Melkisedek, kètu kapai risi agama, dedha risi nèti kètu agama Lewi dènge ana-èpu na
7
1-3 Uru èèna, Melkisedek j'aj'i dhèu aae kota Salem. Nèngu kahèi kètu agama nèti dhèu-dhèu dhu pahaha iisi mi Ama Lamatua dhu Dedha Risi Eele èèna. Ngara Melkisedek ne, sasoa na, “Dhèu Aae D'ara Mola”. Aa dhèu aae Salem, sasoa na, “Dhèu Aae Dame”. Èci sa re'a boe j'aj'aj'i Melkisedek ne nèti mia. Èci sa re'a boe kahèi ina dènge ama na, aa bèi-baki na. Abhu boe ca dhèu sa dhu re'a lod'o rara iisi na, aa lod'o mamadhe na. Dhèu re'a dhoka, nèngu dhèu aae kota Salem, aa kètu agama nèti Ama Lamatua. Te ngaa nèngu ne, nuka sèmi Ana Ama Lamatua, lula nèngu ama agama dhu pakako taruu sasab'a na kahèi.Ca tèka, pèri-pèri dhèu aae dènge sordad'u ra mai parame rèti mèdha-panyau angalai Abraham. Ka Abraham dènge angalai na lasi pamusu dènge dhèu aae se, toke Abraham segi si. Hèia mèdha-panyau nèti angalai na sèra, Abraham nèti aa'i hari. Ropa Abraham lèpa asa rai na, hèia Melkisedek kalua nèti kota Salem, ho la'e soru ne. Ka na hia Abraham berkat, peka na, “Hud'i laa Ama Lamatua dhu Dedha Risi Eele èèna, hia èu mèngi-nale.” Èle ka Abraham hia Melkisedek ca pala nèti canguru pala, nèti mèdha aa'i-aa'i dhu na parame nare hari sèra. Abraham pabagi hia ne, lula Melkisedek ne kètu agama nèti Ama Lamatua dhu Dedha Risi Eele.a
4 De pangee paie-iie Melkisedek ne! Abraham bagi hia ne ca pala nèti canguru pala, nèti mèdha aa'i-aa'i dhu be'a risi dhu na parame nare hari. De dhu lèke, nuka Melkisedek ne dhèu kapai. 5 Aa te ngaa lod'o sèra, Ama Lamatua ded'e mèka dhèu j'aj'i ama agama. Toke d'ai ku lod'o Lewi, ana-èpu èci nèti Abraham, heka Ama Lamatua ded'e ne dènge ana-èpu na, sèna ka j'aj'i ama agama hia mi ana-èpu Abraham aa'i-aa'i ra. Èle èèna ka, Ama Lamatua papuru atora Na dhu peka na, dhèu nèti suku Lewi dènge hak ho abhu ca pala nèti canguru pala nèti rui-j'aj'èra a'ari ra suku leo sèra ètu Isra'el.b 6 Te ngaa Melkisedek ne, ana-èpu boe nèti Lewi. Masi ka sèmi èèna, te ngaa Abraham bagi hia ne ca pala nèti canguru pala, lula na pangee, na, Melkisedek ne dhèu kapai. Lod'o èèna Abraham dhu sèmi nare le lii pajaji nèti Ama Lamatua ho hia ne berkat. Masi ka sèmi èèna, te ngaa Melkisedek peka kahèi, na, “Hud'i laa Ama Lamatua dhu Dedha Risi Eele èèna, hia èu mèngi-nale.” 7 Ne'e ne ka j'aj'i mi tadha, na, Melkisedek ne, dhèu kapai. Lula dhèu dhu hia berkat tatu kapai risi nèti dhèu dhu sèmi nare berkat.
8 Ama agama aa'i-aa'i ra dènge hak abhu ca pala nèti canguru pala. Te ngaa, lula rèngu dhèu rai-haha biasa, nèbhu-nèbhu ra madhe kahèi. Kètu agama Melkisedek abhu kahèi ca pala nèti canguru pala. Te ngaa na mamuri taruu, lula Sasuri Mola-Mèci Lamatua peka boe na, nèngu madhe. 9-10 Lula Abraham bagi hia Melkisedek ca pala nèti canguru pala nèti mèdha na sèra, dhèu bisa pangee, na, Abraham tago nare kahèi ana-èpu na dhu rara iisi mèka. Dènge j'ara sèmi èèna, èdhi bisa pangee, na, nèngu b'ae mema le unu ana-èpu na Lewi, ca pala nèti canguru pala.c
Èdhi parluu kètu agama rupa hiu, lula kètu agama rupa dhui bisa boe saku eele sasala dhèu
11 Lod'o ana-èpu Lewi sèra j'aj'i ama agama, Lamatua pili nare Harun, a'a Musa, ho j'aj'i kètu kapai risi agama dhu partama. Sasab'a nèti ama agama sèra, nuka soru-bara dhèu, sèna ka mamuri mola, pabe'a dènge Ama Lamatua. Masi ka rèngu mamuri madhutu atora agama aa'i-aa'i sèra, te ngaa kètu agama ca ropa dènge Harun, lake nare boe tao dhèu se mola-mèci. Nèti èèna ka, rèngu parluu kètu agama leo, dhu ca ropa dènge Melkisedek. 12 Te ngaa ladhe kètu agama rupa hiu gati eele kètu agama rupa dhui, tatu atora dhui hud'i gati eele kahèi.
13 De te'a mèu le, kètu agama rupa hiu èèna, nuka Yesus. Te rara iisi Ne, nèti boe suku Lewi, te ngaa nèti suku leo. Madhutu atora Musa, kètu agama ca ropa dènge Harun, dhoka mai nèti suku Lewi di, bisa boe nèti suku leo. 14 Te ngaa dhèu aa'i-aa'i dhu re'a, na, Kètu èdhi, Yesus Kristus, j'aj'i nèti suku Yahuda. Madhutu atora Musa, abhu mèka dhu j'aj'i kètu agama nèti suku ne'e.
15 Te ngaa Ama Lamatua pake heka atora dhui, lula abhu le Yesus dhu j'aj'i kètu agama rupa hiu, nuka sèmi Melkisedek. 16 Te madhutu atora Musa, kètu agama rupa dhui hud'i mai ku nèti suku Lewi. Te ngaa Yesus mai boe nèti suku èèna. Masi ka sèmi èèna, te ngaa Ama Lamatua ded'e Ne, sèna ka j'aj'i kètu agama rupa hiu, lula Nèngu dènge koasa ho mamuri toke d'ai mia-mia, aa abhu boe dhu bisa palaho Ne. 17 Te Sasuri Lamatua suri, peka na,
“Èu j'aj'i kètu agama ca ropa dènge Melkisedek, dhu uru èèna,
te ngaa Èu j'aj'i kètu agama toke d'ai mia-mia.”d
18 Sasoa na, atora dhui dènge boe koasa, sèna ka soru-bara dhèu rai-haha. Nèti èèna ka, Ama Lamatua pake heka atora dhui, dhu uru èèna Na pangèd'u mi Musa. 19 Te masi ka dhèu mamuri madhutu atora dhui sèra, te ngaa sasala ra era. Nèti èèna ka, limuri ne, Ama Lamatua bhoke le j'ara dhu be'a risi, ho èdhi bisa mamuri padame dènge Ne.
Yesus ne Kètu Agama dhu kapai risi nèti kètu agama rupa dhui sèra aa'i-aa'i
20-21 Uru èèna, lod'o Ama Lamatua ded'e ana-èpu Lewi ho j'aj'i ama agama, Lamatua pajaji boe, aa subha boe ngaa-ngaa dènge rèngu. Te ngaa lod'o Ama Lamatua ded'e Yesus j'aj'i kètu agama, Na pajaji, peka na,
“Ja'a ne, Lamatua!
Ja'a subha, Ja'a ub'a boe ngaa-ngaa dhu Ja'a pajaji le.
Ja'a ded'e Èu j'aj'i kètu agama,
sèna ka Èu pakako taruu sasab'a-la'a Mu.”e
22 Dènge lii pajaji sèmi èèna, Ama Lamatua pake Yesus j'aj'i mi tate'a hia èdhi, dhu peka na, Nèngu neo pa'èki lii pajaji dhu be'a risi dènge èdhi.
23 Uru èèna, kètu agama rupa dhui gati taruu, lula ra madhe. Nèti èèna ka, hud'i abhu ku kètu agama ae-ae. 24 Te ngaa Yesus, kètu agama rupa hiu dhu mamuri taa-taa, aa Na loe boe pakako sasab'a-la'a Na. Nèti èèna ka, parluu boe dhèu gati Ne. 25 Nèti èèna ka, Yesus bisa hia mamuri mi dhèu aa'i-aa'i dhu neo mai re Nèngu asa madha Ama Lamatua. Nèngu bisa tao sèmi èèna, toke d'ai mia-mia la'e. Aa Nèngu j'aj'i dhèu d'ara, dhu loe boe manèngi Ama Lamatua ho soru-bara rèngu.
26 Yesus kètu kapai risi agama dhu lalau-lalo'o èdhi. Te Nèngu ne, Dhèu mola-mèci dhu dènge boe sasala ngaa-ngaa. Nèngu ne, sama boe dènge dhèu rai-haha biasa, dhu re'a dhoka ad'u-ue sasala di. Te Ama Lamatua dhu nedhe Ne padedha-dedha, risi nèti aa'i-aa'i dhu ètu sorga dènge rai-haha. 27 Nèti èèna ka, Yesus be'a risi nèti kètu agama rupa dhui aa'i-aa'i ra. Uru sèra, rèngu bèli-bèli hud'i roro badha tao korban, sèna ka Ama Lamatua saku eele sasala-sasigo rèngu unu ra. Èle ku, heka ra tao korban hia dhèu biasa kèna. Te ngaa Yesus parluu boe tao korban pahari-pahari sèmi èèna, lula Na saraka ngi'u Na ca tèka èèna ka di, sèna ka j'aj'i korban. Ne'e ne d'ai aa'i kèna, ho Lamatua saku eele sasala-sasigo dhèu aa'i-aa'i ra.f
28 Madhutu atora Musa, rèngu ded'e dhèu rai-haha biasa ho j'aj'i kètu kapai risi agama. Te ngaa sasala ra era. Nèti èèna ka, Ama Lamatua tao lii pajaji hiu, peka na, Nèngu ded'e Ana Na j'aj'i kètu kapai risi agama. Te Ana Na, madhutu taruu dad'èi Na.