Ama Lamatua pake Kristus sèna ka pa'èki lii pajaji hiu dhu be'a risi nèti lii pajaji dhui
8
De lii padhai ja'a dhu kab'ua, sèmi ne'e ka: limuri ne, èdhi dènge le kètu kapai risi agama dhu be'a risi nèti uru sèra. Nèngu ne'e, nuka Yesus. Nèngu dhu madhèdi nèd'u paredha ètu sorga, ètu baboa g'ana Ama Lamatua dhu Dedha Risi Eele.a 2 Aa Na pakako sasab'a Na ètu era sabaj'a dhu asli ètu sorga. Era ne'e ne, pa'ue-ai Ama Lamatua mesa Na, nèti boe dhèu rai-haha.3 Kètu kapai risi agama tema nèti mèdha persembahan dènge korban hia Ama Lamatua. Nèti èèna ka, Yesus hud'i nèti korban kahèi. 4 Te ngaa Yesus pakako boe sasab'a Na ètu rai-haha. Lula ètu rai-haha ne, abhu le ama agama dhu hia mèdha persembahan dènge korban asa Ama Lamatua madhutu atora Musa. 5 Ra pakako sasab'a ra ètu d'ara Paleo Manèngi-Mangaj'i, dhu ca ropa dènge era sabaj'a dhu asli ètu sorga. Te lod'o Musa neo tao Paleo ne, Ama Lamatua pasanèd'e ne, peka na, “Sanèd'e paie-iie! Èu hud'i tao ku palèke mola-mola dènge rupa dhu Ja'a pad'elo dènge èu ètu kolo ledhe nèi!”b 6 Te ngaa sasab'a Yesus ne, kapai risi nèti ama agama rupa dhui aa'i-aa'i ra. Te limuri ne, Ama Lamatua pa'èki le lii pajaji dhu be'a risi, lula Na pake Yesus j'aj'i kalete kahèi, sèna ka dhèu rai-haha bisa padame dènge Ama Lamatua.
7 Uru èèna, Na pa'èki lii pajaji dènge Musa, ropa Na papuru atora sèra. Masi ka sèmi èèna, te ngaa dhèu rai-haha bisa boe mamuri mola-mèci madhutu atora ne. Nèti èèna ka, rèngu bisa boe pabe'a dènge Ama Lamatua. Nèti èèna ka, limuri ne, parluu abhu lii pajaji dhu be'a risi hari. 8 Te lod'o uru sèra, Ama Lamatua dhu kai le dhèu unu Na, lula rèngu sisu pahari-pahari atora Na. Ropa Na taha nare heka d'ara, hèia Na nasa, ka peka, aku Nèngu na,
“Nanene paie-iie, te Ja'a ne Lamatua!
Tatu Ja'a neo pa'èki hari lii pajaji hiu
dènge dhèu Isra'el sèra,
aa dènge suku Yahuda.
9 Lii pajaji dhu Ja'a neo pa'èki dènge rèngu èèna,
sama boe dènge lii pajaji uru èèna
dhu hia mi bèi-baki ra.
Te uru èèna, Ja'a kadhèi kacui-aai ra,
ho lere si kalua nèti rai Masir.
Te ngaa rèngu tao boe
madhutu ngaa dhu ra pajaji dènge Ja'a.
Nèti èèna ka, Ja'a pusi-pahae heka si.
10 Lii pajaji dhu èèna na Ja'a pa'èki dènge suku Isra'el,
isi na sèmi ne'e ka:
Pe Ja'a tao atora Ja'a ètu d'ara ngangee ra.
Pe Ja'a suri paredha Ja'a, ètu d'ara rèngu.
Hèia Ja'a j'aj'i Lamatua ra,
aa rèngu j'aj'i dhèu unu Ja'a.
11 Bèli-camèd'a rèngu parluu heka aj'a-nori angalai ra,
dènge a'ari ra, peka na,
‘Miu hud'i tadhe ku Lamatua!’
te rèngu aa'i-aa'i ra tadhe mèu Ja'a,
mulai nèti ana iiki-iiki toke d'ai kapai aae.
12 Lula Ja'a neo pad'elo rasa kasia Ja'a mi rèngu,
nèti èèna ka Ja'a pabhèlu eele sasala-sasigo ra aa'i-aa'i.”c
13 Lod'o Lamatua padhai lii nare, Na neo pa'èki lii pajaji hiu dènge ra, sasoa na, lii pajaji dhui pake heka. Nèbhu heka, na ele.