na, sèna ka Ama Lamatua bisa pa'èki lii pajaji hiu dènge èdhi. Nèti èèna ka, raa Yesus ne, cuhi d'ara Ama Lamatua. Te ngaa raa Yesus leko-leo nèti raa Habel ètu d'ara Sasuri Lii Lolo dhu Uru Tèka. Te lod'o Kain pamadhe Habel, raa Habel dhu suti èèna, papana d'ara Ama Lamatua, toke Na huku Kain.i
25 Pasa dhilu pabe'a-be'a, ho nanene ngaa dhu Ama Lamatua neo peka dènge miu. Baku tao sèmi bèi-baki èdhi dhu ro'o boe nanene lii padhai Musa, lod'o na j'aj'i dhèu nèti lii padhai Ama Lamatua ètu rai-haha ne. Nèti èèna ka Lamatua huku si. Ngaa hari dènge èdhi se! Ladhe èdhi to'o boe nanene lii Na nèti sorga, tatu Nèngu huku èdhi bia risi eele!j 26 Lod'o bèi-baki èdhi titu ètu ledhe Sinai, lii Lamatua dhu mèdhu èèna, tao rai opo. Limuri ne Na moa, na,
“Bèli-camèd'a Ja'a tao ne opo ca tèka hari.
Mesa boe rai di opo,
te ngaa liru opo kahèi.”k
27 Lod'o Lamatua peka, na, Nèngu neo tao opo aa'i-aa'i “ca tèka hari”, sasoa na, Lamatua neo pagaged'o aa'i-aa'i dhu Na paj'aj'i ètu dedha-liru dènge ètu rai-haha ne, toke abhu dhu bisa boe taha. Ele aa'i si. Te dhu taha di, nuka dhu pea taruu.
28 Ama Lamatua nèd'u paredha ètu sorga. Èèna bisa boe laho. Ngaa-ngaa tao boe! Lula Na neo sèmi nare, na, miu maso j'aj'i mi dhèu unu Na ètu nèi. De mai ho èdhi manèngi makasi mi Nèngu, pahaha iisi mi Nèngu, aa ded'e padedha-dedha Ne, lula dadedha Na. 29 Te ngaa èdhi baku pamud'e kahèi, lula nanasa Ama Lamatua nuka sèmi ai dhu na'e pakèpu aa'i mèu-mèu.l