Ja'a suri sasuri ne

3 Ja'a manèngi sèna ka Ama Lamatua, dènge Kètu èdhi, Yesus Kristus, pad'elo d'ara hua iia Ra mi dedha miu, sèna ka miu bisa mamuri padame èci dènge èci.

4 Pilmon! Lod'o-lod'o dhu ja'a sabaj'a hia èu, ja'a manèngi makasi mi Lamatua, lula mamuri èu. 5 Te ja'a tadèngi ae le nèti parcaya èu mi Lamatua Yesus, dènge sasue èu mi dhèu-dhèu parcaya. 6 Lula lalèka èu, èu bisa mamuri d'ara èci dènge dhèu parcaya dhu leo sèra. Ja'a manèngi-mangaj'i ho ladhe miu pad'elo d'ara be'a miu èci dènge èci, miu bisa me'a mèu madha j'ara aa'i-aa'i dhu be'a, dhu èdhi bisa tao hia Lamatua Yesus. 7 Sasue èu èèna ka pakarej'e d'ara ja'a, aa pa'èra d'ara ja'a kahèi. Aa sasue èu èèna ka, pa'èra kahèi d'ara dhèu parcaya sèra.

8-9 A'a, ee! Ja'a parluu ciki, sèmi ne'e: ja'a j'aj'i dhèu pajuu-paleha Kristus. Nèti èèna ka, ja'a dènge hak kahèi ho paredha èu, sèna ka tao j'ara ne'e. Te ngaa ja'a ko'o boe tao paredha di, dhoka neo manèngi èu bantu di, nuka sèmi dhèu heka dhu to'a mi dedha èu. Ja'a j'aj'i ana bèdho lula madhutu Yesus Kristus. Nèti èèna ka ja'a bani manèngi èu soru-bara ja'a, lula ja'a ke'a sasue èu mi dhèu aa'i-aa'i ra. 10 Ja'a manèngi sèna ka èu pad'elo sasue èu mi ana ja'a, Onesimus. Nèngu èèna, nuka sèmi ana d'èlu ja'a, te nèngu parcaya Yesus nèti sasab'a ja'a, ropa ja'a ètu d'ara bui ne.^c

11 Ja'a ke'a, Onesimus ne, ènu èu dhu rai nèti èu. Ja'a ke'a, na, uru èèna nèngu dhu laku boe ètu katanga madha èu. Te ngaa limuri ne, ja'a parcaya nèngu nèti gaguna ae-ae hia èdhi dua ti.^d 12 Ja'a sue ne titu kèna. Te ngaa hud'i laa, ja'a pua na lèpa hari asa èu.

13 Madhutu ngangee ja'a, na, ja'a taha Onesimus sèna ka gati èu, ho nèngu ladhe-leru ja'a ètu ne'e. Te ja'a bisa boe tao ngaa-ngaa ètu d'ara bèdho ne. Ja'a j'aj'i ana bèdho, lula peka-padhai dènge dhèu Lii Lolo Be'a Lamatua Yesus. 14 Ja'a ko'o boe sèna ka èu sad'i madhutu di, ladhe èu rasa dhèu laka-seti èu. Dad'èi ja'a, na, èu tao dhu be'a madhutu dad'èi èu unu mu. De ladhe èu mo'o mèka sèmi dènge be'a lii manèngi ja'a, na, ja'a ko'o boe tao ngaa ciki sa mi Onesimus ne, lula dhu hak dhoka èu di.

15 Ele boe èu pangee sèmi ne'e: Lamatua soro tèke Onesimus ele nèti èu d'ara ciki oo'e ne, sèna ka na mai hari ho pea taruu dènge èu. 16 Lod'o na rai èèna, nèngu dhoka j'aj'i dhèu ènu èu di. Te ngaa ladhe nèngu lèpa hari dhiu, nèngu j'aj'i mi ari pasue èu. Ja'a sue ne titu kèna kahèi. De ne'e ne, gaguna na hia mi èu asa tabha. Te nèngu ne mesa boe j'aj'i ènu èu di, te ngaa nèngu j'aj'i kahèi ari dhu sama-sama parcaya Kristus.

17 De sèmi ne'e ka. Ladhe èu tadhe ja'a ne angalai èu ètu d'ara sasab'a èci, na, ja'a manèngi ho èu sèmi more nèngu, nuka sèmi ja'a ka dhu dhiu èèna. 18 Te ngaa ladhe Onesimus tao nèdhi sala mi dedha èu, do, na pakèlu era, hud'i laa pe ja'a ka tago kore. 19 Ladhe laa! Sasuri pakèlu ne, ja'a suri unu ku. Ja'a, Paulus, èèna na b'ae pama'ète kèlu Onesimus mi Pilmon. D'ai le, sina ma? De ja'a parluu heka pasanèd'e, na, èu pakèlu ja'a ae risi. Te èu j'aj'i dhèu unu Lamatua, lula ja'a.

20 Lèke kèna! Hud'i laa sèna ka èu bantu ja'a ètu j'ara ne'e, lula èdhi pa'a'ari ètu d'ara Lamatua. Pakarej'e d'ara ja'a sèmi èèna, lula èdhi aa'i-aa'i ti sama-sama dhèu unu Kristus.

21 Pilmon! Ja'a suri sasuri ne hia èu, lula ja'a parcaya èu bisa taru kira mi ja'a dènge be'a. Ja'a rasa, èèna na èu tao risi nèti ngaa dhu ja'a sanao.

22 J'ara èci era. Sadia ku kama èci hia ja'a. Te ja'a parcaya Lamatua tadèngi lii sabaj'a miu, aa pe Na bhoke j'ara ho kalua eele ja'a nèti d'ara bui, sèna ka dhiu hari pa'asu-pareo dènge miu ètu nèi.

23 Epapras ètu ne'e. Nèngu j'aj'i dhèu bui kahèi, lula nèngu lole j'ara-j'ara lula-nèti Yesus Kristus sèmi ja'a kahèi. Na pa'adhu lii maho'o kahèi hia èu.^e 24 Markus, Aristarkus, Demas, dènge Lukas ètu ne'e kahèi. Sasab'a rèngu èci èèna ka dènge ja'a. Rèngu hia lii maho'o kahèi.^f

25 Ja'a manèngi Kètu èdhi, Yesus Kristus, sèna ka pad'elo d'ara hua iia Na mi miu aa'i-aa'i mi.

D'ai sange ne'e ka!