Kristus madhe dhoka ca tèka di, sèna ka dhèu bisa mamuri pabe'a taruu dènge Ama Lamatua
10
Ladhe tare'a-re'a dhèu neo re'a mèu dad'èi Ama Lamatua, atora dhu Na pangèd'u asa bèi-baki èdhi sèra, dhae led'a iia mèka. Te aa'i-aa'i se nuka sèmi sanabhu nèti j'ara-j'ara hua iia dhu Lamatua neo hia èdhi. De masi ka dhèu madhutu aa'i atora, aa rèti dènge badha korban taruu-taruu, te ngaa bisa boe saku pamèu sasala rèngu. 2 Te ladhe atora ne bisa tao eele sasala dhèu, na, rèngu rèti heka badha korban, lula rèngu rasa heka sala. Te ngaa sèmi boe èèna. 3 Te tèu mai-tèu mai rèngu manèngi pahari-pahari ho Ama Lamatua saku eele sasala ra, 4 lula, tatu boe raa badha dènge koasa, sèna ka saku eele sasala dhèu toke d'ai mia-mia.5-6 Nèti èèna ka, Kristus peka sèmi ne'e, lod'o Na mai asa rai-haha ne, aku Nèngu na,
“Ama Lamatua!
Ama d'èi boe badha korban dènge mèdha persembahan dhu rèngu rèti.
Rèngu roro pamadhe badha ae-ae,
sèna ka j'aj'i korban.
Ka rèngu tunu badha sèra,
ho manèngi abho.
Masi ka sèmi èèna, te ngaa d'ara Ama karej'e boe.
Nèti èèna ka, Ama pua Ja'a mai asa rai-haha ne,
sèna ka j'aj'i dhèu rai-haha sama sèmi rèngu.”
7 Hèia Kristus tuhu hari lii, aku Nèngu na,
“Ama! Ja'a ka ne'e le!
Ja'a mai sèna ka tao madhutu dad'èi Ama,
nuka sèmi dhèu rèti lii padhai Ama dhu suri mema lula-nèti Ja'a.”a
8 De dhu Kristus peka partama, nuka:
“Ama Lamatua karej'e boe dènge badha korban, aa mèdha persembahan dhu rèngu rèti.
Rèngu roro pamadhe badha ae-ae,
sèna ka j'aj'i korban.
Hèia ra tunu badha sèra,
ho manèngi abho.
Te ngaa masi ka sèmi èèna, d'ara Lamatua karej'e boe.”
De masi ka rèngu tao madhutu le pamèci dènge atora Musa, te ngaa d'ara Ama Lamatua karej'e boe ciki sa. 9 Lod'o Kristus padhai lii, peka na,
“Ja'a mai, sèna ka tao madhutu dad'èi Lamatua.”
Sasoa na, Kristus mai sèna ka tao eele j'ara dhui, ho gati dènge j'ara hiu. 10 Te dad'èi Lamatua ka, Yesus Kristus j'aj'i korban ho madhe dhoka ca tèka di hia èdhi dhèu rai-haha. Dènge j'ara ne'e, Na pamèu èdhi toke d'ai mia-mia.
11 Bèli-bèli kètu agama rupa dhui pakako taruu sasab'a ra, aa roro pamadhe badha korban. Aa te ngaa korban se, dènge boe koasa sèna ka saku eele sasala dhèu.b 12 Te ngaa Kètu Kapai Risi Agama èdhi, nuka Kristus, saraka ngi'u Na ho madhe sèna ka j'aj'i korban hia èdhi. Nèngu j'aj'i korban dhoka ca tèka èèna di. Dènge tao sèmi èèna, Na bhoke j'ara sèna ka saku eele sasala èdhi dhèu rai-haha aa'i-aa'i ti. Èle èèna, heka Nèngu la'e madhèdi ètu baboa g'ana Ama Lamatua, ètu era dhu kab'ua risi eele. 13 Ètu era nèi, Na mate toke Ama Lamatua tao musu Na sèra mai pahaha iisi mi Nèngu.c 14 Korban Nèngu dhu ca tèka èèna, pama'ète eele koasa sasala-sasigo nèti dhèu dhu Kristus pamèu si.
15 Roh Ama Lamatua dhu Mola-Mèci peka j'ara dhu sèmi èèna kahèi hia mi èdhi. Te Na padhai lii nèdhi, peka na,
16 “Lamatua miu peka sèmi ne'e:
Ja'a pa'èki lii pajaji hiu dènge dhèu unu Ja'a,
Ja'a tao atora Ja'a ètu d'ara ngangee ra,
dènge suri paredha Ja'a ètu d'ara ra.”d
17 Hèia Na peka hari, na,
“Èèna na Ja'a sanèd'e heka sasala ra.
Aa Ja'a pabhèlu eele tatao rèngu dhu karehe,
lod'o rèngu sisu atora Ja'a.”e
18 Sasoa na, ladhe Ama Lamatua saku eele le sasala dhèu, èèna na rèngu parluu heka rèti badha korban, sèna ka pamaho d'ara Lamatua.
Èdhi madha'u iia ka lati asa katanga madha Ama Lamatua
19 De sèmi ne'e a'ari aa'i-aa'i! Yesus pasuti le raa Na, sèna ka cuhi d'ara Ama Lamatua. Nèti èèna ka, limuri ne èdhi madha'u ia ka lati asa katanga madha Na ètu Era Na dhu Mola-Mèci ètu sorga. 20 Pangee ku Kama Luri Mola-Mèci dhu dhui èèna. Ètu era èèna, abhu bèla bhiri ca bèla dhu bhèla aae, dhu pa'abhe sèna ka dhèu baku lasi asa katanga madha Ama Lamatua. Te ngaa dènge mamadhe Yesus èèna, Na bhoke j'ara hiu, ho dhèu bisa padhai lii patoo madha dènge Ama Lamatua. 21 Risi-risi hari, Yesus j'aj'i kètu agama dhu kapai risi, dhu uri dènge lalau-lalo'o isi èmu Ama Lamatua. 22 De limuri ne èdhi dènge hak. Nèti èèna ka, mai ti maso ho padhai lii patoo madha dènge Ama Lamatua. Te ngaa èdhi hud'i parcaya Ne tare'a-re'a dènge d'ara mola. Te mamadhe Yesus ka dhu pamèu le d'ara èdhi, toke èdhi pangee heka j'ara-j'ara bhelu-katub'a. Aa èdhi hud'i mamuri mola, nuka sèmi ama agama rupa dhui sèra, hud'i diu ku èi, heka maso lasi pakako sasab'a Lamatua.f 23 Mai ho èdhi kèpe pa'èra-èra kahèi, aa'i-aa'i dhu èdhi mangaku le lula-nèti Ama Lamatua. Aa èdhi hud'i sanao-maena mi Nèngu kahèi, aa pangee ia ka dhu leo, te tatu Na tao madhutu lii pajaji Na. 24 De mai èdhi patangi-tenge j'ara ho pamako a'ari èdhi dhèu parcaya sèra, sèna ka èdhi aa'i-aa'i ti pad'elo sasue ae-ae, aa dènge tao rupa-rupa j'ara dhu be'a. 25 Te ja'a tadèngi le, abhu dhèu cahag'e dhu ro'o heka pakaboko dènge a'ari ra dhèu parcaya. Te ngaa mage miu sèmi èèna! Te miu hud'i pa'asu-pareo ku, ho pa'èra d'ara èci dènge èci. Risi-risi, lula lod'o mamai hari Lamatua dètu le. Pasanèd'e si sèmi èèna!
26 A'ari pasue! Èdhi te'a le toke lutu-sela, j'ara-j'ara Yesus Kristus dhu mola. Te ngaa ladhe èdhi soro kabodho mi Yesus, aa ad'u-ue taruu sasala, sasoa na, abhu heka korban leo dhu bisa saku eele sasala èdhi. 27 Èdhi dhoka mate dènge d'ara madha'u, lula Ama Lamatua mai huku èdhi. Te ai naraka heo robhe-robhe le, ho pakèpu dhèu aa'i-aa'i dhu lab'a Lamatua.g 28 Uru èèna, ladhe abhu ca dhèu dhu tule eele atora Musa, aa abhu dua do tèlu dhèu dhu j'aj'i sakasii, na, dhèu èèna hud'i abhu huku madhe, hia boe ne abho.h 29 Te ngaa limuri ne, ladhe abhu dhèu dhu pahahe Ana Ama Lamatua, èèna sama sèmi nèngu pakab'ua boe raa Yesus dhu Na pasuti sèna ka pamèu dhèu èèna. Aa no'o boe pane'a dènge lii pajaji dhu Ama Lamatua pa'èki dènge nèngu pake raa èèna ka. Aa nèngu tao Roh Ama Lamatua nasa kahèi. Te Roh èèna ka dhu pad'elo le d'ara hua iia Na mi nèngu. Pangee ku laa! Te dhèu sèmi ne'e ne, tatu pasae nare hahuku dhu bia risi nèti dhèu dhu tule eele atora Musa.i 30 Ama Lamatua peka nèdhi le, na.
“Ja'a dènge hak ho b'ala bhelu-katub'a dhèu.
Aa tatu Ja'a hud'i tao ku madhutu sèmi èèna.”
Aa dhu suri kahèi, na,
“Lamatua ne, Ama.
Bèli-camèd'a Na huku dhèu unu Na.”j
31 Sanèd'e te Ama Lamatua mamuri taa-taa! Dhèu tatu madha'u titu kèna, ladhe Lamatua kèpe nare si!
32 Miu hud'i sanèd'e ku lod'o miu mulai me'a j'ara-j'ara Kristus, ka ngangee miu mulai mèu. Te lod'o èèna, masi ka miu dhoka muri ètu d'ara sasusa dènge j'aj'èra ae-ae, te ngaa miu taha dènge parcaya taruu Kristus. 33 Abhu dhu pamakae dènge pahahe miu ètu madha dhèu ae. Abhu kahèi dhu ra tao sèmi èèna mi angalai miu, dhèu parcaya sèra. 34 Miu rasa kasia aa pad'elo d'ara be'a mi dhèu dhu ra pamaso si asa d'ara bèdho. Ladhe dhèu mana'u rèti mèdha-panyau miu, miu mau-mau sène, lula miu me'a, na, bèli-camèd'a miu abhu dhu be'a risi, dhu dhèu bisa heka mana'u rare. 35 Nèti èèna ka, miu hud'i kèpe pa'èra-èra lalèka miu. Te èèna na Lamatua b'ala hia miu, ae-ae. 36 De taha taruu! Te ladhe miu tao madhutu aa'i dad'èi Lamatua, èèna na miu abhu aa'i dhu Na jaji le hia miu. 37 Dhèu rèti lii padhai Lamatua suri le lula-nèti Dhèu dhu neo mai, peka na,
“Baku paroe d'ara, te nèbhu boe, Dhèu dhu neo mai èèna, cèu,
aa Na pamate heka.
38 Dhèu dhu d'ara mola,
èèna na nèngu abhu mamuri,
lula na parcaya Ja'a.
Te ngaa ladhe abhu dhèu dhu pakaj'èu nèti Ja'a,
d'ara Ja'a karej'e boe.”k
39 Te ngaa èdhi, dhèu dhu pakaj'èu boe nèti Ama Lamatua. Te dhèu dhu pakaj'èu nèti Lamatua, bèli-camèd'a cèri eele nèti Nèngu. Te ngaa èdhi dhèu dhu parcaya Ama Lamatua. Ka Nèngu patabuli èdhi nèti koasa sasala-sasigo èdhi, ho mamuri taruu dènge Ne.