3 Abhu kahèi bèla bhabhiri kapai ca bèla dhu pa'abhe kama leo èci, dhu ra peka na, Kama Luri Mola-Mèci Ama Lamatua.^b 4 Re madha bèla bhabhiri ne, abhu mei hualaa cue, era tunu raa aj'u hèu mèngi hia Ama Lamatua. Aa ètu d'ara Kama Luri Mola-Mèci èèna, abhu boaraka hualaa èci, dhu ra peka na, Boaraka Pajaji. Ètu d'ara boaraka ne, rèngu tao mèdha uuru sèra, sèna ka pasanèd'e dhèu lula-nèti j'ara lii pajaji Ama Lamatua dhu Na pa'èki dènge rèngu. Ètu era ne'e, abhu kahèi toples hualaa cue dhu isi roti manna. Roti ne'e ka dhu uru èèna Ama Lamatua papuru mai nèti dedha-liru hia mi bèi-baki èdhi, lod'o rèngu manganga ètu d'ara pad'a sod'a. Ètu d'ara boaraka ne, abhu kahèi tatea unu Harun, dhu uru èèna sub'u dadana hiu. Abhu kahèi hadhu kabela, dhu uru èèna Ama Lamatua pake ho dule atora Na dhu pangèd'u mi Musa.^c 5 Ètu katanga boaraka ne, abhu dhu dule rupa dua ana dhèu dhu saraga titu kèna. Ana dhèu se, rupa ra nuka sèmi ana pajuu nèti sorga dhu dènge èla, dhu titu baa èla, ho bhiri boaraka ne, lula era ne j'aj'i mi tadha, ho pad'elo rasa kasia Ama Lamatua mi dhèu rai-haha. Te ngaa limuri ne, ja'a pamadhera heka lii lole nèti mèdha-panyau se.^d

6 Rèngu pangèci mèdha-panyau ètu d'ara Paleo Manèngi-Mangaj'i Ama Lamatua mema sèmi èèna ka. Bèli-bèli, ama agama sèra maso-kalua kama re madha ne, sèna ka ra pakako sasab'a ra ètu èèna.^e 7 Te ngaa dhodhoka kètu kapai risi agama Yahudi di, dhu bisa maso la'e asa d'ara Kama Luri Mola-Mèci èèna. Aa nèngu maso leli boe, te ngaa maso sa d'ara dhoka ca tèu ca tèka. Aa ladhe na maso, nèngu hud'i nèti dènge raa badha korban, ho pici asa katanga Boaraka Pajaji ne. Sasoa nèti raa ne, sèna ka Ama Lamatua saku eele sasala-sasigo nèti kètu agama dènge dhèu-dhèu unu na aa'i-aa'i, masi ka sasala dhu rèngu ad'u-ue dènge boe d'ara mase'a.^f

8 Ama Lamatua pake le Roh Mola-Mèci Na, sèna ka hia èdhi te'a, na, ladhe bèla bhabhiri abhu era ètu j'ara maso asa d'ara Kama Luri Mola-Mèci èèna, sasoa na, dhèu rai-haha bisa mèka maso asa madha Ama Lamatua, ladhe pake atora dhui era. 9 Se'e se j'aj'i mi conto dhu Roh Lamatua pake, sèna ka aj'a-nori èdhi dhu mamuri limuri ne. Uru èèna, bèi-baki èdhi rèti mèdha persembahan dènge badha korban rèngu asa ama agama, sèna ka Ama Lamatua saku eele sasala ra. Masi ka rèti korban ae-ae sèmi èèna, te ngaa korban sèra bisa boe pamèu d'ara ra, aa bisa boe pa'ele rasa sala ètu d'ara rèngu. 10 De, ngaa dhu rèngu tao sèra, dhoka madhutu atora agama di. Abhu atora dhu paredha, peka na, rèngu bisa boe ra'a ne'e, aa bisa boe rinu èèna. Abhu atora dhu leo peka na, rèngu hud'i pamèu ku ngi'u ra dènge mèdha dhu ra pake madhutu dad'èi atora. Aa te ngaa, madhutu iia-iia na, atora aa'i-aa'i sèra, ator dhoka ngi'u re li'u di, te ngaa ator boe d'ara dhèu. Masi ka sèmi èèna, te ngaa atora sèra hud'i pakako taruu, toke Ama Lamatua gati dènge atora dhu hiu.

11 Te ngaa limuri ne abhu le Dhèu dhu uru èèna Ama Lamatua padhadha tèke, nuka Kristus. Na mai le sèna ka j'aj'i kètu agama kapai risi èdhi, aa Na tao le j'ara dhu be'a hia èdhi.^g Na pakako sasab'a-la'a Na, sama sèmi kètu agama rupa dhui, te ngaa Na sab'a ètu era sabaj'a dhu be'a risi eele. Era manèngi-mangaj'i Na, ètu boe rai-haha ne, te j'aj'i boe nèti pa'ue-ai dhèu rai-haha. 12 Kristus maso asa d'ara Kama Luri Mola-Mèci èèna kahèi, ho paraga dènge Ama Lamatua, sama sèmi dhu kètu kapai risi agama dhu rupa dhui se tao ca tèu ca tèka. Aa lod'o Na maso la'e, Na nèti raa hia Ama Lamatua kahèi. Te ngaa raa ne leko-leo. Te Kristus nèti boe raa badha korban. Dhu nèti, nuka raa Nèngu unu Na, lula Nèngu madhe le j'aj'i korban hia èdhi. Te ngaa Kristus maso, nèti raa Na dhoka ca tèka di, sèna ka patabuli eele èdhi nèti koasa sasala-sasigo èdhi toke d'ai mia-mia la'e.

13 De raa Kristus èèna, mema kab'ua risi nèti raa badha. Te madhutu atora Musa, dhèu dhu tao sala sèra, kaj'alu, ka nia boe maso ho manèngi-mangaj'i mi Ama Lamatua. Rèngu hud'i lasi ku asa kètu agama ho tao korban, sèna ka raa korban se pamèu hari rèngu. Nèti korban sèra, ae ka dhu pake raa kahib'i dènge raa sapi. Abhu kahèi atora èci, dhu peka na, ladhe dhèu goi lèke dhèu madhe, nèngu kaj'alu ètu madha Lamatua. Ladhe na neo hari j'aj'i mola-mèci, kètu agama hud'i nare ku ahu sisa nèti sapi èni dhu ra tunu. Èle, na nèti ahu èèna, ho la'e ceb'e asa dhèu dhu kaj'alu èèna, ho sèna ka na mola-mèci hari.^h

14 De ladhe raa badha bisa tao dhèu j'aj'i mola-mèci, risi-risi hari dènge raa Kristus! Te raa Kristus èèna ka dhu patalale èdhi nèti koasa sasala-sasigo, aa pamèu d'ara èdhi kahèi. Te sasala èdhi ka dhu cèri eele èdhi nèti Ama Lamatua. Lod'o Yesus Kristus madhe sèmi èèna, Roh Ama Lamatua dhu mamuri taa-taa, soru-bara Ne, sèna ka Na soro iisi Na asa Lamatua, nuka sèmi badha korban dhu dènge boe tadha karehe ciki sa hèi ètu ngi'u na. De limuri ne èdhi bisa le pahaha iisi dènge d'ara kateme mi Ama Lamatua dhu mamuri dènge boe too-lane.

15 Lula raa Kristus dhu kab'ua risi eele èèna, ka Ama Lamatua pake Ne, ho ator lii pajaji hiu hia mi dhèu aa'i-aa'i dhu Ama Lamatua paroa nare si, j'aj'i dhèu unu Na. Te lod'o Kristus madhe ho hia mamuri mi dhèu, Nèngu sui nare kahèi bèi-baki èdhi nèti sasala dhu ra ad'u-ue uru-uru sèra, lod'o Ama Lamatua pa'èki lii pajaji dhui dènge ra. Nèti èèna ka, rèngu bisa mamuri taa-taa dènge Ama Lamatua kahèi.

16 Ja'a pakasame dènge dhèu abhu pusaka, nuka sèmi ca dhèu ama dhu tao sasuri pajaji, ho hia ana na pusaka. Te ngaa ladhe ama na madhe, heka ana èèna abhu pusaka sèra. 17 Te ladhe ama na dhae madhe mèka, ana na bisa mèka abhu pusaka dhu ama na padhadha ètu d'ara sasuri pajaji èèna. 18 Èci èèna ka dènge lii pajaji Ama Lamatua dhu partama, dhu Na pa'èki dènge bèi-baki èdhi sèra. Ladhe abhu dhu madhe uuru, heka rèngu abhu ngaa dhu Lamatua jaji. Nèti èèna ka, korban rèngu pake raa badha ho j'aj'i mi tadha, peka na, abhu dhu madhe le. 19 Uru èèna, Musa oru nare bèi-baki èdhi, ka na peka aa'i paredha dhu abhu ètu d'ara atora dhu Lamatua papuru mai. Èle èèna ka, Musa roro sapi dènge kahib'i sèna ka nare raa, ka na pab'ali dènge èi. Musa nare dhari mea kahèi, ka na pa'èki dènge pèri-pèri ana aaj'u dhu rèu lutu. Hèia na cèb'u asa d'ara raa èèna, ka pici mi Sasuri Lamatua, aa mi dhèu unu na aa'i-aa'i si.ⁱ 20 Lod'o Musa pici raa ne, na padhai lii kahèi, peka na, “Raa ne'e ne j'aj'i mi tadha, dhu peka na, Ama Lamatua dhu pa'èki lii pajaji dènge miu. Ladhe miu madhutu aa'i paredha Na, bèli-camèd'a Nèngu hia aa'i dhu Na pajaji le sèra.”^j 21 Musa pici raa asa Paleo Manèngi-Mangaj'i kahèi, dènge asa mèdha aa'i-aa'i ètu sèra, dhu ra pake ho pahaha iisi mi Ama Lamatua.^k 22 Te madhutu atora Lamatua, aa'i-aa'i dhu kaj'alu hud'i pamèu ku pake raa. Nèti èèna ka, ladhe dhèu rai-haha neo j'aj'i mola-mèci nèti sasala ra, hud'i dènge ku raa korban.^l

23 Ngaa dhu ja'a lole nèti j'ara bèi-baki èdhi dènge Paleo Manèngi-Mangaj'i, se'e se dhoka conto di, sèna ka èdhi bisa te'a mèu, era manèngi-mangaj'i Ama Lamatua dhu asli ètu sorga. Te ladhe kètu agama rupa dhui neo lasi asa d'ara Paleo èèna ho manèngi-mangaj'i mi Ama Lamatua, rèngu hud'i pamèu aa'i-aa'i ku pake raa badha korban. Era manèngi-mangaj'i Ama Lamatua ètu sorga kahèi hud'i mèu taruu-taruu. Te ngaa hud'i pake ku raa korban dhu kab'ua risi eele nèti raa badha. 24 Kama Luri Mola-Mèci dhu Kristus maso èèna, ètu boe d'ara Paleo Manèngi-Mangaj'i dhu dhèu rai-haha tao. Te Paleo dhu ètu rai-haha èèna, dhoka conto di nèti dhu asli. Te ngaa Kristus la'e unu Na asa sorga ho sarii èdhi ètu madha Ama Lamatua. 25 Uru èèna, kètu kapai risi agama hud'i maso ku la'e asa d'ara Kama Luri Mola-Mèci èèna ca tèu ca tèka, aa nèti dènge raa badha hia Ama Lamatua. Te ngaa Kristus aad'o sèmi èèna. Te Nèngu parluu maso dhoka ca tèka di, nèti dènge raa Nèngu unu Na. 26 Te ladhe tèu mai-tèu mai, hud'i Na maso sama sèmi kètu agama dhu uru sèra, sasoa na, Nèngu hud'i madhe ku pahari-pahari karèi nèti j'aj'aj'i rai-haha toke deo ne'e, sèna ka saku eele aa'i sasala nèti dhèu èci-èci. Te ngaa Na tao boe sèmi èèna. Te ropa d'ai lod'o na, Nèngu madhe j'aj'i korban dhoka ca tèka èèna di, ho core eele aa'i sasala dhu dhèu ad'u-ue. 27 Dhu lèke ka, dhèu rai-haha madhe dhoka ca tèka di. Èle èèna, nèngu hud'i la'e asa madha Ama Lamatua ho Ama Lamatua parisa ne. 28 Sèmi èèna kahèi Kristus. Nèngu madhe, aa saraka ngi'u Na ho j'aj'i korban ca tèka èèna ka. Aa bèli-camèd'a Na lèpa hari mai. Te ngaa Na mai uri heka sasala dhèu, lula Na tao pa'èle aa'i le sasab'a èèna. Te ngaa dhu Na uri, nuka pala mamuri hia mi dhèu aa'i-aa'i dhu sanao-maena mi Nèngu.^m