3 Rai-haha dènge liru dhu èdhi ladhe tèdhi ne, èdhi te'a, na, Ama Lamatua ka paj'aj'i aa'i mèu-mèu. Te ngaa Na tao boe nèti mèdha dhu j'aj'i le, dhu dhèu bisa rèdhi. Aa'i-aa'i dhu j'aj'i se, j'aj'i nèti lii padhai Na di.^a

4 Habel parcaya Ama Lamatua. Nèti èèna ka, nèngu nèti mèdha persembahan dhu be'a risi nèti a'a na Kaen. Ama Lamatua sèmi nare Habel dènge mèdha persembahan na, lula d'ara na mola. De masi ka na madhe nèbhu le, te ngaa èdhi bisa tare conto nèti nèngu, lula lalèka na.^b

5 Henok parcaya Ama Lamatua kahèi. Nèti èèna ka, Ama Lamatua nedhe nèti ne asa sorga, sèna ka baku madhe. Dhèu patangi-tenge ne, te ngaa rage boe, lula Lamatua dhu paca'e le. Lamatua sèmi nare ne dènge be'a, te Lamatua dhu peka, na, “Henok ne, dhèu dhu pakarej'e d'ara Ja'a.”^c

6 De sèmi ne'e a'ari! Dhu lèke ka, Ama Lamatua sèmi nare boe dhèu dhu parcaya boe Nèngu. Te dhèu dhu neo la'e asa madha Ama Lamatua hud'i parcaya, peka na, Lamatua dhu mema-mema. Aa nèngu hud'i parcaya kahèi, peka na, Lamatua soru nare dhèu dhu patangi-tenge Ne.

7 Noh parcaya Ama Lamatua kahèi. Nèti èèna ka, Noh parcaya Lamatua ropa Lamatua peka mema dènge ne, “Noh! Sanèd'e, ee! Èèna na Ja'a palaho eele rai-haha ne, pake èi aae lala dhu dhèu rai-haha ne rèdhi mèka ca tèka sa.” Masi ka Noh paraga nèdhi mèka sèmi èèna, te ngaa nèngu nanene ka tao madhutu lii Lamatua, hèia na tao kapa, sèna ka nèngu dènge isi èmu na abhu sod'a. Lula lalèka na, ka Lamatua cap ne dhèu d'ara mola. Te ngaa dhèu aa'i-aa'i dhu lèka boe sèra, Lamatua hia si hahuku dhu bia.^d

8 Abraham parcaya Ama Lamatua kahèi. Nèti èèna ka, Ama Lamatua paroa ne, peka na, “Abraham! Kalua nèti rai èta-èsu èu ne, ho lamu asa era dhu pe Ja'a pad'elo dènge mu. Te rai èèna, bèli-camèd'a j'aj'i mi pusaka ana-èpu èu.” Tadèngi nare sèmi èèna, Abraham tao madhutu, masi ka nèngu ne'a boe la'e asa era mia.^e 9 Ropa Abraham d'ai era èèna, na patitu paleo, ho pea nuka sèmi dhèu tao mai ètu rai èèna dhu Lamatua pajaji le dènge ne. Ka ana na Isak dènge èpu na Yakob pea ètu èèna, te Lamatua dhu padhadha le hia rai ne j'aj'i pusaka rèngu.^f 10 Na sanao, sèna ka nèngu pea ètu kota cue dhu saraga titu kèna. Te Ama Lamatua mesa Na ka dhu gambar ho pakèd'i kota ne.

11 Dhèu èmu Abraham, ngara na Sara, parcaya Ama Lamatua kahèi. Masi ka nara iisi nèdhi mèka, aa dhu heka bhora le, te ngaa Lamatua tao ne j'aj'i bèi-baki nèti dhèu ca nau-ca nadha. Te nèngu parcaya, na, tatu Ama Lamatua tao madhutu ngaa dhu Na jaji le.^g 12 Nèti èèna ka, masi ka nèngu heka bhora le, nèngu bisa nara iisi era, ka abhu ana-èpu ae-ae, toke ige rare boe. Te dhèu se ae, nuka sèmi hua-hètu ètu dedha-liru, aa sèmi salae nebhe dhasi.^h

13 Bèi-baki èdhi Abraham, Isak dènge Yakob parcaya taruu Ama Lamatua, toke madhe. Te ngaa rèngu dhae abhu mèka rai dhu Lamatua pajaji èèna. Masi ka sèmi èèna, te ngaa rèngu ma'ète boe sanao dènge d'ara karej'e, te rèngu rèdhi le nèti kaj'èu. Te rèngu dhu mangaku, na, rèngu se dhèu leo rai kara dhu pea manubha ètu rai-haha ne.ⁱ 14 Aa te ngaa, ladhe dhèu peka sèmi èèna, èdhi te'a, na, rèngu d'èi titu kèna abhu rai cue dhu j'aj'i unu rèngu. 15 Ladhe rai dhu bèi-baki èdhi d'èi, nuka rai èta-èsu Abraham, na, tatu rèngu bisa lèpa hari asa era nèi, lod'o mia èèna ka. 16 Te ngaa rai èta-èsu dhu rèngu d'èi titu kèna, nuka rai èta-èsu dhu saraga bia ètu sorga. Nèti èèna ka, Ama Lamatua sèmi nare si dènge be'a, sèna ka j'aj'i dhèu unu Na. Te Na pamèci nare le kota cue hia si ètu sorga.

17-18 Parcaya Abraham hali boe nèti Ama Lamatua, ropa Lamatua uji parcaya na. Nèti èèna ka, na tao madhutu paredha Lamatua, ho saraka ana na Isak j'aj'i korban.^j Aa te ngaa uru èèna, Lamatua dhu moa le, lula-nèti ana ne, peka na, “Nèti ana mu Isak ne, bèli-camèd'a èu abhu ana-èpu udhu sobhu-sobhu, toke ra j'aj'i suku dhu kapai titu kèna.”^k 19 Te ngaa Abraham pangee le, na, Ama Lamatua dhu dènge koasa, ho pamamuri hari dhèu madhe. Mema, èèna ka dhu lèke, te lod'o èèna, sama sèmi nèngu abhu hari ana na j'aj'i le mi korban.

20 Isak parcaya Ama Lamatua kahèi. Nèti èèna ka, na manèngi ho Lamatua hia mèngi-nale mi ana na, Yakob dènge Esau.^l

21 Yakob parcaya Ama Lamatua kahèi. Nèti èèna ka, lod'o nèngu oe madhe, pakaseti kèd'i titu dènge kabodho kabhuku dènge kèpe tatea na, pahaha iisi mi Ama Lamatua. Hèia manèngi ho Lamatua hia mèngi-nale mi èpu na, ana nèti Yusuf.^m

22 Yusuf parcaya Ama Lamatua kahèi. Lod'o na oe madhe, nèngu parcaya, na, Ama Lamatua pe lere nèti dhèu Na, dhèu Isra'el sèra, kalua nèti rai Masir. Nèti èèna ka, na moa tèke mi rèngu, ho rèti rui na ropa rèngu tèke eele rai Masir.ⁿ

23 Ina-ama Musa parcaya Ama Lamatua kahèi. Lod'o ina na nara iisi ne, ra pahuni ne toke d'ai tèlu hèru kateme, lula ra ladhe na mone iia. Aa ra madha'u boe dhèu aae Masir, masi ka paredha le dhèu, peka na, “Pamadhe aa'i ana-ana mone Ibrani dhu rara iisi hiu!”^o

24 Ropa Musa kapai mai, na parcaya Ama Lamatua kahèi. Te uru èèna, ana bhèni dhèu aae Masir, dhu ded'e nare le nèngu sèna ka j'aj'i mi ana na. Masi ka sèmi èèna, te ngaa Musa d'èi boe ladhe dhèu pangee, na, nèngu ne a'ari nèti dhèu aae Masir.^p 25 Te na pangee, na, be'a risi nèngu mamuri j'èra sama-sama dènge dhèu unu Lamatua sèra. Sad'i nèngu baku mamuri karej'e dènge j'ara bhelu-katub'a, dhu dhoka ètu d'ara ciki oo'e di. 26 Nèngu soro tèke dhèu pahahe ne, lula nèngu sanao-maena taruu mi Kristus, nuka Dhèu dhu Ama Lamatua pajaji le neo hia Na mai. Nèngu taha sèmi èèna, lula ne'a, na, bèli-camèd'a Lamatua bagi hia ne hadia dhu be'a risi nèti mèdha aa'i-aa'i ètu rai Masir.

27 Musa parcaya Ama Lamatua kahèi, lod'o na manèngi isin nèti dhèu aae Masir, ho lere nèti bèi-baki èdhi kalua nèti rai Masir. Masi ka dhèu aae nasa titu kèna, te ngaa Musa madha'u boe dènge ne. Musa lèka taruu Ama Lamatua, masi ka tèdhi boe senu-salao Na, te ngaa nuka sèmi Musa dhu nèdhi.^q

28 Musa parcaya Lamatua kahèi, ropa rèngu pa'èra neo kalua nèti rai Masir. Te nèngu madhutu mèno paredha Lamatua, aa pua bèi-baki èdhi tao Paska hiu-hiu, dènge roro kahib'i-kalèbho, sèna ka tao badha korban. Hèia rare raa kahib'i-kalèbho sèra, sèna ka tao tadha mi babèdho èmu ra. Mèda èèna, ana pajuu Lamatua nèti sorga puru mai pamadhe ana uuru aa'i-aa'i ètu rai Masir. Te ngaa na pamadhe boe ana uuru ètu èmu dhèu Isra'el, lula ladhe nèdhi raa dhu ra pici ètu babèdho èmu.^r

29 Lod'o bèi-baki èdhi kalua nèti rai Masir, rèngu parcaya Ama Lamatua kahèi. Lula lalèka ra, ka Lamatua cèri eele èi dhasi mi dua ètu Dhasi Mea, sèna ka rèngu kako asa cabèka dènge be'a, ètu dedha rai mango. Te ngaa sordad'u Masir dhu bata si sèra, madhe aa'i ètu d'ara dhasi, ropa neo pège asa cabèka.^s

30 Lod'o bèi-baki èdhi maso asa rai Kana'an, rèngu parcaya Ama Lamatua kahèi. Te rèngu madhutu paredha Na, dènge kako rai-reo re li'u tembok ètu kota Jeriko, toke pidhu lod'o kateme. Ka tembok ne guri laho mae-mae.^t

31 Lod'o èèna, Rahab ètu kota èèna kahèi. Uru èèna, nèngu j'aj'i bhèni kajeo. Lula na parcaya Ama Lamatua, nèti èèna ka na sèmi nare mata-mata dhèu Isra'el, aa palu'u si ètu d'ara èmu na. Hèia Lamatua pamadhe aa'i dhèu Jeriko, lula ro'o boe nanene Nèngu. Te ngaa Lamatua hia mamuri mi Rahab, lula na lèka Ne.^u

32 Ja'a bisa padhai lii madhera hari era, j'ara-j'ara dhèu leo dhu parcaya Ama Lamatua. Te ngaa ja'a abhu boe lod'o taleo, ho lole toke lutu, lula-nèti Gideon, Barak, Simson, Yefta, Daud, Samuel, dènge dhèu rèti lii padhai Ama Lamatua dhu leo sèra.^v 33 Rèngu se aa'i-aa'i ra parcaya Ama Lamatua. Nèti èèna ka, abhu dhu segi dhèu aae-dhèu aae. Abhu dhu pakako paredha dènge d'ara mola, ho sarii dhèu dhu sala boe, aa huku dhèu dhu sala. Abhu dhu sèmi rare ngaa dhu Lamatua jaji le. Aa abhu kahèi segi badha singa.^w 34 Abhu dhu pamadhe ai dhu heo robhe-robhe. Abhu dhu Ama Lamatua ère nare si nèti dhèu dhu neo pamadhe si pake samala. Abhu dhu roe, te ngaa Ama Lamatua pa'èra si. Abhu dhu Lamatua tao si ho èra aae ètu d'ara pamusu, toke musu rai.^x 35 Abhu kahèi ina-ina dhu paraga hari dènge dhèu rèngu dhu Ama Lamatua pamamuri hari si nèti mamadhe ra.

Te ngaa abhu dhèu dhu lèke j'aj'èra, lula parcaya Ama Lamatua. Rèngu d'èi risi madhe, sèna ka baku tèke eele parcaya rèngu mi Ama Lamatua. Te rèngu pa'èci taruu dènge Ne. De rèngu dhu sanao-maena, na, bèli-camèd'a Lamatua neo ded'e ra, sèna ka abhu mamuri dhu be'a risi hari ètu sorga.^y 36 Abhu dhu pa-aape si, aa abhu dhu lèke gama. Abhu dhu leo dhu lèke ngapi haga ra dènge ngangapi ètu d'ara bui.^z 37 Abhu dhu madhe, lula lèke pèci dènge hadhu. Abhu dhu roro pamadhe si, pake raroro. Abhu dhu dhèu pare pamadhe si pake samala. Abhu dhu mamuri dènge boe unu, toke ra pake ka'uri badha, lula abhu dhèu dhu paj'èra dènge pasusa si, toke babèga eele si,^a 38 ka rai lasi asa pad'a sod'a, ledhe-ledhe, d'ara loe, dènge asa d'ara ro'a rai. Ra tao dhèu se'e dhu laku-laku boe, aa babège-lalèta si asa era dhu karehe. Aa te ngaa lalèka ra èra titu kèna, toke dhèu ètu rai-haha ne nia boe pa'èci dènge dhèu sèmi se'e se.

39 Lamatua koa dhèu sèmi se'e se, lula ra parcaya Ne. Te ngaa toke ra madhe, rèngu abhu mèka ngaa dhu Lamatua padhadha tèka. 40 Lamatua neo tao madhutu lii padhadha Na dènge j'ara dhu be'a risi. Lula Na d'èi, sèna ka èdhi aa'i-aa'i ti bisa mamuri toke d'ai mia-mia dènge Ne: nuka èdhi tadhe mèu le Kristus, dènge rèngu dhu madhe uuru sèra.