6
De miu hud'i aj'a paie-iie ku a'aj'a dhu carui risi, lula miu dhu aj'a nèbhu ae le a'aj'a dhu carui mèka lula-nèti Kristus. Nèti èèna ka limuri ne, baku dhoka aj'a pahari-pahari a'aj'a dhu carui mèka sèra, nuka sèmi: dhèu hud'i tèke eele ku sasala rèngu aa'i-aa'i; a'aj'a lula-nèti dhèu hud'i parcaya ku Ama Lamatua; 2 a'aj'a lula-nèti sarani; a'aj'a lula-nèti bane ai mi dhèu sèna ka dhèu èèna sèmi nare Roh Lamatua dhu Mola-Mèci; a'aj'a lula-nèti Ama Lamatua pamamuri hari dhèu nèti mamadhe ra; aa a'aj'a dhu èèna na dhèu lasi asa katanga madha Lamatua, ho sèmi rare lii pama'ète, dhu peka na, cee ka dhu bisa mamuri taa-taa dènge Ne, aa cee ka dhu bisa boe. 3 Te ngaa ladhe Lamatua hia ijin, na, èdhi j'aj'i heka ana iiki dhu te'a dhoka tinu susu di. Te ja'a neo aj'a j'ara-j'ara dhu carui risi hari.4-6 Aa te ngaa, abhu le dhèu dhu re'a mèu lii a'aj'a Kristus, aa dhu rasa le d'ara hua iia Lamatua kahèi, toke Na hia si Roh Na dhu Mola-Mèci. Rèngu re'a le Lii Holo-Nori Lamatua, aa rasa le koasa Na dhu Na neo pake lod'o èle rai-haha ne. Masi ka sèmi èèna, te ngaa dhèu se tèke eele le parcaya ra, aa ra soro kabodho mi Kristus. Nèti èèna ka, bisa heka abhu j'ara ho rèngu bisa lèpa hari manèngi abho, sèna ka mamuri pabe'a hari dènge Ama Lamatua. Te ladhe dhèu ro'o boe ele-ho'a, èèna sama sèmi rèngu ka dhu paku pamadhe hari Ana Ama Lamatua ètu aj'u palolo-palèbha, hèia ra nyanyèi Ne ètu madha dhèu ae-ae.
7 Dhèu sèmi sèra, èci èèna ka dènge rai dhu hèu mèngi boe, nèti èèna ka abhu boe hua-hela dhu be'a. Te ngaa ladhe abhu ka èj'i, rai dhu hèu mèngi bisa hia hua-hela dhu dènge guna mi lamatua oka. Hèia Ama Lamatua papuru mamèngi-nale, sèna ka hua-hela nèti rai ne asa tabha ae. 8 Te ngaa dhèu dhu soro kabodho mi Kristus, nuka sèmi rai dhu pènu dènge dhudhu dènge sete di. Aa dhudhu-sete se guna boe mi ngaa-ngaa èci sa. Nèbhu boe, Ama Lamatua mai ho huku rai èèna. Hèia Na labhu pakèpu aa'i dhudhu dènge sete se, dhu gaguna ra aad'o.a
9 A'ari pasue! Masi ka ja'a ako padhai lii bia ciki, te ngaa ja'a ke'a kahèi, na, miu rai eele boe Kristus. Te miu parcaya Ne kahèi, aa mamuri miu kahèi abhu hua-hela dhu be'a. 10 De sanèd'e, te d'ara Ama Lamatua mola, aa Na bhèlu boe èi kabhèsu miu. Te miu sab'a bia le, sèna ka soru-bara dhèu unu Na sèra, aa mi sue si. Mema karèi nèti uru ka, miu pakako le sasab'a Na. Aa miu pakako taruu sasab'a Na era. 11 Te limuri ne, ja'a d'èi ladhe miu sab'a èra risi hari, sèna ka tao madhutu taruu toke pa'èle. Dènge sèmi èèna, miu bèli-camèd'a sèmi mere babe'a aa'i-aa'i dhu miu sanao nèti Ama Lamatua. 12 Sad'i miu baku bai-eed'a! Miu hud'i laladhe nèti dhèu dhu parcaya nèbhu le mi Ama Lamatua. Te rèngu tino sanao-maena mi Nèngu, toke ra sèmi rare aa'i dhu Lamatua pajaji le.
13-16 Conto nuka sèmi Abraham. Uru èèna, Ama Lamatua pa'èki lii pajaji dènge ne pake lii subha. Ladhe dhèu rai-haha ded'e subha, nèngu tema pake kolongara Ama Lamatua, sèna ka Lamatua j'aj'i sakasii na, lula Lamatua risi nèti nèngu. Aa ladhe paraga dènge lii langu, dhèu aa'i-aa'i re'a, na, lii dhu dhèu ne peka èèna lèke tare'a, lula na subha pake kolongara Ama Lamatua. Èèna mema j'ara dhèu rai-haha kèna. Te ngaa lod'o Ama Lamatua ded'e subha dènge Abraham, Lamatua pake kolongara Nèngu unu Na, lula abhu boe dhu risi nèti Nèngu. Na jaji, peka na,
“Èèna na, Ja'a hia mèngi-nale ae-ae,
mi èu dènge ana-èpu mu,
Bèli-camèd'a rèngu bèba-kacanga,
toke dhèu bisa boe ige rare si.”b
Ama Lamatua padadha nare sèmi èèna, hèia Abraham parcaya, aa sanao-maena taruu mi Lamatua, masi ka d'ai nèbhu ae ku, heka sèmi nare ngaa dhu Lamatua pajaji sèra. 17 Dènge j'ara ne, èdhi te'a, ladhe Lamatua pa'èki lii pajaji dènge dhèu unu Na, Nèngu pa'èki lii pajaji ne pake subha, ho j'aj'i mi tate'a, ngaa dhu Na moa èèna, mema lèke aa ub'a boe. 18 Te abhu dua j'ara dhu bisa boe ub'a. Ka èci, nuka lii pajaji Ama Lamatua. Aa èci hari, nuka lii subha Lamatua, dhu Na pake j'aj'i mi tate'a nèti lii pajaji Na. De ladhe Ama Lamatua dhu moa le j'ara èci, tatu Na tao madhutu, lula Nèngu bisa boe omo koso. Nèti èèna ka, èdhi baku pangee rupa-rupa dènge lii pajaji Na. Èdhi dhu rai lati le, sèna ka tenge mamuri nèti Nèngu, de limuri ne, èdhi dhoka mate di, ho sanao dhoka mi Nèngu di. 19 Dènge j'ara ne'e, d'ara èdhi taleo nuka sèmi koha dhu rai eele nèti d'ara rii, ho la'e panahu ètu hèb'a-namo. Te era maena èdhi dhoka Kristus di, dhu j'aj'i le kètu kapai risi agama èdhi. Uru èèna, lèke dènge lod'o kalela dhèu Yahudi, kètu kapai risi agama rèngu maso asa Kama Luri Mola-Mèci re bèla gorden, sèna ka paraga dènge Ama Lamatua ètu èèna.c 20 Te ngaa limuri ne, Yesus dhu la'e uuru le, ho bhoke j'ara hia èdhi. Te Nèngu kètu kapai risi agama kahèi, dhu ca ropa dènge Melkisedek, dhu uru èèna. Te ngaa Yesus kapai risi nèti kètu agama uru èèna, lula Na ae nèdhi boe pakako sasab'a-la'a Na.d